Furaha Asubuhi

“Huja kilio kukaa usiku kucha, lakini asubuhi huwa furaha.” — kutoka Zaburi 30

Mwaka 1896 watu wa Okoyong walihamia nchi mpya, naye Mary akahamia pamoja nao mahali paitwapo Akpap. Wakati nyumba mpya ikijengwa, aliishi katika banda lenye vyumba viwili lisilo na sakafu.

Kisha ugonjwa ulienea nyumbani mwake, na watoto wake wanne wakafa. Muda mfupi baadaye ugonjwa mbaya sana uitwao ndui ulienea katika nchi yote. Mary alitumia saa nyingi kila siku akiwapa watu chanjo ili kuwakinga, akaigeuza nyumba yake ya zamani huko Ekenge kuwa hospitali. Karibu kila mtu mwingine alikimbia.

Kisha Chifu Edem, aliyekuwa amemkaribisha miaka minane kabla, akapatwa na ndui. Mary alimuuguza mchana na usiku, lakini alikufa katikati ya usiku. Hapakuwa na mtu wa kumsaidia. Kwa hiyo Mary alitengeneza jeneza kwa mikono yake mwenyewe, akachimba kaburi, akamzika rafiki yake wa zamani. Kisha akarudi kwa miguu kupitia msitu wenye giza na unyevu hadi Akpap jua lilipokuwa likichomoza.

Kwa muda fulani Mary hakuwa na moyo wa kufanya chochote. Kwa miaka mitatu alifanya kazi peke yake, mara nyingi akiwa mgonjwa na bila kuweza kulala. “Kila kitu ni giza,” aliandika, “isipokuwa juu. Kalvari inasimama salama na imara.” Kalvari ni mahali ambapo Yesu alitufia. Mwaka baada ya mwaka, hakuna mtu aliyebatizwa. Lakini Mary alisema, “Kristo alinituma kuhubiri Injili, naye atashughulikia matokeo.”

Na mwishowe, asubuhi ikafika. Mwezi Agosti 1903, miaka kumi na mitano baada ya Mary kuingia Okoyong kwa mara ya kwanza, vijana saba walibatizwa huko. Mary pia aliwaleta watoto kumi na mmoja wabatizwe, na sita kati yao walikuwa watoto aliowaokoa. Kisha wote waliimba Zaburi 103 kwa lugha ya Kiefik. Zaburi hiyo inamsifu Mungu ambaye “aukomboa uhai wako na kaburi,” maana yake ni kwamba yeye huyaokoa maisha yetu. Mary alikuwa ameona maisha mengi yakiondolewa huko Okoyong. Sasa watu wake walikuwa wakiimba juu ya Mungu anayeokoa, na macho yake yakajaa machozi.

Wakati mwingine tunapaswa kungoja muda mrefu ili tuone mambo mema yakitokea. Lakini Mungu anafanya kazi hata gizani, na asubuhi huwa furaha.

Mungu mpendwa, ninapokuwa na siku za huzuni, nisaidie kukumbuka kwamba bado uko pamoja nami. Asante kwa kuwa asubuhi huwa furaha. Amina.