በቅርብ ዘመናትም ከዚያው ምንጭ ያላነሱ ክፋቶች ተነሥተዋል

ነገር ግን በጥንቶቹ ምሳሌዎች ላይ ሳንቆይ፣ ወደ ቅርብ ዘመን መንፈሳውያን ጀግኖች እንምጣ። በራሳችን ትውልድ የተሰጡንን ክቡራን ምሳሌዎች እንውሰድ። ከቅናትና ከምቀኝነት የተነሣ ታላላቆቹና እጅግ ጻድቃን የሆኑት [የቤተ ክርስቲያን] አዕማድ ተሰደዱ፤ ተገደሉም። የከበሩትን ሐዋርያት በዓይናችን ፊት እናድርግ። ጴጥሮስ ከዓመፀኛ ቅናት የተነሣ አንድ ወይም ሁለት ሳይሆን እጅግ ብዙ መከራዎችን ታገሠ፤ በመጨረሻም ሰማዕት ሆኖ ወደሚገባው የክብር ስፍራ ሄደ። ከቅናት የተነሣ ጳውሎስም ሰባት ጊዜ ታስሮ፣ ለመሸሽ ተገድዶ፣ በድንጋይም ተወግሮ የትዕግሥትን ዋጋ አገኘ። በምሥራቅም በምዕራብም ከሰበከ በኋላ ለእምነቱ የሚገባውን የከበረ ዝና አገኘ፤ ለዓለም ሁሉ ጽድቅን አስተምሮ እስከ ምዕራብ ዳርቻ ደርሶ በገዢዎች ፊት በሰማዕትነት ሞተ። እንዲሁ ከዓለም ተለይቶ ወደ ቅዱሱ ስፍራ ሄደ፤ ለትዕግሥትም ግሩም ምሳሌ ሆኖ ተገኘ።