ምዕራፍ 5 · 12 ደቂቃ ንባብ · 16 ደቂቃ ማዳመጥ
ቅጥሩን አልፈው
በጥቀርሻ መንገድ የገበያ ቀን በየሳምንቱ ሐሙስ ይውል ነበር፤ የታችኛው ሰፈር ለጥሩ ምክንያት የሚጮኽበት በሳምንቱ ውስጥ ያለ ብቸኛ ቀንም እርሱ ነበር።
ረፋዱ ላይ መንገዱ ከግድግዳ እስከ ግድግዳ ጢም ብሎ ይሞላ ነበር። ትናንሽና ደረቅ ፖም የጫኑ የእጅ ጋሪዎች ነበሩ፤ ያገለገሉ ጫማዎችን የሚሸጥ፣ ጫማዎቹ ግን በእርግጥ አንድ ጫማ ብቻ የሆኑበት አንድ ሰው ነበር፤ መጥፎ ወሬ የተነገራቸው የሚመስሉ ዶሮዎችን በጐጆ የያዘች አንዲት ሴትም ነበረች። መንኰራኵሩ የእሳት ፍንጣሪ የሚረጭ ቢላ ሳይ ነበር፣ ሦስት ክር ብቻ ያለው ማሲንቆ የሚጫወት ሰው ነበር፤ በጎኑ ላይ «የማኅበሩ ዘይት — አንድ መስፈሪያ በአንድ ሳንቲም — የነበልባሉ ምልክቶች፣ ሁለቱ በአንድ ሳንቲም፣ በፋናው የተባረኩ» የሚል ትንሽ ቀለም የተቀባ ጽሑፍ የተለጠፈበት የማኅበሩ የዘይት ጋሪም ነበር። ታሊስ የሚባለው ዘይት ሻጭ እንደ ዛገ በር የሚንጫጫ ድምፅ ነበረው፤ ብዙ ምልክቶችንም ይሸጥ ነበር፤ የታችኛው ሰፈር ሰዎች ጨለማን ይፈሩ ነበርና፣ ሁለቱ በአንድ ሳንቲም ደግሞ ለድፍረት ርካሽ ዋጋ ነው።
በዚህ ሁሉ መካከል ደግሞ በሩ ተከፍቶ፣ መስኮቱ በእንፋሎት ጭጋግ ለብሶ፣ የወይዘሮ ፌን ዳቦ ቤት ቆሞ ነበር።
የወይዘሮ ፌንን ዳቦ ቤት ሽታ ከቦዩ ድረስ ታሸተው ነበር። በጥቀርሻ መንገድ ውስጥ ያለ ብቸኛው ጥሩ ሽታ ነበር፤ በአጠገቡ የሚያልፉ ሰዎች ቁርስ ዓይነት ነገር ይመስል ቆም ብለው ዓይኖቻቸውን ጨፍነው ወደ ውስጥ ይስቡት ነበር። ለብዙዎቹ የሚያገኙት ብቸኛ ቁርስ ይኸው ነበር።
ሬንና ኔትል በደጃፉ ላይ ተቀምጠው ነበር፤ በገበያ ቀናት ሁልጊዜ የሚቀመጡት እዚያ ነበር፤ ወይዘሮ ፌን ይዋል ይደር እንጂ ሁልጊዜ ወደ ውጭ ትወጣ ነበርና።
«እንግዲህማ» አለች ወይዘሮ ፌን እየወጣች። ሰፊ፣ ለስላሳ፣ በዱቄት የተሸፈነች ሴት ነበረች፤ ክንዶቿ እንደ ትናንሽ ዳቦዎች፣ ፊቷም እንደ ሙሉ ዳቦ ክብና ደግ ነበር። በጸጉሯ ላይ ዱቄት፣ በሽርጧ ላይ ዱቄት ነበረ፤ በሆነ መንገድም በአፍንጫዋ ጫፍ ላይ ዱቄት ነበረ። «እንግዲህማ፣ እናንተ ሁለት ድንቢጦች። ፈላጊ ያጡ ቍርስራሾች እዚህ አሉኝ። ተቃጥለዋል፣ እንዳትረሱ። ልሸጣቸው አልችልም። ውለታ ትውሉልኛላችሁ።»
አልተቃጠሉም ነበር። መቼም ተቃጥለው አያውቁም። ሬን ይህን ታውቅ ነበር፤ ወይዘሮ ፌንም ሬን ይህን እንደምታውቅ ታውቅ ነበር፤ ከሁለቱም ማንም ይህን ተናግሮ አያውቅም።
«አመሰግናለሁ፣ ወይዘሮ ፌን» አለች ሬን፤ ተቀበለቻቸውም።
«አመሰግናለሁ፣ ወይዠሮ ፌን» አለች ኔትል።
«ይባርክሽ፣ ውዴ።» ወይዘሮ ፌን ወደ ሱቁ ውስጥ ለመጮኽ ዞር አለች። «ፒፕ! ሄቲ! ምድጃውን ተጠንቀቁ! ሳም፣ እኅትህን አውርዳት፣ የዱቄት ከረጢት አይደለችም— ሞሊ፣ ወንድምሽ የት ነው? ሕፃኑ የት ነው? ጄምን ማን ያዘው?»
«እኔ ጄምን ይዤዋለሁ፣ እማዬ!»
«እንግዲያው እንዳትጥለው!»
የፌን ልጆች አምስት ነበሩ፤ ሁልጊዜም በአንድ ጊዜ በየቦታው ይገኛሉ። ፒፕ አሥር ዓመቱ ነበር፤ ስለ ዳቦ በጣም ቍም ነገረኛ ነበር። ሄቲ ስምንት ዓመቷ ነበር፤ ቀኑን ሙሉ ትዘምር ነበር። ሳም ስድስት ዓመቱ ነበር፤ መሸከም የማይፈልጉ ነገሮችን፣ ለምሳሌ እኅቶቹን፣ መሸከም ይወድ ነበር። ሞሊ አራት ዓመቷ ነበር፤ ጄም ደግሞ ሕፃን ነበር፤ ሬንም አንዳንድ ጊዜ ይህ ዳቦ ቤት በኤምበርዊክ ውስጥ እጅግ ሞቃቱ ቦታ መሆን አለበት ብላ ታስብ ነበር።
ሬን ሁለተኛውን ቍርስራሽ ግማሽ እንደ በላች በደጃፉ ላይ ጥላ ወደቀ፤ ቀና ብላ አየችና አቃሰተች።
«እንደምን አደርሽ» አለ ቶቢን ሃሮውጌት።
ጸጉሩን ለማንጨባረር እንደ ሞከረ ያስታውቅ ነበር፤ ግን የቻለው በትንሹ ወደ ሌላ አቅጣጫ ማበጠር ብቻ ነበር። በነጭ የተልባ እግር ፎጣ የተጠቀለለ አንድ ነገር ይዞ ነበር። ሰዎች ፎጣውን አፍጥጠው ይመለከቱ ነበር። በጥቀርሻ መንገድ ውስጥ የምግብ ፎጣ የነበረው ሰው ከቶ አልነበረም።
«አሁንም አንተ» አለች ሬን። «ሄደህ የምትቀመጥበት አዳራሽ የለህም እንዴ?»
«ቋሊማዎቹን አምጥቻለሁ» አለ ቶቢን።
ፎጣውን ፈታ። ሁለት ወፍራም ቡናማ ቋሊማዎች ተኝተው ነበር፤ አሁንም ትንሽ ሞቅ ያሉ፣ የቁንዶ በርበሬ፣ የሽንኩርትና የብዙ ሥጋ መዓዛ ያላቸው። ኔትል መፍላት እንደ ጀመረ ማንቆርቆሪያ ያለ ትንሽ ድምፅ አሰማች።
ሬን ቋሊማዎቹን ለረጅም ጊዜ ተመለከተቻቸው። ከዚያም ቶቢንን ተመለከተችው።
«በእርግጥ አመጣሃቸው።»
«አምጣ ብለሽኝ ነበር። እውነተኛ፣ የኮረብታ፣ ሥጋ ያለበት፣ ለኔትልም አንድ። ከቁርስ ጠረጴዛው ላይ ነው ያነሣኋቸው። ችግር እንደሌለው ተስፋ አደርጋለሁ። በትክክል ለመናገር ስርቆት አይደለም፤ ምክንያቱም የአባቴ ቋሊማዎች ናቸው፣ እኔም ልጁ ነኝ፣ ስለዚህ በአንድ በኩል በከፊል የእኔ ናቸው፤ ደግሞም የራሴን ቁርስ አልበላሁም፤ ስለዚህ የቤቱ ሂሳብ ልክ እኩል ነው—»
«አምጣ» አለች ሬን።
ሰጣት። አንዱን ለኔትል ሰጠቻትና ሌላውን ነከሰች፤ ለአንድ አፍታም ዓለሙ በሙሉ ቋሊማ ብቻ ሆነ። በሕይወቷ ከቀመሰችው ሁሉ የሚበልጥ ነበር። ይህን ግን ከቶ አትናገርም ነበር።
«እንግዲህ» አለ ቶቢን በተስፋ። «ኮምፓሴስ?»
ሬን ዋጠች። «ያ» አለች፣ «ቀብድ ነበር።»
«ምን ነበር?»
«የመጀመሪያው ክፍያ። ቋሊማዎቹ የመጀመሪያው ክፍያ ናቸው። አሁን ስለ ቀሪው እንነጋገራለን።»
«ቋሊማ አምጣ ከዚያ ምናልባት እንነጋገራለን ነበር ያልሽው። ይኸው እየተነጋገርን ነው!»
«እንግዲያው በደንብ እየተግባባን ነው» አለች ሬን፤ ጣቶቿንም ላሰች።
ቶቢን አፉን ከፈተ። ከዚያም ያልጠበቀችውን ነገር አደረገ። ሳቀ። ሳያስፈቅድ ሾልኮ የወጣ ይመስል አጭርና የተደነቀ ሳቅ ነበር፤ እርሱም ራሱ በዚያ ሳቅ የደነገጠ ይመስል ነበር።
«አንቺ» አለ፣ «እስከ ዛሬ ካገኘኋቸው ሰዎች ሁሉ እጅግ የማትረቢ ሰው ነሽ።»
«ብዙ ወጣ ማለት አለብህ» አለች ሬን። ነገር ግን ትንሽ አናዳጅ ሆኖ ሊያስፈግጋት ምንም እንዳልቀረው ተሰማት።
ቆየ። እየጠየቀ በገበያው ውስጥ ወዲያና ወዲህ ተከተላት፤ የት አገኘችው፣ ጠፍቶ ያውቃል ወይ፣ ምን ያነድዳል፣ መዝናዋለች ወይ— በመጨረሻም በዳቦ ቤቱ ጀርባ ባለው ጠባብ መንገድ ውስጥ፣ በአብዛኛው ወሬውን እንዲያቆም ብላ፣ ኮትዋን ለግማሽ ሰከንድ ከፍታ እንዲያይ ፈቀደችለት።
ፋኖሱ ከጎድን አጥንቶቿ ጋር ተጣብቆ ነበር፤ ትንሽና የተጣመመ፣ የመስተዋት ጢስ ማውጫው የተሰነጠቀ፣ ወርቃማ ነበልባሉም ከጥፍር የማይበልጥ ነበር። በብርሃኑም ውስጥ ግራጫው ጠባብ መንገድ ተለወጠ። ጡቦቹ ግራጫ አልነበሩም። እንደ ቀበሮ የሞቁ፣ አቧራማና ጥልቅ ቀለም ነበራቸው። በመካከላቸው የበቀለው ልምላሜም ግራጫ አልነበረም። የቶቢን የራሱ እጆች ደግሞ፣ ፊቱ ፊት ከፍ አድርጎ ሲይዛቸው፣ ሮዝ ነበሩ።
ሬን ኮትዋን ዘጋች። ጠባቡ መንገድ እንደገና ግራጫ ሆነ።
ቶቢን ምንም አልተናገረም። ዝም ሲል ስታየው የመጀመሪያዋ ነበር።
የሆነው ከሰዓት በኋላ ዘግይቶ፣ ገበያው እየተጠቀለለ ሳለ ነበር።
ሬን መጀመሪያ ያስተዋለችው ውሾቹን ነበር። በድንገት በጥቀርሻ መንገድ ያለ ውሻ ሁሉ ፍርፋሪ ማሽተቱን አቁሞ ወደ ቅጥሩ አፍጥጦ ደርቆ ቆመ። ከዚያም አንድ በአንድ ጅራታቸውን በእግሮቻቸው መካከል ሸጉጠው ከጋሪዎቹ ሥር ሹልክ ብለው ሄዱ።
ሁለተኛው ያስተዋለችው ነገር ፋኖሶቹን ነበር።
ከጥቀርሻ መንገድ ጀርባ በሚያልፈው የከተማው ቅጥር ክፍል ላይ አምስት አሮጌ የቀለበቱ ፋኖሶች ቆመው ነበር፤ ባለፈው ሌሊት ከጎጆው ያየቻቸው እነዚያው የደከሙ የብረት ጐጆዎች። እያየች ሳለ በቅርብ ያለው ደከመ። ነበልባሉ ሰማያዊ ዶቃ እስኪሆን ድረስ አነሰ፤ ከዚያም ጢሳማና ቀጭን ሆኖ እንደገና ተነሣ። ከዚያም የሚቀጥለው ፋኖስ እንዲሁ አደረገ፤ ከዚያም የሚቀጥለው። ከወዲያኛው ወገን አንድ ነገር በጣም በቀስታ እየነፋባቸው ያለ ይመስል ነበር። ነፋስ ግን ፈጽሞ አልነበረም።
«ሬን» አለ ቶቢን ከኋላዋ። ድምፁ ቀጥኖ ነበር። «ሬን፣ ፋኖሶቹ።»
«አያቸዋለሁ።»
ከዚያም ብርዱ መጣ።
ባለፈው ምሽት እንዳደረገው በቅጥሩ ላይ መጣ፤ በዚህ ጊዜ ግን ቍልቍል ፈሰሰ። በክረምት ጠዋት ከቦዩ እንደሚነሣ ጭጋግ፣ ነገር ግን ከማንኛውም ጭጋግ ይበልጥ ከባድና ዝግ ብሎ፣ እንደ ረጅም ነጭ-ግራጫ ማዕበል በምሽጉ ጫፎች ላይ ተንከባለለ፤ በድንጋዮቹ ላይ ተንሸራቶ ወረደ፣ በመሬቱ ላይ ተዘረጋ፣ በገበያው ዳሶች መካከልም እየተሳበ ገባ። በነካበት ቦታ ሁሉ በመንገዱ ድንጋዮች ላይ ውርጭ አበበ። አንድ ኩሬ በትንሽና ደረቅ ቋቋታ ነጭ ሆነ። የማሲንቆ ተጫዋቹ የመጨረሻ ዜማ በመሀሉ ጠፋ፤ እርሱም ሌላ አልጀመረም።
ከዚያም ሁሉ ነገር ጸጥ አለ።
በሰው በተጨናነቀ ቦታ ሆነህ ድንገት ጸጥ ያለበትን ጊዜ አይተህ ታውቅ እንደ ሆነ— መምህሩ ሲገባ የመማሪያ ክፍል፣ ወይም አንድ ሰው ምርጡን ሳህን ሲጥል ማድ ቤት— ያን ዓይነት ጸጥታ፣ ሁሉም በአንድ ጊዜ ትንፋሹን የያዘበትን ጸጥታ ታውቀዋለህ። ይህም እንደዚያ ነበር፤ ልዩነቱ ማብቂያ የሌለው መሆኑ ብቻ ነበር። ማንም አልተንቀሳቀሰም። ማንም አልተናገረም። ሙሉ መንገድ የሞላ ሕዝብ ትንፋሹ እንደ ጢስ እየተነነ በቀዝቃዛው ጭጋግ ውስጥ ቆሞ ወደ ቅጥሩ ቀና ብሎ ይመለከት ነበር።
ኦናዎቹ ቅጥሩን አልፈው መጡ።
አልተንጠላጠሉም። ወደ ማሰሮ እንደሚፈስስ ጢስ በአናቱ ላይ ፈሰሱ፣ በድንጋዮቹ ላይ ወረዱ፣ ከታችም ራሳቸውን ሰብስበው ቅርጽ ያዙ። ረጃጅም ቅርጾች፣ ግራጫ ቅርጾች፣ የወንዶችና የሴቶች ቅርጽ ያላቸው፣ ግን እንደ እነርሱ ያልሆኑ፤ ምክንያቱም ፊታቸው መሆን በነበረበት ቦታ ምንም አልነበረም፤ እንደ ደመና ውስጠኛ ክፍል ያለ ደብዛዛ ለስላሳ ግራጫነት ብቻ። ምንም ድምፅ አላሰሙም። እግሮቻቸው፣ እግሮች ካሏቸው፣ መሬቱን አይነኩም ነበር። አንዱ፣ ከዚያ ሦስት፣ ከዚያ ደርዘን ሆነው ወደ ገበያው እየተንሳፈፉ ገቡ፤ ብርዱም አብሯቸው መጣ፤ እጅግ መራራ ከመሆኑ የተነሣ የሬን ዓይኖች እንባ አቀረሩ፤ እንባውም በሽፋሽፍቶቿ ላይ ቀዘቀዘ።
ከዚያም አንድ ሰው ጮኸ፤ ሁሉም ሮጠ።
ይህ ሬን ሊነግሩት የማትወደው የታሪኩ ክፍል ነው። ከብዙ ዓመታት በኋላ አንድ ጊዜ ተናገረችው፤ በግማሹ ላይ ቆመች፤ ልትቀጥልም አልፈለገችም። ስለዚህ እኔ በተቻለኝ መጠን በእርጋታ እነግርላታለሁ።
የእጅ ጋሪዎች ተገለበጡ። ፖሞች በውርጭ በተሸፈኑት የመንገድ ድንጋዮች ላይ እየዘለሉ ተንከባለሉ። የዶሮ ሻጭቱ ጐጆ ተፈንቅሎ ተከፈተ፤ ዶሮዎችም ወደ ሁሉም አቅጣጫ እያንፈራፈሩ በረሩ። እናቶች ልጆቻቸውን መንጭቀው አነሡ፤ በጥቀርሻ መንገድ ሙሉ በሮች ጓ እያሉ ተዘጉ።
በዚህ ሁሉ መካከልም ኦናዎቹ፣ ዓለሙን ሁሉ የሚያህል ጊዜ እንዳላቸው ሁሉ፣ ሳይቸኩሉ ቀስ ብለው ይንሳፈፉ ነበር።
ሬን በመንኰራኵሩ አጠገብ ብዙ የቆየውን ቢላ ሳዩን አየችው፤ ዞር ሲል አንዱ ልክ ከኋላው ቆሞ አገኘ። አልመታውም። አንዲት ረጅም ግራጫ እጅ ዘርግቶ፣ ወዳጅ እንደሚያደርገው፣ በደግነት በሚመስል ሁኔታ በትከሻው ላይ አሳረፋት እንጂ። ቀለሙም ከእርሱ ወጣ። ቢላ ሳዩ ከመጀመሪያውም ብዙ ቀለም አልነበረውም— በኮቱ ውስጥ ትንሽ ቡናማ፣ በጕንጮቹም ትንሽ ቅላት— ነገር ግን የነበረው ሁሉ ውኃ ከገንዳ እንደሚፈስስ ከእርሱ ፈሰሰ፤ እርሱም ሁለንተናው ግራጫ ሆነ፤ ፊቱ ግራጫ፣ እጆቹ ግራጫ፣ ጸጉሩ ግራጫ። አልጮኸም። በተገለበጠው በራሱ መንኰራኵር ላይ በጣም ቀስ ብሎ ተቀመጠ፤ እጆቹን በጭኑ ላይ አጣምሮ ምንም ወደሌለበት ተመለከተ።
ኦናዎቹ ባለፉበት ሁሉ ቀለሙ ጠፋ። የደበዘዙት የዳስ ጥላዎች ግራጫ ሆኑ። ጥቂቶቹ ትናንሽ ፖሞች ግራጫ ሆኑ። በዳቦ ቤቱ መስኮት ያለው ዳቦ፣ የጥሩ ቅርፊት ቡናማ ቀለም የነበረው፣ የአሮጌ ድንጋይ ቀለም ያዘ።
«ግቡ!» ወይዘሮ ፌን በበሯ ላይ ቆማ ልጆቿን እንደ ዶሮ እያባረረች ታስገባ ነበር። «ፒፕ፣ ግባ! ሄቲ፣ ሳም፣ ግቡ፣ ግቡ፣ ግቡ! ሞሊ— ጄም— የት ነው—»
«እኔ ጄምን ይዤዋለሁ፣ እማዬ!»
«እንግዲያው አስገባው!»
ሬን ኔትልን በእጇ ይዛ ነበር። ወደ ዳቦ ቤቱ እየጐተተቻት ነበር፤ ዳቦ ቤቱ ቅርብ ነበርና፣ ዳቦ ቤቱም በር ነበረውና፤ ቶቢንም ትንሹን የሌሊት ፋኖሱን በሁለት እጆቹ ከፊቱ ዘርግቶ ይዞ እየተደናቀፈ ከአጠገባቸው ይሄድ ነበር። አብርቶት ነበር። ሬን መቼ እንዳበራው አላወቀችም። ትንሹ ቢጫ ነበልባሉ እንደ እርሱ የፈራ ይመስል ይንቀጠቀጥ ነበር።
አንድ ኦና በግራቸው በኩል ከጭጋጉ ውስጥ እየተንሳፈፈ ወጣ። ባዶ ፊቱን ወደ እነርሱ አዞረ።
ቶቢን ቆመ። ሬን ጕልበቶቹ ሲንቀጠቀጡ አየች። ጥርሶቹ ሲንገጫገጩ፣ መነጽሩም በብርዱ ሲጨጋግግ አየች። ደግሞም ወደ ጎን ሲራመድ አየች፤ ከኦናው ርቆ ሳይሆን ወደ እርሱ፤ በእርሱና በደጃፉ ላይ ተሰናክላ ወድቃ፣ ለማልቀስ እንኳ እጅግ ፈርታ በውርጩ ላይ በተቀመጠችው በትንሿ ሞሊ ፌን መካከል እንዲቆም።
«ሂ-ሂድ ከዚህ» አለ ቶቢን። «እ-እባክህ። ሂ-ሂ-ሂድ።»
የሌሊት ፋኖሱን ከፍ አደረገ። ኦናው ቆም አለ። የዘይቱ ብርሃን አልጐዳውም፤ ሬን ይህን ማየት ትችል ነበር። ነገር ግን ብርሃኑን አልወደደውም። በጭጋጉ ውስጥ እየተወዛወዘ ተንጠልጥሎ ቆመ፤ አልቀረበምም፤ ፒፕም ሮጦ ወጥቶ ትንሿን እኅቱን አፈፍ አድርጎ አንሥቶ ይዟት ወደ ውስጥ ገባ።
ወይዘሮ ፌን አሁንም በበሯ ላይ ቆማ ትቈጥር ነበር። ሬን ከንፈሮቿ ሲንቀሳቀሱ ታያለች። አንድ፣ ሁለት፣ ሦስት፣ አራት—
ኦናው ከጠባቡ መንገድ ወጥቶ ከኋላዋ ሲመጣ አላየችውም።
«ወይዘሮ ፌን!» ብላ ሬን ጮኸች። «ከኋላሽ—»
ወይዘሮ ፌን ዞር አለች። ኦናውም ረጅሙን ግራጫ እጁን ዘርግቶ በጣም በእርጋታ ጕንጯን ነካት።
ያ ብቻ ነበር። እንዴት ያለ ትንሽ ነገር ነበር። ከዚያም ኦናው ምንም ብዙ ነገር እንዳላደረገ ሁሉ እየተንሳፈፈ አለፈ፤ ወደ ጭጋጉም ውስጥ ጠፋ።
ወይዘሮ ፌን በበሯ ላይ ፍጹም ጸጥ ብላ ቆመች። በሽርጧ ላይ ያለው ዱቄት፣ ነጭ የነበረው፣ ግራጫ ሆነ። ክብና ሮዝ ፊቷ ግራጫ ሆነ። ለስላሳና ደግ ቡናማ የነበሩት ዓይኖቿም እንኳ በመስኮት ላይ ያለ የዝናብ ውኃ ቀለም እስኪይዙ ድረስ ደበዘዙ። ከዚያም ልክ እንደ ቢላ ሳዩ በጣም ቀስ ብላ በራሷ ደጃፍ ላይ ተቀመጠች፤ ግራጫ እጆቿንም በግራጫ ጭኗ ላይ አደረገች።
«እማዬ?» ፒፕ ወደ በሩ ተመልሶ መጥቶ ነበር። ጄምን በክንዱ ታቅፎ ነበር። «እማዬ፣ ወደ ውስጥ ግቢ። እማዬ?»
ወይዘሮ ፌን ቀና ብላ አየችው። ፊቷ የፈራ አልነበረም። ከሁሉ የከፋውም ይኸው ነበር። ጨዋ፣ ግራ የተጋባና ገር ፊት ነበር፤ እንግዳ ሰው መንገድ ጠይቆት ከተማውን የማያውቅ ሰው ፊት።
«ሰላም፣ ውዴ» አለች። «ጠፍተሃል እንዴ?»
ፒፕ አፍጥጦ አያት።
«እኔ ነኝ» አለ። «እማዬ። እኔ ነኝ። ፒፕ ነኝ።»
«ፒፕ» አለች ወይዘሮ ፌን። በባዕድ ቋንቋ ያለ ቃል ይመስል፣ በትክክል መናገሯንም እርግጠኛ እንዳልሆነች በጥንቃቄ ተናገረችው። «ፒፕ። ጥሩ ስም ነው።» ትንሽ ፊቷን አጨፈገገችና እጆቿን ቍልቍል ተመለከተች። «ልጆች የነበሩኝ ይመስለኛል። አልነበሩኝም? ልጆች እንደ ነበሩኝ እርግጠኛ ነኝ። ምን ብዬ እንደ ጠራኋቸው ግን ላስታውስ አልቻልኩም።»
ከፒፕ በስተኋላ፣ በበሩ ላይ፣ ሄቲ ማልቀስ ጀመረች። ወይዘሮ ፌን ዞር አላለችም። በብርዱ ውስጥ በደጃፏ ላይ ተቀምጣ ምንም ወደሌለበት እየተመለከተች ትንሽ፣ ደካማ፣ ሩቅ የሆነ ፈገግታ ፈገግ አለች እንጂ።
ሬን በአሥራ ሁለት ዓመት ዕድሜዋ እጅግ ብዙ መጥፎ ነገሮችን አይታ ነበር። እንደዚህ ያለ ግን አይታ አታውቅም። እንደ ሚስማር ወደ ውስጧ ገባ።
እዚያ ቆማ ሳለች ደግሞ አንድ ቀዝቃዛ ትንፋሽ ማጅራቷን ነካት።
ዞር አለች። ኔትል እጇን ለቅቃ ነበር። ኔትል ወደ ወይዘሮ ፌን ሮጣ ነበር— እንዴታ፣ ኔትል ወደ ማንኛውም ያዘነ ሰው ሁልጊዜ ትሮጣለች— ግራጫ ክንዷንም እየደባበሰች በትንሽ የሚኮላተፍ ድምፅዋ «ወይዠሮ ፌን? ወይዠሮ ፌን፣ አይዦሽ» ትል ነበር። ከኔትል በስተኋላ ደግሞ ከጭጋጉ ውስጥ ከዳቦ ቤቱ በር የረዘመ አንድ ኦና ይነሣ ነበር።
በላይዋ ጐንበስ አለ። አንድ ረጅም ግራጫ እጁን በጠቃጠቆ ወደተሞላው ራሷ አናት ዘረጋ።
ሬን አላሰበችም። በኋላ ምንም ነገር እንደ ወሰነች ከቶ ልታስታውስ አልቻለችም። የምታውቀው እጇ በኮትዋ ውስጥ እንደ ነበረ፣ ከዚያም እጇ ከኮትዋ እንደ ወጣ፣ ፋኖሱም በእጇ ውስጥ በተዘረጋ ክንድ ርቀት ተይዞ እንደ ነበረ፣ እርሷም አንድ ነገር— ምን እንደ ሆነ ከቶ አላወቀችም— በሙሉ ድምፅዋ እየጮኸች እንደ ነበረ ብቻ ነው።
ፋኖሱ ቦግ አለ።
የምታውቀው ትንሹ ሞቅ ያለ ፍካት አልነበረም። ነጭ ነበር። ነጭ-ወርቃማ፣ የሚንቦገቦግ ነበር፤ አንድ ሰው በጥቀርሻ መንገድ መሀል የታላቅ ምድጃ በር የከፈተ ይመስል፤ የእርሷን፣ የኔትልንና የወይዘሮ ፌንን ጥላዎችም ከበስተኋላቸው እስከ መንገዱ ሩቅ ድረስ ጣለ። ጭጋጉ ከማንቆርቆሪያ እንደሚወጣ እንፋሎት በታላቅ ፍጥነት ተትጐልጕሎ ወደ ላይ ወጣ። በመንገዱ ድንጋዮች ላይ ያለው ውርጭ ቀልጦ ውኃ ሆኖ ፈሰሰ። ለአንድ ረጅም አፍታም፣ በዙሪያዋ ባለ ክበብ ውስጥ፣ ቀለም ወደ ዓለም ተመለሰ፤ ጡቦቹ እንደ ቀበሮ ሞቁ፣ የተበተኑት ፖሞች በድንገት፣ በማይታመን ሁኔታ፣ እንደ ሪባኗ ቀይ ሆኑ፤ የኔትል ጠቃጠቆዎችም ብሩህና ግሩም ወርቃማ ሆኑ።

ኦናው ጮኸ።
ሬን ኦና ሲያሰማ የሰማችው ብቸኛው ድምፅ ይህ ነበር፤ ከቶም አልረሳችውም፤ በተሰበረ መስኮት እንደሚያፏጭ ነፋስ ያለ፣ ከየትኛውም አፍ ያልወጣ፣ ከፍ ያለ፣ ቀጭን፣ የሚቀደድ ጩኸት። ግራጫ እጆቹን ባዶ ፊቱ ላይ ጋርዶ ከብርሃኑ እየተንገዳገደ ወደ ኋላ አፈገፈገ። በጥቀርሻ መንገድ ሙሉም ሌሎቹ ኦናዎች ደግሞ፣ እያንዳንዳቸው፣ እየጨመረ የሚሄድ አስፈሪ የጩኸት መዝሙር እያሰሙ ጮኹ፤ ዞረውም ሸሹ። በመጡበት መንገድ ተመልሰው ሸሹ፤ ጢስ ወደ ኋላ በጭስ ማውጫ እንደሚወጣ በቅጥሩ ላይ ፈስሰው ወጡ፤ አናቱንም አልፈው ወደ ግራጫው ምድረ በዳ ሄዱ።
ከአንዱ በስተቀር።
የመጨረሻው በቅጥሩ አናት ላይ ቆመ። ዞር አለ። ዓይኖች አልነበሩትም፤ ስለዚህ ሊያያት አይችልም። ነገር ግን ሬን፣ በሕዝብ መካከል ከኋላህ ያለ ሰው አፍጥጦ ሲያይህ እንደምታውቀው ያለ እውቀት፣ እያያት እንደ ሆነ አወቀች። ፋኖሱን። በግራጫው ሰማይ ላይ ያለ ግራጫ ቅርጽ ሆኖ ለአንድ ረጅም ቀዝቃዛ አፍታ እዚያው ቆየ።
ከዚያም ጠፋ።
ፋኖሱ ቀስ ብሎ ወደ ትንሹ ወርቃማ ፍካቱ ተመለሰ። ቀለሙ ቀስ ብሎ እንደገና ከፖሞቹ ወጣ፤ ጡቦቹም ግራጫ ሆኑ። ጭጋጉ ጠፍቶ ነበር። ብርዱም እየሄደ ነበር። የሬን ክንድ በጣም ይንቀጠቀጥ ስለ ነበር ፋኖሱን ከፍ አድርጋ ለመያዝ እንኳ አቃታት።
በጥቀርሻ መንገድ እንደገና በጣም ጸጥ አለ። አሁን ግን የተለየ ጸጥታ ነበር።
ሬን ቀና ብላ ቅጥሩን አየች። ከጥቀርሻ መንገድ በስተጀርባ ያሉት አምስቱ አሮጌ የቀለበቱ ፋኖሶች ሁሉም ጠፍተው ነበር። እነዚያ አምስቱ ብቻ አይደሉም። በቅጥሩ ላይ በሁለቱም አቅጣጫ ዓይኗ እስከሚያይበት ድረስ ቀለበቱ ጨልሞ ነበር፤ በብርሃናቱ ክበብ ውስጥ እንደ ወደቀ የጥርስ ረድፍ ያለ ረጅም ጥቍር ክፍተት።
ከዚያም ዞር ብላ ሰዎቹን አየች።
ከበሮች ውስጥና ከጋሪዎች ሥር እየወጡ፣ በጥንቃቄ ርቀው በዙሪያዋ ሰፊና የተዘበራረቀ ክበብ ሠርተው ቆመው አፍጥጠው ይመለከቱ ነበር። የጨለመውን ቅጥር አይደለም። ግራጫ የሆነውን ቢላ ሳይ ወይም በደጃፏ ላይ ያለችውን ወይዘሮ ፌንን አይደለም። እርሷን ነበር። ፊቷ ጥቀርሻ የለበሰ፣ በእጇም የሚንቦገቦግ ፋኖስ የያዘችውን ልጅ።
ማንም አመሰግናለሁ አላለም።
«አየሁት» አለ አንድ ሰው። «ቦግ ሲል አየሁት። እንደ ምድጃ።»
«እዚያ የያዘችው ምንድን ነው?»
«ያ የማኅበሩ ፋኖስ አይደለም። ዘይቱ የት አለ? በውስጡ ምንም ዘይት የለም።»
«እርሷ ስታበራው ቀለበቱ ጠፋ። አያችሁ? ቀለበቱ በሙሉ ጨለመ።»
«ይህ እውነት አይደለም!» አለ ቶቢን። «ይህ— ቀለበቱ የጠፋው በፊት ነው— የቅደም ተከተል ጉዳይ ነው፣ አያችሁ፣ ፋኖሶቹ ቀድመው እየተብለጨለጩ ይጠፉ ነበር—»
ማንም አያዳምጠውም ነበር። ዘይት ሻጩ ታሊስ በጋሪው መወጣጫ ላይ ወጥቶ ነበር። ፊቱ በኦናዎች ሳይሆን በፍርሃት ግራጫ ሆኖ ነበር፤ በሚንቀጠቀጥ ጣቱም ወደ ሬን ይጠቍም ነበር።
«የጠንቋይ ብርሃን» አለ እንደ ዛገ በር በሚንጫጫው ድምፁ። «ያ የሆነው ይኸው ነው። ያ እውነተኛ ነበልባል አይደለም። እውነተኛ ነበልባል ከፋናው ይመጣል፤ እውነተኛ ነበልባል ከማኅበሩ ይመጣል። ያ የጠንቋይ ብርሃን ነው። እርሷ ናት ያመጣቻቸው። በእርሱ ጠርታ ቅጥሩን አሻግራ አመጣቻቸው፤ ከዚያም ራሷን ታላቅ ለማስመሰል መልሳ አባረረቻቸው።»
«የጠንቋይ ብርሃን» አለ ሌላ ሰው። ከዚያም ሌላ፣ ደግሞ ሌላ፤ ቃሉም እንደ ቀዝቃዛ ነፋስ በሰዎቹ ክበብ ዙሪያ ዞረ። የጠንቋይ ብርሃን። የጠንቋይ ብርሃን። አንድ ሰው ከቦዩ ዳር የቀዘቀዘ መመለሻ አነሣ።
ሬን ወዴት እንደሚሄድ ለማየት አልጠበቀችም።
ፋኖሱን መልሳ ወደ ኮትዋ ከተተች፣ ኔትልን በአንጓዋ ያዘች፣ ሮጠችም። ቃሉ ከኋላዋ እያሳደዳት በጥቀርሻ መንገድ ቍልቍል ሮጠች፤ ከቆዳ ፋብሪካው ጀርባ ወዳለው ጠባብ መንገድ ዘልቃ ገባች፣ በአጥሩ ቀዳዳ አለፈች፣ ኔትልን ከኋላዋ እየጐተተች በውኃ ቱቦው ወደ ጣሪያዎቹ ወጣች። ጣሪያዎቹ የእርሷ ነበሩ። ጣሪያዎቹ ሁልጊዜ የእርሷ ነበሩ።
ነገር ግን ከመጀመሪያው የጣሪያ ጫፍ ላይ ሆና ወደ ኋላ ስትመለከት ብቻዋን እንዳልሆነች አየች። አንድ ሰው ከኋላዋ በውኃ ቱቦው ላይ እየወጣ ነበር፤ በመጥፎ ሁኔታ፣ የማንኪያና የሹካ መሳቢያ በራሱ ደረጃ ሲወርድ የሚያሰማውን የሚመስል ድምፅ እያሰማ፣ በአንድ እጁም ትንሽ ቢጫ የሌሊት ፋኖስ እያወዛወዘ።