Kujichunguza na Kuungama

Kujichunguza sharti kutangulie daima kabla ya kuungama. Wale wanaofika katika daraja hili wanapaswa kujidhihirisha mbele za Mungu, ambaye hatakosa kuwaangazia, na kuwajulisha hali halisi ya makosa yao. Uchunguzi huu sharti ufanyike kwa amani na utulivu, tukitegemea zaidi kutoka kwa Mungu kuliko kutoka katika utafiti wetu wenyewe ujuzi wa dhambi zetu.

Tunapojichunguza kwa jitihada zetu wenyewe, twakosea kwa urahisi. Tunaita “baya kuwa jema, na jema kuwa baya;” nalo kujithamini hutudanganya kwa urahisi. Lakini tunapobaki wazi mbele ya jicho la Mungu litafutalo, Jua hilo la Kimungu huleta nuruni hata vipande vidogo kabisa. Basi, kwa ajili ya kujichunguza, sharti tujisalimishe kabisa kwa Mungu.

Tunapokuwa katika daraja hili la maombi, Mungu hakawii kutudhihirishia makosa yote tunayoyatenda. Mara tu tukisha tenda dhambi, papo hapo twahisi lawama iwakayo moto.

Ni Mungu Mwenyewe afanyaye uchunguzi ambao hakuna kitu kiwezacho kuukwepa, nasi hatuna budi ila kumgeukia Mungu, na kuvumilia maumivu na marudi anayotupa. Kwa kuwa uchunguzi huu wa Mungu ni wa kudumu, hatuwezi tena kujichunguza wenyewe; nasi tukiwa waaminifu katika kujiachilia kwetu kwa Mungu, karibuni tutachunguzwa vyema zaidi na nuru ya Kimungu kuliko tuwezavyo kwa jitihada zetu zote wenyewe. Uzoefu utalidhihirisha jambo hili. Jambo moja ambalo mara nyingi huistaajabisha nafsi ni kwamba, inapotambua dhambi, na kuja kuiungama kwa Mungu, badala ya kuhisi majuto na toba, kama ilivyokuwa ikihisi zamani, upendo mtamu na mpole huimiliki.

Kwa kuwa haijawahi kupata uzoefu huu hapo awali, hudhani kwamba yapasa ijitoe katika hali hii ili ifanye tendo dhahiri la toba. Lakini haioni kwamba, kwa kufanya hivi, ingepoteza toba ya kweli, ambayo ndio upendo wa ndani, ulio mkuu bila kikomo kuliko chochote iwezacho kujitengenezea yenyewe. Ni tendo lililo la juu zaidi, linalojumuisha yale mengine, kwa ukamilifu mkubwa zaidi, ijapokuwa hayo hayamilikiwi kwa kutofautishwa.

Hatupaswi kutafuta kufanya lolote kwa ajili yetu wenyewe wakati Mungu atendapo kwa ubora zaidi ndani yetu na kwa ajili yetu. Kuichukia dhambi kwa namna hii ni kuichukia kama Mungu aichukiavyo. Upendo huu, ambao ni kazi ya Mungu ndani ya nafsi, ndio ulio safi kuliko mapenzi yote. Basi, lote tunalopaswa kufanya ni kubaki kama tulivyo.

Jambo jingine la ajabu ni kwamba mara nyingi tunayasahau makosa yetu, na kuona vigumu kuyakumbuka; lakini hili halipaswi kutusumbua, kwa sababu mbili: Ya kwanza, kwamba usahaulifu huu wenyewe ni ushahidi kwamba dhambi imekwisha patanishwa, nayo ni bora kusahau yote yatuhusuyo sisi wenyewe, ili tupate kumkumbuka Mungu peke yake. Sababu ya pili ni kwamba Mungu hakosi, wakati wowote kuungama kunapohitajika, kuidhihirishia nafsi makosa yake makuu zaidi, kwa maana wakati huo ni Yeye Mwenyewe aichunguzaye.

Kuhusu Kusoma—Maombi ya Kinywa—Maombi ya Haja

Namna ifaayo ya kusoma katika daraja hili ni kwamba, mara tu tunapohisi kuvutwa kwenye tafakari, tuache kusoma, na kubaki katika pumziko.

Nafsi mara tu inapoitwa kwenye ukimya wa ndani, yapasa ikome kutamka maombi ya kinywa; ikisema machache tu kila wakati, na inapoyasema, ikiona ugumu wowote, au ikijihisi ikivutwa kwenye ukimya, yapasa ibaki kimya, wala isijitahidi kuomba, ikijiachilia kwenye uongozi wa Roho wa Mungu.

Nafsi itaona kwamba haiwezi, kama zamani, kumletea Mungu maombi ya haja dhahiri. Hili halipaswi kuishangaza, kwa maana sasa ndipo “Roho huwaombea watakatifu, kwa kadiri ya mapenzi ya Mungu. Kadhalika Roho naye hutusaidia udhaifu wetu; kwa maana hatujui kuomba jinsi itupasavyo; lakini Roho mwenyewe hutuombea kwa kuugua kusikoweza kutamkwa” (Warumi 8:26, 27).

Hatuna budi kuyaunga mkono makusudi ya Mungu, ambayo ni kuivua nafsi matendo yake yenyewe, na kuweka Yake mahali pake.

Basi mwache Yeye afanye kazi, wala usijifunge na chochote chako mwenyewe. Hata kikionekana kizuri kiasi gani kwako, hakiwezi kuwa hivyo iwapo kinazuia mapenzi ya Mungu kwako. Mapenzi ya Mungu ni bora kuliko wema mwingine wote. Usitafute masilahi yako mwenyewe, bali uishi kwa kujiachilia na kwa imani.

Ni hapa ambapo imani huanza kutenda kazi kwa ajabu ndani ya nafsi.