ምዕራፍ 29 · 15 ደቂቃ ንባብ · 20 ደቂቃ ማዳመጥ
በሙርፊልድስ የሚገኘው ታበርናክል፥ ለንደን ውስጥ የተደረጉ አገልግሎቶች
ለተወሰነ ጊዜ መስበኪያ መድረካቸውን እንድሸፍንላቸው ዶ/ር ካምቤል ያቀረቡልኝን የሞቀ ግብዣ ተቀብዬ ነበር፤ በዚህም መሠረት ከሜይ ወር ስብሰባዎች በኋላ ለመነቃቃት በሙሉ ልቤ ተሰማራሁ፤ ይሁን እንጂ ለብዙ ሳምንታት ይህን ለዶ/ር ካምቤልም ሆነ ለሌላ ለማንም አልተናገርሁም። ሕዝቡን በተቻለ መጠን በጥልቀትና ሁሉንም በአንድነት ስለ ኃጢአት ለመውቀስ ታስበው የተዘጋጁ ተከታታይ ስብከቶችን ሰበክሁ። ቃሉ ታላቅ ተጽእኖ እያሳደረ እንደ ነበረ ከሰንበት ወደ ሰንበት፥ ከምሽት ወደ ምሽትም አየሁ። በሰንበት ቀን ጠዋትና ማታ እሰብክ ነበር፤ እንዲሁም ማክሰኞ፥ ረቡዕ፥ ሐሙስና ዓርብ ምሽቶች እሰብክ ነበር። ሰኞ ምሽት በታበርናክሉ ውስጥ አጠቃላይ የጸሎት ስብሰባ ነበረን። በእያንዳንዱ በእነዚያ ስብሰባዎች ስለ ጸሎት ጉዳይ ለሕዝቡ እናገር ነበር። ጉባኤዎቻችን እጅግ ብዙ ነበሩ፤ ዘወትርም በሰንበትና በሰንበት ምሽቶች ቤቱ በሰው ይጨናነቅ ነበር።
በዚያን ጊዜ በለንደን ሁሉ ሃይማኖት እጅግ ተዳክሞ ስለ ነበር፥ በሳምንቱ ቀናት የሚሰበኩ ስብከቶች በጣም ጥቂት ነበሩ፤ ዶ/ር ካምቤልም አንድ ጊዜ በሳምንቱ ምሽቶች በለንደን ካሉት የቀሩት አገልጋዮች ሁሉ በአንድነት ከሚሰብኩለት ሕዝብ የበለጠ ለብዙ ሰዎች እንደምሰብክ እንደሚያምኑ እንደ ነገሩኝ አስታውሳለሁ። ዶ/ር ካምቤል በጉባኤያቸው ውስጥ ለእረኛው የሚገባውን ደመወዝ ይቀበሉ እንደ ነበር ተናግሬአለሁ። ነገር ግን ይህን ደመወዝ ለራሳቸው አልተጠቀሙበትም፤ ቢያንስ ከፊሉን ብቻ እንጂ ከዚያ በላይ አልተጠቀሙበትም፤ ምክንያቱም ያን ያህል በከበደ የአዘጋጅነት ሥራ ተጭነው ሊፈጽሙት የቻሉትን ያህል የደብሩን ተግባራት እያከናወኑ መስበኪያ መድረኩን በራሳቸው ወጪ ያሸፍኑ ነበር። ዶ/ር ካምቤል ቀናተኛ፥ ነገር ግን እጅግ ተዋጊ ሰው ሆነው አገኘኋቸው። ዘወትር ለክርክር የተሰጡ ነበሩ። የአሜሪካውያንን አነጋገር ልጠቀም ብል፥ ከአመለካከታቸው ጋር በማይስማማ ሰውና ነገር ሁሉ ላይ «መዝመት» ልማዳቸው ነበር። በዚህ መንገድ ብዙ መልካም ነገር አደረጉ፤ አልፎ አልፎም፥ እፈራለሁ፥ ጥቂት ጉዳት አደረሱ።
በገለጽሁት መንገድ ለብዙ ሳምንታት ከሰበክሁ በኋላ ጠያቂዎችን የምጠራበት ጊዜ እንደ ደረሰ አወቅሁ። ነገር ግን ዶ/ር ካምቤል በአእምሮአቸው እንዲህ ያለ ሐሳብ እንዳልነበራቸው ተገነዘብሁ። በእርግጥም እኔ ከመስበኪያ መድረኩ ሆኜ እንደማየው በጉባኤው ውስጥ እየሆነ ያለውን ሊያዩ በሚችሉበት ስፍራ አልተቀመጡም ነበር፤ ቢቀመጡም ኖሮ ምናልባት አይረዱትም ነበር። በዚያች ቤተ ክርስቲያን የነበረው ልማድ በየሁለተኛው የሰንበት ምሽት የቅዱስ ቁርባን አገልግሎት ማድረግ ነበር። በእንደዚህ ያሉ ጊዜያት አጭር ስብከት ይደረግና ጉባኤው ይሰናበታል፤ ለቁርባን አገልግሎቱ ትኬት ያላቸው ብቻ ሥርዓቱ እስኪፈጸም ድረስ ሲቀሩ ሌሎቹ ሁሉ ይሄዳሉ።
ከላይ በጠቀስሁት የሰንበት ጠዋት ዶ/ር ካምቤልን እንዲህ አልኋቸው፦ «ዛሬ ማታ የቁርባን አገልግሎት አለዎት፤ እኔም በዚያው ሰዓት የጠያቂዎች ስብሰባ ማድረግ አለብኝ። ከስብከቱ በኋላ ጠያቂዎችን የምጋብዝበት ክፍል በግቢው ውስጥ የትም ቦታ አለዎትን?» እርሳቸውም አመነቱ፤ እንዲህ ባለው ስብሰባ የሚገኝ ሰው ይኖር እንደ ሆነም ጥርጣሬአቸውን ገለጹ። ሆኖም ጉዳዩን አጥብቄ ስለ ጠየቅኋቸው፥ «አዎን፥ ልትጋብዟቸው የምትችሉበት የሕፃናት ትምህርት ቤት ክፍል አለ» ብለው መለሱ። ምን ያህል ሰዎችን ሊይዝ እንደሚችል ጠየቅሁ። «ከሀያ እስከ ሠላሳ፥ ወይም ምናልባት አርባ» ብለው መለሱ። እኔም፦ «ኧረ፥ ይህማ ግማሽ ያህል እንኳ አይበቃም። ከዚህ የሚበልጥ ክፍል የለዎትምን?» አልሁ። በዚህ ጊዜ መደነቃቸውን ገለጹ፤ እኔ ለመስጠት ያሰብሁትን ዓይነት ግብዣ የሚያጸድቅ በቂ መነሣሣት በጉባኤው ውስጥ አለ ብዬ አስብ እንደ ሆነም ጠየቁ። በጉባኤው ውስጥ በመቶዎች የሚቈጠሩ ጠያቂዎች እንዳሉ ነገርኋቸው። እርሳቸው ግን በዚህ ሳቁና የማይቻል ነገር ነው አሉ። ከዚህ የሚበልጥ ክፍል የላቸውም እንደ ሆነ ጠየቅኋቸው። «እንዴታ፥ አዎን» አሉ፤ «የብሪቲሽ ትምህርት ቤት አዳራሽ አለ። ነገር ግን እርሱ አንድ ሺህ አምስት መቶ ወይም አንድ ሺህ ስድስት መቶ ሰው ይይዛል፤ ያንን እንደማትፈልጉት የታወቀ ነው።» «አዎን» አልሁ፤ «የምፈልገው ልክ ያንን ክፍል ነው። የት ነው ያለው?» «ኧረ» አሉ፥ «በእርግጥ እዚያ ስብሰባ ለመጥራት አትደፍሩም። እኔ እንደምገምተው ወደ ሕፃናት ትምህርት ቤቱ ክፍል ሊገቡ ከሚችሉት ግማሽ ያህል እንኳ አይመጡም።» ቀጥለውም እንዲህ አሉ፦ «አቶ ፊኒ፥ ያላችሁት በእንግሊዝ፥ ደግሞም በለንደን መሆኑን አስታውሱ፤ ሕዝባችንንም እንደማታውቁ አስታውሱ። እናንተ ልታደርጉት ባሰባችሁት ዓይነት ጥሪ በአሜሪካ ሰዎችን እንዲህ ወዳለው ስብሰባ እንዲመጡ ልታደርጉ ትችሉ ይሆናል፤ እዚህ ግን ሰዎችን እንዲመጡ አታደርጉም። በዚህ የዓመቱ ወቅት የምሽት አገልግሎታችን የሚያልቀው ፀሐይ ሳትጠልቅ መሆኑን አስታውሱ። በለንደን እምብርት፥ የነፍሳቸውን መዳን ለሚሹና ስለዚያ ጉዳይ ለተጨነቁ ሰዎች በተሰጠ ግብዣ፥ በጠራራ ቀን፥ እንደዚያ ባለ በይፋ በተሰጠ ጥሪ፥ ራሳቸውን ለይተው እንደዚያ ወዳለው ስብሰባ የሚሄዱ ይመስሏችኋልን?» እኔም፦ «ዶ/ር ካምቤል፥ የሕዝቡ ሁኔታ ምን እንደ ሆነ ከእርስዎ ይልቅ እኔ አውቃለሁ። ወንጌል ለአሜሪካ ሕዝብ እንደሚስማማ ሁሉ ለእንግሊዝ ሕዝብም እንዲሁ ይስማማል፤ የሕዝቡም ኵራት በአሜሪካ ያሉትን ሰዎች ከሚከለክለው በላይ እንደዚህ ላለው ጥሪ ምላሽ ከመስጠት ይከለክላቸዋል የሚል ምንም ፍርሃት የለኝም» ብዬ መለስሁላቸው።
ያ ክፍል የት እንዳለ እንዲነግሩኝ፥ ለሕዝቡ ላመለክተውና ላደርገው ያሰብሁትን ጥሪ ላቀርብ እንድችልም በግልጽ እንዲገልጹልኝ ጠየቅኋቸው። ብዙ ከተነጋገርን በኋላ ዶክተሩ ሳይወዱ ተስማሙ፤ ነገር ግን ኃላፊነቱን በራሴ ላይ መውሰድ እንዳለብኝ፥ እርሳቸውም እንደማይካፈሉበት በግልጽ ነገሩኝ። ኃላፊነቱን እንደምወስድ እንደ ጠበቅሁና ለዚያም እንደ ተዘጋጀሁ መለስሁላቸው። ከዚያም ከታበርናክሉ ጥቂት ርቀት ብቻ ስለሚገኘው ስፍራ ዝርዝር አቅጣጫ ሰጡኝ። ሕዝቡ በካውፐር ጎዳና ወደ ሲቲ ሮድ አቅጣጫ ጥቂት ሮድ ወጥቶ በአንድ ጠባብ መተላለፊያ በኩል በመታጠፍ ወደ ብሪቲሽ ትምህርት ቤት አዳራሽ ሕንጻ መሄድ ነበረበት። ከዚያም ወደ ስብሰባ ሄድን፤ ጠዋት ሰበክሁ፤ ማታም እንደ ገና ሰበክሁ፤ ማለትም፥ ሰዓቱን በትክክል የማስታውሰው ከሆነ፥ ማታ በአሥራ ሁለት ሰዓት። አጭር ስብከት ሰበክሁና ከዚያም የምፈልገውን ለሕዝቡ ነገርኋቸው። ስለ ነፍሳቸው የተጨነቁትንና በዚያን ጊዜ ወዲያውኑ ከእግዚአብሔር ጋር ሰላም ለመፍጠር የተዘጋጁትን ሁሉ ለአእምሮአቸው ሁኔታ ተስማሚ የሆነ ትምህርት ለመቀበል ወደሚደረገው ስብሰባ እንዲመጡ ጠራኋቸው። ስለ ተጋበዙት ሰዎች ዓይነት እጅግ ጥንቃቄ አደረግሁ። እንዲህ አልሁ፦ «እምነታቸውን የሚመሰክሩ ክርስቲያኖች ወደዚህ ስብሰባ አልተጋበዙም። እዚህ የቁርባን አገልግሎት ይኖራል፤ እነርሱ እዚሁ ይቈዩ። ግድ የለሽ ኃጢአተኞች ወደዚህ ስብሰባ አልተጋበዙም። እንዲመጡ የሚጠበቁት ክርስቲያኖች ያልሆኑ፥ ነገር ግን ስለ ነፍሳቸው መዳን የተጨነቁና አሁን በእግዚአብሔር ፊት ያለባቸውን ግዴታ በሚመለከት ጥያቄ ላይ ቀጥተኛ ትምህርት እንዲሰጣቸው የሚፈልጉ እነዚያ፥ እነዚያ ብቻ ናቸው።» እንዳልሳሳት ይህን ደጋግሜ ተናገርሁ። ዶ/ር ካምቤል በታላቅ ትኵረት አዳመጡ፤ ጥሪዬን በእንደዚህ ያሉ ሰዎች ብቻ ስለ ወሰንሁ፥ የሚመጡት በጣም ጥቂቶች ወይም ምናልባት ማንም እንደማይመጣ ጠብቀው እንደ ነበር እገምታለሁ። የሕዝቡ ብዛት ወደዚያ ክፍል እንዳይገባ፥ ደግሞም የሚሄዱት ጠያቂ ኃጢአተኞች መሆናቸውን በግልጽ ተረድተው እንዲሄዱ ቁርጥ ውሳኔ አድርጌ ነበር። በዚህ ነጥብ ላይ ጥንቁቅ የሆንሁት ስለ ስብሰባው ውጤት ብቻ ሳይሆን፥ ዶ/ር ካምቤል በጉዳዩ ላይ የነበራቸው አመለካከት የተሳሳተ መሆኑን ለማሳመን ጭምር ነበር። በጉባኤው ውስጥ እጅግ ብዙ የኃጢአት ወቀሳ እንዳለና በመቶዎች የሚቈጠሩ ሰዎች እንደዚህ ላለው ጥሪ ወዲያውኑ ምላሽ ለመስጠት እንደ ተዘጋጁ ፍጹም እርግጠኛ ነበርሁ። እንዲህ ያለውን ጥሪ በማድረጌ ጊዜውን እንዳልቀደምሁ ፍጹም እርግጠኛ ነበርሁ። ስለዚህ እንዲመጡ የምፈልጋቸውን ሰዎች ዓይነትና ስፍራውን የሚያገኙበትን መንገድ በዝርዝር አመለከትሁ። ከዚያም ስብሰባውን አሰናበትሁ፤ ጉባኤውም ሄደ።
ዶ/ር ካምቤል ጉባኤው በየትኛው አቅጣጫ እንደሚሄድ ለማየት በፍርሃትና በጭንቀት በመስኮት ተመለከቱ፤ እጅግም በመደነቅ ካውፐር ጎዳና ወደ ብሪቲሽ ትምህርት ቤት አዳራሽ ለመግባት ወደ ላይ በሚጋፉ ሰዎች ፈጽሞ ተጨናንቆ አዩ። እኔም ወጥቼ ከሕዝቡ ጋር ወደ ላይ ሄድሁ፤ ሕዝቡም ገብቶ እስኪያልቅ በመግቢያው በር ላይ ጠበቅሁ። ስገባ ክፍሉ ጢም ብሎ ሞልቶ አገኘሁት። ዶ/ር ካምቤል በዚያ የተገኙት ከአንድ ሺህ አምስት መቶ ወይም ከአንድ ሺህ ስድስት መቶ ያላነሱ ሰዎች ናቸው የሚል ግምት ነበራቸው። በትምህርት ቤት ክፍሎች ውስጥ ብዙ ጊዜ እንደሚጠቀሙባቸው ያሉ መቀመጫዎች ወይም አግዳሚ ወንበሮች የተደረደሩበት ትልቅ ክፍል ነበር።
ከመግቢያው አጠገብ፥ ሕዝባዊ ስብሰባዎች በሚያደርጉበት ጊዜ ሁሉ ተናጋሪዎቹ የሚቆሙበት መድረክ ነበረ፤ እንደዚህ ያሉ ስብሰባዎችም በተደጋጋሚ ይደረጉ ነበር። ጉባኤው ልትገታ የማትችል ስሜት እንዳትፈነዳ ታላቅ ጥንቃቄ እስኪያስፈልግ ድረስ በኃጢአት ወቀሳ እንደ ተጨነቀ ብዙም ሳይቆይ ተረዳሁ። ብዙም ሳይቆይ ዶ/ር ካምቤል ራሳቸው ገቡ። እንዲህ ያለ ሕዝብ ሲሰበሰብ አይተው በዚያ ለመገኘት እጅግ ጓጉተው ነበርና የቁርባን አገልግሎታቸውን በችኰላ ፈጽመው ወደ ጠያቂዎች ስብሰባ መጡ። በተገኘው ሕዝብ ብዛት፥ በተለይም በተገለጠው የስሜት መጠን የተደነቁ ይመስሉ ነበር። ስለ ወዲያውኑ ግዴታቸው ለጥቂት ጊዜ ተናገርኋቸው፤ እንደ ወትሮዬም፥ እግዚአብሔር በዚያው ጊዜ ራሳቸውን ፈጽሞ ለፈቃዱ እንዲሰጡ፥ የዓመፃ መሣሪያዎቻቸውን እንዲያስቀምጡ፥ ትክክለኛ ገዢያቸው ለሆነው ለእርሱ እንዲገዙና ኢየሱስን ብቸኛ ቤዛቸው አድርገው እንዲቀበሉ እንደሚፈልግባቸው እንዲረዱ ለማድረግ ጣርሁ።
የእግዚአብሔርን ጊዜ መጠበቅ የሚለውን አስተሳሰባቸውን የሚያስወግድ ትምህርት በመስጠት ረገድ እጅግ ጥንቁቅ መሆን አስፈላጊ መሆኑ እንዲሰማኝ በቂ ጊዜ በእንግሊዝ ቆይቼ ነበር። ለንደን አሁንም፥ ለረጅም ጊዜም፥ በጽንፈኛ ካልቪናዊ ስብከት የተረገመች ናት። ስለዚህ ብዙዎቹ ተምረውበታል ብዬ ያሰብሁትን ያን አስተሳሰብ ለመገርሰስ ንግግሬን አነጣጠርሁ፤ ምክንያቱም በዚያ ከተገኙት ውስጥ በእርግጥ የዶ/ር ካምቤል ጉባኤ አባላት የሆኑት ጥቂቶች ብቻ ናቸው ብዬ አስቤ ነበር። በእርግጥም ከቀን ወደ ቀን የሚያዩት ጉባኤ ለእርሳቸው አዲስ እንደ ሆነ፥ እዚያ የሚጐርፉት ብዙ ሕዝብ ለእኔ እንደማይታወቁ ሁሉ ለእርሳቸውም የማይታወቁ እንደ ሆኑ ራሳቸው ነግረውኝ ነበር። ስለዚህ በትምህርቴ በአንድ በኩል ከጽንፈኛ ካልቪናዊነት፥ በሌላ በኩል ደግሞ ብዙዎቹ ተምረውበታል ብዬ ካሰብሁት ዝቅተኛ አርሚኒያኒዝም እንዲጠበቁ ለማድረግ ሞከርሁ።
ከዚያም የወንጌልን መረብ በዙሪያቸው በሚገባ ከዘረጋሁ በኋላ ወደ ዳር ለመጐተት ተዘጋጀሁ። ተንበርክከው ራሳቸውን ፈጽሞና ለዘላለም ለክርስቶስ እንዲሰጡ ልጠይቃቸው ስል፥ አንድ ሰው በጉባኤው መካከል እጅግ በከፋ የአእምሮ ጭንቀት ሆኖ የጸጋ ቀኑን በኃጢአት እንዳባከነ ጮኸ። ሁከት ሊነሣ እንደሚችል አየሁ፤ በተቻለኝ መጠንም ጸጥ አሰኘሁት፤ ሕዝቡም እንዲንበረከኩ፥ ነገር ግን ልጸልየው ያለሁትን የጸሎት ቃል ሁሉ ሊሰሙ እስኪችሉ ድረስ፥ ቢቻላቸው፥ ጸጥ እንዲሉ ጠራኋቸው። እነርሱም በቤቱ በየስፍራው ታላቅ ሲቅና ልቅሶ ቢኖርም፥ በግልጽ በሚታይ ጥረት የሚባለውን ለመስማት እስኪችሉ ድረስ ጸጥ አሉ።
ከዚያም ስብሰባውን አሰናበትሁ። ከዚህ በኋላ ከዚያ ጉባኤ ጋር በቆየሁበት ጊዜ ሁሉ፥ ይህም በጠቅላላው ዘጠኝ ወር ነበር፥ ብዙ ጊዜ በሰንበት ምሽት ተመሳሳይ ስብሰባዎችን አደረግሁ፤ ውጤቱም ተመሳሳይ ነበር። መነሣሣቱ እጅግ ከፍ ብሎና ተስፋፍቶ ጠያቂዎቹ በዚያ ትልቅ የብሪቲሽ ትምህርት ቤት አዳራሽ ውስጥ ሊስተናገዱ እስከማይችሉ ደረሰ፤ በጉባኤው ላይ ያረፈው ተጽእኖ እጅግ አጠቃላይና ጥልቅ መሆኑን ባየሁ ጊዜ ብዙ ጊዜ ተገቢውን ትምህርት ከሰጠኋቸውና ያለ ምንም ገደብ ሁሉን አሁን ለክርስቶስ የማስረከብን ጥያቄ ፊት ለፊት ካጋፈጥኋቸው በኋላ፥ ይህን ለማድረግ በአእምሮአቸው የተዘጋጁት፥ እኛ በጸሎት ለእግዚአብሔር ስናቀርባቸው፥ በቆሙበት ስፍራ እንዲነሡ እጠራቸው ነበር። በዚያ ቤት ውስጥ ያሉት መተላለፊያዎች እጅግ ጠባቦችና በሰው የተጨናነቁ ስለ ነበሩ፥ የተጨነቁ ሰዎች መቀመጫ ተብሎ የሚጠራውን መጠቀም ወይም ሰዎች በጉባኤው ውስጥ በፍጹም መንቀሳቀስ የማይቻል ነበር።
ሰዎች እንዲነሡና እኛ በጸሎት ስናቀርባቸው ራሳቸውን እንዲያቀርቡ እንደዚህ ያሉ ጥሪዎችን ባደረግሁ ጊዜ ብዙ ጊዜ በብዙ መቶዎች የሚቈጠሩ ይነሡ ነበር፤ በአንዳንድ አጋጣሚዎችም፥ ቤቱ ይይዛል ተብሎ የታሰበውን ያህል ሰው የሚይዝ ከሆነ፥ ጥሪ በተደረገ ጊዜ ከሁለት ሺህ ያላነሱ ሰዎች አንዳንድ ጊዜ ይነሡ ነበር። በእርግጥም ከመስበኪያ መድረኩ ሲታይ ጉባኤው በሙሉ ማለት ይቻላል የተነሣ ይመስል ነበር። ይሁን እንጂ እንዲነሡና ራሳቸውን ለእግዚአብሔር እንዲሰጡ የጠራሁት ጠያቂዎችን ብቻ እንጂ የቤተ ክርስቲያን አባላትን አልነበረም።
በሥራው መካከል በዚያን ጊዜ ከዚያ ጉባኤ ጋር የተያያዘው ሃይማኖታዊ መነሣሣት ምን ያህል ሰፊ እንደ ነበረ የሚያሳይ አንድ ሁኔታ ተከሰተ። የምጠቅሰው ሁኔታ ይህ ነበር፦ በእንግሊዝ የነበሩት ከመንግሥት ቤተ ክርስቲያን የተለዩት (ዲሰንተሮች) መንግሥት በድርጊቱ በዚያች አገር ላሉት የተለዩት ወገኖች ጥቅም ከወትሮው የበለጠ አክብሮት እንዲያሳይ ለማሳመን ለረጅም ጊዜ ሲጥሩ ነበር። ነገር ግን ዘወትር የሚሰጣቸው መልስ የተለዩት ወገኖች ከመንግሥት ቤተ ክርስቲያን ጋር ሲነጻጸሩ ጥቂቶች መሆናቸውን የሚያመለክት ነበር። በዚህ ጉዳይ ላይ እጅግ ብዙ ስለ ተባለ፥ መንግሥት የሁለቱን ወገኖች፥ ማለትም የዲሰንተሮችንና የእንግሊዝ ቤተ ክርስቲያንን፥ አንጻራዊ ጥንካሬ ለማረጋገጥ እርምጃ ለመውሰድ ወሰነ። በአንድ ቅዳሜ ምሽት፥ በየትኛውም ስፍራ ያለ ሕዝብ እንቅስቃሴውን እንዲረዳ ወይም እንዲጠረጥር እንኳ የሚያደርግ ምንም ቀደም ያለ ማስጠንቀቂያ ወይም ማስታወቂያ ሳይኖር፥ በመንግሥቱ ውስጥ ላለው የአምልኮ ስፍራ ሁሉ በሚስጥር መልእክት ተላከ፤ መልእክቱም በሚቀጥለው የሰንበት ጠዋት የየትኛውም ቤተ እምነት የአምልኮ ቤቶች የሚገቡትን ሁሉ ለመቍጠር በመንግሥቱ ሁሉ ባሉት በአብያተ ክርስቲያናትና በጸሎት ቤቶች፥ በአምልኮ ስፍራዎችም ሁሉ በሮች ላይ የሚቆሙ ሰዎች እንዲመረጡ የሚጠይቅ ነበር። እንዲህ ያለ ማስታወቂያ ለዶ/ር ካምቤል ተልኮ ነበር፤ እኔ ግን ይህን ያወቅሁት በኋላ ነው። እርሳቸውም በመመሪያው መሠረት በጠዋቱ አገልግሎት ጊዜ የሚገባውን ሰው ሁሉ እንዲቈጥሩ ትእዛዝ ሰጥተው በታበርናክሉ በር ሁሉ ላይ ሰዎችን አቆሙ። እኔ እንደ ተረዳሁት ይህ በመላው ታላቋ ብሪታንያ ተደረገ። በዚህ መንገድ የሁለቱን ወገኖች አንጻራዊ ጥንካሬ፥ በሌላ አነጋገር በሰንበት ብዙ አምላኪዎች የነበሩት ዲሰንተሮች ወይስ የመንግሥት ቤተ ክርስቲያን እንደ ሆኑ አረጋገጡ። ይህ ቈጠራ ዲሰንተሮች አብላጫ መሆናቸውን እንዳሳየ አምናለሁ። ይህ እንደ ሆነ ቢሆንም፥ ዶ/ር ካምቤል በታበርናክሉ በሮች ላይ የቆሙት ሰዎች በአንድ ጊዜ ወደ ቤቱ ሊገቡ ከሚችሉት በብዙ ሺህ የሚበልጡ ሰዎችን እንደ ቈጠሩ ነገሩኝ። ይህ የሆነው እጅግ ብዙ ሰዎች በበሮቹ ገብተው የሚቀመጡበትም ሆነ የሚቆሙበት ስፍራ ሲያጡ ለሌሎች ቦታ ይለቅቁ ስለ ነበር ነው። መነሣሣቱ እጅግ ታላቅ ስለ ነበር ብዙ ሺዎችን የሚይዝ የአምልኮ ስፍራ ቢኖር ኖሮ ልክ እንደ ታበርናክሉ ይሞላ ነበር።
ሁሉም ከየት እንደ መጡ ዶ/ር ካምቤል አላወቁም፤ ማንም ሊናገር አልቻለም፤ ነገር ግን ከእነርሱ መካከል በመቶዎችና በሺዎች የሚቈጠሩ እንደ ተለወጡ የምንጠራጠርበት ምንም ምክንያት የለም። በእርግጥም እጅግ ብዙ ሰዎችን አየሁ፥ አነጋገርሁም፤ በዚህም መንገድ እስከ ኃይሌ ሙሉ ወሰን ድረስ ሠራሁ።
ቅዳሜ ምሽት ጠያቂዎችና የተለወጡ ሰዎች ለመነጋገር ወደ ጥናት ክፍሉ ይመጡ ነበር። በየሳምንቱ እጅግ ብዙ ሰዎች ይመጡ ነበር፤ የሚለወጡትም እየበዙ ሄዱ። እንደ ተረዳሁት ሰዎች ከከተማው ክፍል ሁሉ ይመጡ ነበር። ብዙ ሰዎች በስብሰባዎቹ ላይ ለመገኘት በየሰንበቱ ብዙ ማይል በእግራቸው ይጓዙ ነበር። ብዙም ሳይቆይ በከተማው በተለያዩ ክፍሎች በመንገድ ላይ የሚያውቁኝና በስብሰባዎቻችን በመገኘታቸው እጅግ የተባረኩ ሰዎች ያነጋግሩኝ ጀመር። በእርግጥም በዚያን ጊዜ የእግዚአብሔር ቃል በለንደን ተባረከ፤ እጅግ ተባረከ።
አንድ ቀን ዶ/ር ካምቤል ገብቼ በብሪቲሽ ትምህርት ቤት አዳራሽ ለሚገኙት ተማሪዎች ጥቂት ቃል እንድናገር ጠየቁኝ። እንዲሁም አደረግሁ፤ በትምህርታቸው ምን ሊያደርጉ እንዳሰቡ በመጠየቅ ጀመርሁ፤ በዚያም ረገድ ስላለባቸው ኃላፊነት አብራርቼ ተናገርሁ። ትምህርታቸውን በትክክል ቢጠቀሙበት ምን ያህል መልካም ነገር ሊያደርጉ እንደሚችሉ፥ ትምህርታቸውም ለራሳቸውና ለዓለም ምን ያህል ታላቅ በረከት እንደሚሆን፥ በራስ ወዳድነት ቢጠቀሙበት ግን ለራሳቸውና ለዓለም ምን ያህል ታላቅ መርገም እንደሚሆን ላሳያቸው ሞከርሁ። ንግግሩ አጭር ነበር፤ ነገር ግን ያ ነጥብ በብርቱ ቀረበላቸው። ዶ/ር ካምቤል በኋላ በዚያን ጊዜ ነቅተው የነፍሳቸውን መዳን ለመሻት የተመሩ ቍጥራቸው ጥቂት ያልሆነ ተማሪዎች፥ ምን ያህል እንደ ሆኑ አሁን ረስቻለሁ፥ የቤተ ክርስቲያን አባልነት እንደ ተቀበሉ ነገሩኝ። እንዲህ ያለ ውጤት ይከተላል ብለው ፈጽሞ ስላልጠበቁ ይህን እንደ አስገራሚ እውነታ ጠቀሱት።
እውነቱ በእንግሊዝም እንደዚሁም በዚህች አገር ያሉ አገልጋዮች የአሁኑን ግዴታ በሕዝቡ ሕሊና ላይ አጥብቆ የማስረጽን አስፈላጊነት በአብዛኛው ዘንግተውት ነበር። ዶ/ር ካምቤል ይህን በነገሩኝ ጊዜ፦ «እንዴ፥ አልገባኝም። ሌላ ማንም ሰው ልክ እንደዚሁ ሊናገረው የማይችለውን ምንም ነገር አልተናገራችሁም» አሉ። እኔም፦ «አዎን፥ ሊናገሩት ይችሉ ነበር፤ ነገር ግን ይናገሩት ነበርን? እኔ እንዳደረግሁት ለእነዚያ ወጣቶች ሕሊና እንዲህ ያለ ቀጥተኛና ጠንካራ ጥሪ ያቀርቡ ነበርን?» ብዬ መለስሁ። ችግሩ ይህ ነው። አገልጋዮች ስለ ኃጢአተኞች ይናገራሉ፤ እግዚአብሔር አሁን ንስሐ እንዲገቡ እንደሚያዝዛቸው የሚያስገነዝብ ተጽእኖ ግን አያሳድሩም፤ በዚህም አገልግሎታቸውን ከንቱ ያደርጋሉ።
በእርግጥም ኃጢአተኞችን ወዲያውኑ በእግዚአብሔር ፊት ካለባቸው የአሁኑ ግዴታቸው ጋር ፊት ለፊት ለማገናኘት ታስቦ የተዘጋጀ የሚመስል ስብከት የምሰማው አልፎ አልፎ ነው። በዚህችም አገር ሆነ በእንግሊዝ ከሚሰሙት ስብከቶች፥ አገልጋዮች በዚያው ሰዓት በቤቱ ውስጥ ያለን ማንንም ሰው ለመለወጥ መሣሪያ ለመሆን እንደሚጠብቁ ወይም እንዳሰቡ የሚያሳይ ሐሳብ እምብዛም አታገኙም።
አሁን የተናገርሁትን የሚያስረዳ አንድ እውነተኛ ታሪክ ከተወሰነ ጊዜ በፊት ተነግሮኝ ነበር። እርስ በርሳቸው የሚተዋወቁ፥ ነገር ግን ወንጌልን ስለ መስበክ እጅግ የተለያየ አመለካከት የነበራቸው ሁለት ወጣቶች፥ እርስ በርሳቸው ብዙም በማይራራቁ ጉባኤዎች ላይ እረኞች ሆነው ተሾመው ነበር። ከእነርሱ አንዱ በጉባኤው ኃይለኛ መነቃቃት ነበረው፤ ሌላው ግን ምንም አልነበረውም። አንዱ ወደ ቤተ ክርስቲያኑ ያለማቋረጥ አዳዲስ አባላት ይጨመሩለት ነበር፤ ለሌላው ግን ምንም አልተጨመረለትም። አንድ ቀን ተገናኙ፤ ወደ ቤተ ክርስቲያኑ ምንም ያልተጨመረለትም በመካከላቸው ያለው ልዩነት ምክንያት ምን እንደ ሆነ ወንድሙን ጠየቀ፤ ከስብከቶቹም አንዱን ወስዶ ለሕዝቡ ሊሰብከውና ከራሱ ስብከት የተለየ ውጤት ይኖረው እንደ ሆነ ሊያይ ይችል እንደ ሆነ ጠየቀ። ስምምነቱ ተደረገ፤ የተዋሰውንም ስብከት ለሕዝቡ ሰበከ። ስብከቱ ምንም እንኳ የተጻፈ ቢሆንም ኃጢአተኞችን በእግዚአብሔር ፊት ካለባቸው ግዴታ ጋር ፊት ለፊት ለማገናኘት ዓላማ የተዘጋጀ ነበር። በአገልግሎቱ መጨረሻ ብዙዎች እጅግ እንደ ተነኩና እያለቀሱ በመቀመጫቸው እንደ ቀሩ አየ። ስለዚህ ስሜታቸውን እንዳልጐዳ ተስፋ እንደሚያደርግ፥ ይህን ለማድረግ አላሰበምና፥ በመናገር ጥልቅ ይቅርታ ጠየቀ።
የዚያች ሰፊ የለንደን ከተማ የሞራል ውድመት ሳይ አእምሮዬ እጅግ ተጨነቀ። እንደ ተረዳሁት በከተማዋ ያሉት የአምልኮ ስፍራዎች ከነዋሪዎቿ ጥቂቱን ክፍል ብቻ ለማስተናገድ የሚበቁ ነበሩ። ነገር ግን በኤጲስቆጶሳውያን መካከል በተነሣ አንድ እንቅስቃሴ እጅግ ተሳብሁ። ከአገልጋዮቻቸው ብዙዎቹ እየገቡ በስብሰባዎቻችን ይገኙ ነበር። ከደብር አለቆቹ አንዱ፥ አቶ አለን የተባሉ፥ በሥራው እጅግ ተጠመዱ፤ በራሳቸው ታላቅ ደብር መነቃቃትን ለማስፋፋት ለመሞከርም ቈረጡ። በኋላ እንደ ነገሩኝ በደብራቸው ውስጥ እየዞሩ በተለያዩ ስፍራዎች ሀያ የጸሎት ስብሰባዎችን አቋቋሙ። በሙሉ ኃይላቸው በቀጥታ ለሕዝቡ መስበክ ጀመሩ። ጌታም ድካማቸውን እጅግ ባረከ፤ እኔም ከመሄዴ በፊት በደብራቸው ውስጥ ከአንድ ሺህ አምስት መቶ ያላነሱ ሰዎች በተስፋ እንደ ተለወጡ ነገሩኝ። ሌሎች በርካታ የኤጲስቆጶሳውያን አገልጋዮችም እጅግ ተነሣሡ፤ በነፍሳቸውም ሕያው ሆኑ፤ ተከታታይ ወይም የማያቋርጡ አገልግሎቶችንም ማድረግ ጀመሩ። ለንደንን ለቅቄ በሄድሁ ጊዜ ዕለታዊ ስብሰባዎችን የሚያደርጉና መነቃቃትን ለማስፋፋት ጥረት የሚያደርጉ አራት ወይም አምስት የተለያዩ የኤጲስቆጶሳውያን አብያተ ክርስቲያናት ነበሩ። በእያንዳንዱም ሁኔታ እጅግ እንደ ተባረኩና እንደ ታደሱ አምናለሁ። ለመሥራት ወደ ለንደን እንደ ገና ከመሄዴ በፊት አሥር ዓመት አለፈ፤ ሥራው ፈጽሞ እንዳላቋረጠ፥ እየቀጠለ፥ ድንበሩን እያሰፋና በተለያዩ አቅጣጫዎች እየተስፋፋ እንደ ነበረ ተነገረኝ። ለሁለተኛ ጊዜ እዚያ በሄድሁ ጊዜ ከተለወጡት ብዙዎቹ በተለያዩ የለንደን ክፍሎች በልዩ ልዩ መንገድ በታላቅ ስኬት ሲሠሩ አገኘኋቸው።
ስለ ለንደን ሁኔታ አእምሮዬ እጅግ ተጨንቆ እንደ ነበረ ተናግሬአለሁ። ለለንደን የተሳብሁትን ያህል ለማናቸውም ከተማ ወይም ስፍራ በጸሎት የተሳብሁበት ጊዜ እምብዛም አልነበረም። አንዳንድ ጊዜ፥ በተለይም በሕዝብ ፊት ስጸልይ፥ ብዙ ሕዝብ በፊቴ ሆኖ፥ ጸሎቴን ማቆም የማልችል ይመስለኝ ነበር፤ የጸሎት መንፈስም ስለ ሕዝቡና ስለ መላው ከተማ በምማልድበት ጊዜ ከራሴ ውጭ ያወጣኝ ያህል ነበር። ወደ እንግሊዝ ገና እንደ ደረስሁ፥ ለተለያዩ ዓላማዎች ገንዘብ ለማሰባሰብ እንድሰብክ እጅግ ብዙ ግብዣዎች ይደርሱኝ ጀመር፤ ይኸውም የእረኛውን ደመወዝ ለመክፈል፥ ለጸሎት ቤት የሚከፈለውን ለመክፈል ለማገዝ፥ ወይም ለሰንበት ትምህርት ቤት ወይም ለእንደዚህ ላለ ዓላማ ገንዘብ ለማሰባሰብ ነበር። ጥያቄዎቻቸውን ብቀበል ኖሮ ሌላ ምንም ነገር ማድረግ ባልቻልሁም ነበር። ነገር ግን እንደዚህ ላለው ጥሪ ሁሉ ምላሽ ሰጥቼ ለመሄድ እምቢ አልሁ። ወደ እንግሊዝ የመጣሁት ለራሴም ሆነ ለእነርሱ ገንዘብ ለማግኘት እንዳልሆነ ነገርኋቸው። ዓላማዬ ነፍሳትን ለክርስቶስ መማረክ ነበር።
ለዶ/ር ካምቤል አራት ወር ተኩል ያህል ከሰበክሁ በኋላ ድምፄ እጅግ ተዘጋ፤ የባለቤቴም ጤንነት በአየሩ ጠባይና በብርቱ ድካማችን እጅግ ተጐዳ። እዚህም እግዚአብሔር በእርሷ በኩል ያደረገውን በይበልጥ በዝርዝር መተረክ መጀመር አለብኝ።
እስከዚያ ጊዜ ድረስ የተገኘችውና የተሳተፈችው የሴቶች ብቻ በሆኑ ስብሰባዎች ነበር፤ እነዚያም በእንግሊዝ እጅግ አዲስ ነገር ስለ ነበሩ እስከዚያ ድረስ በዚያ ረገድ የሠራችው ጥቂት ነበር። ነገር ግን በዶ/ር ካምቤል ዘንድ ሳለን፥ ትምህርትም ሃይማኖትም በሌላቸው ድሆች ሴቶች የሻይ ስብሰባ ላይ እንድትገኝ ጥያቄ ቀረበላት። የሻይ ስብሰባ የሚባሉት በእንግሊዝ ሰዎችን ለማናቸውም ልዩ ዓላማ ለማሰባሰብ ይደረጋሉ። እንዲህ ያለው ስብሰባ በአንዳንድ በጎ አድራጊ ክርስቲያን ወንዶችና ሴቶች ተጠራ፤ ባለቤቴም እንድትገኝ አጥብቀው ለመኑአት። ንግግሯን በምታደርግበት ጊዜ ወንዶች በስብሰባው ውስጥ ይቈያሉ የሚል ምንም ሐሳብ ሳይኖራት ተስማማች። ሆኖም እዚያ በደረሰች ጊዜ ስፍራው በሰው ተጨናንቆ አገኘችው፤ ከሴቶቹም በተጨማሪ በስብሰባው ውጤት እጅግ የተሳቡ ቍጥራቸው ቀላል ያልሆነ ወንዶች ነበሩ። ይሄዳሉ ብላ በመጠበቅ ጥቂት ቈየች። ነገር ግን እዚያው ስለ ቀሩና ስብሰባውን እንድትመራ ስለ ጠበቁ፥ ተነሣች፤ በሕዝብ ፊት እንድትናገር በመጠራቷም ይቅርታ ጠየቀች ብዬ አምናለሁ፤ እንዲህ የማድረግ ልማድ ፈጽሞ እንዳልነበራትም ነገረቻቸው። በዚያን ጊዜ ሚስቴ ከሆነች ገና ከአንድ ዓመት ጥቂት ብቻ ማለፉ ነበር፤ ወደ እንግሊዝ እስከ ሄድንበት ጊዜ ድረስም በመነቃቃቶች ውስጥ ለመሥራት ከእኔ ጋር ወደ ውጭ ሄዳ አታውቅም ነበር። ወደ ማረፊያችን ከመጣች በኋላ እንደ ነገረችኝ፥ በዚህ ስብሰባ ላይ ሦስት አራተኛ ሰዓት ያህል የሚረዝም ንግግር አደረገች፤ ውጤቱም በግልጽ መልካም ነበር። በዚያ የተገኙት ድሆች ሴቶች እጅግ የተነኩና የተሳቡ ይመስሉ ነበር፤ ንግግሯንም በጨረሰች ጊዜ በዚያ ከተገኙት ወንዶች አንዳንዶቹ ተነሥተው በሰሙት ነገር ታላቅ እርካታ እንዳገኙ ገለጹ። ሴቶች በሕዝብ ፊት መናገራቸውን በተመለከተ ጭፍን አመለካከት እንደ ነበራቸው ተናገሩ፤ ነገር ግን እንደዚህ ባሉ ሁኔታዎች ምንም ተቃውሞ ሊያዩበት እንደማይችሉ፥ ታላቅ መልካም ነገር ለማድረግ የሚያስችል መሆኑንም በግልጽ እንዳዩ ገለጹ። ስለዚህ በሌሎች ተመሳሳይ ስብሰባዎች ላይ እንድትገኝ ጠየቋት፤ እርሷም ተገኘች። በተመለሰች ጊዜ ያደረገችውን ነገረችኝ፤ ይህም የእንግሊዝን ሕዝብ ጭፍን አመለካከት ቀስቅሶ ምናልባት ከመልካሙ ይልቅ ጉዳቱ ይበዛ እንደ ሆነ እንደማታውቅ ተናገረች። እኔም ራሴ ይህን ፈርቼ ነበር፤ ለእርሷም እንዲሁ ገለጽሁላት። ይሁን እንጂ ዝም እንድትልና በእንደዚህ ያሉ ስብሰባዎች ከእንግዲህ እንዳትገኝ የመከርኋት አይመስለኝም፤ ይልቁንም ከተጨማሪ ማሰላሰል በኋላ አበረታታኋት። ከዚያን ጊዜ ጀምሮ በእንግሊዝ በቆየንበት ጊዜ ለዚያ ዓይነቱ አገልግሎት ይበልጥ እየለመደች ሄደች፤ ወደ ቤታችን ከተመለስን በኋላም በሄድንበት ሁሉ ከራሷ ጾታ ጋር መሥራቷን ቀጠለች። እርሷ እጅግ ጉልህ ድርሻ ስለ ነበራት መነቃቃቶች በምናገርበት ጊዜ በዚህ ላይ ሰፋ አድርጌ የምናገርበት አጋጣሚ ይኖረኛል።
በዚያን ጊዜ በለንደን ከሁሉም የኅብረተሰብ ክፍሎች ማለት ይቻላል እጅግ አስደሳች የሆኑ እጅግ ብዙ የመለወጥ ታሪኮች ነበሩ። ስለ ኃጢአት መናዘዝና ስለ ካሳ መመለስ ብዙ ሰበክሁ፤ ውጤቱም በእውነት አስደናቂ ነበር። በዚህ መንገድ ማለት ይቻላል የወንጀል ዓይነት ሁሉ ተፈልጎ ወጣ፤ ተናዘዙበትም። ካሳ ለመመለስ በመቶዎች፥ እንዲያውም በሺዎች ብዬ አምናለሁ፥ የሚቈጠሩ ፓውንድ ስተርሊንግ ተከፈሉ።
ለንደንን የሚያውቅ ሁሉ ከኖቬምበር መጀመሪያ እስከሚቀጥለው ማርች ድረስ ከተማዋ እጅግ ጨለምተኛ እንደምትሆን፥ ለመተንፈስም ሆነ ለመናገር የሚያስቸግር መጥፎ አየር እንዳላት ያውቃል። እኛ ወደዚያ የሄድነው በሜይ መጀመሪያ ነበር። በሴፕቴምበር ወዳጄ የሃውተኑ ብራውን ሊጠይቁን መጡ፤ ሁለታችንም የነበርንበትን የጤና ሁኔታ አይተው እንዲህ አሉ፦ «ይህማ ፈጽሞ አይሆንም። ወደ ፈረንሳይ ወይም ቋንቋችሁን ሊረዱ ወደማይችሉበት ወደ ሌላ የአውሮፓ ክፍል መሄድ አለባችሁ፤ ምክንያቱም ጨርሶ መናገር እስከ ቻላችሁ ድረስ በእንግሊዝ ዕረፍት የላችሁም።» ጉዳዩን ከተነጋገርንበት በኋላ ምክራቸውን ተቀብለን ለጥቂት ጊዜ ወደ ፈረንሳይ ለመሄድ ወሰንን። ወጪያችንን እንድንሸፍንበት ሃምሳ ፓውንድ ስተርሊንግ ሰጡኝ። ወደ ፓሪስና ወደ ሌሎች የተለያዩ የፈረንሳይ ስፍራዎች ሄድን። ከማንም ጋር ትውውቅ ከማድረግ በጥንቃቄ ተቈጠብን፤ በተቻለ መጠንም ጸጥ ብለን ኖርን። የአየር ጠባዩ ለውጥ በባለቤቴ ጤንነት ላይ ያሳደረው ተጽእኖ እጅግ ጉልህ ነበር። ሙሉ ብርታቷን በፍጥነት መልሳ አገኘች። እኔም ቀስ በቀስ ከድምፅ መዘጋቴ ዳንሁ፤ ስድስት ሳምንት ያህል ከቈየን በኋላም በታበርናክሉ ወደ ነበረን ሥራችን ተመለስን፤ በዚያም እስከሚቀጥለው ኤፕሪል መጀመሪያ ድረስ መሥራታችንን ቀጠልን፤ ከዚያም ወደ አገራችን ለመመለስ ተነሣን። እንግሊዝን የለቀቅሁት እጅግ ሳልወድ ነበር። ነገር ግን የኮሌጃችን ብልጽግና እንድመለስ የሚጠይቅ መሰለ። በእንግሊዝ ሕዝብ እጅግ ተሳበን ነበር፤ እዚያ ለመቈየትና ሥራችንን ለማራዘምም እጅግ ተመኘን። ሳውዝሃምፕተን በተባለች ትልቅ የመንገደኞችና የደብዳቤ መርከብ ከለንደን በመርከብ ተጓዝን። በተነሣንበት ቀን በሥራችን የተሳቡ እጅግ ብዙ ሰዎች በወደቡ ላይ ተሰበሰቡ። ከእነርሱ እጅግ አብዛኞቹ አዲስ የተለወጡ ሰዎች ነበሩ። መርከቡ የባሕሩን ሙላት መጠበቅ ነበረበት፤ ለብዙ ሰዓታትም በመርከቡ ዙሪያ ባለው ክፍት ስፍራ እኛን ለመሸኘት የሚጠብቁ እጅግ ብዙ ሰዎች ነበሩ። ከዚያ ሁሉ አፍቃሪ ልብ ተነጥሎ መሄድ የባለቤቴን ብርታት ፈጽሞ አሸነፈው። መርከቡ ከወደቡ እንደ ወጣ ወደ ክፍላችን ገባች። እኔ ግን በወንዙ ወደ ታች ተወስደን ከዓይን እስክንሰወር ድረስ በመርከቡ ወለል ላይ ቆሜ የሚውለበለቡትን መሐረቦች እመለከት ነበር። የመጀመሪያው የእንግሊዝ ጉብኝታችን ሥራ በዚህ ተደመደመ።