እርስ በርሳችን እንመካከር እንገሥጽም

እንግዲህ በማናቸውም ኃጢአት ለወደቁት፥ ለእኛ ሳይሆን ለእግዚአብሔር ፈቃድ ይገዙ ዘንድ የዋህነትና ትሕትና እንዲሰጣቸው ደግሞ እንጸልይ። በዚህም መንገድ በእግዚአብሔር ፊት በምናቀርበው ጸሎታችንም ለቅዱሳንም በምናነሣቸው ጊዜ ከእኛ ዘንድ በርኅራኄ ፍሬያማና ፍጹም የሆነ መታሰቢያ ያገኛሉ። ወዳጆች ሆይ፥ ተግሣጽን እንቀበል፤ ስለ እርሱም ማንም ሊከፋው አይገባም። እርስ በርሳችን የምንመካከርበት ምክር [በራሱ] መልካም ነው፤ እጅግም ይጠቅማል፤ ከእግዚአብሔር ፈቃድ ጋር አንድ ያደርገናልና። ቅዱሱ ቃል እንዲህ ይላልና፦ «እግዚአብሔር እጅግ ቀጣኝ፥ ለሞት ግን አልሰጠኝም።» «ጌታ የሚወደውን ይቀጣዋልና፥ የሚቀበለውንም ልጅ ሁሉ ይገርፈዋል።» «ጻድቅ» ይላል፥ «በምሕረት ይቀጣኛል፥ ይገሥጸኛልም፤ የኃጢአተኞች ዘይት ግን ራሴን አያለስልሰው።» ደግሞም እንዲህ ይላል፦ «ሁሉን የሚችል አምላክ የሚገሥጸው ሰው ብፁዕ ነው፤ አንተም የእርሱን ተግሣጽ አትናቅ። እርሱ ያሳዝናል፥ ደግሞም [ወደ ደስታ] ይመልሳል፤ ያቈስላል፥ እጆቹም ይፈውሳሉ። ከስድስት መከራ ያድንሃል፤ በሰባተኛውም ክፉ ነገር አይነካህም። በራብ ጊዜ ከሞት ያድንሃል፤ በጦርነትም ጊዜ ከሰይፍ ኃይል ይታደግሃል። ከምላስ ጅራፍ ይሰውርሃል፤ ክፉ ነገርም በመጣ ጊዜ አትፈራም። በዓመፀኞችና በክፉዎች ላይ ትስቃለህ፤ የምድርንም አራዊት አትፈራም። የዱር አራዊት ከአንተ ጋር በሰላም ይኖራሉና፤ ያን ጊዜም ቤትህ በሰላም እንደሚኖር ታውቃለህ፤ የድንኳንህም ማደሪያ አይጐድልም። ዘርህም እንደሚበዛ፥ ልጆችህም እንደ ምድር ሣር እንደሚሆኑ ታውቃለህ። በጊዜው እንደሚታጨድ እንደ በሰለ እህል፥ ወይም በወቅቱ እንደሚሰበሰብ የአውድማ ክምር ወደ መቃብር ትመጣለህ።» ወዳጆች ሆይ፥ በጌታ ለሚቀጡት ጥበቃ እንደሚደረግላቸው ታያላችሁ፤ እግዚአብሔር ቸር ነውና በቅዱስ ቅጣቱ እንድንመከር ይቀጣናል።