Wanawake Wawili Kutoka Msituni

“Nami nitawaleta vipofu kwa njia wasiyoijua; nitafanya giza kuwa nuru mbele yao.” — kutoka Isaya 42

Karibu miaka miwili baadaye, Novemba 1957, Betty alikuwa katika kituo cha misheni kiitwacho Arajuno. Wanaume wawili wa Kikichua walikuja na habari za kushangaza. Wanawake wawili wa Kiwaorani walikuwa wametoka msituni na walikuwa wakikaa nyumbani kwao! Betty alikwenda mara moja.

Wanawake wale waliitwa Mankamu na Mintaka. Mintaka ndiye yule mwanamke mzee aliyewatembelea wamisionari watano ufuoni, siku chache tu kabla hawajafa.

Betty aliwachukua wanawake wote wawili nyumbani Shandia. Kwa miezi kumi waliishi nyumbani mwake pamoja naye na Valerie mdogo. Betty aliwapa chakula, mahali pa kulala na kila kitu walichohitaji. Na siku baada ya siku aliwasikiliza wakizungumza, akayaandika maneno yao. Lugha ya Kiwaorani haifanani na lugha nyingine yoyote duniani. Hapakuwa na kitabu cha kumsaidia. Ilikuwa lugha ngumu kuliko zote alizowahi kujifunza.

Kulikuwa na mwanamke mwingine wa Kiwaorani aitwaye Dayuma. Miaka mingi kabla, alikuwa amewakimbia watu wake akaenda kuishi kati ya Wakichua. Dada yake Nate Saint, Rachel Saint, alikuwa akijifunza lugha ya Kiwaorani kutoka kwake. Mwaka 1958, Rachel na Dayuma walirudi Ekuado. Dayuma alikutana na Mintaka na Mankamu, na wanawake wale watatu wakaamua kurudi nyumbani kwa watu wao pamoja.

Tarehe 3 Septemba 1958, wanawake wale watatu waliingia msituni wakitembea. Hakuna aliyejua kama wangerudi. Lakini karibu wiki tatu baadaye, walirudi, pamoja na kikundi cha wanaume na wanawake wa Kiwaorani! Walileta mwaliko. Betty na Rachel waliombwa waje kuishi kati ya Waorani.

Hakuna mtu ambaye angeweza kupanga jambo hili. Njia ya kuwafikia Waorani ilifunguliwa na wanawake watatu waliotoka msituni na kurudi tena. Mungu anaweza kufungua milango ambayo sisi wenyewe hatuwezi kuifungua.

Mungu mpendwa, asante kwa kuwa unaweza kufungua milango ambayo hakuna mwingine anayeweza kuifungua. Nisaidie kuwatendea wema wageni, kama Betty alivyofanya. Amina.