Vitabu Vingi Mno

“Mpende Bwana Mungu wako kwa moyo wako wote, na kwa roho yako yote, na kwa akili zako zote.” — kutoka Mathayo 22

Ndugu Lawrence alitaka kujua jinsi ya kuwa karibu na Mungu. Kwa hiyo alisoma vitabu vingi kuhusu jambo hilo. Lakini kila kitabu kilisema jambo tofauti. Fanya hivi! Hapana, fanya vile! Omba namna hii! Hapana, namna ile! Badala ya kumsaidia, mawazo hayo yote tofauti yalimchanganya tu.

Basi akaamua kufanya jambo rahisi. Alijitoa mzima kwa Mungu, akamwomba Mungu amwondolee dhambi zake. Kisha akaanza kuishi kana kwamba katika ulimwengu wote kulikuwa na watu wawili tu: Mungu na yeye.

Alijitahidi kumfikiria Mungu kadiri alivyoweza, mchana kutwa. Siku nyingine alimfikiria Mungu kama hakimu, akasikitika kwa mambo mabaya aliyokuwa ameyafanya. Siku nyingine alimfikiria Mungu kama Baba yake mwenye upendo, anayeishi ndani kabisa ya moyo wake.

Haikuwa rahisi. Mawazo yake yalikuwa yakitangatanga. Na kwa miaka mingi alihofu kwamba hampendi Mungu kama ipasavyo, na aliendelea kukumbuka mambo mabaya aliyokuwa ameyafanya. Mara nyingi alianguka, kisha akainuka tena. Lakini aliendelea kumtumaini Mungu.

Kisha siku moja, ghafula, amani nyingi tulivu ikaujaza moyo wake, nayo ikadumu. Tangu hapo alitembea na Mungu kwa urahisi, kwa kumtumaini na kwa upendo.

Kumpenda Mungu hakuhitaji kuwa jambo gumu. Huhitaji kujua sheria nyingi za kiwerevu. Unaweza kuanza leo, kwa kukumbuka tu kwamba Mungu yuko pamoja nawe, na kumwambia kwamba unampenda.

Mungu mpendwa, nataka kukupenda kwa moyo wangu wote. Nisaidie nikumbuke kwamba uko pamoja nami, leo na kila siku. Amina.