Furaha katika Roho Mtakatifu

Warumi 14:17.—Kwa maana ufalme wa Mungu si kula na kunywa, bali ni haki na amani na furaha katika Roho Mtakatifu.

Katika andiko hili, tunayo ufunuo wa kidunia wa kazi ya Utatu. Ufalme wa Mungu ni haki; ambayo inawakilisha kazi ya Baba. Misingi ya kiti chake cha enzi ni haki na hukumu. Kisha inakuja kazi ya Mwana: Yeye ni amani yetu, Shilo wetu, pumziko letu. Ufalme wa Mungu ni amani; si tu amani ya msamaha kwa yaliyopita bali amani ya uhakika mkamilifu kuhusu wakati ujao. Si tu kazi ya upatanisho imekamilika, bali kazi ya utakaso imekamilika katika Kristo, nami naweza kupokea na kufurahia kile kilichotayarishwa kwa ajili yangu.

Mtu mpya ameumbwa, nami naweza katika Yeye kuishi maisha yangu; ikiwa ufalme umeimarishwa katika haki ikiwa utawala ni mkamilifu, kunaweza kuwa na pumziko kamili.

Ikiwa kuna amani, hakuna vita kutoka nje, wala mafarakano ya ndani, taifa laweza kuwa na furaha na kufanikiwa.

Na hivyo hapa inakuja, baada ya haki na amani, ile furaha, ile heri iliyobarikiwa ambamo mtu aweza kuishi; “Kwa maana ufalme wa Mungu si kula na kunywa, bali ni haki na amani na furaha katika Roho Mtakatifu.” Warumi 14:17. Na tuiangalie furaha hii ya Roho Mtakatifu, si tu kama kitu kizuri cha kupendeza, si tu kama kitu cha kuwa na mawazo mazuri juu yake, bali kama baraka ambayo tunakwenda kuidai.

Mara nyingi tunaona duka la mwuza matunda au mwuza keki, likiwa na matunda mazuri au keki iliyopangwa kwa kuvutia dirishani. Mbele yake kuna kioo kikubwa cha bati, na wavulana wadogo wenye njaa husimama pale na kutazama, na kutamani, lakini hawawezi kuyafikia. Ukimwambia mmoja, “Sasa, mvulana mdogo, chukua tunda lile,” angekutazama kwa mshangao. Amejifunza kuwa kuna kitu katikati. Kama asingekuwa amewahi kujua kuhusu kioo angeweza kujaribu. Kioo cha bati wakati mwingine ni safi kiasi kwamba hata mtu mzima kwa muda anaweza kudanganyika na kunyoosha mkono wake. Lakini mara hugundua kuna kitu kisichoonekana kati yake na tunda. Hii inawakilisha hasa maisha ya Wakristo wengi; wanaona, lakini hawawezi kuchukua. Na sasa ni nini kioo hiki cha bati kisichoonekana, kinachonizuia kuchukua vitu vizuri ninavyoviona? Si kingine ila maisha ya nafsi; naona vitu vya kimungu lakini siwezi kuvifikia, maisha ya nafsi ndicho kioo cha bati kisichoonekana.

Tuko tayari, tunafanya kazi, tunajitahidi, na bado tunazuia kitu; tunaogopa kumtolea Mungu kila kitu. Hatujui matokeo yaweza kuwa nini. Bado hatujaelewa kuwa Mungu na Kristo Yesu wanastahili kila kitu. Chochote tunachoambiwa kuhusu maisha yaliyobarikiwa ya amani na furaha, tunasema, “Msifuni Mungu; Neno la Mungu ni kweli; ninaliamini Neno;” na bado, siku baada ya siku, tunajizuia. Mtu anaposema, “Kichukue,” tunasema, “Siwezi kukichukua; kuna kitu katikati.” Je, tungekuwa tayari kuyaacha maisha yetu ya nafsi; je, tungekuwa na ujasiri wa kuacha leo, na kuiacha furaha ya Roho Mtakatifu iwe furaha yetu?

Furaha hii ni nini? Kwanza kabisa, ni furaha ya uwepo wa Yesu. Mara nyingi tunaelekea kuzungumza kuhusu mambo mengine mawili, nguvu ya utakaso, na nguvu ya utumishi lakini naona kuna jambo la muhimu zaidi kuliko yoyote kati ya hayo mawili, nalo ni kwamba Roho Mtakatifu alikuja kutoka Mbinguni ili awe uwepo wa kudumu wa Kristo katika wanafunzi wake, katika Kanisa, na katika moyo wa kila mwaminifu.

Bwana Yesu alikuwa akienda zake, na wanafunzi wake walikuwa na huzuni sana; mioyo yao ilikuwa na majonzi; lakini aliwaambia, “Nitawaona tena, na mioyo yenu itafurahi, wala furaha yenu hakuna mtu atakayeiondoa kwenu.” Yohana 16:22.

Kilichowatokea wao, chaweza kututokea sisi pia. Roho Mtakatifu ametolewa ili kuufanya uwepo wa Yesu kuwa uhalisia wa kudumu, tukio la kuendelea. Na furaha ile ambayo hakuna mtu angeweza kuigusa ilikuwa nini? Ilikuwa furaha ya Pentekoste. Na Pentekoste ilikuwa nini? Kuja kwa Bwana Yesu katika Roho Mtakatifu ili kukaa pamoja na wanafunzi wake.

Wakati Yesu alipokuwa pamoja na wanafunzi wake duniani, hakuweza kuingia mioyoni mwao kwa njia sahihi. Walimpenda, lakini hawakuweza kuipokea mafundisho yake, hawakuweza kushiriki tabia yake, wala hawakuweza kuipokea roho yake yenyewe katika nafsi yao. Lakini alipokwisha kupaa Mbinguni, alirudi katika Roho ili kukaa mioyoni mwao. Ni jambo hili peke yake litakalotusaidia kwenda, mchungaji kwa kusanyiko lake pamoja na magumu yake, mfanyabiashara kwa meza yake, mama kwa familia yake kubwa pamoja na masumbufu yake, na mtenda kazi kwa darasa lake la Biblia. Ni jambo hili peke yake litakalotusaidia kuhisi, “Naweza kushinda, naweza kuishi katika pumziko la Mungu.” Kwa nini? “Kwa sababu ninaye Yesu mwenye uweza wa yote pamoja nami kila siku.” Kwa watu wa Mungu, inaonekana kuna kizuizi kimoja, hawamjui Mwokozi wao. Hawatambui kuwa Kristo huyu aliyebarikiwa ni Kristo aliyepo daima, aenezaye kila mahali, akaaye ndani, ambaye anataka kuchukua uongozi wa maisha yao yote. Hawajui, hawaamini kuwa Yeye ni Kristo Mwenye Uweza wa Yote, na aliye tayari katikati ya magumu yoyote na hali zozote kuwa mlinzi wao na Mungu wao. Hili ni kweli kabisa. Wakristo wengi huulizwa jinsi mtu awezavyo kuwa na furaha isiyoelezeka, furaha ambayo hakuna kitu kiwezacho kuiondoa, furaha ya urafiki na ukaribu na upendo wa Yesu ijazayo moyo wake. Tunalalamika kuwa kasi ya ushindani ni ya kutisha kiasi kwamba hatuwezi kupata muda wa maombi ya faragha.

Ndugu, kama Bwana Yesu Kristo akija kwako kama ndugu na rafiki na mgeni akaaye, aweza kuupa moyo wako furaha ya Roho Mtakatifu, hivi kwamba biashara itachukua nafasi yake ipasavyo chini ya miguu yako. Moyo wako ni mtakatifu mno kiasi cha kujazwa biashara; iache biashara iwe kichwani na chini ya miguu, lakini mwache Kristo awe na moyo wote, naye atayalinda maisha yote. Kristo wetu mtukufu, aliyetukuzwa, mwenye uweza wa yote, aliyepo daima! Kwa nini wewe nami hatuwezi kumtumaini kikamilifu, na kwa ukamilifu ili afanye kazi yake? Je, hatutasema mbele za Mungu kuwa tunamtumaini, kuwa tutamtumaini Kristo awe kwetu kila dakika yote tuwezayo kuyatamani? Juu ya Msalaba wa Kalvari, Kristo alikuwa peke yake kabisa, nawe unaamini alifanya kazi kamilifu na iliyobarikiwa; na Kristo Mbinguni yuko peke yake, kama kuhani mkuu na mwombezi, nawe unamtumaini kwa kazi yake huko. Lakini, msifuni Mungu! Ni kweli vilevile, kuwa Kristo moyoni ana uwezo peke yake kuulinda siku zote. Na impendeze Mungu kuwafunulia watoto wake ukaribu wa Kristo asimamaye na kubisha hodi mlangoni pa kila moyo, aliye tayari kuingia na kupumzika huko milele na kuiongoza nafsi katika pumziko lake?

Sote tunajua nguvu ya furaha ni nini; tunajua hakuna kitu kivutiacho kama furaha, hakuna kitu kiwezacho kumsaidia mtu kustahimili na kuvumilia kama furaha; tunajua kuwa Bwana Yesu mwenyewe kwa ajili ya furaha iliyowekwa mbele yake aliustahimili msalaba. Mtu haishi vema ikiwa anaishi maisha ya kuugua, kutetemeka, na kutia shaka.

Njoo leo na uamini furaha ya Roho Mtakatifu imekusudiwa kwa ajili yako. Je, Maandiko hayasemi, “Ambaye ingawa hamkumwona mnampenda; ambaye ijapokuwa hammwoni sasa, mnamwamini na kufurahi kwa furaha isiyoneneka yenye utukufu,” 1 Petro 1:8. Je, huamini kuwa Mwana huyu wa Mungu aliyebarikiwa, apendezaye, mzuri kupita kufikirika, furaha ya Baba,—je, huamini kuwa Mwana huyu wa Mungu angeweza kuujaza moyo wako furaha mchana na usiku kama angekuwapo daima? Na je, huamini kuwa anakupenda kuliko bwana harusi ampendavyo bibi harusi wake? Je, huamini kuwa akiisha kukununua kwa damu yake, Yesu anakutamani? Anakuhitaji ili kuutosheleza moyo wake wa upendo. Anza kuamini kwa moyo wako wote, “Furaha ya Roho Mtakatifu ni fungu langu,” kwa maana Roho Mtakatifu ananihakikishia bila kukatizwa uwepo na upendo wa Yesu.

Pili, kuna furaha ya kuokolewa kutoka dhambini. Roho Mtakatifu anakuja kututakasa. Kristo ni utakaso wetu, na Roho Mtakatifu anakuja kumfikisha kwetu, kufanya yote yaliyo katika Kristo na kuyazalisha ndani yetu. Na tukumbuke kuwa mbele za macho ya Mungu, kuna kitu kikubwa kuliko kazi. Kuna kufanana na Kristo—mfano na uzima wa Kristo ndani yetu. Hicho ndicho Mungu akitakacho; hicho kitatuandaa kwa kazi. Mungu haombi kuwa Kristo aishi ndani yetu kama nafsi zilizo tofauti; mahekalu yaliyojaa viumbe wachafu, wasio safi, wenye uchafu, huku Kristo akiwa amefichwa mahali fulani humo,—hiyo si nia ya Mungu, bali anataka Kristo aumbwe ndani yetu kiasi kwamba tuwe kitu kimoja na Kristo, na kwamba katika kufikiri kwetu, kuhisi na kuishi, sura ya Mwana wake aliyebarikiwa idhihirike mbele zake. Roho Mtakatifu ametolewa ili kututakasa.

Ndugu yangu, je, uko tayari kutakaswa kutoka kila dhambi, iwe dhambi hiyo kubwa au ndogo? Siulizi, je, unahisi kuwa una nguvu ya kuishinda? Wala siulizi, je, unahisi nguvu ya kuitoa? Yaweza kuwa hujisikii nguvu yoyote; hilo halitazuia ikiwa uko tayari. Mimi siwezi kuitoa dhambi, lakini naweza kumpata Kristo Mwenye Uweza wa Yote kwa njia ya Roho Mtakatifu aifanye, na ni kazi yangu kumwambia Kristo, “Ipo dhambi, kipo kitu kiovu, nakiweka miguuni pako, nakitupa hapo, nakitupa katika kifua chako hasa. Bwana, niko tayari kukata mkono wa kuume, chochote, ila uniokoe nacho.” Ndipo Kristo atamtoa yule pepo mchafu na kutoa wokovu.

Roho wa Mungu ni Roho Mtakatifu na kazi yake ni kutuweka huru kutoka nguvu ya dhambi na mauti. Kama unataka kuishi katika furaha ya Roho Mtakatifu, swali linakuja: “Je, uko tayari kujisalimisha kila kilicho cha dhambi, hata kile kionekanacho kizuri,—lakini kina doa la dhambi juu yake?” Yaweza kuwa umehusika katika mahusiano yanayoyafanya maisha yako kuwa magumu sana. Mchungaji pamoja na watu wake aweza kuletwa katika mahusiano magumu sana, au mfanyabiashara pamoja na mshirika wake au wale ambao yampasa kushirikiana nao aweza kuwa katika hali ngumu mno. Lakini je, Mwana-Kondoo wa Mungu aliyebarikiwa hastahili yote hayo? Kristo anastahili kiasi gani kwako? Swali lilipata kuulizwa na wanafunzi, “Mwaonaje juu ya Kristo?” Nami nauliza, “Kristo anastahili kiasi gani kwako?” Nami nakusihi, magumu yoyote yanayoweza kuwapo mbeleni, na mashaka yoyote yanayokuzunguka, chukua ulimwengu wote leo na uutupe miguuni pake. Kuwa naye kunastahili ugumu wowote; kuwa naye kutakuwa suluhisho la kila ugumu.

Hakuna tu magumu na mashaka ya nje, yanayodhihirika, bali kuna pia mambo madogo elfu yanayoingia maishani mwetu na ambayo mara nyingi yanatusumbua, vishawishi vya hisia zisizo za upendo, maneno makali, na hukumu za haraka. Oh, njoo, na uamini kuwa Roho Mtakatifu, mtakasaji, aweza kuingia na kutawala, na kutoa neema ya kupita katika yote bila kutenda dhambi, nawe utajua furaha ya Roho Mtakatifu ni nini. Mwili wetu, tunasoma katika Wakorintho wa kwanza, ni hekalu la Roho Mtakatifu. Yapasa uwe mtakatifu katika mambo kama kula na kunywa.

Mara ngapi Mkristo hufikia utambuzi kuwa anachukua au anatafuta anasa nyingi mno katika kula huko, kula kwa ajili ya raha, bila kujikana wala kujitolea sadaka katika kuulisha mwili! Mara ngapi tunashawishiana kula, na mara ngapi mwaminifu husahau kuwa mwili huu ni hekalu la siri kabisa la Roho Mtakatifu na kwamba kila tonge tunalokula na kunywa lazima liwe kwa utukufu wa Mungu kwa namna ya kumpendeza kikamilifu! Mpendwa, nakuletea ujumbe: Kuna njia ya wewe kuingia katika pumziko la Mungu, na Roho Mtakatifu ametolewa ili kukuingiza ndani, naye atajaza moyo wako furaha isiyoelezeka ya uwepo wa Kristo; na furaha ya kuokolewa kutoka dhambini, ya ushindi juu ya dhambi; furaha isiyoelezeka ya kujua kuwa unafanya mapenzi ya Mungu na unapendeza machoni pake; furaha isiyoelezeka ya kujua kuwa Yeye anatakasa na kulilinda hekalu ili Kristo akae ndani yake. Waaminio, furaha ya Roho Mtakatifu, furaha ya utakatifu ule wa Mungu, ni heri yake, usafi wake, ukamilifu wake, ambao hakuna kitu kiwezacho kuuharibu au kuutia doa au kuusumbua. Roho Mtakatifu anasubiri kuileta na kuidhihirisha katika maisha yetu. Anataka kuingia hivyo mioyoni mwetu kiasi kwamba tutaishi, kama watu wa Roho Mtakatifu, maisha yaliyotakaswa, huku nguvu ya utakaso ya Yesu ikipita katika viumbe vyetu vyote.

Wazo langu la tatu ni kwamba furaha ya Roho Mtakatifu ni furaha ya upendo wa watakatifu. Roho Mtakatifu hakutolewa kwa mtu yeyote siku ya Pentekoste kwa kutengwa na wengine; alikuja na kulijaza kundi lote. Tunajua kulikuwa na mgawanyiko na utengano na kiburi kiasi gani miongoni mwao, lakini siku ile Roho Mtakatifu aliijaza mioyo yao kiasi kwamba tunaona baadaye ilisemwa: “Tazama jinsi watu hawa wanavyopendana.” Kulikuwa na upendo katika kanisa la kwanza ambao hata wapagani waliuona, wala hawakuweza kuuelewa. Kwa nini hivyo? Roho Mtakatifu ni kifungo cha muungano kati ya Baba na Mwana, na kifungo hicho ni upendo.

Roho Mtakatifu ni upendo tu wa Mungu unaokuja kukaa moyoni. Anapokaa pamoja nami na ndugu yangu, tunajifunza kupendana. Ingawa kwa asili sina upendo, na ingawa nina neema kidogo sana, kama moyo wa ndugu yangu umejaa Roho Mtakatifu ananipenda katika hayo yote. Wajua, upendo ni jambo la ajabu. Maadamu mtu anajaribu kupenda si upendo halisi, lakini upendo halisi ukija, kadiri unavyokutana na upinzani zaidi ndivyo unavyoshinda zaidi, kwa maana kadiri unavyoweza kujitumia na kujikamilisha, ndivyo unavyofurahi zaidi. Mchukue mama mwenye mwana amwaibishaye. Jinsi upendo wake unavyomfuata! Anapoona kuwa ameanguka kwa kina zaidi kuliko wakati wowote uliopita, jinsi moyo wa mama mpendwa unavyompenda tu kwa nguvu zaidi katika taabu yote ile! Je, Maandiko hayasemi, “Yeye aliutoa uhai wake kwa ajili yetu; nasi imetupasa kuutoa uhai wetu kwa ajili ya ndugu.”? 1 Yohana 3:16. Roho Mtakatifu anakuja kama roho ya upendo, na kama unataka kuijua furaha ya Roho Mtakatifu, na unataka akuongoze katika pumziko la Mungu na akuweke huko, jihadhari kuliko kila kitu duniani au kuzimu na kuwa bila upendo. Neno moja kali kwa ndugu yako mwanamume au mwanamke huleta wingu juu yako bila wewe kujua. Watu wamezoea kusema tu jinsi wapendavyo juu ya mmoja na mwenzake kiasi kwamba wanasema mambo makali na yasiyo ya fadhili na yasiyo ya upendo, na wingu lijapo kutokana na hayo, hawawezi kulielewa.

Kama kuna jambo moja limhuzunishalo Mungu, kama kuna jambo moja limzuialo Roho—tunda la Roho ni upendo—ni ukosefu wa upendo. Kama unataka kuishi katika furaha ya Roho Mtakatifu, fanya agano lako na Mungu. “Lakini,” wasema, “yupo mtu Mkristo anayenifanya nisiwe na saburi kabisa; ananitaabisha na kunikera hivyo kwa upumbavu wake. Na wapo wale watu wa kidunia; jinsi walivyonishawishi nyakati zilizopita na kunidhuru! Na yupo yule mfanyabiashara anayejaribu kuniangamiza.” Wachukue wote, na mke wako mwenyewe na watoto na kila mtu aliye karibu nawe na useme, “Naelewa, upendo ni pumziko, na pumziko ni upendo. Mungu hupumzika katika upendo wake. Upendo ni pumziko na pumziko ni upendo, na pasipo upendo pumziko lazima lisumbuliwe.” Na tuseme leo, “Naona furaha ni nini; ni furaha ya kupenda daima, ni furaha ya kupoteza uhai wangu mwenyewe katika kuwapenda wengine.” Kuhusiana na unyenyekevu, mtu fulani auliza, “Vipi kuhusu andiko lile, ‘Kwa heshima mkiwatanguliza wenzenu?’”

Nafsi inapoingia katika unyenyekevu mkamilifu mbele za Mungu inakuwa si kitu, na Mungu anakuwa yote katika yote. Mimi si kitu. Hakuna nafsi ya kuudhiwa; nimesema mbele za Mungu: “Mimi si kitu; ni uzima wako na nuru yako peke yake iangazayo. Heshima ni yako, wala hakuna kitu kiwezacho kunigusa ila kile kilicho kinyume cha utukufu wa Mungu wangu.” Mpendwa, je, unaishi katika furaha ya Roho Mtakatifu? Njoo na ukubali baraka na ujitoe kuishi maisha ya unyenyekevu ambamo wewe si kitu, na maisha ya upendo kama ya Kristo ambamo unaishi tu kwa ajili ya wenzako, kwa maana ufalme wa Mungu ni furaha ya Roho Mtakatifu. Wazo langu la mwisho ni kwamba furaha ya Roho Mtakatifu ni furaha ya kumfanyia Mungu kazi. Furaha ya uwepo wa Yesu, furaha ya kuokolewa kutoka dhambini, furaha ya upendo kwa ndugu, na kisha furaha ya kumfanyia Mungu kazi. Baadhi yetu nyakati fulani tumehisi ni jambo lisiloeleweka kiasi gani kuwa Mungu wa milele afanye kazi kupitia sisi; nasi tumesema, “Bwana, ni nini hiki, kwamba wewe Mwenye Uweza wa Yote wafanya kazi ndani yangu na kupitia mimi, funza duni kwa asili?” Ni siri ipitayo maarifa, na bado ni kweli kabisa.

Furaha ya Roho Mtakatifu inakuja mtu ajitoapo kwa kazi ya mfano wa Kristo ya kuchukua upendo wa Mungu kwa watu. Na tuwatafute wanaopotea, na tuishi na kufa kwa ajili ya roho, na tuishi na kufa ili wenzetu warejeshwe na kurudishwa kwa Mungu wao. Hakuna furaha kama kusikia wimbo wa furaha wa nafsi iliyozaliwa upya.

Lakini ndiyo, kuna furaha nyingine iwezayo kuwa na kina hicho hicho. Hata kama Mungu hanipi baraka ya kusikia nafsi iliyozaliwa upya ikiimba wimbo wake, naweza kuwa na furaha, ile huruma pamoja na Yesu katika maisha yake yaliyokataliwa, na uhakika kwamba Baba ananitazama kwa upendeleo mwema. Ninapowaza maelfu ya waaminio katika ulimwengu wa Kikristo na kisha kuufikiria ulimwengu wa wapagani, kilio kinapanda moyoni mwangu: “Tunafanya nini?”

Twahitaji kumlilia Mungu mchana na usiku, “Bwana Mungu, tuamshe. Bwana Mungu, uache Roho Mtakatifu awake ndani yetu.” Je, sisi ni warithi wa kweli wa Yesu Kristo? Je, kweli sisi ni wafuasi na warithi wa Kristo aliyekwenda hadi Kalvari kutoa damu yake kwa ajili ya watu? Basi na tukumbuke furaha ya Roho Mtakatifu ni furaha ya kumfanyia Mungu kazi katika Kristo.

Ninaamini kuwa Mungu ana njia mpya, miongozo mipya, na nguvu mpya kwa ajili ya watu wake kama watamngoja tu.

Lakini kile ambacho wengi wetu hufanya ni hiki: tunamshukuru Mungu kwa yote aliyoyatoa, tunatazama njia zote za kufanya kazi tulizonazo, na tunasema kuwa tutajaribu kufanya kazi yetu vizuri zaidi. Lakini oh, kama tungekuwa na hisia ya uhitaji, kama tungekuwa na hisia yoyote, kwa maono ya Roho Mtakatifu, ya hali ya mamilioni yanayotuzunguka, nina hakika tungeanguka kifudifudi mbele za Mungu na kusema, “Mungu nisaidie kufanya jambo jipya. Oh kila nyuzi ya nafsi yangu ichukuliwe milki kwa ajili ya kazi hii kuu pamoja na Mungu!” Uhitaji mkuu ni kwamba Wakristo wote wajiweke wakfu kabisa kwa Mungu kwa ajili ya kazi yake. Mungu na atusaidie kuijua furaha ya Roho Mtakatifu ni nini.

Kwa kuhitimisha, nauliza tena: “Je, unaamini kuwa inawezekana kwa Bwana Yesu, Shilo wetu, ambaye Yakobo alimtabiri, Yoshua wetu, Mfalme wetu mtukufu na Kuhani Mkuu,—je, unaamini inawezekana kwa Kristo Yesu kukuingiza leo katika pumziko la Mungu?” Kumbuka neno lile katika Waebrania 3:7, “Kama vile Roho Mtakatifu asemavyo, Leo.” Leo, jipe ujasiri na uichukue huduma yako, ichukue biashara yako, uyachukue mazingira yako, uichukue tabia yako ya asili, uichukue nyumba yako, na uyachukue maisha yako kwa ajili ya siku zijazo hapa Duniani, na useme, “Sielewi, sijui litakalokuja, lakini jambo moja najua, ninatoa kila kitu kabisa mikononi mwa Mwana-Kondoo wa Mungu aliyesulubiwa; atakuwa nami mzima wangu wote.” Na oh, kumbuka, mpendwa, kuwa Kristo atakuwa kwako zaidi ya uwezavyo kufikiri au kuelewa, zaidi ya uwezavyo kuomba au kutamani.

Njoo, na tujitupe katika mikono ile iliyobarikiwa, yenye upendo, na tuamini hata sasa kuwa Yoshua wetu anatuongoza katika pumziko la Mungu, pumziko ambamo tunaokolewa kutoka kujitunza nafsi, kujitafutia, kujitegemea na kujipenda, pumziko ambamo hatujifikirii sisi wenyewe, bali ambamo Yeye aliye mwenye uweza wa yote na aliyepo kila mahali daima atakuwa pamoja nasi na daima atafanya kazi ndani yetu. Na tukiisha kufanya hivyo, na tuidai ile ahadi, kwamba kama tulivyoutafuta kwanza ufalme na haki ya Mungu, vitu vyote tutazidishiwa. Mpendwa, ufalme wa Mungu umo ndani yenu, nao ni haki na amani na furaha katika Roho Mtakatifu. Njoo, na tuudai hata sasa kwa imani rahisi, ya kitoto, ya unyenyekevu.