ምዕራፍ 27 · 19 ደቂቃ ንባብ · 25 ደቂቃ ማዳመጥ
በቦስተን ሌላ የብርድ ወቅት
በ1843 መጸው እንደ ገና ወደ ቦስተን ተጠራሁ። ባለፈው ጊዜ እዚያ በሄድሁ ጊዜ፥ በቦስተን ስለ ክርስቶስ ዳግም ምጽአት ጉዳይ ታላቅ ግርግር የነበረበት ወቅት ነበር። የእንቅስቃሴው መሪ የነበሩት አቶ ሚለር በዚያ ሆነው ንግግር ያደርጉ ነበር፤ በየዕለቱም የመጽሐፍ ቅዱስ ክፍሎችን እያካሄዱ ያስተምሩና ልዩ የሆኑትን አመለካከቶቻቸውን ያሰርጹ ነበር፤ ትምህርታቸውም ብዙ ሥርዐት የለሽና ከአእምሮ ውጭ የሆነ ነገር ያዘለ ኃይለኛ ግርግር አስከተለ። የአቶ ሚለርን የመጽሐፍ ቅዱስ ክፍል አንድ ወይም ሁለት ጊዜ ተካፈልሁ፤ ከዚያ በኋላ ወደ ክፍሌ ጋብዣቸው እንደ ተሳሳቱ ላሳምናቸው ሞከርሁ። በትንቢቶቹ ላይ የሰጡትን አተረጓጐም አስገነዘብኋቸው፤ እኔ እንደ መሰለኝም በአንዳንድ መሠረታዊ አመለካከቶቻቸው ፈጽመው እንደ ተሳሳቱ አሳየኋቸው። እርሳቸውም ስሕተት ካላቸው ስሕተታቸውን የሚያጋልጥ የምርመራ መንገድ እንደ ያዝሁ መለሱልኝ። እኔም መሠረታዊ ስሕተታቸው አስቀድሞ እንደ ተጋለጠ ላሳያቸው ሞከርሁ። ለመጨረሻ ጊዜ የመጽሐፍ ቅዱስ ክፍላቸውን በተካፈልሁ ጊዜ፥ ክርስቶስ በ1843 በአካል መጥቶ ጠላቶቹን ያጠፋል የሚለውን ትምህርት ያሰርጹ ነበር። በዚህ ጉዳይ ላይ የዳንኤልን ትንቢት ማብራሪያ ብለው የጠሩትን ሰጡ። በዚያ የተነገረውን ምስል ያደቀቀውና ያጠፋው፥ ያለ እጅ ከተራራ ተፈንቅሎ የተንከባለለው ድንጋይ ክርስቶስ ነው አሉ። ወደ ክፍሌ በመጡ ጊዜ፥ ነቢዩ ድንጋዩ ክርስቶስ ሳይሆን የእግዚአብሔር መንግሥት እንደ ሆነ በግልጽ እንደሚያረጋግጥ፥ ነቢዩም በዚያ ምስሉን የምታፈርሰው ቤተ ክርስቲያን ማለትም የእግዚአብሔር መንግሥት እንደ ሆነች እንደሚያሳይ አስገነዘብኋቸው። ይህ እጅግ ግልጽ ስለ ነበር አቶ ሚለር ይህ በእርግጥ እውነት እንደ ሆነ፥ እነዚያንም ሕዝቦች የሚያጠፋቸው ክርስቶስ ሳይሆን የእግዚአብሔር መንግሥት እንደ ሆነ ለመቀበል ተገደዱ። ከዚያም የእግዚአብሔር መንግሥት እነዚያን ሕዝቦች እርሳቸው በሚያስተምሩት ትርጕም፥ ማለትም በሰይፍ ወይም ጦርነት በመክፈትባቸው ታጠፋቸዋለች ብለው ያስቡ እንደ ሆነ ጠየቅኋቸው።
እርሳቸውም፦ አይደለም፥ ያንንማ ማመን አልችልም አሉ። እኔም እንዲህ ብዬ ጠየቅኋቸው፦ «የታሰበው የሕዝቡ መጥፋት ሳይሆን የመንግሥታቱ መገልበጥ አይደለምን? ይህስ የሚፈጸመው የእግዚአብሔር ቤተ ክርስቲያን በወንጌል አእምሮአቸውን በማብራት በምታሳድረው ተጽዕኖ አይደለምን? ትርጕሙ ይህ ከሆነ ደግሞ፥ በተወሰነ ጊዜ ክርስቶስ የምድርን ሕዝቦች ሁሉ ለማጥፋት በአካል ይመጣል ለሚለው ትምህርትዎ መሠረቱ ወዴት ነው?» ደግሞም፦ «እንግዲህ ይህ የትምህርትዎ መሠረት ነው። በክፍሎችዎ ውስጥ ትኩረት የሚያስገኙበት ታላቁ ነጥብ ይህ ነው፤ እዚህ ደግሞ ግልጽ ስሕተት አለ፤ የነቢዩ ቃላት ራሳቸው እርስዎ ከሚያስተምሩት ፍጹም ተቃራኒውን ያስተምራሉና» አልኋቸው። ነገር ግን በዚያን ጊዜ ከእርሳቸውና ከተከታዮቻቸው ጋር መከራከር ከንቱ ነበር። የክርስቶስ መምጣት እንደ ቀረበ በእርግጥ ያምኑ ስለ ነበር፥ በግርግሩ እጅግ ተወስደው ምንም ፍሬ ያለው ምክንያት ሊሰሙ አለመቻላቸው የሚያስደንቅ አልነበረም። በ1843 መጸው እዚያ በደረስሁ ጊዜ ያ የተለየ የግርግር ዓይነት አልፎ አገኘሁት፤ ነገር ግን በሕዝቡ መካከል ብዙ ዓይነት ስሕተቶች ሰፍነው ነበር። በእርግጥም እዚያ ባገለገልሁበት የመጀመሪያው የብርድ ወቅት ዶ/ር ቢቸር ስለ ቦስተን ያረጋገጡልኝ ነገር እውነት እንደ ሆነ አግኝቻለሁ። እንዲህ አሉኝ፦ «አቶ ፊኒ፥ እዚህ በሌላ በማናቸውም ስፍራ እንደምትሠራው መሥራት አትችልም። የተለየ የማስተማር መንገድ መከተልና ከመሠረቱ መጀመር ይኖርብሃል፤ ዩኒቴሪያኒዝም የክሕደቶች ሥርዓት ነውና፥ በትምህርቱም ሥር የክርስትና መሠረቶች ፈርሰዋል። ምንም ነገር እንደ ተቀበለ አድርገህ መውሰድ አትችልም፤ ዩኒቴሪያኖችና ዩኒቨርሳሊስቶች መሠረቶቹን አፍርሰዋልና ሕዝቡ ሁሉ ተንሳፍፎአል። ብዙኃኑ የጸና አስተያየት የላቸውም፤ ‹እነሆ በዚህ› ወይም ‹እነሆ በዚያ› የሚል ሁሉ ሰሚ ያገኛል፤ ሊታሰብ የሚችል ማናቸውም ዓይነት ስሕተት ማለት ይቻላል መቆሚያ ሊያገኝ ይችላል።»
ይህ ከዚያ ወዲህ ካገለገልሁባቸው ከሌሎቹ የሥራ መስኮች ሁሉ ይልቅ በበለጠ መጠን እውነት እንደ ሆነ አግኝቻለሁ። በቦስተን ያለው ብዙኃኑ ሕዝብ ምንም አስተዋይ ቢሆንም፥ ካገለገልሁባቸው ከሌሎቹ ስፍራዎች ሁሉ ይልቅ በሃይማኖታዊ እምነቱ ያልጸና ነው፤ ከሃይማኖት ጉዳይ በቀር በሌሎች ጥያቄዎች ሁሉ በእርግጥ እጅግ አስተዋይ ሕዝብ ናቸውና። ሃይማኖታዊ እውነቶችን በአእምሮአቸው ውስጥ እንዲቀመጡ ማድረግ እጅግ አስቸጋሪ ነው፤ ምክንያቱም የዩኒቴሪያን ትምህርት ተጽዕኖ የመጽሐፍ ቅዱስን ዋና ዋና ትምህርቶች ሁሉ እንዲጠራጠሩ የሚመራ ሆኖአል። ሥርዓታቸው የክሕደቶች ሥርዓት ነው። ሥነ መለኮታቸው አሉታዊ ነው። ሁሉን ነገር ማለት ይቻላል ይክዳሉ፤ ምንም ነገር ማለት ይቻላል አያረጋግጡም። በእንዲህ ያለ መስክ ስሕተት የሕዝቡን ጆሮ ክፍት ሆኖ ያገኘዋል፤ በሃይማኖታዊ ጉዳዮችም እጅግ ከአእምሮ ውጭ የሆኑ አመለካከቶች በብዙ ሰዎች ዘንድ ተቀባይነት ያገኛሉ።
በዚህ ጊዜ በማርልቦሮው የጸሎት ቤት አገልግሎቴን ጀመርሁ፤ በዚያም እጅግ እንግዳ የሆነ ሁኔታ አገኘሁ። በአብዛኛው ጽንፈኛ ለውጥ ፈላጊዎች የሆኑ ሰዎች የመሠረቱት አንድ ቤተ ክርስቲያን ነበር፤ ከአባላቱም አብዛኞቹ በልዩ ልዩ ጉዳዮች ላይ ጽንፈኛ አመለካከቶች ነበሯቸው። ከሌሎች ኦርቶዶክሳዊ አብያተ ክርስቲያናት ወጥተው በማርልቦሮው የጸሎት ቤት የራሳቸውን ቤተ ክርስቲያን አቋቁመው ተባብረው ነበር። ጽኑዎች፥ ብዙዎቹም ወጥነት ያላቸው የተሐድሶ አራማጆች ነበሩ። መልካም ሰዎች ነበሩ፤ ነገር ግን አንድነት ያላቸው ሕዝብ ነበሩ ማለት አልችልም። ጽንፈኛ አመለካከቶቻቸው እርስ በርሳቸው የሚገፋፉበት ምክንያት የሆኑ ይመስሉ ነበር። አንዳንዶቹ ፈጽሞ ኃይልን የማይጠቀሙ ጽንፈኞች ነበሩ፤ የገዛ ልጆቻቸውን ለመቈጣጠር እንኳ ማናቸውንም አካላዊ ኃይል ወይም ማናቸውንም አካላዊ መንገድ መጠቀም ስሕተት ነው ብለው ያምኑ ነበር። ሁሉ ነገር በምግባራዊ ማግባባት ብቻ መፈጸም አለበት ይሉ ነበር። ይሁን እንጂ በአጠቃላይ የሚጸልዩ፥ ትጉና ክርስቲያን ሕዝብ ነበሩ። ከእነርሱ ጋር ተስማምቶ ለመኖር የተለየ ችግር አላጋጠመኝም፤ ነገር ግን በዚያን ጊዜ የሚለር ግርግርና ሌሎችም ልዩ ልዩ ምክንያቶች በመካከላቸው ብዙ ግራ መጋባት ሲያስከትሉ ቆይተው ነበር። እንደ ቤተ ክርስቲያን ፈጽሞ በበለጸገ ሁኔታ ላይ አልነበሩም።
ኤስ—— የተባለ አንድ ወጣት ሰው በመካከላቸው ተነሥቶ ነቢይ ነኝ ይል ነበር። ከእርሱ ጋር ብዙ ጊዜ ተነጋግሬ ፈጽሞ እንደ ተሳሳተ ላሳምነው ሞከርሁ፤ እንደ ተሳሳተም እንዲያዩ ለማድረግ ከተከታዮቹ ጋር ደከምሁ። ይሁን እንጂ በመጨረሻ በብዙ ነጥቦች ላይ ራሱን እስኪያጋልጥና አንዳንድ ነገሮች በተወሰኑ ቀኖች እንደሚሆኑ እስኪተነብይ ድረስ፥ ከእርሱም ሆነ ከእነርሱ ጋር ምንም ማድረግ እንደማይቻል አገኘሁ። ከትንቢቶቹ አንዱ አባቱ በአንድ በተወሰነ ቀን ይሞታል የሚል ነበር። በዚያን ጊዜ እንዲህ አልሁት፦ «እንግዲህ እንፈትንሃለን። አሁን የይገባኛልህ እውነተኛነት ይፈተናል። እነዚህ የምትተነብያቸው ነገሮች ቢፈጸሙ፥ እንደምትለውም በተወሰኑት ጊዜያት ቢፈጸሙ፥ ነቢይ እንደ ሆንህ የምናምንበት ምክንያት ይኖረናል። ባይፈጸሙ ግን እንደ ተታለልህ ያረጋግጣል።» ይህን ሊክድ አልቻለም። የእግዚአብሔር መልካም አቅርቦት እንዲህ እንዲሆን ስለ ፈቀደ፥ እነዚህ ትንቢቶች የሚመለከቱት ትንቢቶቹ ከተነገሩበት ጊዜ ጥቂት ሳምንታት ብቻ ርቀው የሚሆኑትን ድርጊቶች ነበር። እንደ ነቢይ ያለውን ስሙን በእነዚህ ትንቢቶች እውነተኛነት ላይ አስይዞ መፈጸማቸውን ይጠባበቅ ነበር። እርግጥ ነው፥ ሁሉም አንድ በአንድ ከሸፉ፤ እርሱም ከእነርሱ ጋር ከሸፈ፤ ስለ ትንቢቶቹም ከዚያ በኋላ ምንም አልሰማሁም። ነገር ግን የብዙ ሰዎችን አእምሮ አደናግሮ ጥረታቸውንም በእርግጥ ከንቱ አድርጎ ነበር፤ ተከታዮቹ የነበሩትም እንደ ክርስቲያኖች የቀድሞ ተጽዕኖአቸውን መልሰው አግኝተው እንደ ሆነ አላውቅም።
በዚህ የብርድ ወቅት ጌታ የገዛ ነፍሴን እጅግ በደንብ አደሳት፤ የመንፈሱንም አዲስ ጥምቀት ሰጠኝ። በማርልቦሮ ሆቴል እኖር ነበር፤ የጥናት ክፍሌና መኝታ ቤቴም በጸሎት ቤቱ ሕንፃ በአንደኛው ማእዘን ነበሩ። ለረጅም ጊዜ አእምሮዬ በጸሎት እጅግ ተስቦ ነበር፤ በእርግጥም በቦስተን ባገለገልሁ ቁጥር ሁልጊዜ እንዲሁ ሆኖአል። በዚያ ሁልጊዜ ብዙ የጸሎት መንፈስ ተሰጥቶኛል። ነገር ግን በተለይ በዚህ የብርድ ወቅት አእምሮዬ ስለ ግል ቅድስና ጥያቄ እጅግ ተጨንቆ ነበር፤ እንዲሁም ስለ ቤተ ክርስቲያን ሁኔታ፥ በእግዚአብሔር ዘንድ ኃይል ስለ ማጣቷ፥ በቦስተን ስላሉት ኦርቶዶክሳዊ አብያተ ክርስቲያናት ድካም፥ ስለ እምነታቸው ድካምና በእንዲህ ያለ ማኅበረሰብ መካከል ኃይል ስለ ማጣታቸው እጅግ ተጨንቄ ነበር። የዚያችን ከተማ ስሕተቶች በማሸነፍ ረገድ ጥቂት ወይም ምንም እድገት አለማድረጋቸው አእምሮዬን እጅግ ነካው።
ራሴን ለብዙ ጸሎት ሰጠሁ። ከምሽት አገልግሎቶቼ በኋላ በተቻለኝ መጠን ቀድሜ እተኛ ነበር፤ ነገር ግን ከዚያ በላይ መተኛት ስለማልችል ከሌሊቱ በአሥር ሰዓት እነሣና ወዲያውኑ ወደ ጥናት ክፍሌ ሄጄ በጸሎት እተጋ ነበር። አእምሮዬም እጅግ ጥልቅ በሆነ ሁኔታ ተጨንቆና በጸሎት ተውጦ ስለ ነበር፥ ብዙ ጊዜ ከተነሣሁበት ከሌሊቱ አሥር ሰዓት ጀምሮ የቁርስ ደወል እስከሚጠራበት እስከ ጠዋቱ ሁለት ሰዓት ድረስ እቀጥል ነበር። ቀኖቼን ጊዜ እስካገኘሁ ድረስ መጻሕፍትን በመመርመር አሳልፍ ነበር። ያን የብርድ ወቅት ሁሉ ከመጽሐፍ ቅዱሴ በቀር ሌላ ምንም አላነበብሁም፤ ብዙው ክፍሉም አዲስ መሰለኝ። ጌታ እንደ ገና ከዘፍጥረት እስከ ራእይ ድረስ ይዞ አሳለፈኝ ማለት ይቻላል። የነገሮችን ትስስር፥ የተስፋ ቃሎቹን፥ ማስፈራሪያዎቹን፥ ትንቢቶቹንና መፈጸማቸውን እንዳይ መራኝ፤ በእርግጥም መጽሐፍ ሁሉ በብርሃን የሚንበለበል መሰለኝ፤ ብርሃን ብቻም አይደለም፥ የእግዚአብሔር ቃል በእግዚአብሔር ሕይወት ራሱ የተሞላ መሰለኝ።
በዚህ ሁኔታ ለሳምንታትና ለወራት ከጸለይሁ በኋላ፥ አንድ ቀን ጠዋት በጸሎት ላይ ሳለሁ እንዲህ የሚል ሐሳብ መጣብኝ፦ ከዚህ ሁሉ መለኮታዊ ትምህርት በኋላ ፈቃዴ ባይማረክ፥ ይህም ትምህርት በስሜቴ ላይ ብቻ ቢሠራስ? መጽሐፍ ቅዱስን በማንበብ ከተገለጡልኝ ከእነዚህ መገለጦች የተነሣ ስሜቴ ብቻ ተነክቶ ልቤ ግን በእነርሱ በእውነት ያልተገዛ ሊሆን አይችልምን? በዚህ ጊዜ እንደዚህ ያሉ በርካታ የመጽሐፍ ክፍሎች ትዝ አሉኝ፦ «ሄደው ወደ ኋላ እንዲወድቁ፥ እንዲሰበሩም፥ በወጥመድም እንዲያዙ፥ እንዲጠመዱም፥ ትእዛዝ በትእዛዝ ላይ፥ ትእዛዝ በትእዛዝ ላይ፥ ሥርዓት በሥርዓት ላይ፥ ሥርዓት በሥርዓት ላይ፥ ጥቂት በዚህ፥ ጥቂት በዚያ ይሆንላቸዋል።» ራሴን እያታለልሁ ሊሆን ይችላል የሚለው ሐሳብ መጀመሪያ በመጣብኝ ጊዜ እንደ እፉኝት ነደፈኝ ማለት ይቻላል። ልገልጸው የማልችለውን ሥቃይ ፈጠረብኝ። በዚያ አቅጣጫ ትዝ ያሉኝ የመጽሐፍ ክፍሎች ለጥቂት ጊዜ ጭንቀቴን እጅግ አበዙት። ነገር ግን ወዲያውኑ በፍጹሙ የእግዚአብሔር ፈቃድ ላይ ራሴን እንድጥል ተደረግሁ። ጌታን፦ ጥበብና መልካም መሆኑን ካየ፥ ክብሩም እንድታለልና ወደ ሲኦል እንድወርድ መተውን የሚጠይቅ ከሆነ ፈቃዱን እንደምቀበል ነገርሁት፤ «በፊትህ መልካም መስሎ የታየህን አድርግብኝ» አልሁት።
ይህ ከመሆኑ ጥቂት ቀደም ብሎ፥ ከዚያ በፊት ግዴታዬ እንደ ሆነ ካየሁት ወይም ይቻላል ብዬ ካሰብሁት በላቀ ትርጕም ራሴን ለእግዚአብሔር ለመቀደስ ታላቅ ትግል አድርጌ ነበር። ከዚያ በፊት ቤተሰቤን ሁሉ በእግዚአብሔር መሠዊያ ላይ አኑሬ እንደ ፈቃዱ እንዲያደርጋቸው ብዙ ጊዜ ትቻቸው ነበር። ነገር ግን አሁን በምናገርለት በዚህ ጊዜ፥ ሚስቴን ለእግዚአብሔር ፈቃድ አሳልፌ ስለ መስጠት ታላቅ ትግል ገጥሞኝ ነበር። ጤንነቷ እጅግ ደካማ ነበር፤ ብዙ ጊዜ መኖር እንደማትችልም እጅግ ግልጽ ነበር። እርሷንና ያለኝን ሁሉ በእግዚአብሔር መሠዊያ ላይ ማኖር ምን እንደሚጨምር ከዚያ በፊት እንዲህ ግልጽ ሆኖ አይቼው አላውቅም ነበር፤ ያለ አንዳች ገደብ ለእግዚአብሔር ፈቃድ አሳልፌ ልሰጣት በጕልበቴ ተንበርክኬ ለሰዓታት ታገልሁ። ነገር ግን ይህን ማድረግ እንዳልቻልሁ አገኘሁ። በዚህ እጅግ ደንግጬና ተገርሜ ስለ ነበር፥ ከሥቃዩ የተነሣ እጅግ በላብ ተጠመቅሁ። እስክደክም ድረስ ታገልሁ፤ ጸለይሁም፤ ሆኖም እንደ ወደደ እንዲያደርጋት ምንም ተቃውሞ በማላነሣበት ሁኔታ ፈጽሞ ለእግዚአብሔር ፈቃድ አሳልፌ ልሰጣት ፍጹም እንዳልቻልሁ አገኘሁ።
ይህ እጅግ አስጨነቀኝ። ምን ዓይነት ትግል እንዳደረግሁና ያለ ምንም ገደብ ለፍጹሙ የእግዚአብሔር ፈቃድ አሳልፌ ልሰጣት ፈቃደኛ ባለመሆኔ የተሰማኝን ጭንቀት ለሚስቴ ጻፍሁላት። ይህ የሆነው አሁን እንደሚመስለኝ ፈተና ከነበረው፥ ከተናገርሁለት ከዚያ ፈተና እጅግ ጥቂት ቀደም ብሎ ነበር፤ በዚያን ጊዜ እነዚያ የመጽሐፍ ክፍሎች በጭንቀት ወደ አእምሮዬ መጥተው ነበር፤ ሃይማኖቴ የስሜት ብቻ ሊሆን ይችላል፥ የእግዚአብሔርም ትምህርት በስሜቴ ላይ ብቻ ሠርቶ ሊሆን ይችላል በሚለው ሐሳብ፥ ለጥቂት ጊዜ የሞት ያህል የሆነ መራራነት የያዘኝ መሰለ። ነገር ግን እንዳልሁት፥ ከጊዜ በኋላ የሰይጣን የሚንበለበል ፍላጻ እንደ ነበረ ካመንሁበት ከዚህ ተስፋ መቍረጥና መራራነት ጋር ለጥቂት ጊዜ ከታገልሁ በኋላ፥ ከዚያ በፊት ካደረግሁት በጠለቀ ትርጕም፥ ወሰን በሌለው ብሩክና ፍጹም በሆነው የእግዚአብሔር ፈቃድ ላይ ራሴን እንድጥል ተደረግሁ። ከዚያም ራሴን፥ ሚስቴንና ቤተሰቤን ሁሉ እንደ ገዛ ጥበቡ እንዲያደርገን ለመስጠት ፍጹም ፈቃደኛ እስክሆን ድረስ በእርሱ ላይ ታላቅ መተማመን እንዳለኝ ለጌታ ነገርሁት።
ከዚያም ራስን ለእግዚአብሔር መቀደስ ምን እንደሚጨምር ከዚያ በፊት ከነበረኝ ሁሉ የጠለቀ እይታ አገኘሁ። ነገሩን ሁሉ ከጫፍ እስከ ጫፍ በማሰላሰልና ሁሉን ነገር ለእግዚአብሔር ፈቃድ አሳልፌ በመስጠት ረጅም ጊዜ በጕልበቴ ተንበርክኬ አሳለፍሁ፤ የቤተ ክርስቲያንን ጥቅም፥ የሃይማኖትን እድገት፥ የዓለምን መለወጥ፥ የገዛ ነፍሴንም መዳን ወይም መኰነን የእግዚአብሔር ፈቃድ እንደሚወስነው ሰጠሁ። በእርግጥም ብሩክ ፈቃዱ የሚስማማበትን ማናቸውንም ነገር በእኔም ሆነ በእኔ በሆኑት ላይ ሊያደርግ እንደሚችል በሙሉ ልቤ ለጌታ እስከ መናገር ድረስ እንደ ሄድሁ ትዝ ይለኛል፤ እኔ ልቃወመው የምችለውን ማናቸውንም ነገር ለማድረግ ሊስማማ እንደማይችል እስካምን ድረስ በቸርነቱና በፍቅሩ ላይ ፍጹም መተማመን እንደ ነበረኝም ነገርሁት። በፊቱ መልካም መስሎ እንደ ታየው በእኔ ላይ እንዲያደርግ ስነግረው አንድ ዓይነት ቅዱስ ድፍረት ተሰማኝ፤ ፍጹም ጥበብና መልካም ያልሆነን ማናቸውንም ነገር ሊያደርግ አይችልምና፤ ስለዚህ እኔንና የእኔ የሆኑትን በሚመለከት እርሱ የሚስማማበትን ማናቸውንም ነገር ለመቀበል ከሁሉ የተሻለ ምክንያት ነበረኝ። እንዲህ ያለ ጥልቅና ፍጹም በእግዚአብሔር ፈቃድ ማረፍን ከዚያ በፊት ፈጽሞ አላውቅም ነበር።
እንግዳ የሆነብኝ ነገር ይህ ነው፤ የቀድሞ ተስፋዬን መያዝ አልቻልሁም፤ ቀደም ብዬ ያሳለፍኋቸውን የኅብረትና የመለኮታዊ መረጋገጫ ወቅቶችንም በምንም ትኩስነት ማስታወስ አልቻልሁም። ተስፋዬን ትቼ ሁሉን ነገር በአዲስ መሠረት ላይ አሳረፍሁ ማለት እችላለሁ። ይህም ማለት በማናቸውም ያለፈ ልምድ ላይ የተመሠረተውን ተስፋዬን ትቼ፥ ሊያድነኝ አስቦ እንደ ሆነ ወይም እንዳልሆነ እንደማላውቅ ለጌታ እንደ ነገርሁት ትዝ ይለኛል። ማወቅም አላሳሰበኝም። ውጤቱን ለመጠበቅ ፈቃደኛ ነበርሁ። እንዲህም አልሁ፦ ቢጠብቀኝ፥ በመንፈሱም በውስጤ ቢሠራ፥ ለሰማይም ቢያዘጋጀኝ፥ በነፍሴም ውስጥ ቅድስናንና የዘላለምን ሕይወት ቢሠራ፥ ሊያድነኝ እንዳሰበ እቀበለዋለሁ፤ በሌላ በኩል ግን ከመለኮታዊ ኃይልና ብርሃንና ፍቅር ባዶ ሆኜ ራሴን ባገኘው፥ ወደ ሲኦል ሊልከኝ ጥበብና ተገቢ እንደ ሆነ አይቶአል ብዬ እደመድማለሁ፤ በሁለቱም ሁኔታ ፈቃዱን እቀበላለሁ። አእምሮዬ በፍጹም ጸጥታ ውስጥ ረጋ።
ይህ የሆነው በማለዳ ነበር፤ በዚያም ቀን ሁሉ በሥጋም በነፍስም በፍጹም ዕረፍት ላይ ያለሁ መሰለኝ። በቀኑ ውስጥ፦ «አሁንም ራስህን ለእግዚአብሔር በመቀደስህ ጸንተሃልን? በእግዚአብሔርስ ፈቃድ ትኖራለህን?» የሚል ጥያቄ በአእምሮዬ ብዙ ጊዜ ይነሣ ነበር። እኔም ሳላመነታ፦ «አዎን፥ ምንም ነገር አልመልስም። ምንም ነገር የምመልስበት ምክንያት የለኝም፤ በቃል ኪዳኖቼና በምስክርነቴ ምክንያታዊ ከሆነው በላይ አልሄድሁም። ምንም ነገር የምመልስበት ምክንያት የለኝም፤ ምንም ነገር መመለስም አልፈልግም» አልሁ። ልጠፋ እችላለሁ የሚለው ሐሳብ አላስጨነቀኝም። በእርግጥም በዚያ ቀን ሁሉ የቻልሁትን ያህል ባስብም፥ በአእምሮዬ ውስጥ ትንሹን ፍርሃት፥ ትንሹን የሚረብሽ ስሜት እንኳ ማግኘት አልቻልሁም። ምንም ነገር አላስጨነቀኝም። አልተኵራራሁም፤ አልተዋረድሁምም፤ እኔ እንደማየው ደስተኛም ኀዘንተኛም አልነበርሁም። በእግዚአብሔር ላይ የነበረኝ መተማመን ፍጹም ነበር፤ ፈቃዱን መቀበሌም ፍጹም ነበር፤ አእምሮዬም እንደ ሰማይ የረጋ ነበር።
ልክ በምሽት፦ «እግዚአብሔር ወደ ሲኦል ቢልክህስ፥ ታዲያ ምን ይሆናል?» የሚል ጥያቄ በአእምሮዬ ተነሣ። «እንግዲያማ አልቃወመውም።» ቀጣዩ ጥያቄም፦ «ነገር ግን አንተ በምትቀበለው ትርጕም ፈቃዱን የሚቀበለውን ሰው ወደ ሲኦል ሊልክ ይችላልን?» የሚል ነበር። ይህ ጥያቄ በአእምሮዬ እንደ ተነሣ ወዲያውኑ መልስ አገኘ። «አይችልም፤ የማይቻል ነው። የእግዚአብሔርን ፍጹም ፈቃድ ከተቀበልሁ ሲኦል ለእኔ ሲኦል ሊሆን አይችልም» አልሁ። ይህም በአእምሮዬ ውስጥ ለሳምንታትና ለወራት፥ በእርግጥም ለዓመታት ማለት እችላለሁ፥ እየበዛና እየበዛ የሄደ የደስታ ምንጭ አፈለቀ። ለዓመታት አእምሮዬ በማናቸውም ጉዳይ በጭንቀት እንዳይያዝ በደስታ እጅግ የተሞላ ነበር። ለረጅም ጊዜ እንዲያ ብርቱና የተራዘመ የነበረው ጸሎቴ ሁሉ ወደ፦ «ፈቃድህ ትሁን» የፈሰሰ መሰለ። ምኞቶቼ ሁሉ የተፈጸሙ መሰለ። ለራሴ ስጸልይለት የነበረውን ነገር ፈጽሞ ባልጠበቅሁት መንገድ ተቀብዬ ነበር። «ቅድስና ለጌታ» በአእምሮዬ እንቅስቃሴዎች ሁሉ ላይ የተጻፈ መሰለ። እግዚአብሔር ፍጹም ፈቃዱን ሁሉ እንደሚፈጽም እጅግ ጽኑ እምነት ስለ ነበረኝ፥ ስለ ምንም ነገር መጨነቅ አልቻልሁም። በብርቱ ጭንቀት በምጸልይባቸው ወቅቶች አእምሮዬን ይዘውት የነበሩት ታላላቅ ጭንቀቶች ወደ ጎን የተተዉ መሰሉ፤ ስለዚህም ለረጅም ጊዜ ከእርሱ ጋር ለመነጋገር ወደ እግዚአብሔር በሄድሁ ጊዜ — ይህንም እጅግ እጅግ ብዙ ጊዜ አደርግ ነበር — በጕልበቴ ተንበርክኬ፥ ፈቃዱ በሰማይ እንደ ሆነች እንዲሁ በምድር ትሁን ከማለት በቀር ምንም ነገር በትጋት መለመን እንደማይቻለኝ አገኝ ነበር። ጸሎቶቼ በዚያ ተዋጡ፤ ብዙ ጊዜም በእግዚአብሔር ፊት እንደ ፈገግሁ ሆኜ ምንም ነገር እንደማልፈልግ ስናገር ራሴን አገኝ ነበር። ጥበብ ያለበትንና መልካም የሆነውን በጎ ፈቃዱን ሁሉ እንደሚፈጽም እጅግ እርግጠኛ ነበርሁ፤ በዚያም ነፍሴ ፍጹም ረካች።
በዚህ ጊዜ ለረጅም ዘመን ስታገለው የነበረው ያ ታላቅ ትግል ከእኔ ተወገደ፤ ከዚህም አዲስና የሰፋ ልምዴ ጋር በሚስማማ መንገድ ለጉባኤው መስበክ ጀመርሁ። በቤተ ክርስቲያኒቱ ውስጥ ያሉና ስብከቴን የሚከታተሉ የተረዱኝ ቍጥራቸው ጥቂት ያልሆነ ሰዎች ነበሩ፤ እነርሱም በአእምሮዬ ውስጥ ያለፈውንና አሁንም የሚያልፈውን ከስብከቴ አስተዋሉ። በአሰባበኬ ላይ የመጣውን ታላቅ ለውጥ ሕዝቡ ከእኔ ይበልጥ ተገንዝበውት ነበር ብዬ እገምታለሁ። እርግጥ ነው፥ አእምሮዬ በዚህ ጉዳይ እጅግ ተሞልቶ ስለ ነበር፥ በጌታ በኢየሱስ ክርስቶስ ካለው ሙሉና አሁን ካለው መዳን በቀር ሌላ ምንም ልሰብክ አልቻልሁም።
በዚያን ጊዜ ነፍሴ ከዚህ ቀደም ፈጽሞ ባላሰብሁትና ባልተረዳሁት መንገድ ከክርስቶስ ጋር የተጋባች መሰለኝ። የመኃልየ መኃልይ ቋንቋ እንደ እስትንፋሴ ተፈጥሮአዊ ሆነልኝ። ሰሎሞን ያን መዝሙር በጻፈ ጊዜ የነበረበትን የአእምሮ ሁኔታ በሚገባ የተረዳሁት መሰለኝ፤ በዚያን ጊዜም፥ ከዚያ ወዲህ ሁልጊዜ እንዳሰብሁት፥ ያ መዝሙር የተጻፈው ከታላቁ ከእግዚአብሔር መራቁ ከተመለሰ በኋላ ነው ብዬ ደመደምሁ። የመጀመሪያ ፍቅሬ ትኩስነት ሁሉ ነበረኝ ብቻ ሳይሆን፥ እጅግ ታላቅ ጭማሪም ተጨመረበት። በእርግጥም ጌታ ከዚህ ቀደም ካየሁት ሁሉ እጅግ ከፍ አደረገኝ፤ ስለ መጽሐፍ ቅዱስ ትርጕም፥ ስለ ክርስቶስ ግንኙነቶች፥ ስለ ኃይሉና ስለ ፈቃደኝነቱ እጅግ ብዙ አስተማረኝ፤ ስለዚህም ብዙ ጊዜ «እንዲህ ያለ ነገር እውነት እንደ ሆነ አላውቅም ነበር፤ አላሰብሁትም ነበር» እያልሁ ስናገረው ራሴን አገኘው ነበር። ያን ጊዜ እርሱ «ከምንለምነው ወይም ከምናስበው ሁሉ ይልቅ እጅግ አብልጦ ሊያደርግ» እንደሚቻለው የሚናገረው ቃል ምን ማለት እንደ ሆነ ተገነዘብሁ። በዚያን ጊዜ በእርግጥ ከለመንሁትና ካሰብሁት ሁሉ ወሰን በሌለው መጠን አብልጦ አስተማረኝ። የጸጋውን ርዝመትና ስፋት፥ ከፍታና ጥልቀት፥ ውጤታማነቱንም ፈጽሞ አልተረዳሁም ነበር።
በዚያን ጊዜ «ጸጋዬ ይበቃሃል» የሚለው ቃል እጅግ ብዙ ትርጕም ያለው ሆኖ ስለ ታየኝ፥ ከዚህ በፊት አለመረዳቴ አስደናቂ ነገር መሰለኝ። እነዚህ መገለጦች ሲገለጡልኝ «ድንቅ! ድንቅ! ድንቅ!» እያልሁ ስጮኽ ራሴን አገኘሁ። ያን ጊዜ ነቢዩ «ስሙም ድንቅ መካር፥ ኃያል አምላክ፥ የዘላለም አባት፥ የሰላም አለቃ ተብሎ ይጠራል» ባለ ጊዜ ምን ማለቱ እንደ ሆነ ተረዳሁ። ወደ ቤቴ እንድመለስ እስከ ተገደድሁበት ጊዜ ድረስ የቀረውን የብርዱን ወቅት ከሞላ ጎደል በሙሉ በክርስቶስ ስላለው ሙላት ሕዝቡን በማስተማር አሳለፍሁት። ነገር ግን የሕዝቡ አብዛኞቹ ሊረዱት ከሚችሉት በላይ እንደ ሰበክሁ ተገነዘብሁ። አልተረዱኝም። እርግጥ የተረዱኝ ቍጥራቸው ጥሩ የሆነ ሰዎች ነበሩ፤ እነርሱም በነፍሳቸው እጅግ በሚያስደንቅ ሁኔታ ተባረኩ፤ እኔም እንደማምንበት፥ በመለኮታዊው ሕይወት ቀድሞ በሕይወት ዘመናቸው ሁሉ ካደረጉት የበለጠ እድገት አደረጉ።
ነገር ግን በዚያ የተመሠረተችው ትንሿ ቤተ ክርስቲያን በብዙ መጠን በጤናማና በውጤታማ መንገድ አብረው ሊሠሩ ከሚችሉ ሰዎች የተዋቀረች አልነበረችም። ከውጭ የሚመጣባቸው ተቃውሞ ታላቅ ነበር። በከተማይቱ ውስጥ እምነታቸውን የሚመሰክሩ ክርስቲያኖች ብዙኃኑ እንኳ ከእነርሱ ጋር ፈጽሞ አልተባበሩም። የአብያተ ክርስቲያናቱ ሕዝብ በአጠቃላይ ስለ መቀደስ ያለኝን አመለካከት ለመቀበል በሚችሉበት ሁኔታ ላይ አልነበሩም፤ ምንም እንኳ ከሞላ ጎደል በሁሉም አብያተ ክርስቲያናት ውስጥ በጥልቅ የተሳቡና እጅግ የተባረኩ ግለሰቦች ቢኖሩም፥ በአጠቃላይ ግን የሰጠሁት ምስክርነት ለእነርሱ የማይገባ ነበር።
አንዳንዶቹ ግን እኔ ያለሁበትን ማየት ይችሉ ነበር። አንድ ምሽት ዲያቆን ፒ—— እና ዲያቆን ኤስ—— ስብከቴን ሰምተውና በጉባኤው ላይ ያስከተለውን ውጤት አይተው፥ ከመስበኪያው መድረክ ከወረድሁ በኋላ ወደ እኔ መጥተው እንዲህ እንዳሉኝ አስታውሳለሁ፦ «እንዴ፥ አንተ በዚህች ከተማ ከእኛ እጅግ ርቀህ ቀድመሃል፤ ከአገልጋዮቻችንም እጅግ ርቀህ ቀድመሃል። አገልጋዮቻችን መጥተው እነዚህን እውነቶች እንዲሰሙ እንዴት ልናደርጋቸው እንችላለን?» እኔም፦ «አላውቅም። ነገር ግን እኔ እንደማያቸው ነገሮችን ቢያዩ እመኛለሁ፤ በቦስተን ከፍ ያለ የቅድስና መለኪያ እንዲኖር ማድረግ ወሰን በሌለው መጠን አስፈላጊ መስሎ ይታየኛልና» ብዬ መለስሁላቸው። እነዚህ እውነቶች በአጠቃላይ ለሕዝቡ እንዲቀርቡ እጅግ የጓጉ ይመስሉ ነበር። የቦስተን ሕዝብ በሚገባ እንደሚያውቀው፥ እነርሱ ደጋግ ሰዎች ነበሩ፤ ነገር ግን አገልጋዮቻቸውና ሕዝባቸው እንዲገኙ በእርግጥ ምን ያህል ጥረት እንዳደረጉ ልናገር አልችልም።
በዚያ የብርድ ወቅት በአብዛኛው የደከምሁት በክርስቲያኖች መካከል ሃይማኖታዊ መነቃቃት እንዲሆን ነበር። ጌታም በራሴ ነፍስ ውስጥ በሠራው ታላቅ ሥራ ለዚህ አዘጋጀኝ። ምንም እንኳ መለኮታዊው ሕይወት በውስጤ በብዙ ሲሠራ የቆየ ቢሆንም፥ ቀደም ብዬ እንዳልሁት በዚያ የብርድ ወቅት ያየሁት ልምድ ከዚያ በፊት ካየሁት ሁሉ እጅግ ስለ በለጠ፥ አንዳንድ ጊዜ ከዚያ በፊት በእውነት ከእግዚአብሔር ጋር ኅብረት አድርጌ እንደ ነበር ለማመን ያቅተኝ ነበር።
እርግጥ ነው፥ ብዙ ጊዜና ለረጅም ጊዜም ኅብረት አድርጌ ነበር፤ ይህንንም ሳሰላስልበትና በተደጋጋሚ ያለፍሁበትን ሳስታውስ አውቅ ነበር። በዚያ የብርድ ወቅት፥ ምናልባት ወደ ሰማይ በደረስን ጊዜ አመለካከታችን፥ ደስታችንና ቅዱስ ተግባሮቻችን በዚህ ሕይወት ካየነው ማናቸውም ነገር እጅግ ስለሚበልጡ፥ በዚህ ዓለም ሳለን ምንም ሃይማኖት እንደ ነበረን እንኳ ለማወቅ እንቸገር ይሆናል ብዬ አሰብሁ። በእርግጥ ብዙ ጊዜ የማይነገር ደስታና ከእግዚአብሔር ጋር እጅግ ጥልቅ ኅብረት አይቼ ነበር፤ ነገር ግን ይህ ሁሉ በሰፋው ልምዴ ፊት እጅግ ከመደብዘዙ የተነሣ፥ በተባረከው ወንጌሉ ውስጥ ስለ ተገለጡት አስደናቂ ነገሮችና በክርስቶስ ኢየሱስ ስላለው አስደናቂ ጸጋ ከዚህ በፊት ምንም ግንዛቤ እንዳልነበረኝ ብዙ ጊዜ ለጌታ እነግረው ነበር። ሳሰላስልበት ይህ አነጋገር በንጽጽር እንደ ሆነ አውቅ ነበር፤ ቢሆንም ለጊዜው የቀድሞ ልምዶቼ ሁሉ የታተሙና ከዓይኔ ሊጠፉ የተቃረቡ መሰሉ። የዚያ ወቅት ታላቅ ስሜት እየበረደና አእምሮዬ እየተረጋጋ በሄደ ጊዜ፥ የክርስቲያናዊ ልምዴን የተለያዩ ደረጃዎች ይበልጥ በግልጽ አየሁ፤ ሁሉም ከመጀመሪያ እስከ መጨረሻ በእግዚአብሔር የተሠሩ መሆናቸውን በማየትም የነገሮችን ትስስር ተገነዘብሁ። ከዚያ ወዲህ ግን ቀድሞ ብዙ ጊዜ ያሳለፍኋቸውን እነዚያን ታላላቅ ትግሎችና ረጅም የጣር ጸሎት ወቅቶች ፈጽሞ አላየሁም። በራሴ ልምድ፥ በእግዚአብሔር ፊት ማሸነፍ ከቀድሞው ፍጹም የተለየ ነገር ሆኗል። ይበልጥ ፍጹም በሆነ መተማመን ስለምቀርብ፥ ይበልጥ በእርጋታ ወደ እግዚአብሔር መቅረብ እችላለሁ። አሁን በእርሱ እንዳርፍና ሁሉንም ነገር ወደ ፍጹም ፈቃዱ እንድተው የሚያስችለኝ፥ ከዚያ የብርድ ወቅት ልምድ በፊት ከነበረው ሁሉ እጅግ በበለጠ ፈቃደኝነት ነው።
ከዚያ ወዲህ ሃይማኖታዊ ነጻነት፥ ሃይማኖታዊ ብርታትና በእግዚአብሔርና በቃሉ ደስ መሰኘት፥ የእምነት ጽናት፥ ክርስቲያናዊ ነጻነትና የተትረፈረፈ ፍቅር ተሰምቶኛል፤ እነዚህንም ከዚያ በፊት አልፎ አልፎ ብቻ ነበር ያየኋቸው ማለት እችላለሁ። ይህን ስል እንዲህ ያሉት ተግባሮች ከዚያ በፊት ለእኔ ብርቅ ነበሩ ማለቴ አይደለም፤ ተደጋጋሚና ብዙ ጊዜ የሚመላለሱ ነበሩና፤ ነገር ግን ከዚያ ወዲህ እንደ ሆኑት የሚጸኑ አልነበሩም። ባርነቴ በዚያን ጊዜ ፈጽሞ የተሰበረ መሰለ፤ ከዚያ ወዲህም አፍቃሪ ወላጅ እንዳለው ልጅ ነጻነት አለኝ። እግዚአብሔርን በውስጤ በእርሱ ላይ ዐርፌ ጸጥ ልል፥ ልቤን በእጁ ላይ ላኖር፥ በፍጹም ፈቃዱም ውስጥ ልጠለል፥ ምንም ጭንቀትና ሥጋት ሳይኖርብኝ በሚያስችለኝ መንገድ ማግኘት የምችል ይመስለኛል።
ከዚያ ጊዜ ወዲህ ስለ እነዚህ ተግባሮች የማያቋርጡ እንደ ሆኑ እናገራለሁ፤ ነገር ግን ፈጽሞ ያልተቋረጡ ነበሩ ብዬ ማረጋገጥ አልችልም፤ በ1860 በሕመም ወቅት የታላቅ ጭንቀትና አስደናቂ የመዋረድ ወቅት አሳልፌአለሁና። ነገር ግን ጌታ ከዚያ አውጥቶ ወደ ጸና ሰላምና ዕረፍት አገባኝ።
ከዚህ የመታደስ ወቅት ጥቂት ዓመታት በኋላ፥ ቀደም ብዬ የተናገርሁላት ያቺ የተወደደች ሚስቴ ሞተች። ይህ ለእኔ ታላቅ መከራ ነበር። ቢሆንም ምንም ማጕረምረም ወይም ለእግዚአብሔር ፈቃድ ትንሽ እንኳ መቃወም አልተሰማኝም። እኔ እስከማስታውሰው ድረስ ምንም ሳልቃወም ለእግዚአብሔር አሳልፌ ሰጠኋት። ነገር ግን ለእኔ ታላቅ ኀዘን ነበር። እርሷ በሞተች በማግሥቱ ሌሊት፥ በክፍሌ ውስጥ ብቻዬን ተኝቼ ነበር፤ አንዳንድ ክርስቲያን ወዳጆችም በእንግዳ መቀበያው ክፍል ተቀምጠው ሌሊቱን ያነጉ ነበር። ለጥቂት ጊዜ ተኝቼ ነበር፤ ስነቃም የሐዘኔ ሐሳብ በምን ያህል ኃይል በአእምሮዬ ላይ ብልጭ አለ! ሚስቴ ሄደች! ዳግመኛ ስትናገር አልሰማትም፥ ፊቷንም አላያትም! ልጆቿ እናት አልባ ሆኑ! ምን ላድርግ? አእምሮዬ ከመዘውሩ የሚወልቅ ይመስል ራሴ የሚዞር መሰለ። ወዲያውኑ ከአልጋዬ ተነሥቼ፦ «በእግዚአብሔር ማረፍ ካልቻልሁ አእምሮዬን እስታለሁ!» ብዬ ጮኽሁ። ጌታ ለዚያ ሌሊት አእምሮዬን ቶሎ አረጋጋው፤ ቢሆንም አሁንም አልፎ አልፎ ሊያሸንፈኝ የሚቃረብ የኀዘን ወቅት ይመጣብኝ ነበር።
አንድ ቀን በዚሁ ጉዳይ ከእግዚአብሔር ጋር እየተነጋገርሁ በጕልበቴ ተንበርክኬ ሳለሁ፥ ድንገት እንዲህ ያለኝ መሰለኝ፦ «ሚስትህን ትወዳት ነበርን?» «አዎን» አልሁ። «እንግዲያውስ ስለ ራሷ ብለህ ነበር የወደድሃት ወይስ ስለ ራስህ ብለህ? እርሷን ነበር የወደድኸው ወይስ ራስህን? ስለ ራሷ ብለህ ከወደድሃት፥ ከእኔ ጋር በመሆኗ ለምን ታዝናለህ? ስለ ራሷ ብለህ ከወደድሃት፥ ከእኔ ጋር ያላት ደስታ ከማዘን ይልቅ ደስ ሊያሰኝህ አይገባምን? ስለ እኔ ብለህ ነበርን የወደድሃት?» ብሎ ያለኝ መሰለኝ። «ስለ እኔ ብለህ ከወደድሃት፥ በእርግጥ ከእኔ ጋር በመሆኗ አታዝንም ነበር። ስለ እርሷ ትርፍ ከማሰብ ይልቅ ስለ ኪሳራህ ለምን ታስባለህ፤ በዚያስ ላይ ለምን ይህን ያህል ትኩረት ታደርጋለህ? እርሷ እጅግ ደስተኛና ሐሤተኛ ሆና ሳለች አንተ ልታዝን ትችላለህን? ስለ ራሷ ብለህ ከወደድሃት፥ በደስታዋ ደስ አይልህም ነበርን? በሐሤቷስ ሐሤት አታደርግም ነበርን?»
በዚህ ሁኔታ የተነገረኝ በመሰለኝ ጊዜ የተሰማኝን ስሜት ፈጽሞ ልገልጸው አልችልም። በአእምሮዬ ሁኔታ ሁሉ ላይ ቅጽበታዊ ለውጥ አመጣ። ከዚያች ቅጽበት ጀምሮ በኪሳራዬ ምክንያት የነበረው ኀዘን ለዘላለም ጠፋ። ከዚያ በኋላ ሚስቴን እንደ ሞተች ሳይሆን፥ በሕይወት እንዳለችና በሰማይ ክብር መካከል እንዳለች አሰብኋት። በዚያን ጊዜ እምነቴ እጅግ ጠንካራ፥ አእምሮዬም እጅግ የበራ ስለ ነበር፥ እርሷ በሰማይ ወዳለችበት የአእምሮ ሁኔታ ራሱ መግባት የምችል መሰለኝ፤ እዚህ ከሌለ መንፈስ ወይም በሰማይ ካለ ሰው ጋር ኅብረት ማድረግ የሚባል ነገር ካለ፥ ከእርሷ ጋር ኅብረት የማደርግ መሰለኝ። ይህን ስል ከእርሷ ጋር በአካል ኅብረት እስካደርግ ድረስ አጠገቤ ነበረች ብዬ ፈጽሞ አስቤ አይደለም። ነገር ግን በዚያ የአእምሮዋ ሁኔታ ምን እንደ ሆነ፥ በእግዚአብሔር ፍጹም ፈቃድ ውስጥ እንዴት ያለ ጥልቅና ያልተቋረጠ ዕረፍት እንዳላት የማውቅ መሰለኝ። ያ ሰማይ እንደ ሆነ ማየት ቻልሁ፤ በራሴ ነፍስም ቀመስሁት። የእነዚህን አመለካከቶች በረከት እስከ ዛሬ ድረስ ፈጽሞ አላጣሁትም። የሰማይ ነዋሪዎች ያሉበት የአእምሮ ሁኔታ ራሱ ሆነው ደጋግመው ወደ እኔ ይመለሳሉ፤ እነርሱም ለምን እንዲህ ባለ ብፅዕና ውስጥ እንዳሉ ማየት እችላለሁ።
ሚስቴ የሞተችው በሰማያዊ የአእምሮ ሁኔታ ውስጥ ሆና ነበር። በእግዚአብሔር ያላት ዕረፍት እጅግ ፍጹም ስለ ነበር፥ ይህን ዓለም ስትለቅ የእግዚአብሔርን ፍቅርና ታማኝነት ይበልጥ ሙሉ በሆነ መረዳት ውስጥ ብቻ የገባች መሰለኝ፤ ይኸውም በእግዚአብሔር ያላትን መታመንና ከፈቃዱ ጋር ያላትን አንድነት ለዘላለም እንዲያጸናና ፍጹም እንዲያደርግ ነው። ከዚያ ጊዜ ወዲህ በብዙ የኖርሁባቸው ልምዶች እነዚህ ናቸው። ነገር ግን በስብከት ረገድ፥ ነፍሴ በእነርሱ ላይ መኖር ደስ የሚላትን እነዚያን እውነቶች ሰብኬ የምረዳበት ስፍራ ከጥቂት ሰዎች በቀር የትም እንደሌለ ተገንዝቤአለሁ። ነፍሴ አሁንም መመገብ ደስ የሚላትን እነዚያን ስለ እግዚአብሔርና ስለ ክርስቶስ፥ ስለ ነጻ መዳኑም ሙላት ያሉትን አመለካከቶች የሚያደንቁና የሚቀበሉ ከራሴ ሕዝብ መካከል እንኳ ከጥቂቶች በላይ አግኝቼ አላውቅም። በየትኛውም ስፍራ ሕዝቡ እንዲረዱኝ ለማድረግ እነርሱ ወዳሉበት ደረጃ ለመውረድ እገደዳለሁ፤ ለብዙ ዓመታት በሰበክሁበት በእያንዳንዱ ስፍራም፥ ከወንጌል ሁሉ እጅግ ውድ እውነቶች እንደ ሆኑ የምቈጥራቸውን ለመረዳትና ለማድነቅ ፈጽሞ እስከማይችሉ ድረስ አብያተ ክርስቲያናቱን በዝቅተኛ ሁኔታ ላይ አግኝቻቸዋለሁ።
ንስሐ ላልገቡ ኃጢአተኞች ስሰብክ፥ እርግጥ ነው፥ ወደ መሠረታዊ ትምህርቶች ለመመለስ እገደዳለሁ። በራሴ ልምድ እነዚህን የውጭ ኬላዎችና መሠረታዊ ትምህርቶች ካለፍሁ ረጅም ጊዜ ስለ ሆነኝ፥ በእነዚያ እውነቶች ላይ መኖር አልችልም። ቢሆንም ንስሐ ያልገቡትን ለመለወጥ ስል እነርሱን ልሰብክላቸው ግድ ይለኛል። ወንጌልን ስሰብክ፥ በሃይማኖታዊ ሕይወት ገና ለጋ በሆኑት፥ እንዲሁም በእግዚአብሔር ቤተ ክርስቲያን ውስጥ ለረጅም ጊዜ ኖረው በክርስቶስ እውቀት እጅግ ጥቂት እድገት ባደረጉት ዘንድ የሚደነቁትንና ተቀባይነት የሚያገኙትን ማስተሰረያን፥ መለወጥን፥ እንዲሁም ብዙዎቹን የወንጌል ጐልተው የሚታዩ ትምህርቶች መስበክ እችላለሁ። ነገር ግን ነፍሴ በክርስቶስ የምታየውን ሙላት ለእግዚአብሔር ሕዝብ ማፍሰስ በእርግጥ ጠቃሚ ሆኖ የማገኘው አልፎ አልፎ ብቻ ነው። በዚህ ስፍራ የሚረዱኝና ያንን ዓይነት እውነት በጕጕት የሚቀበሉ ሰዎች ቍጥር በሌላ ስፍራ ካገኘሁት እጅግ ይበልጣል፤ ነገር ግን እዚህም እንኳ እምነታቸውን የሚመሰክሩ ክርስቲያኖች አብዛኞቹ እነዚያን እውነቶች በመረዳት አይቀበሏቸውም። አይቃወሙም፥ ተቃውሞም አያነሡም፤ በተረዱትም መጠን ይረቱበታል። ነገር ግን በልምድ ረገድ፥ በክርስቶስ ኢየሱስ ያለው የመዳን ወንጌል እጅግ ከፍ ያሉትና እጅግ ውድ የሆኑት እውነቶች ያላቸውን ኃይል አያውቁም።
ይህ በቦስተን ያሳለፍሁት የብርድ ወቅት በአብዛኛው እምነታቸውን ለሚመሰክሩ ክርስቲያኖች በመስበክ እንዳለፈና ብዙዎቹም በነፍሳቸው እጅግ እንደ ተባረኩ ተናግሬአለሁ። መሠረቱ በሆነ መንገድ እንደ ገና ካልተጣለ፥ በቦስተን ያሉ ክርስቲያኖችም ከፍ ያለ የክርስቲያናዊ ኑሮ ዓይነት ካልያዙ፥ ዩኒቴሪያኒዝምን ፈጽሞ ሊያሸንፉ እንደማይችሉ በጣም እርግጠኛ ነበርሁ። ኦርቶዶክሳውያን አገልጋዮች ዩኒቴሪያኒዝምን በመቃወም ለብዙ ዓመታት ኦርቶዶክሳዊነትን ሲሰብኩ እንደ ኖሩ፥ በክርክር ሊፈጸም የሚቻለውም ሁሉ እንደ ተፈጸመ አውቅ ነበር። ነገር ግን ዩኒቴሪያኖች የሚያስፈልጋቸው ክርስቲያኖች ንጹሑን የክርስቶስ ወንጌል በኑሯቸው ሲኖሩት ማየት እንደ ሆነ ተሰማኝ። ኢየሱስ ክርስቶስ መለኮታዊ አዳኝ እንደ ሆነና ከኃጢአት ሁሉ ሊያድናቸው እንደሚችል ክርስቲያኖች ሲናገሩ መስማት፥ የሚናገሩትንም በኑሯቸው ሲያረጋግጡ ማየት ያስፈልጋቸው ነበር። በክርስቶስ ላይ ያላቸው የእምነት ምስክርነት ከልምዳቸው ጋር አይስማማም ነበር። ክርስቶስን እንደሚሰብኩት ሆኖ በልምዳቸው አግኝተነዋል ማለት አይችሉም ነበር። ዩኒቴሪያኖችን ለማሳመን የእግዚአብሔር ሕያዋን ምስክሮች ምስክርነት፥ የልምድ ምስክርነት ያስፈልጋል፤ ተራ አመክንዮዎችና ክርክሮች ምንም ያህል አሳማኝ ቢሆኑ ስሕተቶቻቸውንና ጭፍን አመለካከቶቻቸውን ፈጽሞ አያሸንፉም።
በዚያ ያሉት ኦርቶዶክሳውያን አብያተ ክርስቲያናት እጅግ ሥርዓተ ተኮር ናቸው፤ ለተወሰኑ ልማዶች ተገዝተዋል፤ ዘዴዎችን ይፈራሉ፤ ነፍሳትን ለማዳን መንገዶችን በመጠቀም በሙሉ ነጻነት ወደ ፊት መግፋትን ይፈራሉ። በጸሎታቸውም ታስረው ያሉ መስለው ሁልጊዜ ይታዩኛል፤ ስለዚህም እኔ የጸሎት መንፈስ የምለውን በቦስተን ያየሁት እጅግ አልፎ አልፎ ነው። የአብያተ ክርስቲያናቱ አገልጋዮችና ዲያቆናት ደጋግ ሰዎች ቢሆኑም፥ ሃይማኖትን ለማስፋፋት በሚወስዷቸው ዘዴዎች ሕዝቡን በሚያነቃ መንገድ ወደ ፊት ቢገፉ ዩኒቴሪያኖች ምን ይሉ ይሆን ብለው ይፈራሉ። ሁሉ ነገር በተወሰነ መንገድ መደረግ አለበት። እንዲህ ላለው ባርነት በመገዛታቸውም መንፈስ ቅዱስ ያዝናል።
በቦስተን በአምስት ብርቱ ሃይማኖታዊ መነቃቃቶች ውስጥ ደክሜአለሁ፤ ዩኒቴሪያኒዝምንና በዚያ ያሉትን የስሕተት ዓይነቶች ሁሉ ለማሸነፍ በመንገድ ላይ ያለው ትልቁ እንቅፋት የክርስቲያኖችና የአብያተ ክርስቲያናት ፍርሃት እንደ ሆነ ልባዊ እምነቴን መግለጽ አለብኝ። ለዩኒቴሪያኖች ትችት ዘወትር የተጋለጡ መሆናቸውን ስለሚያውቁ፥ ከመጠን በላይ ጠንቃቆች ሆነዋል። እምነታቸው ተደቍሷል። ዩኒቴሪያኒዝምና ዩኒቨርሳሊዝም በዚያ መስፋፋታቸውም፥ ፕሬዚዳንት ኤድዋርድስ እንዳቀረበው የንስሐ ያልገቡትን አደጋ ከመስበክና ከማቅረብ ወደ ኋላ እንዳስቀራቸው በእርግጥ እፈራለሁ። ማለቂያ የሌለው የቅጣት ትምህርት፥ ፍጹም የመቀደስ አስፈላጊነት፥ ማለትም ለመዳን እንደ ቅድመ ሁኔታ ኃጢአትን ሁሉ መተው — በእርግጥም ሰዎችን ለማንቃት የሚያስችሉት ትምህርቶች — ለዚያች ከተማ መዳን አስፈላጊ በሆነው ድግግሞሽና ኃይል አይቀርቡም ብዬ እፈራለሁ።
በማርልቦሮ የጸሎት ቤት የነበረችው ትንሿ ቤተ ክርስቲያን እረኛቸው እንድሆን እጅግ ተመኙ፤ እኔም ይህን ጥያቄ በአእምሮዬ ይዤ ከቦስተን ተነሥቼ ወደ ቤቴ መጣሁ። ከዚያ በኋላ ወንድም ሲርስ ሄጄ በዚያ እንድኖር ሊያግባባኝ መደበኛ የጥሪ ደብዳቤ በኪሱ ይዞ መጣ። ነገር ግን ኦበርሊን ደርሶ መሄዴ ተገቢ ስለ መሆኑ በዚህ ያሉትን ወንድሞች ባማከረ ጊዜ፥ እጅግ ተስፋ ስላስቈረጡት ጉዳዩን ጨርሶ ለእኔ አላቀረበልኝም።