Meli Iliyosimamishwa

“Nafsi yetu imeokoka kama ndege katika mtego wa wawindaji; mtego umevunjika, na sisi tumeokoka.” — kutoka Zaburi 124

Huko Lagos, Ajayi alinunuliwa na wafanyabiashara wa watumwa Wareno. Aliwekwa pamoja na wavulana na wanaume wengine katika chumba chenye giza kisicho na dirisha, wakiwa wamefungwa pamoja kwa minyororo shingoni. Walingoja humo kwa karibu miezi minne.

Mwishowe, usiku mmoja, walipelekwa kwenye meli. Kulikuwa na watu 187 waliosongamana ndani yake. Meli hiyo ilikuwa iende ng’ambo ya bahari hadi Amerika, ambako watumwa walilazimishwa kufanya kazi katika mashamba makubwa.

Lakini jioni ile ile, manowari mbili za Kiingereza zilikuja zikaisimamisha meli ya watumwa! Siku zile jeshi la wanamaji la Uingereza lilizunguka huku na huko kando ya pwani ya Afrika ili kuzisimamisha meli za watumwa na kuwaweka watu huru. Meli zao ziliitwa Myrmidon na Iphigenia. Ilikuwa tarehe 7 Aprili 1822.

Ajayi na rafiki zake watano walipelekwa kwenye Myrmidon. Huko waliona kitu cha kutisha: nyama yenye ngozi nyeupe ikiwa imening’inizwa, na safu za mipira ya chuma juu ya sitaha. Wavulana walidhani mabaharia walikuwa wamewala mateka wengine, na kwamba mipira ile ilikuwa vichwa vyao! Lakini walipochunguza kwa karibu, nyama ile ilikuwa ya nguruwe, na mipira ilikuwa mipira ya mizinga tu. Ajayi aliicheka hadithi hii maisha yake yote.

Mabaharia walikuwa wema. Waliwapa wavulana chakula na nguo. Baada ya karibu miezi miwili na nusu baharini, meli iliwafikisha Sierra Leone, mahali ambapo watu waliookolewa wangeweza kuishi kwa uhuru. Watu wa huko waliwaambia, “Mko huru!” Na upesi sana, wakaamini.

Yesu alikuja kuwaweka watu huru pia. Alisema alikuja “kuwatangazia wafungwa kufunguliwa kwao.” Ajayi aliwekwa huru kutoka katika meli ya watumwa. Siku moja angejifunza habari za uhuru mkubwa zaidi.

Yesu mpendwa, asante kwa kuwa ulikuja kuwaweka watu huru. Asante kwa watu wanaowasaidia wengine walio katika shida. Unisaidie kuwa mmoja wao. Amina.