ጻድቃንን ማስጨነቅ የክፉዎች ሥራ ነው

ወንድሞች ሆይ፥ ክርክርን ትወዳላችሁ፤ ለመዳንም በማይጠቅሙ ነገሮች ቅንዓት ተሞልታችኋል። የመንፈስ ቅዱስ እውነተኛ ቃል የሆኑትን መጻሕፍት አጥብቃችሁ መርምሩ። በእነርሱ ውስጥ ዓመፃ ያለበት ወይም የተጭበረበረ ምንም ነገር እንዳልተጻፈ አስተውሉ። በዚያ ጻድቃን ራሳቸው ቅዱሳን በሆኑ ሰዎች እንደ ተጣሉ አታገኙም። ጻድቃን በእርግጥ ተሰደዱ፤ ነገር ግን በክፉዎች ብቻ ነው። ወደ ወኅኒ ተጣሉ፤ ነገር ግን ቅድስና በሌላቸው ብቻ ነው፤ በድንጋይ ተወገሩ፤ ነገር ግን በሕግ ተላላፊዎች ብቻ ነው፤ ተገደሉ፤ ነገር ግን በርጉማን ብቻ ነው፥ በእነርሱም ላይ የዓመፅ ቅንዓት ባደረባቸው ሰዎች ብቻ ነው። እንዲህ ያለውን መከራ በተቀበሉ ጊዜ በክብር ታገሡ። ወንድሞች ሆይ፥ እንግዲህ ምን እንላለን? ዳንኤል ወደ አንበሶች ጕድጓድ የተጣለው እግዚአብሔርን በሚፈሩ ሰዎች ነውን? አናንያ፥ አዛርያና ሚሳኤልስ በእሳት እቶን ውስጥ የተዘጉት ታላቁንና የከበረውን የልዑልን አምልኮ በሚጠብቁ ሰዎች ነውን? እንዲህ ያለው ሐሳብ ከእኛ ይራቅ! እንግዲያስ ይህን ያደረጉ እነማን ነበሩ? የተጠሉትና ክፋት ሁሉ የሞላባቸው ሰዎች እጅግ ተቈጥተው እግዚአብሔርን በቅዱስና ነቀፋ በሌለበት [የልብ] ዓላማ ያገለገሉትን አሠቃዩ፤ ልዑል በንጹሕ ሕሊና እጅግ የከበረውን ስሙን ለሚያከብሩ ሁሉ ተከላካይና ጠባቂ እንደ ሆነ አላወቁምና፤ ለእርሱ ከዘላለም እስከ ዘላለም ክብር ይሁን፤ አሜን። ነገር ግን [ይህን] በድፍረት የታገሡት አሁን የክብርና የምስጋና ወራሾች ሆነዋል፤ በእግዚአብሔርም ከፍ ከፍ ብለው በመታሰቢያቸው ለዘላለም ዓለም ከብረዋል። አሜን።