በረከቶች ሁሉ በክርስቶስ በኩል ተሰጥተውናል

ወዳጆች ሆይ፥ መድኃኒታችንን፣ የመባዎቻችን ሁሉ ሊቀ ካህናት፣ የድካማችንም ጠበቃና ረዳት የሆነውን ኢየሱስ ክርስቶስን የምናገኝበት መንገድ ይህ ነው። በእርሱ ወደ ሰማያት ከፍታ ቀና ብለን እንመለከታለን። በእርሱ እንከን የሌለበትንና እጅግ የከበረውን ፊቱን እንደ መስተዋት እናያለን። በእርሱ የልባችን ዓይኖች ተከፈቱ። በእርሱ ሰነፉና የጨለመው አእምሮአችን ወደሚደነቅ ብርሃኑ እንደ ገና ያብባል። በእርሱ ጌታ የማይሞተውን እውቀት እንድንቀምስ ወደደ፤ «እርሱም የግርማው መንጸባረቅ ሆኖ፥ ከመላእክት ይልቅ እጅግ የሚበልጥ ስምን በወረሰ መጠን እንዲሁ ከእነርሱ አብዝቶ ይበልጣል።» እንዲህ ተብሎ ተጽፎአልና፦ «መላእክቱን መናፍስት አገልጋዮቹንም የእሳት ነበልባል የሚያደርግ።» ስለ ልጁ ግን ጌታ እንዲህ አለ፦ «አንተ ልጄ ነህ፥ እኔ ዛሬ ወልጄሃለሁ። ለምነኝ፥ አሕዛብን ለርስትህ፥ የምድርንም ዳርቻ ለግዛትህ እሰጥሃለሁ።» ደግሞም፦ «ጠላቶችህን የእግርህ መረገጫ እስካደርግልህ ድረስ በቀኜ ተቀመጥ» ይለዋል። ጠላቶቹ ግን እነማን ናቸው? ክፉዎች ሁሉ፣ የእግዚአብሔርንም ፈቃድ ለመቃወም የተነሡ ናቸው።