ማንበብ የሚወደው አለቃ

«የሚመራኝ ሳይኖር ይህ እንዴት ይቻለኛል?» — ከየሐዋርያት ሥራ 8

ክንዱ እየዳነ ሳለ ዴቪድ በአፍሪካ ያደገችውን የሮበርት ሞፋትን ልጅ ሜሪን አወቃት። በጃንዋሪ 9 ቀን 1845 ተጋቡ። ብዙም ሳይቆዩ ሴቸሌ ወደሚባል አንድ አለቃ ከተማ ተዛወሩ፤ ይህ አለቃ ዴቪድ እንዲመጣ ጠይቆት ነበር።

የባክዌና ሕዝብ አለቃ የሆነው ሴቸሌ ዕድሜው ከዴቪድ ጋር ተቀራራቢ ነበር። ዴቪድ እንደ ጻፈው፣ ሴቸሌ ፊደላትን የተማረው ገና በመጀመሪያው ቀን ነበር! ብዙም ሳይቆይ መጽሐፍ ቅዱስን ያነብ ጀመር፤ በጣም የሚወደውም መጽሐፍ ኢሳይያስ ነበር። እርሱ እንዳለው፣ ኢሳይያስ መናገርን የሚያውቅ ግሩም ሰው ነበር።

ሴቸሌ ከባድ ጥያቄዎችን ይጠይቅ ነበር። እግዚአብሔር አንድ ቀን በዓለም ላይ እንደሚፈርድ በሰማ ጊዜ «አስደነገጥኸኝ፤ እነዚህ ቃላት አጥንቶቼን ሁሉ ያንቀጠቅጣሉ።» አለ። ከዚያም የገዛ አባቶቹ ስለ ኢየሱስ ፈጽሞ ሳይሰሙ ስለ ሞቱ፣ ለሕዝቡ ይህን ለመንገር ማንም ቀደም ብሎ ለምን እንዳልመጣ ጠየቀ።

ሴቸሌ ሕዝቡ ሁሉ እንዲያምኑ ለማድረግ ሹማምንቱን አለንጋ አስይዞ ለመላክ እንኳ ፈቃደኛ መሆኑን ተናገረ! ዴቪድ ግን እምቢ አለ። ማንም ሰው በኢየሱስ እንዲያምን ሊገደድ አይችልም።

በዚያ ዘመን ሚስዮናውያን ከአንድ በላይ ሚስት ያለውን ሰው አያጠምቁም ነበር፤ ሴቸሌ ደግሞ እንደ ሌሎቹ አለቆች ብዙ ሚስቶች ነበሩት። ነገሩ እጅግ ከባድ ነበር፤ እርሱ ግን የመጀመሪያ ሚስቱን ብቻ አስቀርቶ ሌሎቹን አዲስ ልብስ ሰጥቶና የራሳቸውን ንብረት አስይዞ ወደ ቤታቸው ሰደዳቸው። በኦክቶበር 1 ቀን 1848 ተጠመቀ። ከጥቂት ወራት በኋላ ሴቸሌ በደል ሠራ፤ ዴቪድም በኀዘን ከእንግዲህ ከጌታ እራት መካፈል እንደማይችል ነገረው።

ሴቸሌ ግን እግዚአብሔርን አልተወም። በቀረው ዕድሜው ሁሉ መጽሐፍ ቅዱስን ያነብ፣ ይጸልይ፣ ሕዝቡንም ስለ ኢየሱስ ያስተምር ነበር። በ1852 የታጠቁ ሰዎች ሕዝቡን አጠቁ፤ ከተማውንም አቃጠሉ። ሴቸሌ ንግሥት ቪክቶሪያን ርዳታ ለመጠየቅ ጉዞ ጀመረ። ምንም ርዳታ ባልመጣ ጊዜ ከተማውን እንደ ገና ሠራ፤ ኃያል አለቃም ሆነ። ከባክዌና ሕዝብ ብዙዎቹ በእርሱ ምክንያት ክርስቲያኖች ሆኑ።

ሴቸሌ እውነተኛ የእምነት ጀግና ነበር። ሁሉም ሰው አንዳንድ ጊዜ ስሕተት ይሠራል። እግዚአብሔር ግን አይተወንም፤ እኛም እርሱን መተው አያስፈልገንም።

ውድ እግዚአብሔር ሆይ፣ የማነበው ቃልህን ስለ ሰጠኸኝ አመሰግንሃለሁ። ስሕተት ስሠራ ወደ አንተ እንድመለስ፣ እንደ ሴቸሌም በሕይወቴ ዘመን ሁሉ አንተን መከተሌን እንድቀጥል እርዳኝ። አሜን።