አማ

«ጠቦቶቹን በክንዱ ሰብስቦ በብብቱ ይሸከማል።» — ከኢሳይያስ 40

በዚያው በ1901 ቆየት ብሎ፣ ኤሚ፣ ዎከሮች፣ የቡድኑ ሴቶችና ትንሿ ፕሪና በሰማያዊ ተራሮች ግርጌ ወደምትገኘው ወደ ዶህናቩር መንደር ተዛወሩ። ከብዙ ጊዜ በፊት ዶህናቩር የተመሠረተችው ከቤታቸው ለተባረሩ ክርስቲያኖች መጠጊያ እንድትሆን ነበር። አሁን ደግሞ ለልጆች መጠጊያ ሆነች።

ብዙ ልጃገረዶች መጡ፤ ከ1904 ገደማ ጀምሮም ሕፃናት ጭምር መጡ። አንዳንዶቹን ሊያሳድጓቸው ያልቻሉ እናቶች አመጧቸው። አንዳንዶቹ ለቤተ መቅደሶች የመሰጠት አደጋ ላይ ነበሩ። ኤሚ ከእንግዲህ ከቡድኑ ጋር መጓዝ ስላልቻለች ልጆቹን ለመንከባከብ ቤት ቀረች። አንዳንድ ሰዎች ሚስዮናዊነቷን ትታ ሞግዚት ሆነች አሉ! ኤሚ ግን ስለ ኢየሱስ ብሎ ልጅን መንከባከብ እንደ መስበክ ቅዱስ እንደ ሆነ ታምን ነበር።

ልጆቹ አማ ብለው ጠሯት፤ ይህም በታሚል ቋንቋ «እናት» ማለት ነው። ኤሚ ዶህናቩር የሕፃናት ማሳደጊያ ሳይሆን ቤተሰብ እንዲሆን ፈለገች። ሁሉም የሕንድ ልብስ ይለብሱ፣ የሕንድ ምግብ ይበሉና ታሚል ይናገሩ ነበር፤ ለእያንዳንዱ ልጅም በጥንቃቄ የተመረጠ የታሚል ስም ይሰጠው ነበር። አካሎች የሚባሉ ሕንዳውያን ክርስቲያን ሴቶች፣ ትርጉሙም «ታላላቅ እኅቶች» ማለት ነው፣ ልጆቹን በፍቅር ይንከባከቡ ነበር። በዚህ ቤተሰብ ውስጥም ማንም ከሌላው በላይ ወይም በታች ተደርጎ አይቈጠርም ነበር። ሁሉም እኅት ነበረች።

ኤሚ በቁልምጫ ኤልፍ፣ ማለትም ትንሿ ተረታዊ ፍጡር፣ ብላ የምትጠራት ፕሪና በጨዋታ የተሞላች ነበረች። መዘመር እንደሚረዳት እስክታውቅ ድረስ የናሱን የውኃ እንስራዎች መወልወል አትወድም ነበር። «ሰይጣን መዝሙር አይወድም» ትል ስለ ነበር እጅግ ጮክ ብላ ትዘምር ነበር። ማታ ስትተኛ ኃጢአቶቿን በአንድ እጇ፣ በረከቶቿን ደግሞ በሌላው እጇ ትቈጥር ነበር።

ዶህናቩር ከማንም ገንዘብ ጠይቆ አያውቅም። ኤሚ የሚያስፈልጋቸውን ለእግዚአብሔር ትነግረው ነበር፤ ስጦታዎችም ይመጡ ነበር። በ1913 በቤተሰቡ ውስጥ መቶ ሠላሳ ገደማ ልጆች ነበሩ።

ኢየሱስ ጠቦቶቹን ወደ ልቡ አቅርቦ እንደሚሸከም እረኛ ነው። እርሱ እንዳይወድህ በጣም ትንሽ አይደለህም፤ የቤተሰቡም አባል እንድትሆን ይፈልጋል።

ውድ ኢየሱስ ሆይ፣ ወደ ልብህ አቅርበህ ስለምትሸከመኝ አመሰግንሃለሁ። ስለሚንከባከቡኝ ሰዎች አመሰግንሃለሁ፤ ቤተሰቤንም በሚገባ እንድወድ እርዳኝ። አሜን።