Jiko Asilolipenda

“Lo lote mfanyalo, lifanyeni kwa moyo, kama kwa Bwana.” — kutoka Wakolosai 3

Katika nyumba ya watawa, kila mtu alikuwa na kazi yake. Je, unajua walimpa Ndugu Lawrence, yule asiye stadi, kazi gani? Walimfanya kuwa mpishi!

Ndugu Lawrence hakuipenda kazi ya jikoni. Alisema ilikuwa kinyume kabisa na mambo aliyoyapenda kwa asili yake. Hebu fikiria jiko lile kubwa: moto mkali, sufuria nzito za chuma, mvuke kila mahali, na Ndugu wengi wenye njaa wakingojea chakula chao cha jioni.

Lakini Ndugu Lawrence aligundua siri. Kabla ya kuanza kazi, alikuwa akifikiri kwanza ni nini kinachopaswa kufanywa, na lini, na jinsi gani. Kisha alizungumza na Mungu. Alisema maneno kama haya: “Mungu wangu, uko hapa pamoja nami. Sasa inanibidi nifikirie kazi hizi zote. Tafadhali nisaidie nikae karibu nawe ninapozifanya. Unisaidie, na uipokee kazi yangu yote kama zawadi kwako.”

Kisha, alipokuwa akipika, aliendelea kuzungumza na Mungu kimya kimya moyoni mwake. Alimwomba Mungu amsaidie aifanye kazi yake vizuri, na aliifanya yote kwa ajili ya upendo wa Mungu.

Na hapa ndipo mshangao ulipo. Kazi ya jikoni aliyokuwa haipendi ikawa rahisi! Alifanya kazi pale kwa miaka kumi na mitano, na aligundua kwamba kuifanya kwa ajili ya Mungu kulileta tofauti kubwa sana.

Je, kuna kazi usiyoipenda, kama kupanga chumba chako, kufanya kazi za shule au kuosha vyombo? Jaribu kuifanya kwa ajili ya Mungu. Mwombe akusaidie, na uifanye kama zawadi ya upendo kwake.

Mungu mpendwa, ninapokuwa na kazi nisiyoipenda, nisaidie niifanye kwa ajili yako, na nikumbuke kwamba uko pale pale kando yangu. Amina.