Empeera Ennene Ddala

"By’okoledde ... ne bwe waleka kitaawo ne nnyoko era n’abantu bo n’ojja mu nsi ey’abantu botomanyi, babintegezezza byonna. Mukama Katonda wa Isirayiri gwe weeyuna wansi w’ebiwaawaatiro bye, akusasule olw’ebyo by’okoze. Mukama Katonda wa Isirayiri, oyo gwe weewagamye wansi w’ebiwawaatiro bye, akuwe empeera ennene ddala." (Luusi 2:11-12).

Mu lugero luno olunyuvu tulabamu ekyokulabirako ekirala eky’engeri Omwoyo Omutukuvu gy’ayigirizaamu ng’ayita mu bulamu bw’abantu obuli ng’ebifaananyi. Twamala okufumiitiriza ku by’okuyiga eby’omuwendo bye tuyigirizibwa ku Kabaka waffe nga tuyita mu by’okujja kwa kabaka omukazi ow’e Seeba eri Kabaka Sulemaani. Eyo twayigirizibwa naddala engeri ebibuuzo byaffe ebizibu gye bigonjoolwamu, n’emitima gyaffe gye gikkusibwamu ddala. Wano tuweebwa eky’okuyiga ekisingawo obugulumivu: engeri y’okuweereza tulyoke tufune "empeera ennene ddala," era ne ku ngeri y’empeera eyo tuweebwa ekitangaala kingi.

Gye tuli, eby’okuyiga bino bya mugaso wa njawulo, kubanga bikwata ku mulimu gw’Enjiri mu mawanga ag’ewala, era oboolyawo binnyonnyolako lwaki Oyo asanyukira okuwa omukisa, era asobola okuwa omukisa omwoyo ogugondera, yagamba n’amaanyi bwe gatyo nti, "Mugende mufuule abantu bonna mu nsi zonna, abayigirizwa;" "Mugende mu nsi yonna mubuulire Enjiri eri abantu bonna." Okuweereza Katonda nkizo ya ssanyu buli wantu. Naye abo abasigala eka beetaaga okufuuka abagenyi era abatambuze eyo. Kino si kyangu bulijjo mu mulembe guno; era bangi balemererwa, ne beerabira ekifo kyabwe ekituufu. Abo abakkirizibwa okukolera mu nsi ez’ewala akabi kano kabakendeerera; n’olwekyo bangi bafuna essanyu erisingawo mu kuweereza kwa kaakano, era basuubira empeera esingawo mu biseera eby’omu maaso, okusinga bwe baalowooza nga tebannaleka byonna ku lwa Yesu.

Mu buzaaliranwa Luusi yali "atabalirwa mu ggwanga lya Isirayiri," naye bwe yafumbirwa Omuyisirayiri n’ayingizibwa mu bantu abo. Bba bwe yafa, n’akyanywerera ku nnyazaala we ne ku Katonda we, Katonda wa Isirayiri. Ekifo kye eky’enkizo yakitwala nga kya muwendo nnyo, ne kiba nti ku lwakyo yaleka ensi gye yazaalibwamu n’ebinyumu byayo byonna; n’aleka bazadde be, ab’enganda ne mikwano gye, n’ebisikiriza byonna ebyazzaayo Olupa e Mowaabu. Gy’ali kyali kirungi okubeera munne wa nnyazaala we, newakubadde nga yali mwavu era nga yalekebwa yekka, okusinga okunyumirwa okumala akaseera ebyo bye yandifunye e Mowaabu.

Okwefiiriza kuno kwali kwa ddala nnyo, ne kiba nti Nawomi, newakubadde nga yali ayagala nnyo muka mwana we, era nga yandisigadde yekka nga tali naye, yawulira nti tayinza kukimwagaliza ku lwe yekka; naye Luusi bwe yagamba nti, "abantu bo be banaabanga abantu bange, era ne Katonda wo y’anaaberanga Katonda wange," teyaddamu kuba na kubuusabuusa kwonna kwe yandyogedde, wadde ekiremesa ekirala kye yandimutadde mu kkubo. Obanga okubeera munne w’omu ku baweereza ba Katonda abaavu kwa muwendo nnyo bw’ati, tunaagamba ki eri Oyo atukubiriza nti, "Mugende! ... era Nze ndi nammwe bulijjo"? Tatugamba nti: Omusumba Omulungi ateekwa okunoonya endiga ezaabula okutuusa lw’azizuula; nammwe mugende muzinoonye, era bwe munaakola bwe mutyo munaakakasa nti ndi wamu nammwe? Tunaagaana okussa ekimu naye mu ngeri eno, ne tumuleka, ku lwaffe, azinoonye yekka?

Oluvannyuma tusanga Luusi ng’akolera mu musana ogwokya ng’omulonzi w’ebisigalira, era eyo gy’asisinkana omulundi ogusooka nannyini makungula. Obulungi bw’olugero lwa Bowaazi ng’alamusa abakunguzi be nti, "Mukama Katonda abeere nammwe," n’okuddamu kwabwe nti, "Naawe Mukama Katonda akuwe omukisa," buteekwa okusanyusa buli asoma. Ne Luusi omwavu, newakubadde nga si mukunguzi—wabula omulonzi bulonzi—ayanirizibwa n’essanyu lingi, era akubirizibwa okusigala mu nnimiro za Bowaazi okutuusa ng’amakungula gonna gaweddeko. Mu bwangu n’obwetoowaze obukwata ku mutima, omulonzi oyo eyeebaza addamu nti, "Lwaki ondaze nze ekisa mu maaso go, n’onfaako nze, munnaggwanga?" Awo nannyini makungula n’addamu mu bigambo bye twateeka ku ntandikwa y’olupapula luno, "By’okoledde nnyazaala wo ... babintegezezza byonna," n’ebirala.

Kale ka tuve ku Bowaazi tukyukire Mukama ow’amazima ow’Amakungula. Atusisinkana ffe eyo, nga tukola mu bbugumu ly’omusana ogw’ekyeya? Bw’amanyi ddala byonna ffe bye tukoze, okumanya okwo kuleeta essanyu mu mutima gwe? era kiba ssanyu gye tuli okumanya nti Ye amanyi byonna? Mukama waffe eyazuukira era ow’ekitiibwa, ayogerwako mu ngeri ey’ekitalo bw’etyo mu Okubikkulirwa 1, akyali oyo atambulira wakati w’ebikondo by’ettaala omusanvu ebya zaabu. Ayinza okutugamba nti, "Mmanyi ebikolwa byo," awatali kigambo kya kunenya? oba ensonyi zitukwata ng’amaaso ge agali "ng’ennimi z’omuliro" gatutunuulidde? "Kaakano, abaana abaagalwa, munywerere mu Kristo, bw’alirabika tulyoke tube bagumu abatalikwatibwa nsonyi ku lunaku lw’aliddirako."

Ffenna ka tuleke ensi eno, ensi y’obuzaaliranwa bwaffe, era waakiri tufuuke abagenyi era abatambuze mu yo. Ffenna ka tukole mu ngeri emu oba endala mu nnimiro ennene ey’amakungula, era obanga kitugwanira, tuleme kulwawo kugondera kiragiro nti, "mugende mufuule abantu bonna mu nsi zonna, abayigirizwa." Awali obwetaavu obusinga obunene, eyo ka tusangibwe nga tugondera n’essanyu ekiragiro kya Mukama waffe. Kubanga mu nnimiro y’amakungula, mu bakunguzi, eyo gye tulimusanga.

Tewali kuweereza kwa Kikristaayo kwonna mwe kukkiriza kutateekwa kukola n’amaanyi. Eka, ebweru, mu kitundu kino eky’omulimu gwa Katonda oba ekirala, awatali kukkiriza toyinza kusanyusa Katonda. Pawulo ayinza okusiga, Apolo n’afukirira; naye Katonda yekka y’akuza. Buli muweereza wa Katonda ow’amazima, buli muminsani ow’amazima, buli musomesa w’essomero lya Ssande ow’amazima, na buli mukozi Omukristaayo, mukozi wa kukkiriza. Naye mu nnimiro ey’ensi ez’ewala abakozi beesigama ku Katonda mu ngeri ey’enjawulo. Eriyo akabi n’ebizibu eby’enjawulo, obunafu n’ebyetaago eby’enjawulo ebisembeza Katonda kumpi nnyo—kumpi okusinga abakozi abasinga obungi bwe baali bamulowooza nga bakyali eka. Era eri abo abaagenda nga tebalina muntu yenna abakakasa nti bajja kuyambibwa, abatamanyi buyambi obuddako lwe bunaabatuukako, wadde obungi bwabwo, waliwo akakwate akalala n’omutima omunene ogw’okwagala ogwa Kitaffe era Katonda waffe, akatayogerekeka bwe kali ak’omuwendo era akaanirizibwa.

Tetuyinza kugamba nti mu buli mbeera ey’obulamu, bwe tuba abanafu mu ffe fennyini, mu mikwano gyaffe, ne mu mbeera zaffe, olwo lwe tuba ab’amaanyi ennyo mu Ye? Era bwe tuba mu bwetaavu bwaffe obunene, ku lwaffe oba ku lw’emyoyo egitwetoolodde, ne tunywerera ku Katonda ne tugamba nti, "Emmeeme yange ewummulire mu Katonda yekka; kubanga mu ye mwe muli essuubi lyange," nga okuwummula n’obukuumi n’obukakafu bingi bwe biyingira mu mmeeme erindirira! Era ai! Bwe tukola mu mwoyo ogwo, ebigambo ng’ebyo ebya Bowaazi waffe ow’omu ggulu nga bikwata ku mutima! "Mukama Katonda wa Isirayiri gwe weeyuna wansi w’ebiwaawaatiro bye, akusasule olw’ebyo by’okoze. Mukama Katonda wa Isirayiri, oyo gwe weewagamye wansi w’ebiwawaatiro bye, akuwe empeera ennene ddala." Alina omukisa omukozi mu Bushinwa! Alina omukisa omukozi eka! Oluusi bwe wabaawo ekizikiza, ekisiikirize ekyo si kirala wabula eky’ekiwaawaatiro kye, wansi waakyo w’obeera, wansi waakyo gye weewagamye.

Tetujja kwongera kulwawo mu kufumiitiriza kuno. Oyo eyabudaabuda era eyawa omukisa omulonzi eyali yekka ng’amakungula gakyagenda mu maaso, yafuuka bba we ng’emirimu gy’amakungula giweddeko. Bw’atyo Mukama bwe yasasula omulimu gwe. Isirayiri teyaweebwa mukisa nga tali wamu naye, kubanga Dawudi omununuzi, ne Sulemaani ekitiibwa kya Isirayiri, baava mu zzadde Bowaazi lye yafuna mu ye. Mangu ddala lunaatuuka olunaku olw’ekitiibwa olw’embaga y’obugole bwa Kristo n’Ekkanisa ye. Ng’ali wamu nayo alijja okununula Isirayiri n’okusalira ensi omusango, ne bamalayika bennyini. Luusi yali tamanyi kitiibwa na ssanyu ebyali bimulindiridde bwe yaleka byonna ku lwa Katonda n’abantu be. Ffe tumanyi ebigendererwa by’ekisa kya Katonda n’ebitiibwa ebituterekeddwa. Kale tugwanidde kubeeranga bantu ba ngeri ki, era abanyiikivu n’abeesigwa ennyo kwenkana wa mu kiseera ekitono ekitusigaddeyo nga tetunnayitibwa kufuna mpeera yaffe, n’okumusisinkana mu bbanga? Ye bw’agamba nti, Mugende! Tunaamuddamu nti, Nedda? Bw’atusaba okweyongera mu makungula ge okutuusa okukungula lwe kunaggwa, tunaamugamba nti, Tetwagala?