የዓመፁ ጀማሪዎች ይገዙ

እንግዲህ እናንተ የዚህን ዓመፅ መሠረት የጣላችሁ፥ ለሽማግሌዎች ተገዙ፤ የልባችሁንም ጕልበት አጎንብሳችሁ ንስሐ እስክትገቡ ድረስ ተግሣጽን ተቀበሉ። የምላሳችሁን የትዕቢትና የኵራት ራስን መተማመን አስወግዳችሁ መገዛትን ተማሩ። ከፍ ከፍ ብላችሁ ከሕዝቡ ተስፋ ከምትጣሉ ይልቅ በክርስቶስ መንጋ ውስጥ ዝቅተኛ ነገር ግን የተከበረ ስፍራ ቢኖራችሁ ይሻላችኋልና። በጎነት ሁሉ ያላት ጥበብ እንዲህ ትላለችና፦ «እነሆ፥ የመንፈሴን ቃል አወጣላችኋለሁ፤ ንግግሬንም አስተምራችኋለሁ። ጠራሁ፥ እናንተም አልሰማችሁም፤ ቃሎቼን ዘረጋሁ፥ እናንተም አላስተዋላችሁም፤ ምክሬን ሁሉ ናቃችሁ፥ ለተግሣጼም አልታዘዛችሁም፤ ስለዚህ እኔ ደግሞ በጥፋታችሁ እስቃለሁ፤ አዎን፥ ጥፋት በመጣባችሁ ጊዜ፥ ድንገተኛ ድንጋጤም ባገኛችሁ ጊዜ፥ መገልበጥም እንደ ዐውሎ ነፋስ በቀረበ ጊዜ፥ ወይም መከራና ጭንቀት በወደቀባችሁ ጊዜ ደስ ይለኛል። በጠራችሁኝም ጊዜ አልሰማችሁም፤ ክፉዎች ይፈልጉኛል፥ አያገኙኝምም። ጥበብን ጠልተዋልና፥ እግዚአብሔርን መፍራትም አልመረጡምና፤ ምክሬንም አልሰሙም፥ ተግሣጼንም ናቁ። ስለዚህ የመንገዳቸውን ፍሬ ይበላሉ፤ ከገዛ ኃጢአታቸውም ይጠግባሉ።» …