ሰላምታ

በሮሜ በእንግድነት የምትኖር የእግዚአብሔር ቤተ ክርስቲያን፣ በቆሮንቶስ በእንግድነት ለምትኖር ለእግዚአብሔር ቤተ ክርስቲያን፣ በጌታችን በኢየሱስ ክርስቶስ በኩል በእግዚአብሔር ፈቃድ ለተጠሩትና ለተቀደሱት፤ ሁሉን ከሚችል ከእግዚአብሔር በኢየሱስ ክርስቶስ በኩል ጸጋና ሰላም ይብዛላችሁ።

የተወደዳችሁ ወንድሞች ሆይ፥ በእኛ ላይ በድንገትና በተከታታይ ከደረሱብን መከራዎች የተነሣ፣ ስለ ጠየቃችሁን ጉዳዮች፣ በተለይም ደግሞ ጥቂት ችኩሎችና በራሳቸው የሚመኩ ሰዎች እስከ እብደት ድረስ ስላቀጣጠሉት፣ ለእግዚአብሔር ምርጦች ፈጽሞ ስለሚያስጸይፈው ስለዚያ አሳፋሪና አስጸያፊ ሁከት ትኩረታችንን ለማድረግ በመጠኑ እንደ ዘገየን ይሰማናል። በዚህም ሁከት ምክንያት በሁሉ ዘንድ ሊወደድ የሚገባው የተከበረውና የታወቀው ስማችሁ ክፉኛ ተጎድቶአል። ለመሆኑ ለጥቂት ጊዜ እንኳ በመካከላችሁ የኖረ፣ እምነታችሁ እንደ ጸና ሁሉ በበጎነትም ፍሬያማ መሆኑን ያላየ ማን ነው? በክርስቶስ ያለው እግዚአብሔርን የመምሰላችሁ ጭምትነትና ልከኝነት ያላስደነቀው ማን ነው? የዘወትር እንግዳ ተቀባይነታችሁን ታላቅነት ያላወራ ማን ነው? ፍጹምና በሚገባ በተመሠረተው እውቀታችሁስ ደስ ያላለው ማን ነው? ሁሉን ለሰው ፊት ሳታደሉ ታደርጉ ነበርና፤ በእግዚአብሔርም ትእዛዛት ትመላለሱ ነበር፤ ለሚመሩአችሁ ትታዘዙ፣ በመካከላችሁ ላሉት ሽማግሌዎችም የሚገባቸውን ክብር ሁሉ ትሰጡ ነበር። ጐበዞች ራሳቸውን የሚገዙና ጭምቶች እንዲሆኑ ታዝዙ ነበር፤ ሚስቶቻችሁ ሁሉን ነገር ያለ ነቀፋ፣ በሚገባና በንጹሕ ሕሊና እንዲያደርጉ፣ እንደሚገባቸውም ባሎቻቸውን እንዲወዱ ታስተምሩአቸው ነበር፤ በመታዘዝም ሥርዓት እየኖሩ የቤታቸውን ጉዳይ በአግባቡ እንዲያስተዳድሩና በሁሉም ረገድ በአስተዋይነት የታወቁ እንዲሆኑ አስተማራችኋቸው።