በሊቨርፑል የታየ ማስታወቂያ

«ያለ ሰባኪስ እንዴት ይሰማሉ?» — ከሮሜ 10

ስተዶች ወደ እንግሊዝ ሲመለሱ በጣም ጥቂት ገንዘብ ነበራቸው፤ ቤተሰቦቻቸውና ወዳጆቻቸው ግን ረዷቸው። ቻርሊ ጤናው ሲፈቅድለት በስብሰባዎች ላይ ይናገር ነበር። በ1896 ወደ አሜሪካ ሄዶ ወደ አሥራ ስምንት ወራት ያህል ዩኒቨርሲቲዎችን እየጎበኘ ለተማሪዎች ስለ ኢየሱስና ስለ እርሱ ፈጽሞ ስላልሰሙት ሚሊዮኖች ይነግራቸው ነበር።

በ1900 ቤተሰቡ በደቡብ ሕንድ ቀዝቃዛ ኮረብቶች ላይ ወደምትገኘው ወደ ኡታካመንድ ተዛወረ፤ ቻርሊም በዚያ ለስድስት ዓመት ያህል የአንድ ቤተ ክርስቲያን እረኛ ሆነ። ቤተሰቡ በአንድነት ነበሩ፤ ሴቶች ልጆቹም እያደጉ ነበር። ብዙ ሰዎች በዚያ መቆየት ደስ ባላቸው ነበር። ቻርሊ ግን ስለ ኢየሱስ ፈጽሞ ስላልሰሙ ሰዎች ማሰቡን አላቆመም። በ1906 እንደ ገና ታሞ ቤተሰቡን ወደ እንግሊዝ መለሰ።

በ1908 አንድ ቀን ቻርሊ በሊቨርፑል ከተማ ሲራመድ በአንድ አዳራሽ ደጅ ላይ የተለጠፈ ማስታወቂያ አየ። በውስጥ ካርል ኩም የተባለ ጀርመናዊ ሚስዮናዊ ስለ አፍሪካ ይናገር ነበር። ስለ ኢየሱስ ፈጽሞ ስላልሰሙ በአፍሪካ መካከል ስለሚኖሩ ሕዝቦች ተናገረ። ነጋዴዎች፣ አዳኞችና ባሪያ አፋኞች ደርሰውባቸው ነበር፤ የምሥራቹን ሊነግራቸው የመጣ ግን ማንም አልነበረም።

ቻርሊ ሊረሳው የማይችለውን ጥያቄ ይዞ ወጣ። ለምንድን ነው ክርስቲያኖች ወደ እነዚህ ሰዎች ያልሄዱት? ማንም ስላልተላከ ነው። ከዚያም ሁለተኛ ጥያቄ መጣ፦ ታዲያ እርሱ ራሱ ለምን አይሄድም?

ብዙ ሰዎች ይህን የእብደት ሐሳብ አድርገው ቈጠሩት። ቻርሊ አርባ ሰባት ዓመቱ ነበር። አስም ነበረበት፤ ብዙ ጊዜ ታሞ ነበር፤ የራሱ የሆነ ገንዘብም አልነበረውም። ፕሪሲላ ታማ ነበር፤ እንዲሄድም አልፈለገችም። ቻርሊ ግን በ1910 መጨረሻ በዓይኑ ለማየት በመርከብ ወደ አፍሪካ ሄደ። በሱዳን ሩቅ ደቡብ ሳለ፣ በኮንጎ ሰሜን ምሥራቅ ጥግ ስለ ኢየሱስ ከሞላ ጎደል ያልሰሙ ብዙ ሰዎች እንደሚኖሩ ተረዳ።

መጽሐፍ ቅዱስ፦ ማንም ካልነገራቸው ሰዎች ስለ ኢየሱስ እንዴት ይሰማሉ? ብሎ ይጠይቃል። አንተ የሚነግር ሰው መሆን ትችላለህ። ኢየሱስ ለአንተ ምን ማለት እንደ ሆነ ለወዳጅህ መንገር ትችላለህ፤ ስለ እርሱ ፈጽሞ ላልሰሙ በሩቅ ላሉ ሰዎችም መጸለይ ትችላለህ።

ውድ እግዚአብሔር ሆይ፣ ለሁሉም ስለ ኢየሱስ የሚነግሩ ሰዎችን እባክህ ላክ። እኔም ለወዳጆቼ ስለ አንተ እንድነግራቸው እርዳኝ። አሜን።