Aliuzwa Tena na Tena

“Na usitutie majaribuni, lakini utuokoe na yule mwovu.” — kutoka Mathayo 6

Asubuhi iliyofuata, wavamizi waligawana mateka wao. Ajayi alipewa mkuu wao, kisha akabadilishwa kwa farasi! Lakini farasi huyo hakufaa, kwa hiyo akarudishwa. Kwa muda fulani alikuwa katika mji mmoja na mama yake na dada yake mchanga, naye aliweza kwenda kuwaona.

Kisha jioni moja Ajayi alifungwa minyororo pamoja na mateka wengine, ili apelekwe sokoni asubuhi. Alikesha usiku kucha bila kulala. Kulipopambazuka walianza safari, naye alidhani walipita mbele ya nyumba ile ile aliyokuwamo mama yake. Hakuthubutu kuita. Alidhani hatamwona tena kamwe.

Ajayi aliuzwa tena, na tena, na tena. Kwa jumla aliuzwa au kubadilishwa mara sita hivi, kwa vitu kama nguo, tumbaku na pombe kali. Kila mara alipelekwa mbali zaidi na nyumbani, kati ya watu waliozungumza tofauti naye.

Alihuzunika sana hata akaacha kula, akaugua. Mwishowe alifika ufuoni mwa ziwa kubwa la pwani. Hakuwahi kuona maji mengi kiasi hicho! Yalimtisha sana. Alivushwa kwa mtumbwi usiku hadi mji uitwao Lagos, mahali meli za watumwa zilipofika.

Miaka mingi baadaye, Ajayi alitazama nyuma akaikumbuka miezi ile ya giza. Aliona kwamba Mungu alikuwa akimlinda muda wote, hata kabla hajalijua jina la Mungu. Alisema kwamba Mungu “aliniokoa na yule mwovu,” sawasawa na sala ambayo Yesu alitufundisha, muda mrefu kabla yeye hajaiomba kamwe.

Mungu anakulinda wewe pia, hata siku unazojisikia kuwa peke yako kabisa.

Mungu mpendwa, asante kwa kuwa unanilinda hata ninapojisikia kuwa peke yangu. Tafadhali unilinde salama na uniokoe na yule mwovu. Amina.