ለማመን መፍራት

ጤና ከጎደለው ባሕርያችን የሚወጣ እንግዳ ፍሬ ነው፤ እርሱም—ለማመን መፍራት። ቢሆንም ብዙ ጊዜ አግኝቼዋለሁ፤ ዳግመኛ እንዳላየው እስክመኝ ድረስ እጅግ ብዙ ጊዜ። ትሕትና ይመስላል፤ ራሱንም እንደ ጨዋነት ነፍስ አድርጎ ለማቅረብ ይሞክራል፤ ይሁን እንጂ እጅግ አሳፋሪ የሆነ የትዕቢት ነገር ነው፤ እንዲያውም ግብዝነትን የሚጫወት ድፍረት ነው። ሰዎች ላለማመን ቢፈሩ ኖሮ በፍርሃቱ ውስጥ ጤናማ አስተሳሰብ በኖረ ነበር፤ አምላካቸውን ለመታመን መፍራት ግን ቢያንስ ሞኝነት ነው፤ በእውነቱም ለታማኝነቱና ለእውነቱ የሚገባውን ክብር ከጌታ የሚከለክል አታላይ መንገድ ነው።

በእኛ ሁኔታ እምነት የማያድንበትን ምክንያት ለማግኘት የሚደክም ትጋት እንዴት የማይጠቅም ነው! በኢየሱስ የሚያምን ሁሉ እንደማይጠፋ የእግዚአብሔር ቃል አለን፤ እኛ ግን ብናምን እንኳ እኛ የምንጠፋበትን ክርክር እንፈልጋለን። አንድ ሰው ርስት ቢሰጠኝ በእርግጥ ስለ ባለቤትነቱ ሰነድ ጥያቄ ማንሣት አልጀምርም። የራሴን ቤት እንዳልይዝ፣ ወይም የምጠቀምበትን ሌላ ማንኛውንም ንብረት የራሴ እንዳላደርግ የሚከለክሉ ምክንያቶችን መፍጠር ምን ጥቅም አለው? ጌታ በተወደደው ልጁ ብቃት ሊያድነኝ ከረካ፣ እኔም እንዲሁ በመዳን በእርግጥ ልረካ እችላለሁ። እግዚአብሔርን በቃሉ ብይዘው፣ የተስፋ ቃሉን የመፈጸም ኃላፊነት በእኔ ላይ ሳይሆን የተስፋውን ቃል በሰጠው በእግዚአብሔር ላይ ነው።

ነገር ግን የተስፋው ቃል ከታሰበላቸው ሰዎች አንዱ ላትሆን ትችላለህ ብለህ ትፈራለህ። በዚያ ከንቱ ጥርጣሬ አትደንግጥ። ወደ ኢየሱስ በስሕተት የመጣች አንዲትም ነፍስ የለችም። አብ ካልሳበው በቀር ማንም ሊመጣ አይችልም፤ ኢየሱስም፦ «ወደ እኔም የሚመጣውን ከቶ ወደ ውጭ አላወጣውም» ብሏል። ክርስቶስን በዝርፊያ መንገድ የያዘች አንዲትም ነፍስ የለችም፤ እርሱን ያገኘ በመለኮታዊ መብት አግኝቶታል፤ ጌታ ራሱን ስለ እኛና ለእኛ መስጠቱ እጅግ ነጻ በመሆኑ እርሱን የምትወስድ ነፍስ ሁሉ ይህን ለማድረግ በጸጋ የተሰጠ መብት አላት። ያለ ፈቃድ ከኋላው ሆነህ የልብሱን ጫፍ ብትይዝ እንኳ፣ በስምህ ጠርቶ እንድትታመነው እንዳዘዘህ ያህል በእርግጥ ኃይል ከእርሱ ወደ አንተ ይፈስሳል። አዳኙን በምትታመንበት ጊዜ ፍርሃትን ሁሉ አስወግድ። ውሰደው፤ በደስታ ተፈቅዶልሃል። በኢየሱስ የሚያምን ከእግዚአብሔር ምርጦች አንዱ ነው።

በኢየሱስ ታምነህ ብትጠፋ አሰቃቂ ነገር ይሆናል ብለሃልን? አዎን፣ ይሆናል። ነገር ግን ካልታመንህ መጥፋትህ ስለማይቀር፣ በከፋውም ሁኔታ ቢሆን አደጋው ያን ያህል ታላቅ አይደለም።

«ብሄድ ቢበዛ እጠፋለሁ፤ ለመሞከር ቈርጫለሁ፤ ብቀር ግን ለዘላለም መሞቴን አውቃለሁ።»

ለዘላለም በተስፋ መቁረጥ ረግረግ ውስጥ ቆመህ ብትኖር ምን ጥቅም አለው? በጨለማና በእምነት ማጣት አሳብ ጭቃና ቆሻሻ ውስጥ እየሰመጡ ከመሄድ ይልቅ፣ ወደ ሰማያዊቱ ከተማ በንጉሡ አውራ ጎዳና ላይ እየታገሉ መሞት በእርግጥ ይሻላል! የምታጣው ምንም ነገር የለህም፤ ሁሉን አስቀድመህ አጥተሃልና፤ ስለዚህ ቈርጠህ ተወርወር፤ የእግዚአብሔርን ምሕረት ለአንተ፣ አዎን ለአንተ እንኳ እንደ ሆነ ለማመን ድፈር።

ነገር ግን አንዱ፦ «ወደ ክርስቶስ ብመጣና እርሱ ቢጥለኝስ?» እያለ ያቃስታል። መልሴ፦ «ሞክረው» የሚል ነው። ራስህን በጌታ በኢየሱስ ላይ ጣል፤ እምቢ ይልህ እንደ ሆነም እይ። የተስፋን በር የዘጋበት የመጀመሪያው ሰው ትሆናለህ። ወዳጄ፣ ገና ያልደረስህበትን ድልድይ አሁን ለመሻገር አትጨነቅ! ኢየሱስ ወደ ውጭ ሲጥልህ ያን ጊዜ ተስፋ ለመቁረጥ በቂ ጊዜ ይኖርሃል፤ ያ ጊዜ ግን ፈጽሞ አይመጣም። «ይህስ ኃጢአተኞችን ይቀበላል»፤ እነርሱን ወደ ውጭ መጣል ገና አልጀመረም።

በአንድ ሌሊት መንገዱን ስቶ፣ እንደ መሰለው ገደል አፋፍ ላይ ደርሶ፣ በራሱ ግምትም ከገደሉ ላይ ስለ ወደቀው ሰው ሰምተህ አታውቅምን? አንድ አሮጌ ዛፍ ጨበጠ፤ በዚያም ተንጠልጥሎ በደካማው መደገፊያ ላይ በሙሉ ኃይሉ ተጣበቀ። መያዣውን ቢለቅ ከታች በሚጠብቁት አስፈሪ ዓለቶች ላይ ወድቆ እንደሚንኮታኮት አምኖ ነበር። ግንባሩ በላብ ተሸፍኖ፣ በአካሉ ሁሉ ጭንቀት ሞልቶ በዚያ ተንጠልጥሎ ቀረ። ወደ ተስፋ አስቈራጭ የትኩሳትና የመዛል ሁኔታ ገባ፤ በመጨረሻም እጆቹ ሰውነቱን ሊደግፉ አልቻሉም። መያዣውን ለቀቀ! ከተንጠለጠለበት ወደቀ! የወደቀውም—አንድ ስንዝር ያህል ብቻ ነበር፤ ለስላሳ ሣር የለበሰ ጉብታም ተቀበለው፤ በዚያም ምንም ሳይጎዳ ፍጹም በደኅና እስኪነጋ ተኛ። እንዲሁም ብዙዎች በድንቁርናቸው ጨለማ ውስጥ ሆነው ኃጢአታቸውን ቢናዘዙ፣ በራሳቸው ላይ ያላቸውን ተስፋ ሁሉ ቢተዉና ራሳቸውን በእግዚአብሔር እጅ አሳልፈው ቢሰጡ የተረጋገጠ ጥፋት የሚጠብቃቸው ይመስላቸዋል። ባለማወቅ የሙጥኝ ያሉትን ተስፋ ለመልቀቅ ይፈራሉ። ከንቱ ፍርሃት ነው። ከክርስቶስ በቀር በሁሉ ነገር ላይ ያለህን መያዣ ልቀቅና ውደቅ። በሥራህ፣ ወይም በጸሎትህ፣ ወይም በስሜትህ ላይ ካለህ መታመን ሁሉ ውደቅ። ወዲያውኑ ውደቅ! አሁኑኑ ውደቅ! የሚቀበልህ ጉብታ ለስላሳና አስተማማኝ ይሆናል። ኢየሱስ ክርስቶስ በፍቅሩ፣ በክቡር ደሙ ኃይል፣ በፍጹም ጽድቁ ወዲያውኑ ዕረፍትና ሰላም ይሰጥሃል። በራስ መታመንን ተው። በኢየሱስ እቅፍ ውስጥ ውደቅ። ይህ የእምነት ዋነኛው ክፍል ነው—ሌላውን መያዣ ሁሉ ትቶ በቀላሉ በክርስቶስ ላይ መውደቅ። ለፍርሃት ምንም ምክንያት የለም፤ ለዘላለም ደኅንነትህ የሚሆንህን ነገር እንድትፈራ የሚያደርግህ ድንቁርና ብቻ ነው። የሥጋዊ ተስፋ ሞት የእምነት ሕይወት ነው፤ የእምነትም ሕይወት የዘላለም ሕይወት ነው። ክርስቶስ በአንተ ይኖር ዘንድ ራስህ ይሙት።

ችግሩ ግን ሰዎችን ወደዚያ ወደ አንዱ በኢየሱስ የማመን ድርጊት ልናመጣቸው አለመቻላችን ነው። ከራሳቸው ጋር ከመለያየት ይልቅ ማንኛውንም ዘዴ ይመርጣሉ። ከማመን ይሸሻሉ፤ እምነትንም እንደ ጭራቅ ይፈሩታል። እናንተ ሞኞች ተንቀጥቃጮች ሆይ፣ አዚም ያደረገባችሁ ማን ነው? የፍርሃታችሁ ሁሉ ሞትና የደስታችሁ መጀመሪያ የሚሆነውን ትፈራላችሁ። እግዚአብሔር ራሱ ከሾመው የመዳን ዕቅድ ይልቅ ሌሎችን መንገዶች በጠማማነት በመምረጥ ለምን ትጠፋላችሁ?

ወዮ! እጅግ ብዙ ነፍሳት፦ «በኢየሱስ እንድንታመን ታዝዘናል፤ ነገር ግን በዚያ ፋንታ የጸጋ መንገዶችን አዘውትረን እንከታተላለን» ይላሉ። የሕዝብ አምልኮን በማንኛውም መንገድ ተካፈል፤ ነገር ግን በእምነት ፋንታ አይሁን፤ አለዚያ ከንቱ መታመኛ ይሆናል። ትእዛዙ «እመን በሕይወትም ኑር» የሚል ነው፤ ሌላ ምንም ብታደርግ ይህን ፈጽም። «እንግዲያስ መልካም መጻሕፍትን ማንበብ እጀምራለሁ፤ ምናልባት በዚያ መንገድ ጥቅም አገኝ ይሆናል።» መልካሞቹን መጻሕፍት በማንኛውም መንገድ አንብብ፤ ያ ግን ወንጌል አይደለም፤ ወንጌሉ፦ «በጌታ በኢየሱስ ክርስቶስ እመን አንተና ቤተ ሰዎችህ ትድናላችሁ» የሚል ነው። አንድ ሐኪም በእጁ ሥር ያለውን በሽተኛ፦ «በጠዋት ገላህን ታጠብ፤ ለበሽታህ እጅግ ይጠቅምሃል» ይለዋል እንበል። ሰውየው ግን በጠዋት ከመታጠብ ፋንታ አንድ ሲኒ ሻይ ይጠጣና፦ «ይህም ያንኑ ያህል ይበቃል፤ ምንም ጥርጥር የለኝም» ይላል። ሐኪሙ፦ «ያዘዝሁህን ፈጸምህን?» ብሎ ሲጠይቀው ምን ይላል? «አይ፣ አልፈጸምሁም።» «እንግዲያስ ትእዛዜን ከቁም ነገር ስለማትቆጥረው፣ ከጉብኝቴ ምንም መልካም ውጤት እንደማትጠብቅ የታወቀ ነው።» እንዲሁ እኛም ነፍሳችን በምትመረመርበት ጊዜ ለኢየሱስ ክርስቶስ በተግባር እንዲህ እንለዋለን፦ «ጌታ ሆይ፣ እንድታመንህ አዘዝኸኝ፤ እኔ ግን ሌላ ነገር ማድረግን እመርጣለሁ! ጌታ ሆይ፣ አስፈሪ የኃጢአት ወቀሳ እንዲሰማኝ እፈልጋለሁ፤ በሲኦል አፍ ላይ እንድናወጥ እፈልጋለሁ፤ እንድደነግጥና እንድጨነቅ እፈልጋለሁ!» አዎን፣ ክርስቶስ ካዘዘልህ በቀር ሌላውን ሁሉ ትፈልጋለህ፤ እርሱ ያዘዘልህ ደግሞ በቀላሉ እንድትታመነው ነው። ቢሰማህም ባይሰማህም፣ እርሱ፣ እርሱም ብቻ እንዲያድንህ ራስህን በእርሱ ላይ ጣል። «ነገር ግን በጸሎት፣ መልካም መጻሕፍትን በማንበብና በእነዚህ በመሳሰሉት ላይ ትናገራለህ ማለት አይደለም፤ አይደል?» የጠቀስሁት ሐኪም ብሆን በሰውየው ሻይ መጠጣት ላይ እንደማልናገር ሁሉ፣ ከእነዚህ ነገሮች በአንዱም ላይ አንዲት ቃል እንኳ አልናገርም። ሻዩን ይጠጣ፤ ነገር ግን ለእርሱ በታዘዘው መታጠብ ፋንታ ከሆነ አይሁን። እንዲሁ ሰውየው ይጸልይ፤ በበዛ መጠን ይሻላል። ሰውየው መጻሕፍትን ይመርምር፤ ነገር ግን እነዚህ ነገሮች በክርስቶስ ላይ ባለ ቀላል እምነት ስፍራ ከተቀመጡ ነፍስ እንደምትጠፋ አስታውስ። ጌታችን ከእናንተ ስለ አንዳችሁ፦ «እናንተ በመጻሕፍት የዘላለም ሕይወት እንዳላችሁ ይመስላችኋልና እነርሱን ትመረምራላችሁ… ነገር ግን ሕይወት እንዲሆንላችሁ ወደ እኔ ልትመጡ አትወዱም» እንዳይል ተጠንቀቁ።

ወደ ኢየሱስ በእምነት ና፤ ያለ እርሱ ለዘላለም ትጠፋለህና። የጥድ ዛፍ ምንም አፈር የሚሰጡት በማይመስሉ ዓለቶች መካከል እንዴት እንደሚጨብጥ አስተውለህ ታውቃለህን? በሚከፈት በማንኛውም ትንሽ ስንጥቅ ውስጥ ትንሽ ሥር ይሰዳል፤ ባዶውን ዓለት እንኳ እንደ ትልቅ ወፍ ጥፍር ይጨብጣል፤ አጥብቆ ይይዛል፤ በመቶ መልሕቆችም ራሱን ከምድር ጋር ያስራል። ትንሹ ሥዕላችን እጅግ ትክክለኛ ነው። ከተራራው ተለይተው በወደቁ ባዶ ቋጥኞች ላይ እንዲህ ጸንተው የተተከሉ ዛፎችን ብዙ ጊዜ አይተናል። እንግዲህ ውድ ልብ ሆይ፣ ይህ የራስህ ሥዕል ይሁን። የዘመናትን ዓለት ጨብጥ። በትንሽ እምነት ሥርህ እርሱን ያዝ። ያቺ ትንሽ ሥር ትደግ፤ እስከዚያው ድረስም ያንኑ ዓለት እንደ ገና ለመጨበጥ ሌላ ሥር ስደድ። ኢየሱስን ያዝ፤ ኢየሱስንም አጥብቀህ ያዝ። ወደ እርሱ እደግ። የባሕርይህን ሥሮች፣ የልብህን ጅማቶች በእርሱ ዙሪያ ጠምጥም። ዓለቶቹ ለጥዱ ነጻ እንደ ሆኑ እርሱም ለአንተ ነጻ ነው፤ ጥዱ ከተራራው ጎን ጋር እንደ ተሳሰረ አንተም ከእርሱ ጋር አጥብቀህ ተሳሰር።

---