ይህ ዋጋ እጅግ ታላቅ ነው

ወዳጆች ሆይ፥ የእግዚአብሔር ስጦታዎች እንዴት የተባረኩና ድንቅ ናቸው! ሕይወት በአለመሞት፣ ክብር በጽድቅ፣ እውነት በፍጹም ድፍረት፣ እምነት በመተማመን፣ ራስን መግዛት በቅድስና! እነዚህም ሁሉ [አሁን] በማስተዋላችን ይታወቃሉ፤ እንግዲህ እርሱን ለሚጠብቁት የተዘጋጁት ነገሮች ምን ይሆኑ ይሆን? የዓለማት ሁሉ ፈጣሪና አባት፣ ቅዱሰ ቅዱሳን፣ ብዛታቸውንና ውበታቸውን እርሱ ብቻ ያውቃል። ስለዚህ ተስፋ ከሰጣቸው ስጦታዎች እንድንካፈል እርሱን ከሚጠብቁት ቍጥር እንገኝ ዘንድ አጥብቀን እንጣጣር። ወዳጆች ሆይ፥ ይህ ግን እንዴት ይሆናል? አሳባችን በእምነት ወደ እግዚአብሔር ቢጸና፤ ደስ የሚያሰኘውንና የሚወደውን አጥብቀን ብንፈልግ፤ ነውር ከሌለው ፈቃዱ ጋር የሚስማማውን ብናደርግ፤ የእውነትንም መንገድ ብንከተል፥ ዓመፃንና በደልን ሁሉ፣ ከእነርሱም ጋር መጐምጀትን፣ ክርክርን፣ ክፉ ተግባርን፣ ተንኰልን፣ ሹክሹክታንና ሐሜትን፣ እግዚአብሔርን መጥላትን ሁሉ፣ ትዕቢትንና ኩራትን፣ ከንቱ ውዳሴንና የሥልጣን ጥማትን ከእኛ ብንጥል ነው። እንዲህ ያሉትን የሚያደርጉ በእግዚአብሔር ዘንድ የተጠሉ ናቸውና፤ የሚያደርጓቸውም ብቻ ሳይሆኑ በሚያደርጓቸው ደስ የሚሰኙትም ጭምር። መጽሐፍ እንዲህ ይላልና፦ «እግዚአብሔር ግን ኃጢአተኛውን አለው፦ ሥርዓቴን ስለ ምን ትናገራለህ? ኪዳኔንስ በአፍህ ስለ ምን ትወስዳለህ? አንተ ተግሣጽን ጠልተሃል፥ ቃሌንም ወደ ኋላህ ጥለሃል። ሌባን ባየህ ጊዜ ከእርሱ ጋር ተስማማህ፥ እድል ፈንታህንም ከአመንዝሮች ጋር አደረግህ። አፍህ ክፋትን አበዛ፥ ምላስህም ተንኰልን ጐነጐነ። ተቀምጠህ በወንድምህ ላይ ትናገራለህ፤ የእናትህንም ልጅ ታማለህ። ይህን አደረግህ፥ እኔም ዝም አልሁ፤ አንተ ክፉ ሆይ፥ እንደ አንተ የምሆን መሰለህ። ነገር ግን እዘልፍሃለሁ፥ ራስህንም በፊትህ አቆማለሁ። እግዚአብሔርን የምትረሱ እናንተ፥ እንደ አንበሳ እንዳይነጥቃችሁ የሚያድንም እንዳይኖር ይህን አስተውሉ። የምስጋና መሥዋዕት ያከብረኛል፤ የእግዚአብሔርንም ማዳን የማሳይበት መንገድ በዚያ አለ።»