ስለ እግዚአብሔር አሳብ

1. የእግዚአብሔር አሳብ የመዳን ምክንያት ነው።

በጥቅሱ ውስጥ ያለው ሦስተኛውና የመጨረሻው ነገር፣ በአጭሩ ብቻ የምዳስሰው፣ የውጤታማ መጠራታችን መሠረትና መነሻ ነው፤ ይህም «እንደ እርሱ አሳብ» በሚለው ቃል ተገልጧል (ኤፌሶን 1:11)። አንሴልም ቃሉን፣ እንደ በጎ ፈቃዱ፣ ብሎ ይተረጕመዋል። ፒተር ማርቲር ደግሞ፣ እንደ ውሳኔው፣ ብሎ ያነበዋል። ይህ የእግዚአብሔር አሳብ ወይም ውሳኔ የመንፈሳዊ በረከቶቻችን ዋና ምንጭ ነው። ለመጠራታችን፣ ለመጽደቃችንና ለመክበራችን አንቀሳቃሹ ምክንያት እርሱ ነው። በወርቃማው የመዳን ሰንሰለት ውስጥ ከሁሉ በላይ ያለው ቀለበት ነው። አንዱ ሰው የሚጠራበት ሌላው የማይጠራበት ምክንያቱ ምንድር ነው? ከእግዚአብሔር ዘላለማዊ አሳብ የተነሣ ነው። በሰው መዳን ውስጥ ወሳኙን ድምፅ የሚሰጠው የእግዚአብሔር ውሳኔ ነው።

እንግዲያስ የጸጋን ሥራ በሙሉ ለእግዚአብሔር ፈቃድ በጎ ደስታ እንስጥ። እግዚአብሔር የመረጠን የተገባን ስለ ሆንን አይደለም፤ ነገር ግን በመምረጡ የተገባን ያደርገናል። ትዕቢተኞች ከእግዚአብሔር ጋር ተካፋዮች ነን በማለት ለራሳቸው እጅግ ብዙ ነገርን ለመውሰድና ለመንጠቅ ፈጣኖች ናቸው። ብዙዎች የቤተ ክርስቲያንን ንብረት መዝረፍ እየተቃወሙ ሲጮኹ፣ በዚያው ጊዜ የመዳንን አክሊል በገዛ ራሳቸው ላይ ለመድፋት ሲሞክሩ እግዚአብሔርን ክብሩን በመዝረፍ እጅግ የከፋ የቅዱስ ነገር ዝርፊያ ይፈጽማሉ። እኛ ግን ሁሉን ወደ እግዚአብሔር አሳብ መመለስ ይገባናል። የመዳን ምልክቶች በቅዱሳን ውስጥ ናቸው፤ የመዳን ምክንያት ግን በእግዚአብሔር ውስጥ ነው።

የሚያድነን የእግዚአብሔር አሳብ ከሆነ፣ እንግዲያስ ነጻ ፈቃድ አይደለም። ፔላጊያውያን ነጻ ፈቃድን አጥብቀው ይከራከሩለታል። ሰው የራሱን መለወጥ ሊያከናውን የሚችልበት በተፈጥሮው ያለ ኃይል እንዳለው ይነግሩናል፤ ይህ ጥቅስ ግን ያስተባብለዋል። መጠራታችን «እንደ እግዚአብሔር አሳብ ነው።» መጽሐፍ ቅዱስ የነጻ ፈቃድን ሥር ይነቅላል። «ምሕረት ለወደደ ወይም ለሮጠ አይደለም» (ሮሜ 9:16)። ሁሉ በእግዚአብሔር አሳብ ላይ የተመሠረተ ነው። እስረኛው በችሎት ፊት ሲፈረድበት፣ ንጉሡ ሊያድነው አሳብ ከሌለው በቀር የሚያድነው የለም። የእግዚአብሔር አሳብ የንጉሣዊ ሥልጣኑ መብት ነው።

የሚያድነን የእግዚአብሔር አሳብ ከሆነ፣ እንግዲያስ የሥራ ብቃት አይደለም። ቤላርሚን መልካም ሥራዎች ኃጢአትን እንደሚያስተሰርዩና ክብርን እንደሚያስገኙ ያስተምራል፤ ጥቅሱ ግን እንደ እግዚአብሔር አሳብ እንደ ተጠራን ይናገራል፤ ተመሳሳይ የሆነም ሌላ የመጽሐፍ ቅዱስ ቃል አለ፦ «ያዳነን በቅዱስም አጠራር የጠራን እግዚአብሔር ነውና፥ ይህም እንደ ራሱ አሳብና ጸጋ መጠን ነው እንጂ እንደ ሥራችን መጠን አይደለም» (2ኛ ጢሞቴዎስ 1:9)። የሥራ ብቃት የሚባል ነገር የለም። እጅግ መልካም የሆኑት ሥራዎቻችን እንኳ ጕድለትም መበከልም አለባቸው፤ ስለዚህም የሚያብረቀርቁ ኃጢአቶች ብቻ ናቸው፤ ስለዚህ ከተጠራንና ከጸደቅን ይህን የሚያከናውነው የእግዚአብሔር አሳብ ነው።

ተቃውሞ፦ የጳጳሱ ተከታዮች ግን ይህን የመጽሐፍ ቅዱስ ቃል ለሥራ ብቃት ማስረጃ አድርገው ይጠቅሳሉ፦ «ወደ ፊት የጽድቅ አክሊል ተዘጋጅቶልኛል፥ ይህንም ጻድቅ ፈራጅ የሆነው ጌታ ያን ቀን ለእኔ ያስረክባል» (2ኛ ጢሞቴዎስ 4:8)። የክርክራቸው ኃይል ይህ ነው፦ እግዚአብሔር በፍትሕ ሥራዎቻችንን የሚከፍል ከሆነ፣ ሥራዎቻችን መዳንን ያስገኛሉ።

ምላሽ፦ ለዚህ እንዲህ ብዬ እመልሳለሁ፤ እግዚአብሔር እንደ ጻድቅ ፈራጅ ዋጋን የሚሰጠው ለሥራዎቻችን ብቃት ሳይሆን ለክርስቶስ ብቃት ነው። እግዚአብሔር እንደ ጻድቅ ፈራጅ የሚከፍለን ስለ ተገባን ሳይሆን ተስፋ ስለ ሰጠ ነው። እግዚአብሔር ሁለት ፍርድ ቤቶች አሉት፤ የምሕረት ፍርድ ቤትና የፍትሕ ፍርድ ቤት፤ ጌታ በምሕረት ፍርድ ቤት የሚያቀዳጃቸውን ሥራዎች በፍትሕ ፍርድ ቤት ይኰንናቸዋል። ስለዚህ በመዳናችን ውስጥ ዋናውን ድርሻ የሚይዘው የእግዚአብሔር አሳብ ነው።

ደግሞም የእግዚአብሔር አሳብ የብፅዕና ምንጭ ከሆነ፣ እንግዲያስ የምንድነው አስቀድሞ ስለ ታየ እምነት አይደለም። በእኛ ውስጥ ያለ አንዳች ነገር በመመረጣችን ላይ ትንሽ እንኳ ተጽዕኖ ሊኖረው ይችላል ብሎ ማሰብ ከንቱ ነው። አንዳንዶች እግዚአብሔር እነዚህ ሰዎች እንደሚያምኑ አስቀድሞ ስላየ መረጣቸው ይላሉ፤ በዚህም የመዳንን ጉዳይ በእኛ ውስጥ ባለ አንዳች ነገር ላይ የተመሠረተ ያደርጉታል። እግዚአብሔር ግን የሚመርጠን ስለ እምነት ሳይሆን ለእምነት ነው። «በፊቱ ቅዱሳንና ነውር የሌለን በፍቅር እንሆን ዘንድ በክርስቶስ መረጠን» (ኤፌሶን 1:4)፤ ቅዱሳን እንደምንሆን ስላየ ሳይሆን ቅዱሳን እንድንሆን ነው። የተመረጥነው ለቅድስና ነው እንጂ ስለ ቅድስና አይደለም። እግዚአብሔር በእኛ ውስጥ ከርኵሰትና ከዓመፅ በቀር ምን አስቀድሞ ሊያይ ይችላል! ማንም ቢድን እንደ እግዚአብሔር አሳብ ነው።

ጥያቄ፦ እግዚአብሔር ሊያድነን አሳብ እንዳለው እንዴት ማወቅ እንችላለን?

መልስ፦ በውጤታማ መጠራት በመጠራታችን ነው። «መጠራታችሁንና መመረጣችሁን ታጸኑ ዘንድ ከፊት ይልቅ ትጉ» (2ኛ ጴጥሮስ 1:10)። መጠራታችንን በማጽናት መመረጣችንን እናጸናለን። «እግዚአብሔር በመንፈስ መቀደስ እውነትንም በማመን ለመዳን እንደ በኵራት መርጦአችኋልና» (2ኛ ተሰሎንቄ 2:13)። በጅረቱ በኩል በመጨረሻ ወደ ምንጩ እንደርሳለን። የመቀደስ ጅረት በነፍሳችን ውስጥ ሲፈስስ ብናገኝ፣ በዚህ ወደ መመረጥ ምንጭ ልንደርስ እንችላለን። ሰው ወደ ሰማይ ቀና ብሎ ማየት ባይችል እንኳ፣ ጨረቃ በውኃው ላይ ስታበራ በማየት ጨረቃ በዚያ እንዳለች ሊያውቅ ይችላል፤ እንዲሁ እኔም ወደ እግዚአብሔር አሳብ ምሥጢር ቀና ብዬ ማየት ባልችልም፣ በነፍሴ ውስጥ በሚያበራው የሚቀድስ ጸጋ እንደ ተመረጥሁ ማወቅ እችላለሁ። የእግዚአብሔርን ቃል በልቡ ውስጥ ተገልብጦና ተጽፎ የሚያገኝ ሰው ሁሉ መመረጡን ያለ ጥርጥር ሊደመድም ይችላል።

2. የእግዚአብሔር አሳብ የእርግጠኝነት መሠረት ነው።

በእግዚአብሔር ለተጠሩት ሊነገር የማይችል መጽናናት የሚሰጥ ፍቱን መድኃኒት እዚህ አለ። መዳናቸው በእግዚአብሔር አሳብ ላይ የተመሠረተ ነው። «ጌታ ለእርሱ የሆኑትን ያውቃል፥ ደግሞም። የጌታን ስም የሚጠራ ሁሉ ከዓመፅ ይራቅ የሚለው ማኅተም ያለበት የተደላደለ የእግዚአብሔር መሠረት ቆሞአል» (2ኛ ጢሞቴዎስ 2:19)። ጸጋዎቻችን ፍጹማን አይደሉም፤ መጽናናታችን ይጐድላል ይሞላልም፤ የእግዚአብሔር መሠረት ግን ተደላድሎ ቆሞአል። በዚህ በእግዚአብሔር ዘላለማዊ አሳብ ዓለት ላይ የተሠሩት ከእምነት እንወድቃለን ብለው መፍራት አያስፈልጋቸውም፤ የሰው ኃይልም ሆነ የፈተና ብርታት ፈጽሞ ሊገለብጣቸው አይችልም።

(ይህ ሥራ በመጀመሪያ የታተመው በ1663 እ.ኤ.አ. ነው። ይህን እትም ስናዘጋጅ ጊዜ ያለፈባቸውን አገላለጾችና ሥርዓተ ነጥቦችን ማስተካከል ተገቢ ሆኖ ተገኝቷል፤ ደራሲው በሕይወት ቢኖር ኖሮ እነዚህን እርማቶች ያለ ጥርጥር ይቀበላቸው ነበር።

ቲ. ኢ. ዋትሰን።

ተፈጸመ።