የትሕትና ምሳሌ የሆነው ክርስቶስ

ክርስቶስ የትሑታን ነውና፤ በመንጋው ላይ ራሳቸውን ከፍ ከፍ የሚያደርጉት አይደለም። የእግዚአብሔር ግርማ በትረ መንግሥት የሆነው ጌታችን ኢየሱስ ክርስቶስ ቢችልም እንኳ በትዕቢትና በኩራት ግርማ አልመጣም፤ ነገር ግን መንፈስ ቅዱስ ስለ እርሱ አስቀድሞ እንደ ተናገረ በትሕትና መጣ። እንዲህ ይላልና፦ «ጌታ ሆይ፥ ምስክርነታችንን ማን አመነ? የጌታስ ክንድ ለማን ተገለጠ? በፊቱ [መልእክታችንን] ተናገርን፤ እርሱ እንደ ሕፃን፥ በጥማት ምድርም እንዳለ ሥር ነው፤ መልክና ክብር የለውም፤ አየነው፥ መልክና ውበትም አልነበረውም፤ መልኩ ግን የተዋረደ፥ ከሰዎች [የተለመደ] መልክ ይልቅ ያነሰ ነበረ። እርሱ ለግርፋትና ለመከራ የተሰጠ፥ ኀዘንንም መታገሥ የሚያውቅ ሰው ነው፤ ፊቱ ተመልሶ ነበርና፤ የተናቀ ነበረ፥ አላከበርነውም። እርሱ በደላችንን ይሸከማል፥ ስለ እኛም ያዝናል፤ እኛ ግን [ስለ ራሱ] ለድካም፥ ለግርፋትና ለመከራ የተሰጠ መሰለን። እርሱ ግን ስለ መተላለፋችን ቈሰለ፥ ስለ በደላችንም ደቀቀ። የሰላማችን ተግሣጽ በእርሱ ላይ ነበረ፤ በመገረፉም ቍስል እኛ ተፈወስን። ሁላችን እንደ በጎች ተቅበዘበዝን፤ [እያንዳንዱ] ሰው በገዛ መንገዱ ሳተ፤ ጌታም ስለ ኃጢአታችን አሳልፎ ሰጠው፤ እርሱም በመከራው መካከል አፉን አይከፍትም። እንደ በግ ወደ መታረድ ተነዳ፥ የበግ ጠቦትም በሸላቹ ፊት ዝም እንደሚል፥ እንዲሁ አፉን አልከፈተም። በውርደቱ ፍርዱ ተወገደ፤ ትውልዱንስ ማን ይናገራል? ሕይወቱ ከምድር ተወግዳለችና። ስለ ሕዝቤ መተላለፍ ወደ ሞት ወረደ። ኃጢአተኞችን ስለ መቃብሩ፥ ባለ ጠጎችንም ስለ ሞቱ እሰጣለሁ፤ እርሱ ኃጢአት አላደረገም፥ ተንኰልም በአፉ አልተገኘበትምና። ጌታም በግርፋት ሊያነጻው ወደደ። ስለ ኃጢአት መሥዋዕት ብታቀርቡ ነፍሳችሁ ዕድሜው የረዘመ ዘርን ታያለች። ጌታም ከነፍሱ ጭንቀት ሊያሳርፈው፥ ብርሃንንም ሊያሳየው፥ በማስተዋልም ሊቀርጸው፥ ለብዙዎች መልካም የሚያገለግለውን ጻድቁን ሊያጸድቀው ወደደ፤ እርሱም ራሱ ኃጢአታቸውን ይሸከማል። ስለዚህ ብዙዎችን ይወርሳል፥ የብርቱዎችንም ምርኮ ይካፈላል፤ ነፍሱ ለሞት ተሰጥታለችና፥ ከዓመፀኞች ጋር ተቈጠረ፤ እርሱም የብዙዎችን ኃጢአት ተሸከመ፥ ስለ ኃጢአታቸውም ተሰጠ።» ደግሞም እንዲህ ይላል፦ «እኔ ግን ትል ነኝ፥ ሰውም አይደለሁም፤ የሰው መሰደቢያ የሕዝብም መናቂያ ነኝ። የሚያዩኝ ሁሉ ተሣለቁብኝ፤ በከንፈሮቻቸው ተናገሩ፥ ራሳቸውንም ነቀነቁ፤ [እንዲህ ሲሉ]፦ በእግዚአብሔር ተስፋ አደረገ፤ እርሱ ያድነው፥ ያውጣውም፤ ደስ ይለዋልና።» ወዳጆች ሆይ፥ የተሰጠን ምሳሌ ምን እንደ ሆነ ታያላችሁ፤ ጌታ እንዲህ ራሱን ካዋረደ፣ በእርሱ በኩል ወደ ጸጋው ቀንበር ሥር የገባን እኛ ምን እናድርግ?