Kujisalimisha kwa Mungu

Ni hapa ndipo kujisalimisha kwa kweli na kujiweka wakfu kwa Mungu kunapaswa kuanzia, kwa sisi kusadiki kwa kina kwamba yote yanayotupata kila dakika ni mapenzi ya Mungu, na hivyo ni yote tunayoyahitaji.

Usadikisho huu utatufanya turidhike na kila kitu, na utatufanya tuyaone matukio ya kawaida kabisa ndani ya Mungu, wala si ndani ya kiumbe.

Nakusihi, uwe nani uwaye, wewe unayetamani kujitoa kwa Mungu, usijitwae tena mara ukishatolewa kwake, na ukumbuke kwamba kitu kilichokwisha kutolewa hakiko tena mikononi mwako. Kujisalimisha ndiyo ufunguo wa maisha ya ndani: yeye aliyejisalimisha kikamilifu atakuwa mkamilifu upesi.

Basi, sharti ushikamane kwa uthabiti na kujisalimisha kwako, bila kuisikiliza akili wala tafakari. Imani kubwa hufanya kujisalimisha kukubwa; sharti umtumaini Mungu kikamilifu, ukitumaini kinyume cha tumaini kwa tumaini (Warumi 4:18). Kujisalimisha ni kutupilia mbali kila hangaiko juu ya nafsi zetu, ili tujiache tuongozwe kabisa na Mungu.

Wakristo wote wanahimizwa kujisalimisha, kwa maana wote wanaambiwa, “Msisumbukie ya kesho; kwa maana Baba yenu wa mbinguni anajua ya kuwa mnahitaji hayo yote” (Mathayo 6:32, 34). “Katika njia zako zote mkiri yeye, naye atayanyoosha mapito yako” (Mithali 3:6). “Mkabidhi Bwana kazi zako, nayo mawazo yako yatathibitika” (Mithali 16:3). “Umkabidhi Bwana njia yako; umtumaini yeye naye atatenda” (Zaburi 37:5).

Basi, kujisalimisha kunapaswa kuwa ni kujiacha kabisa, kwa nje na kwa ndani, mikononi mwa Mungu, tukijisahau wenyewe, na kumfikiri Mungu peke yake. Kwa njia hii moyo hutunzwa daima huru na wenye kuridhika.

Kwa vitendo kunapaswa kuwa ni kupotea kwa kudumu kwa mapenzi yetu wenyewe ndani ya mapenzi ya Mungu, kukataa kila mwelekeo wa asili, hata uonekane mwema kiasi gani, ili tuachwe huru kuchagua kadiri Mungu achaguavyo tu: tunapaswa kutojali mambo yote, yawe ya wakati huu au ya kiroho, kwa ajili ya mwili au kwa ajili ya nafsi; tukiuacha uliopita katika kusahaulika, ujao kwa majaliwa ya Mungu, na kuutoa uliopo kwa Mungu; tukiridhika na dakika iliyopo, iletayo pamoja nayo mapenzi ya milele ya Mungu kwetu; tusihusishe lolote linalotupata na kiumbe, bali tukiyaona mambo yote ndani ya Mungu, na kuyachukulia kuwa yanatoka bila kukosea mkononi mwake, isipokuwa dhambi yetu wenyewe tu.

Basi, jiacheni mwongozwe na Mungu apendavyo, iwe kwa habari ya maisha ya ndani au ya nje.