Kurudi Kwake!

Jiandae kukutana na Bwana Yesu Kristo!

“Na katika jua na mwezi na nyota kutakuwa na ishara; na katika nchi dhiki ya mataifa wakiona taabu kwa msukosuko wa bahari na mawimbi; watu wakivunjika mioyo kwa hofu na kwa kutazamia mambo yatakayoupata ulimwengu; kwa maana nguvu za mbinguni zitatikiswa. Ndipo watakapomwona Mwana wa Adamu akija katika wingu pamoja na nguvu na utukufu mwingi. Basi mambo hayo yaanzapo kutokea, changamkeni, mkaviinue vichwa vyenu, kwa kuwa ukombozi wenu umekaribia.” Luka 21:25-28 Ishara nyingi zinatuonyesha tulipo leo na jinsi tulivyo karibu na wakati ambao mataifa yatahukumiwa. Popote ulipo sasa hivi, kumbuka daima kwamba Yesu Kristo anakuja karibuni.

Wengine wanaamini na wanangojea kurudi kwake kwa shauku, huku wengine wakiwa na mashaka na hawamtazamii. Lakini yeye anakuja, kwa hiyo jiandae kwa ajili yake. Anakuja kwa ajili ya “...wote wanaopenda kufunuliwa kwake.” (2 Timotheo 4:8), wale walio tayari kwa ajili yake. Biblia inasema heri wale wanaongojea kurudi kwake (Luka 12:37).

Ukiwa shuleni, nyumbani, au mahali pengine popote, ishi maisha yako kana kwamba kurudi kwake kwaweza kutokea wakati wowote, kwa sababu hakika kwaweza kutokea wakati wowote. Wakorintho wa Kwanza 15:52 inatuambia, “kwa dakika moja, kufumba na kufumbua, wakati wa parapanda ya mwisho; maana parapanda italia, na wafu watafufuliwa, wasiwe na uharibifu, nasi tutabadilika.” Yamepita takriban miaka elfu mbili tangu Yesu Kristo apae kutoka ulimwengu huu. Unabii kuhusu kuja kwake unatimizwa mbele ya macho yetu. Alisema: “Naam, naja upesi...” (Ufunuo 22:20).

Takwimu zinaonyesha kwamba ulimwengu wa leo ni katili zaidi, wenye jeuri, na umejaa ugaidi kuliko wakati mwingine wowote.

Changamoto za maisha ni ngumu zaidi sasa kuliko zilivyokuwa wakati wowote. Kwa hiyo, usikutwe ghafla bila tahadhari. Kaa ndani ya Kristo, ishi katika haki, na uendelee kuishi kwa ajili yake. Angaza ulimwengu wako kwa Injili kwa kuihubiri injili na kuvuta roho kwa Bwana Yesu Kristo. Thawabu yako ni kuu.

Ulimwengu unavyobadilika, kataa kushindwa na shinikizo lake, kwa sababu yeye aliye ndani yako ni mkuu kuliko yeye aliye katika dunia hii. Kristo amekupa mamlaka juu ya vitu vyote. Uwe imara usiyetikisika. Ishi juu ya mifumo ya ulimwengu.

Kristo anarudi! Si hadithi wala si ngano, kunakaribia kutokea!

Toa wakati wako, rasilimali zako, na nguvu zako kwa ajili ya kueneza Injili mpaka ifike miisho ya dunia. Jiandae na uwasaidie wengine pia wajiandae kwa ajili ya unyakuo wa kanisa.