ለቆሮንቶስ ሰዎች የቀረበው ምስጋና ቀጣይ

ደግሞም ሁላችሁ በትሕትና የታወቃችሁ ነበራችሁ፤ በምንም ረገድ በትዕቢት አልተነፋችሁም፤ መታዘዝን በግድ ከመጠየቅ ይልቅ ራሳችሁ ትታዘዙ ነበር፤ ከመቀበልም ይልቅ ለመስጠት ትወዱ ነበር። እግዚአብሔር ባዘጋጀላችሁ ስንቅ ረክታችሁ፣ ቃሎቹንም በጥንቃቄ እያደመጣችሁ በትምህርቱ በውስጣችሁ ተሞልታችሁ ነበር፤ መከራውም በዓይናችሁ ፊት ነበረ። እንዲሁ ጥልቅና የበዛ ሰላም ለሁላችሁ ተሰጥቶአችሁ ነበር፤ መልካምን ለማድረግም የማይጠገብ ምኞት ነበራችሁ፤ የመንፈስ ቅዱስም ሙሉ መፍሰስ በሁላችሁ ላይ ነበረ። በቅዱስ አሳብ ተሞልታችሁ፣ በእውነተኛ የልብ ትጋትና እግዚአብሔርን በመምሰል በሚገኝ መተማመን፣ ሳታውቁ በአንዳች መተላለፍ በድላችሁ እንደ ሆነ ምሕረት እንዲያደርግላችሁ እየለመናችሁት እጃችሁን ሁሉን ወደሚችል ወደ እግዚአብሔር ትዘረጉ ነበር። የእግዚአብሔር ምርጦች ቍጥር በምሕረትና በበጎ ሕሊና ይድን ዘንድ ቀንና ሌሊት ስለ ወንድሞች ማኅበር ሁሉ ትጨነቁ ነበር። ቅኖችና ያልረከሳችሁ ነበራችሁ፤ እርስ በርሳችሁም በደልን ትረሱ ነበር። ማንኛውም ዓይነት ወገንተኝነትና መለያየት በፊታችሁ አስጸያፊ ነበር። በባልንጀሮቻችሁ መተላለፍ ታለቅሱ ነበር፤ ጕድለታቸውንም እንደ ራሳችሁ ጕድለት ትቈጥሩ ነበር። «ለበጎ ሥራ ሁሉ የተዘጋጃችሁ» ሆናችሁ ማንኛውንም የቸርነት ሥራ ከቶ አልነፈጋችሁም። ፍጹም በጎና ለእግዚአብሔር በተሰጠ ሕይወት ተውባችሁ ሁሉን በእግዚአብሔር ፍርሃት ታደርጉ ነበር። የጌታ ትእዛዛትና ሥርዓቶች በልባችሁ ጽላት ላይ ተጽፈው ነበር።