ግሪክኛና ጂም የሚባል ልጅ

«የእውነትን ቃል በቅንነት የሚናገር የማያሳፍርም ሠራተኛ ሆነህ፥ የተፈተነውን ራስህን ለእግዚአብሔር ልታቀርብ ትጋ።» — ከ2ኛ ጢሞቴዎስ 2

በ1944 በመጸው ወራት ቤቲ በቺካጎ አቅራቢያ ወደሚገኘው ወደ ዊተን ኮሌጅ ሄደች። እዚያም ግሪክኛ ለመማር መረጠች። በዚያ ዘመን አንዲት ወጣት ሴት ግሪክኛ መማሯ ያልተለመደ ነገር ነበር፤ ቤቲ ግን ጥሩ ምክንያት ነበራት። አዲስ ኪዳን መጀመሪያ የተጻፈው በግሪክኛ ነው። አንድ ቀን መጽሐፍ ቅዱስን የምትተረጉም ከሆነ፣ በመጀመሪያው ቋንቋው ልታነበው ፈለገች።

ግሪክኛ መማር ብዙ ድካም ይጠይቅ ነበር። ቤቲ ረጃጅም የቃላት ዝርዝሮችንና ሰዋሰውን ደጋግማ ደጋግማ ተማረች። ነገር ግን ጥንቁቅ አእምሮና ጥሩ ጆሮ ነበራት፤ እየቆየችም ግሪክኛን ወደደችው። በሕይወቷ ሁሉ የግሪክኛ አዲስ ኪዳኗን ከአጠገቧ አትለየውም ነበር።

ከአንድ ዓመት በኋላ ከፖርትላንድ፣ ኦሬገን አንድ አዲስ ተማሪ ወደ ዊተን መጣ። ስሙ ጂም ኤሊየት ነበር። ጂም ብርቱ፣ ሐሳቡን በግልጽ የሚናገርና በጣም ቀልደኛ ወጣት ነበር። የትግል ቡድኑ አባል ነበር፤ ኢየሱስንም በሙሉ ልቡ ይወድ ነበር። እርሱም ግሪክኛ ይማር ነበር! በኮሌጅ የጂም የቅርብ ጓደኛ የቤቲ ታናሽ ወንድም ዴቭ ነበር።

በ1947 በገና በዓል ዴቭ ጂምን አብሮት ወደ ሙርስታውን ቤታቸው እንዲሄድ ጋበዘው። ጂም ከሃዋርድ ቤተሰብ ጋር መዝሙር ዘመረ፤ አብሮአቸውም ጸለየ። ልክ በገዛ ቤቱ እንዳለ ሆኖ ተሰማው። ከዚያ በኋላ የዴቭን ዝምተኛና ቁም ነገረኛ እኅት በአዲስ ዓይን ማየት ጀመረ።

በጃንዋሪ 1948 ኮሌጅ እንደ ገና ሲጀመር፣ ቤቲና ጂም በአንድ ዓይነት የግሪክኛ ክፍሎች ውስጥ ተገናኙ፤ ስለዚህ አብረው አጠኑ። ስለ ግሪክኛ፣ ስለ መጽሐፍ ቅዱስ፣ ስለ ሚስዮን ሥራ፣ እንዲሁም እግዚአብሔር እንዲያደርጉ ስለሚፈልገው ነገር ይነጋገሩ ነበር። ሁለቱም ከምንም ነገር በላይ እግዚአብሔርን መታዘዝ ይፈልጉ ነበር።

ቤቲ የእግዚአብሔርን ቃል ለሌሎች ሰዎች ለማድረስ ስለ ፈለገች ግሪክኛን በትጋት ተማረች። የአንተም የትምህርት ቤት ሥራ በጥንቃቄና በሚገባ ስትሠራው እግዚአብሔርን የምታገለግልበት መንገድ ሊሆን ይችላል።

ውድ እግዚአብሔር ሆይ፣ የምማራቸውን ነገሮች በትጋት እንድማርና ለአንተ በሚገባ እንድሠራቸው እርዳኝ። አንተን የሚወዱ መልካም ጓደኞች ስለ ሰጠኸኝ አመሰግንሃለሁ። አሜን።