Mambo Yote kwa Mema
Mambo yaliyo bora hufanya kazi kwa mema kwa wacha Mungu

Sura 3 · dakika 17 za kusoma · dakika 22 za kusikiliza

Mambo yaliyo bora hufanya kazi kwa mema kwa wacha Mungu

TUTAFIKIRI, kwanza, ni mambo gani hufanya kazi kwa mema kwa wacha Mungu; na hapa tutaonyesha kwamba mambo yaliyo bora na mambo yaliyo mabaya kabisa, yote mawili, hufanya kazi kwa mema yao. Tunaanza na mambo yaliyo bora.

1. Sifa za Mungu hufanya kazi kwa mema kwa wacha Mungu.

(1). Uweza wa Mungu hufanya kazi kwa mema. Ni uweza wa utukufu (Wakolosai 1:11), nao umejitoa kwa ajili ya mema ya wateule.

Uweza wa Mungu hufanya kazi kwa mema, kwa kututegemeza katika taabu. “Mikono ya milele i chini yako” (Kumbukumbu la Torati 33:27). Ni nini kilichomtegemeza Danieli katika tundu la simba? Yona katika tumbo la nyangumi? Wale Waebrania watatu katika tanuru? Ni uweza wa Mungu peke yake. Je, si ajabu kuona mwanzi uliopondeka ukimea na kusitawi? Mkristo dhaifu aweza jinsi gani, si kustahimili mateso tu, bali hata kufurahi ndani yake? Anategemezwa na mikono ya Mwenyezi. “Uweza wangu hutimilika katika udhaifu” (2 Wakorintho 12:9).

Uweza wa Mungu hufanya kazi kwa ajili yetu kwa kutupatia mahitaji yetu. Mungu huumba faraja njia zinapokoma. Yeye aliyempelekea nabii Eliya chakula kwa kunguru, atawaletea watu wake riziki. Mungu aweza kuyahifadhi “mafuta katika chupa” (1 Wafalme 17:14). Bwana aliufanya uvuli wa jua katika saa ya Ahazi urudi nyuma madaraja kumi: vivyo hivyo faraja zetu za nje zinapopungua, na jua karibu kuchwa, mara nyingi Mungu huleta uamsho, na kulirudisha jua nyuma madaraja mengi.

Uweza wa Mungu huishinda mielekeo yetu miovu. “Atayakanyaga maovu yetu” (Mika 7:19). Je, dhambi yako ina nguvu? Mungu ni mwenye uweza, atakivunja kichwa cha lewiathani huyu. Je, moyo wako ni mgumu? Mungu atalayeyusha jiwe hilo katika damu ya Kristo. “Mwenyezi ameulegeza moyo wangu” (Ayubu 23:16). Tunaposema kama Yehoshafati, “Hatuna nguvu juu ya jeshi hili kubwa”; Bwana hupanda pamoja nasi, na kutusaidia kupigana vita vyetu. Hukata vichwa vya tamaa zile zilizo kama Goliathi, zenye nguvu kuliko sisi.

Uweza wa Mungu huwashinda adui zetu. Huutia doa kiburi chao, na kuuvunja ujasiri wa watesi. “Utawavunja kwa fimbo ya chuma” (Zaburi 2:9). Kuna ghadhabu ndani ya adui, uovu ndani ya Ibilisi, lakini uweza ndani ya Mungu. Jinsi gani aweza kwa urahisi kuyakimbiza majeshi yote ya waovu! “Bwana, si kitu kwako kusaidia” (2 Mambo ya Nyakati 14:11). Uweza wa Mungu uko upande wa kanisa lake. “Heri wewe, Israeli, taifa lililookolewa na Bwana, yeye aliye ngao ya msaada wako, na upanga wa utukufu wako” (Kumbukumbu la Torati 33:29).

(2). Hekima ya Mungu hufanya kazi kwa mema. Hekima ya Mungu ndiyo mwongozo wetu wa kutufundisha. Kama yeye ni Mungu Mwenye Nguvu, vivyo hivyo pia ni Mshauri (Isaya 9:6). Mara nyingi tuko gizani, na katika mambo yaliyotatanika na ya shaka hatujui njia ipi tuishike; hapo Mungu huingia na nuru. “Nitakushauri, jicho langu likikutazama” (Zaburi 32:8). “Jicho,” hapo, limewekwa badala ya hekima ya Mungu. Ni kwa nini watakatifu huweza kuona mbali kuliko wanasiasa walio wepesi wa kuona kuliko wote? Wao huliona baya mapema, wakajificha; huziona hila za Shetani. Hekima ya Mungu ndiyo nguzo ya moto iendayo mbele yao na kuwaongoza.

(3). Wema wa Mungu hufanya kazi kwa mema kwa wacha Mungu. Wema wa Mungu ni njia ya kutufanya wema. “Wema wa Mungu wakuvuta upate kutubu” (Warumi 2:4). Wema wa Mungu ni mwali wa jua wa rohoni wa kuuyeyusha moyo hata ukatoa machozi. Lo, nafsi husema, je, Mungu amekuwa mwema kwangu hivi? Je, ameniahirishia jehanamu muda mrefu hivi, nami nitamhuzunisha Roho wake tena? Je, nitautendea dhambi wema huu?

Wema wa Mungu hufanya kazi kwa mema, kwa kuwa huziingiza baraka zote. Fadhili tunazopokea ni vijito vya fedha vitokavyo katika chemchemi ya wema wa Mungu. Sifa hii ya kimungu ya wema huleta aina mbili za baraka. Baraka za kawaida: hizi wote hushiriki, waovu kama vile wema; umande huu mtamu huanguka juu ya mbigili kama vile juu ya waridi. Baraka za taji: hizi hushiriki wacha Mungu peke yao. “Akutia taji ya fadhili” (Zaburi 103:4). Hivyo sifa za Mungu zilizobarikiwa hufanya kazi kwa mema kwa watakatifu.

2. Ahadi za Mungu hufanya kazi kwa mema kwa wacha Mungu.

Ahadi ni hati za mkono wa Mungu; je, si vema kuwa na dhamana? Ahadi ni maziwa ya Injili; je, maziwa si kwa ajili ya mema ya mtoto mchanga? Zinaitwa “ahadi kubwa mno, za thamani” (2 Petro 1:4). Ni kama dawa za kuburudisha kwa nafsi iliyo karibu kuzimia. Ahadi zimejaa nguvu.

Je, tuko chini ya hatia ya dhambi? Iko ahadi, “Bwana, Mungu mwenye rehema, mwenye neema” (Kutoka 34:6), ambapo Mungu, kana kwamba, huvaa mapambo yake ya utukufu, na kunyosha fimbo ya enzi ya dhahabu, ili kuwatia moyo wenye dhambi maskini wanaotetemeka waje kwake. “Bwana, mwenye rehema.” Mungu yu tayari zaidi kusamehe kuliko kuadhibu. Rehema huongezeka ndani yake kuliko dhambi ndani yetu. Rehema ndiyo tabia yake. Nyuki kwa asili hutoa asali; huuma tu anapochokozwa. “Lakini,” asema mwenye dhambi mwenye hatia, “siwezi kustahili rehema.” Hata hivyo yeye ni mwenye neema: huonyesha rehema, si kwa sababu tunastahili rehema, bali kwa sababu anapendezwa na rehema. Lakini hilo lanihusu nini mimi? Huenda jina langu halimo katika hati ya msamaha. “Awaonea rehema maelfu” : hazina ya rehema haijakwisha. Mungu ana hazina zilizowekwa akiba, na kwa nini wewe usipate fungu la mtoto?

Je, tuko chini ya unajisi wa dhambi? Iko ahadi ifanyayo kazi kwa mema. “ Nitauponya ukengeufu wao” (Hosea 14:4). Mungu hatatoa rehema tu, bali na neema. Tena ametoa ahadi ya kumtuma Roho wake (Isaya 44:3), ambaye, kwa sababu ya tabia yake ya kutakasa, katika Maandiko hufananishwa wakati mwingine na maji, yanayosafisha chombo; wakati mwingine na pepeto, linalopepeta nafaka na kusafisha hewa; wakati mwingine na moto, unaosafisha madini. Hivyo Roho wa Mungu ataisafisha nafsi na kuiweka wakfu, akiifanya kuwa mshiriki wa tabia ya Uungu.

Je, tuko katika taabu kubwa? Iko ahadi ifanyayo kazi kwa mema yetu, “Nitakuwa pamoja naye taabuni” (Zaburi 91:15). Mungu hawaleti watu wake katika taabu na kuwaacha humo. Atasimama pamoja nao; atavishika vichwa vyao na mioyo yao wanapozimia. Tena iko ahadi nyingine, “Yeye ni ngome yao wakati wa taabu” (Zaburi 37:39). “Lo,” nafsi husema, “nitazimia siku ya kujaribiwa.” Lakini Mungu atakuwa nguvu ya mioyo yetu; ataunganisha majeshi yake pamoja nasi. Ama ataufanya mkono wake kuwa mwepesi zaidi, ama imani yetu kuwa na nguvu zaidi.

Je, tunaogopa kupungukiwa na mahitaji ya nje? Iko ahadi. “Wamtafutao Bwana hawatahitaji kitu cho chote kilicho chema” (Zaburi 34:10). Ikiwa ni chema kwetu, tutakipata; ikiwa si chema kwetu, basi kunyimwa kwake ndiko kwema. “Nitakibariki chakula chako na maji yako” (Kutoka 23:25). Baraka hii huanguka kama umande wa asali juu ya jani; hukifanya kitamu kile kidogo tulicho nacho. Na nikose nyama ya mawindo, ili mradi nipate baraka. Lakini naogopa sitapata riziki? Lisome Andiko hili, “Nilikuwa kijana, na sasa ni mzee, na katika miaka hiyo yote sijawaona wenye haki wakitelekezwa, wala watoto wao wakihangaika kutafuta mkate” (Zaburi 37:25). Twapaswa kulielewaje jambo hili? Daudi analisema kama jambo alilolishuhudia mwenyewe; hakupata kuona kupatwa kwa namna hiyo, hakupata kumwona mtu mcha Mungu ameshushwa chini kiasi cha kukosa kipande cha mkate cha kutia kinywani. Daudi hakupata kuwaona wenye haki pamoja na watoto wao wakipungukiwa. Ingawa Bwana huenda akawajaribu wazazi wacha Mungu kwa muda kwa uhitaji, hata hivyo si watoto wao pia; uzao wa wacha Mungu utapatiwa mahitaji. Daudi hakupata kumwona mwenye haki akitafuta mkate, tena ametelekezwa. Ingawa huenda akashushwa katika dhiki kubwa, hata hivyo hatelekezwi; bado yeye ni mrithi wa mbinguni, na Mungu anampenda.

Swali. Ahadi hufanya kazi kwa mema jinsi gani?

Jibu. Ni chakula cha imani; na kile kinachoitia imani nguvu hufanya kazi kwa mema. Ahadi ni maziwa ya imani; imani hufyonza lishe kutoka kwazo, kama mtoto kifuani mwa mama. “Yakobo akaogopa sana” (Mwanzo 32:7). Roho yake ilikuwa karibu kuzimia; basi akaiendea ahadi, “Bwana, wewe ulisema, Hakika nitakutendea mema” (Mwanzo 32:12). Ahadi hii ilikuwa chakula chake. Alipata nguvu nyingi sana kutoka katika ahadi hii, hata akaweza kushindana na Bwana usiku kucha katika maombi, wala hakumwacha aende mpaka amembariki.

Ahadi pia ni chemchemi za furaha. Katika ahadi kuna mengi zaidi ya kufariji kuliko yaliyomo duniani ya kutatanisha. Ursin alifarijiwa na ahadi ile: “Hakuna mtu atakayewanyakua katika mkono wa Baba yangu” (Yohana 10:29). Ahadi ni dawa za kuburudisha wakati wa kuzimia. “Kama sheria yako isingalikuwa furaha yangu, hapo ningalipotea katika taabu yangu” (Zaburi 119:92). Ahadi ni kama vielea katika wavu, vya kuuchukua moyo usizame katika maji makuu ya dhiki.

3. Rehema za Mungu hufanya kazi kwa mema kwa wacha Mungu.

Rehema za Mungu hunyenyekesha. “Ndipo mfalme Daudi akaingia, akaketi mbele za Bwana; akasema, Mimi ni nani, Ee Bwana Mungu, na nyumba yangu ni nini, hata umenileta hata hapa?” (2 Samweli 7:18). Bwana, kwa nini heshima kama hii nimepewa mimi, hata niwe mfalme? Kwamba mimi niliyewafuata kondoo niingie na kutoka mbele ya watu wako? Vivyo hivyo husema moyo wenye neema, “Bwana, mimi ni nini, hata hali yangu iwe njema kuliko ya wengine? Hata ninywe matunda ya mzabibu, wakati wengine hunywa, si kikombe cha pakanga tu, bali kikombe cha damu (yaani, mateso hata kufa). Mimi ni nini, hata niwe na rehema hizi ambazo wengine wanazikosa, walio bora kuliko mimi? Bwana, ni kwa nini, pamoja na kutostahili kwangu kote, wimbi jipya la rehema huingia kila siku?” Rehema za Mungu humfanya mwenye dhambi kuwa na kiburi, bali mtakatifu kuwa mnyenyekevu.

Rehema za Mungu zina nguvu ya kuiyeyusha nafsi; huiyeyusha katika upendo kwa Mungu. Hukumu za Mungu hutufanya tumwogope, rehema zake hutufanya tumpende. Jinsi gani Sauli alivyoguswa na wema! Daudi alimpata mahali pa faida, na angeweza kukata, si pindo la joho lake tu, bali kichwa chake; hata hivyo akauacha uhai wake. Wema huu uliuyeyusha moyo wa Sauli. “Je! Hii ndiyo sauti yako, mwanangu Daudi? Sauli akapaza sauti yake, akalia” (1 Samweli 24:16). Ndivyo ilivyo nguvu ya rehema ya Mungu ya kuyeyusha; huyafanya macho yadondoshe machozi ya upendo.

Rehema za Mungu huufanya moyo uzae matunda. Unapotumia gharama zaidi juu ya shamba, huzaa mavuno bora. Nafsi yenye neema humheshimu Bwana kwa mali yake. Haitendi na rehema zake kama Israeli walivyotenda na vito vyao na pete zao za masikioni, wakafanya ndama wa dhahabu; bali, kama Sulemani alivyotenda na fedha iliyotiwa hazinani, hujenga hekalu kwa ajili ya Bwana. Manyunyu ya dhahabu ya rehema huleta rutuba.

Rehema za Mungu huufanya moyo uwe na shukrani. “Nimrudishie Bwana nini kwa ukarimu wake wote alionitendea? Nitapokea kikombe cha wokovu” (Zaburi 116:12, 13). Daudi anawagusia wana wa Israeli, ambao katika sadaka zao za amani walikuwa na desturi ya kushika kikombe mikononi mwao, na kumshukuru Mungu kwa ajili ya kuokolewa kwao. Kila rehema ni sadaka ya neema ya bure; na jambo hili huipanua nafsi katika shukrani. Mkristo mwema si kaburi la kuzika rehema za Mungu, bali ni hekalu la kuimba sifa zake. Ikiwa kila ndege kwa jinsi yake, kama asemavyo Ambrosi, hulia akimshukuru Muumba wake, si zaidi sana Mkristo mwenye moyo mnyofu, ambaye maisha yake yametajirishwa na kutiwa harufu nzuri kwa rehema?

Rehema za Mungu huhuisha. Kama zilivyo sumaku za upendo, vivyo hivyo ni mawe ya kunolea utii. “Nitaenenda mbele za Bwana katika nchi za walio hai” (Zaburi 116:9). Yeye anayezitafakari tena baraka zake hujiona kuwa mtu aliyefungwa kwa ajili ya Mungu. Hutoa hoja kutoka katika utamu wa rehema hata kufikia wepesi wa wajibu. Hutumia na kutumiwa kwa ajili ya Kristo; hujiweka wakfu kwa Mungu. Kwa Warumi, mtu alipomkomboa mwingine, yule aliyekombolewa alipaswa baadaye kumtumikia. Nafsi iliyozungukwa na rehema huwa na bidii na juhudi katika utumishi wa Mungu.

Rehema za Mungu huzaa huruma kwa wengine. Mkristo ni mwokozi wa mambo ya dunia hii. Huwalisha wenye njaa, huwavika walio uchi, na huwatembelea wajane na yatima katika dhiki yao; kati yao hupanda mbegu za dhahabu za ukarimu wake. “Mtu mwema hufanya fadhili, na kukopesha” (Zaburi 112:5). Ukarimu hudondoka kutoka kwake bila kizuizi, kama manemane kutoka mtini. Hivyo kwa wacha Mungu, rehema za Mungu hufanya kazi kwa mema; ni mabawa ya kuwainua hata mbinguni.

Rehema za kiroho pia hufanya kazi kwa mema.

Neno linalohubiriwa hufanya kazi kwa mema. Ni harufu ya uzima, ni neno libadilishalo nafsi, huufananisha moyo na mfano wa Kristo; huleta uthibitisho. “Injili yetu haikuwafikia ninyi kwa maneno tu, bali na kwa nguvu, na kwa Roho Mtakatifu, na kwa uthibitifu mwingi” (1 Wathesalonike 1:5). Ni gari la wokovu.

Maombi hufanya kazi kwa mema. Maombi ni mvuvo wa mapenzi ya moyo; huipuliza hata ikawaka tamaa takatifu na juhudi za nafsi. Maombi yana nguvu kwa Mungu. “Niagizeni mimi” (Isaya 45:11). Ni ufunguo unaofungua hazina ya rehema ya Mungu. Maombi huuweka moyo wazi kwa Mungu, na kufungwa kwa dhambi; hutuliza mioyo isiyo na kiasi na mifuro ya tamaa. Lilikuwa shauri la Luther kwa rafiki yake kwamba, alipoona jaribu linaanza kuinuka, ajikimbilie kwa maombi. Maombi ni bunduki ya Mkristo, anayoifyatua juu ya adui zake. Maombi ni dawa kuu ya nafsi. Maombi hutakasa kila rehema (1 Timotheo 4:5). Huyafukuza majonzi: kwa kuitoa huzuni nje huustarehesha moyo. Hana alipokwisha kuomba, “akaenda zake, wala uso wake haukuwa na huzuni tena” (1 Samweli 1:18). Na ikiwa yana matokeo haya adimu, basi hufanya kazi kwa mema.

Meza ya Bwana hufanya kazi kwa mema. Ni mfano wa karamu ya arusi ya Mwanakondoo (Ufunuo 19:9), na arabuni ya ushirika ule tutakaokuwa nao pamoja na Kristo katika utukufu. Ni karamu ya vinono; hutupa mkate kutoka mbinguni, uhifadhio uzima, na kuzuia mauti. Ina matokeo matukufu katika mioyo ya wacha Mungu. Huyahuisha mapenzi yao, huzitia nguvu neema zao, huiua mielekeo yao miovu, huyafufua matumaini yao, na kuiongeza furaha yao. Luther asema, “Ni kazi kubwa kumfariji mtu aliyevunjika moyo, kama kuwafufua wafu”; hata hivyo jambo hili laweza kutendeka, na wakati mwingine hutendeka, kwa nafsi za wacha Mungu katika meza ile iliyobarikiwa.

4. Neema za Roho hufanya kazi kwa mema.

Neema ni kwa nafsi kama nuru kwa jicho, kama afya kwa mwili. Neema huitendea nafsi kama mke mwema amtendeavyo mumewe, “Humtendea mema siku zote za maisha yake” (Mithali 31:12). Jinsi gani neema zilivyo na faida isiyo na kifani! Imani na hofu huenda pamoja mkono kwa mkono. Imani huuweka moyo katika uchangamfu, hofu huuweka moyo katika utulivu wa makini. Imani huuzuia moyo usizame katika kukata tamaa, hofu huuzuia usielee katika kujiamini kupita kiasi. Neema zote hujionyesha katika uzuri wao: tumaini ni “ chapeo” (1 Wathesalonike 5:8), upole ni “pambo” (1 Petro 3:4), upendo ni “kifungo cha ukamilifu” (Wakolosai 3:14). Neema za watakatifu ni silaha za kuwalinda, mabawa ya kuwainua, vito vya kuwatajirisha, manukato ya kuwapa harufu nzuri, nyota za kuwapamba, dawa za kuwaburudisha. Je, haya yote si hufanya kazi kwa mema? Neema ndizo hati zetu za ushahidi kwa ajili ya mbinguni. Je, si vema kuwa na hati zetu saa ya kufa?

5. Malaika hufanya kazi kwa ajili ya mema ya Watakatifu.

Malaika wema wako tayari kutenda kila huduma ya upendo kwa watu wa Mungu. “Je! Hao wote si roho watumikao, wakitumwa kuhudumu kwa ajili ya hao watakaourithi wokovu?” (Waebrania 1:14). Baadhi ya mababa wa kanisa walikuwa na maoni kwamba kila mwamini ana malaika wake mlinzi. Jambo hili halihitaji mabishano makali. Yatutosha kujua kwamba jeshi lote la malaika kwa daraja zao hutumika kwa ajili ya mema ya watakatifu.

Malaika wema huwatumikia watakatifu maishani. Malaika alimfariji bikira Mariamu (Luka 1:28). Malaika walifunga vinywa vya simba, wasiweze kumdhuru Danieli (Danieli 6:22). Mkristo ana walinzi wa malaika wasioonekana wanaomzunguka. “Atakuagizia malaika zake wakulinde katika njia zako zote” (Zaburi 91:11). Malaika ni sehemu ya walinzi wa uhai wa watakatifu, naam, hata walio wakuu wa malaika: “Je! Hao wote si roho watumikao?” Malaika walio juu kabisa huwatunza watakatifu walio chini kabisa.

Malaika wema hutumika wakati wa kufa. Malaika huwa karibu na vitanda vya ugonjwa vya watakatifu ili kuwafariji. Kama Mungu afarijivyo kwa Roho wake, vivyo hivyo kwa malaika zake. Kristo katika dhiki yake kuu alitiwa nguvu na malaika (Luka 22:43); ndivyo walivyo waamini katika dhiki ya mauti: na pumzi ya watakatifu inapokoma, roho zao huchukuliwa juu mbinguni na msafara wa malaika (Luka 16:22).

Malaika wema pia hutumika siku ya hukumu. Malaika watayafungua makaburi ya watakatifu, na kuwaongoza mbele za Kristo, watakapofanywa kufanana na mwili wake wa utukufu. “Naye atawatuma malaika zake, nao watawakusanya wateule wake toka pepo nne, toka mwisho huu wa mbingu hata mwisho huu” (Mathayo 24:31). Malaika siku ya hukumu watawaondolea wacha Mungu adui zao wote. Hapa watakatifu husumbuliwa na adui. “Huwa adui zangu, kwa kuwa nalifuata lililo jema” (Zaburi 38:20). Haya, malaika hivi karibuni watawapa watu wa Mungu hati ya kustarehe, na kuwaweka huru mbali na adui zao wote: “Na yale magugu ni wana wa yule mwovu; na mavuno ni mwisho wa dunia, na wale wavunao ni malaika. Basi, kama vile magugu yakusanywavyo na kuchomwa motoni, ndivyo itakavyokuwa katika mwisho wa dunia: Mwana wa Adamu atawatuma malaika zake, nao watakusanya kutoka katika ufalme wake machukizo yote, na wale watendao maasi, na kuwatupa katika tanuru ya moto” (Mathayo 13:38-42). Siku ya hukumu malaika wa Mungu watawachukua waovu, ambao ndio magugu, na kuwafunga matita, na kuwatupa katika tanuru ya jehanamu, na hapo wacha Mungu hawatasumbuliwa na adui tena: hivyo malaika wema hufanya kazi kwa mema. Ona hapa heshima na hadhi ya mwamini. Ameandikiwa juu yake jina la Mungu (Ufunuo 3:12), Roho Mtakatifu anakaa ndani yake (2 Timotheo 1:14), na walinzi wa malaika wanamhudumia.

6. Ushirika wa Watakatifu hufanya kazi kwa mema.

“Tu wasaidizi wa furaha yenu” (2 Wakorintho 1:24). Mkristo mmoja anapozungumza na mwingine, ni njia ya kumthibitisha. Kama mawe katika tao yanavyosaidiana kutiana nguvu, Mkristo mmoja kwa kumshirikisha mwenzake mambo aliyoyaona maishani, humtia joto na kumhuisha mwingine. “Tukaangaliane wenyewe kwa wenyewe ili kuhimizana katika upendo na matendo mema” (Waebrania 10:24). Jinsi gani neema husitawi kwa mazungumzo matakatifu! Mkristo kwa maneno mema humdondoshea mwenzake mafuta yale yanayoifanya taa ya imani yake iwake kwa mwanga zaidi.

7. Maombezi ya Kristo hufanya kazi kwa mema.

Kristo yuko mbinguni, kama Haruni na bamba lake la dhahabu kipajini mwake, na uvumba wake wa thamani; naye huwaombea waamini wote kama alivyowaombea mitume. “Wala si hawa tu ninaowaombea; lakini na wale watakaoniamini” (Yohana 17:20). Mkristo anapokuwa dhaifu, na kwa shida aweza kujiombea mwenyewe, Yesu Kristo anamwombea; naye huomba mambo matatu. Kwanza, kwamba watakatifu walindwe na dhambi (Yohana 17:15). “Siombi kwamba uwatoe katika ulimwengu, bali uwalinde na yule mwovu.” Tunaishi duniani kama katika nyumba ya tauni; Kristo huomba ili watakatifu wake wasiambukizwe uovu unaoambukiza wa nyakati hizi. Pili, kwa ajili ya watu wake kuendelea katika utakatifu. “Uwatakase” (Yohana 17:17). Wapate daima msaada mpya wa Roho, na kutiwa mafuta mapya. Tatu, kwa ajili ya kutukuzwa kwao “Baba, wale ulionipa nataka hao nao wawe pamoja nami po pote nilipo” (Yohana 17:24). Kristo haridhiki mpaka watakatifu wawe mikononi mwake. Maombi haya, aliyoyaomba duniani, ndiyo nakala na kielelezo cha maombi yake mbinguni. Ni faraja iliyoje hii; Shetani anapojaribu, Kristo anaomba! Jambo hili hufanya kazi kwa mema.

Maombi ya Kristo huziondoa dhambi za maombi yetu. Kama mtoto, asema Ambrosi, anayetaka kumletea baba yake shada la maua, huingia bustanini, na huko huchuma maua na magugu pamoja, lakini anapomfikia mama yake, yeye huyachagua magugu na kuyafunga maua, na hivyo shada hupelekwa kwa baba: vivyo hivyo tunapokwisha kutoa maombi yetu, Kristo huja, na kuyaondoa magugu, yaani dhambi ya maombi yetu, na kumpelekea Baba yake maua tu, yaliyo harufu nzuri ya manukato.

8. Maombi ya Watakatifu hufanya kazi kwa mema kwa wacha Mungu.

Watakatifu huwaombea viungo vyote vya mwili ule wa siri, na maombi yao hufaulu sana. Hufaulu kwa ajili ya kupona ugonjwa “Kule kuomba kwa imani kutamwokoa mgonjwa, na Bwana atamwinua” (Yakobo 5:15). Hufaulu kwa ajili ya kushinda adui. “Inua maombi yako kwa ajili ya mabaki waliopo” (Isaya 37:4). “Basi malaika wa Bwana akatoka, akapiga watu mia na themanini na tano elfu katika kituo cha Waashuri” (Isaya 37:36). Hufaulu kwa ajili ya kufunguliwa kutoka gerezani. “Lakini kanisa likamwomba Mungu kwa bidii kwa ajili yake. Na tazama, malaika wa Bwana akasimama karibu naye, nuru ikamulika mle gerezani; akampiga Petro ubavuni, akamwamsha, na minyororo yake ikamwanguka mikononi” (Matendo 12:5-7). Malaika alimtoa Petro gerezani, lakini ni maombi yaliyomleta malaika. Hufaulu kwa ajili ya msamaha wa dhambi. “Mtumishi wangu Ayubu atawaombea; kwa kuwa yeye nitamkubali” (Ayubu 42:8). Hivyo maombi ya watakatifu hufanya kazi kwa mema kwa mwili ule wa siri. Na hili si pendeleo dogo kwa mtoto wa Mungu, kwamba ana biashara ya maombi inayoendeshwa daima kwa ajili yake. Anapofika mahali popote, aweza kusema, “Nina maombi kiasi hapa; naam, duniani kote nina akiba ya maombi inayoendelea kwa ajili yangu. Ninapokuwa sina moyo, na kukosa utaratibu wa roho, wengine wananiombea, walio hai na wachangamfu.” Hivyo mambo yaliyo bora hufanya kazi kwa mema kwa watu wa Mungu.

Umemaliza Mambo yaliyo bora hufanya kazi kwa mema kwa wacha Mungu