ለእንግሊዝኛው የፕሮቴስታንት እትም የተጻፈ መቅድም

አንድ ፕሮቴስታንት የጸና የሮማ ካቶሊክ ጸሐፊን ሥራዎች እንዲህ ለፕሮቴስታንት አንባቢዎች ሲያቀርብ ምናልባት ጥቂት ማብራሪያ ያስፈልገው ይሆናል። ምክንያታችን ይህ ነው፦ በእነዚህ ሥራዎች የተገለጹት ትምህርትና ተሞክሮ በመሠረቱ ፕሮቴስታንታዊ ናቸው፤ የሮማ ካቶሊክ ቤተ ክርስቲያንን ይሁንታ ማግኘት ይቅርና፥ ጸሐፊዋ እነዚህን በመያዟና በማስፋፋቷ ስደት ደርሶባታል።

ስለ ማዳም ጊዮን ተሞክሮ አንድ ነገር ማስታወስ ይገባል፦ እርሷ የደረሰችባቸውን ከእግዚአብሔር ጋር የሚደረግ የኅብረት የክብር ከፍታዎች ከእግዚአብሔር ምርጦች እጅግ ደካማ የሆነው እንኳ ሊወጣባቸው ይችላል፤ ነገር ግን እርሷ በተመራችበት በዚያ አድካሚና ረጅም በሚመስል መንገድ በኩል መድረስ በፍጹም ግድ አይደለም።

«መንፈሳዊ ጅረቶች» የተባለው መጽሐፍ በተለይ እግዚአብሔር ነፍስን ከራሱ ጋር ወደ አንድነት ሁኔታ ሲያመጣት ሁልጊዜ ወይም በአብዛኛው የሚጠቀምበት ዕቅድ ተደርጎ ሳይሆን የጸሐፊዋ የግል ተሞክሮ ዘገባ ተደርጎ ሊታይ ይገባዋል። እርግጥ ነው፥ «ለጽድቅ እንድንኖር» በእውነት «ለኃጢአት የሞትን» መሆን አለብን፤ የክርስቶስም ሕይወት በእኛ ከመገለጡ በፊት እኔነት መሰቀል አለበት። «ከክርስቶስ ጋር ተሰቅዬአለሁ» ማለት ስንችል ብቻ ነው «እኔም አሁን ሕያው ሆኜ አልኖርም ክርስቶስ ግን በእኔ ይኖራል» ብለን መጨመር የምንችለው። ይህ ማለት ግን ይህ ውስጣዊ ሞት ሁልጊዜ በማዳም ጊዮን ላይ እንደ ሆነው የሚዘገይ መሆን አለበት ማለት አይደለም። ምክንያቱ እርሷ ለመለኮታዊው ፈቃድ ፈጽማ ራሷን ያላስገዛች መሆኗ፥ ሰጪውንም ገንዘብ አድርጋ ትደሰትበት ዘንድ ከእግዚአብሔር ስጦታዎች ለመለየት ፈቃደኛ ያልነበረች መሆኗ እንደ ሆነ ራሷ ትነግረናለች። ይህ የእግዚአብሔርን ፈቃድ መቃወም በፍጥረቱ በኩል መከራን፥ በእግዚአብሔር በኩል ደግሞ ተግሣጽን ያስከትላል፤ ይኸውም በፈቃድ ያልተሰጠውን ለራሱ ያስገዛ ዘንድ ነው።

ራስን ሙሉ በሙሉ ለእግዚአብሔር በመስጠት ስለሚገኘው ደስታ እዚህ መናገር አያስፈልግም፤ በሺዎች የሚቆጠሩ የእግዚአብሔር ልጆች ብፅዕናውን ለራሳቸው እየተገነዘቡት ነው፤ ራሳቸውን ሕያው መሥዋዕት አድርገው ለእግዚአብሔር ማቅረብና ስለ እነርሱ ለሞተውና ለተነሣው እንጂ ወደ ፊት ለራሳቸው አለመኖር ጭንቅ ሳይሆን የማይነገር ደስታ መሆኑን እያረጋገጡ ነው።

ሕያው በሆነና በግል በሚታወቅ መድኃኒት ላይ ቀላል መታመን፤ ፈቃዱን የሚቃወም መሆኑ የታወቀውን ሁሉ በጸጋው ማስወገድ፤ ዕቅዱም በእኛ ውስጥና በእኛ በኩል ይፈጸም ዘንድ ራስን ፈጽሞ ለእርሱ መተው፤ ወደ ተሰወረው የኅብረት መቅደስ የሚያስገባው ቀላል ቁልፍ ይህ ነው።

አጭር የጸሎት መንገድ

መንፈሳዊ ጅረቶች

ክፍል አንድ

ክፍል ሁለት

አጭር የጸሎት መንገድ

«በፊቴ ተመላለስ፥ ፍጹምም ሁን።»—ዘፍጥረት 17:1።