በፍቅር ለመገኘት የተገባን እንድንሆን እንጸልይ

ወዳጆች ሆይ፥ ፍቅር እንዴት ታላቅና ድንቅ ነገር እንደ ሆነ፥ ፍጽምናውም ሊነገር እንደማይቻል ታያላችሁ። እግዚአብሔር እንዲህ እንዲሆኑ ካልፈቀደላቸው በቀር በእርሱ ሆኖ ለመገኘት የሚበቃ ማን ነው? እንግዲህ አንዱን ከሌላው ከማስበለጥ ሰዋዊ አድልዎ ሁሉ ርቀን በፍቅር ያለ ነቀፋ እንድንኖር እንጸልይ፤ ምሕረቱንም እንለምን። ከአዳም ጀምሮ እስከ ዛሬ ድረስ ያሉት ትውልዶች ሁሉ አልፈዋል፤ ነገር ግን በእግዚአብሔር ጸጋ በፍቅር ፍጹማን የሆኑት አሁን እግዚአብሔርን ከሚያመልኩት ጋር ስፍራ አላቸው፤ በክርስቶስም መንግሥት መገለጥ ይገለጣሉ። እንዲህ ተብሎ ተጽፎአልና፦ «ቍጣዬና መዓቴ እስኪያልፍ ድረስ ለጥቂት ጊዜ ወደ እልፍኝህ ግባ፤ መልካሚቱንም ቀን አስባለሁ፥ ከመቃብራችሁም አስነሣችኋለሁ።» ወዳጆች ሆይ፥ በፍቅር ኃጢአታችን ይቅር ይባልልን ዘንድ የእግዚአብሔርን ትእዛዛት በፍቅር ስምምነት ብንጠብቅ ብፁዓን ነን። እንዲህ ተብሎ ተጽፎአልና፦ «ዓመፃቸው የተሰረየላቸው ኃጢአታቸውም የተከደነላቸው ብፁዓን ናቸው፤ ጌታ ኃጢአቱን የማይቆጥርበት፥ በአፉም ተንኰል የሌለበት ሰው ብፁዕ ነው።» ይህ ብፅዕና በጌታችን በኢየሱስ ክርስቶስ በኩል በእግዚአብሔር ለተመረጡት ይደርሳል፤ ለእርሱ ከዘላለም እስከ ዘላለም ክብር ይሁን፤ አሜን።