Maayi

Maayi 1

Ayi Katonda, oli Katonda wange, nkunoonya n’omutima gwange gwonna. Zabbuli 63:1.

Mu nsi omuli ebingi ennyo ebitabulatabula ebyoya by’omwoyo, nga kyetaagisa nnyo okuyingira mu kyama ky’eweema ya Katonda, ekyo kyokka ekiyinza okuguzzaamu obukkakkamu n’emirembe! Mu nsi omuli ebingi ennyo ebinakuwaza n’ebimalamu amaanyi, nga kya mukisa nnyo okussa ekimu naye, oyo mwe muli ensibuko emu yokka ey’amazima, ensulo y’essanyu lyonna ery’amazima n’essanyu eritaggwaawo! Mu nsi omuli ebingi ennyo ebinoonya bulijjo okwonoona obutukuvu bw’emyoyo gyaffe, okugifuula egya bulijjo era egitali mitukuvu, nga kya kitiibwa kinene okugiwonga obuggya mu kusaba eri obutukuvu n’eri Katonda.—Archbishop Trench.

Maayi 2

Mu ye mwe mwali obulamu; era obulamu buno ne buba ekitangaala eri abantu. Yokaana 1:4. Mmwe muli musana gwa nsi. Matayo 5:14.

Mu musana tusobola okutambula n’okukola. Tutambulira mu musana ne tufuuka ddala abaana b’omusana. Tuleka omusana gwaffe, omusana gwa Katonda, ne gwaka, abantu balabe ebikolwa byaffe ebirungi, bagulumize Kitaffe ali mu ggulu. Mpola, mu kasirise, n’okwagala, awatali kukoma, twewaayo okutambuza omusana n’okwagala Katonda by’atakoma kwakiza munda mu ffe. Omulimu gwaffe gumu gwokka: okulindirira, n’okukkiriza omusana okuyingira, n’oluvannyuma okugutambuza, omusana gwa Katonda oguli mu Kristo.—Andrew Murray.

Maayi 3

Mubenga banywevu era abatasagaasagana nga mweyongeranga bulijjo okukola omulimu gwa Mukama waffe. 1 Abakkolinso 15:58.

Okunyiikira mu kukola ebirungi lye limu ku ddagala erifuula Abakristaayo okuba abasanyufu; kiringa okwegolola eri omubiri, era kikuuma emmeeme nga nnamu bulungi.—Bishop Ryle.

Maayi 4

Yesu n’atunula waggulu n’assa ekikkowe. Makko 7:34.

Emirundi mingi nnyo ffe tussa ekikkowe ne tutunula munda; Yesu yassa ekikkowe n’atunula ebweru. Ffe tussa ekikkowe ne tutunula wansi; Yesu yassa ekikkowe n’atunula waggulu. Ffe tussa ekikkowe ne tutunula ku nsi; Yesu yassa ekikkowe n’atunula mu ggulu. Ffe tussa ekikkowe ne tutunuulira omuntu; Yesu yassa ekikkowe n’atunuulira Katonda.—Stork.

Maayi 5

Twenyumiririza ne mu kubonaabona. Abaruumi 5:3.

Wali olowoozezza nti olunaku lumu tolibeera na kintu kyonna kikugezesa, wadde omuntu yenna akunyiiza nate?—A. B. Simpson.

Maayi 6

Mulowoozenga ku ebyo ebiri mu ggulu, so si ebiri ku nsi. Abakkolosaayi 3:2.

Oyo ateeka omutima gwe ku bintu ebya waggulu afaanana omuntu eyeekwata ku ggulu; era bw’aba ng’ebyo abikutte nnyo, yandisobodde okugamba, ne bwe yandirabye ensi ng’eyiringita okuva wansi w’ebigere bye, nti “Omutima gwange munywevu, Ayi Katonda, omutima gwange munywevu. Nnaakutenderezanga n’ennyimba.”—Guthrie.

Maayi 7

Ddala Mukama waffe azuukidde! Alabikidde Peetero! Lukka 24:34. Awo abo abakkiriza ebigambo bye (ebya Peetero) . . . ku lunaku olwo ne beeyongerako ng’enkumi ssatu. Ebikolwa by’Abatume 2:41.

Mukama nga tannaba kutukozesa mu buweereza bwe, tulina okusooka okukolagana naye kinnoomu era ku lusegere. Bulijjo ateekwa okukolagana mu kyama n’emmeeme eyo gy’ategeka okukozesa okuleetera abalala omukisa.

Oyagala okwogera ku lwa Yesu eri abo abakwetoolodde? Kale oteekwa okugenda eri Yesu yennyini okufuna obubaka bwo. By’oyogera ku lwa Yesu biteekwa okufunibwa okuva ewa Yesu.

Ayi, omukka mungi nnyo ogufuuwa awatali maanyi ku buli ludda kubanga tegwasikibwa mu watukuvu! Twetaaga okukolagananga ennyo mu kyama ne Katonda omulamu. Tudduka nga tetutumiddwa; twogera nga Katonda tannaba kwogera naffe: si kya kwewuunya nti emirundi mingi tulemererwa. Ayi, omutima nga gwetaaga okusaba okw’ekyama n’okukangavvulwa okugukebera munda, Katonda nga tannaba kugukozesa!—F. Whitfield.

Maayi 8

Omutuukirivu alya emmere ye n’akkuta. Engero 13:25.

Kristo ateekwa okukkusa; kale, bwe tuba nga tetukkuta, kiteekwa okuba nga kiri bwe kityo kubanga tetwekkusa ku ye mu bujjuvu era ku ye yekka. Ensobi teri mu mmere eyategekebwa.—Frances Ridley Havergal.

Maayi 9

Mukama gw’ayagala amukangavvula. Abaebbulaniya 12:6.

Kyayogerwa bulungi nti “okweraliikirira kw’ensi kwe kukangavvula okuva mu ggulu,” naye kusinga n’okukangavvula; ze ggaali za Katonda, ezitumibwa okutwala emmeeme mu bifo byayo ebya waggulu eby’obuwanguzi. Mu Luyimba lwa Sulemaani tubuulirwa ku ggaali eyo “munda nga mwaliire bulungi n’okwagala.” Tetusobola bulijjo kulaba kwagala okwaliiriddwa munda mu ggaali yaffe ffe kennyini—emirundi mingi erabika nga si nnungi n’akatono; naye buli ggaali Katonda gy’atuma eteekwa okuba nga mwaliire n’okwagala, kubanga Katonda kwagala. Mazima, kwagala kwe kwennyini okutuma eggaali eyo.

Kale, okukangavvulwa kwo, ne bwe kuba kwa bulumi kutya kati, kutunuulire nga ggaali za Katonda, ezitumibwa okusitula emmeeme zammwe okuzituusa mu “bifo ebya waggulu” eby’okutuukiriza ebikulu n’okusitulibwa mu mwoyo, era olizuula nti, oluvannyuma lw’ebyo byonna, “mwaliire bulungi n’okwagala.”—Smith.

Maayi 10

Omusaayi gwa Yesu Omwana we, gutunaazaako buli kibi kyonna. 1 Yokaana 1:7.

Yiga eky’okuyiga ku liiso ly’omusimi w’amanda, akola olunaku lwonna wakati mu nfuufu y’amanda ebuuka. Bw’afuluma mu kitangaala ky’emisana, obwenyi bwe buyinza okuba nga bujjudde enziro; naye amaaso ge gaba matangaavu era nga gamasamasa, kubanga ensulo y’amaziga mu kanyama akagakola bulijjo efukumula amazzi gaayo empola ku liiso, n’enaaza buli kafuufu amangu ddala nga kaakagwako.

Ekyo si kye kyamagero eky’okunaazibwa emyoyo gyaffe kye gyetaaga mu nsi ng’eno? Era kino Mukama waffe ow’omukisa kye yeetegese okutukolera olw’omusaayi gwe ogunaaza, singa tumwesiga bwesizi.—F. B. Meyer.

Maayi 11

Kyonna ky’abagamba kye muba mukola. Yokaana 2:5.

Florence Nightingale yagamba nti: “Singa nnali wa kubabuulira ku bulamu bwange, kyandibadde kya kulaga engeri omukazi ow’obusobozi obwa bulijjo ddala gye yakulemberwamu Katonda mu makubo ag’ekitalo era agatali gamanyiddwa, okukola mu buweereza bwe ekyo kye yakola mu ye. Era singa nsobola okubabuulira byonna, mwandirabye nga Katonda ye yakola byonna, nze ne sikola kintu. Nkoze nnyo, nnyo ddala, ekyo kyokka; era sigaanangako Katonda kintu kyonna.”

Maayi 12

Mmanyi okuba nga nnina buli kimu. Abafiripi 4:12.

Kya kabi okukulaakulana. Ekyoto ky’okunakuwala tekigezesa nnyo Mukristaayo ng’entamu erongoosa ey’okukulaakulana. Kyetaagisa amagezi agasinga ag’omuntu okusitula ekikopo ekijjudde essanyu ery’ensi n’omukono ogutakankana; naye Pawulo yali ayize amagezi ago, kubanga agamba nti, “Mu buli ngeri ne mu bintu byonna nayiga ekyama ekiri mu kukkusibwa ne mu kuba omuyala.” Bwe tufuna ebingi ku kusaasira kwa Katonda okw’okutulabirira, emirundi mingi kibaawo nga tulina kitono nnyo ku kisa kya Katonda; nga tumatidde n’ensi, tukkiriza okubeera awatali ggulu. Kakasa nti kizibu nnyo okumanya okukkusibwa okusinga okumanya okuba omuyala, olw’engeri obuntu gye bwekubiramu ennyo ku malala n’okwerabira Katonda. Weegendereze okusaba Katonda mu ssaala zo akuyigirize “ekyama ekiri mu kukkusibwa.”—Spurgeon.

Maayi 13

Buli muntu eyeegulumiza alitoowazibwa; n’oyo eyeetoowaza aligulumizibwa. Lukka 14:11.

. . . Bw’obuuza ekkubo erituuka ku ngule—liyita mu musaalaba; erituuka ku lusozi—liyita mu kiwonvu; erituuka ku kugulumizibwa, ye oyo eyeetoowaza.—J. H. Evans.

Maayi 14

Era neetukuza ku lwabwe nabo balyoke batukuzibwe mu mazima. Yokaana 17:19.

Ojjukira, Yesu bwe yali atudde n’abayigirizwa be ku kijjulo eky’enkomerero, bwe yayimusa eddoboozi lye n’asaba, era wakati mu kusaba kwe ne wavaamu ebigambo bino eby’ekitalo: “Neetukuza ku lwabwe nabo balyoke batukuzibwe”? Waliwo ekintu kyonna mu njigiriza zonna omuntu ze yali afunye okuva mu kamwa ka Katonda ekisinga ekyo obukulu, ekituuka ewala okusinga ekyo—okuba nga nsinga obulungi, si ku lwange nzekka, wabula ku lw’ensi yonna? Osobola okuyamba bantu banno—oteekwa okuyamba bantu banno; naye engeri yokka gy’oyinza okubayambamu kwe kuba omuntu asinga obulungi n’ekitiibwa nga bw’oyinza okuba.—Phillips Brooks.

Maayi 15

Omuntu omugumiikiriza asinga omutabaazi, n’oyo afuga obusungu bwe akira awamba ekibuga. Engero 16:32.

Mu maaso ga Katonda ne bamalayika be, okusinga obuwanguzi obulala bwonna, obw’omuwendo ennyo bwe buwanguzi ku ggwe kennyini, buli muntu bw’ayinza okwefunira ng’ayambibwa eggulu.—Dean Stanley.

Maayi 16

Namusaba omwana ono, era Mukama Katonda ampadde kye namusaba. Kaakano mmuwaayo eri Mukama, era obulamu bwe bwonna aweereddwayo eri Mukama Katonda. 1 Samwiri 1:27, 28.

Oluusi Katonda awa ebirabo, okwagala kulyoke kufune kye kuyinza okwerekereza. Ebintu by’atuteeka mu ngalo biyinza okuba nga yabituteekamu tulyoke tufune omukisa ogw’okulaga ekiri mu mutima gwaffe. Ayi, singa mu ffe mwalimu okwagala okwaka ennyo, okwanditukubirizza okukebera buli kintu kye tulina, tumanye engeri gye kiyinza okufuulibwa ekkubo ery’okulaga okwagala kwaffe eri Kristo!—George Bowen.

Maayi 17

Naye musooke munoonye obwakabaka bwa Katonda n’obutuukirivu bwe, ebyo byonna mulibyongerwako. Matayo 6:33.

Twetaaga okufaayo ku kintu kimu kyokka: okusooka ekisooka—obwesigwa eri Katonda. Olwo byonna bye twetaaga mu nsi zombi binaatuweebwa. Katonda talitulekerera; naye oluusi, nga tusanyukira obukakafu obwo, twerabira nti tuteekwa okutuukiriza omugabo gwaffe bwe tuba twagala okwetwalira ekisuubizo kya Katonda.

Tekiriba kyangu bulijjo. Enkya kiyinza okutegeeza omulimu ogutasanyusa, obuvunaanyizibwa obukaawa, ekiweebwayo eky’omuwendo ku lw’omuntu atalabika nga agwanidde. Obulamu bujjudde okugezesebwa okulumya okw’okulaba oba twagala okugoberera Omusumba Omulungi. Tetulina ddembe n’akatono okwetwalira obukakafu buno okuggyako nga tutwala Kristo okuba omukulembeze w’obulamu bwaffe.—J. R. Miller.

Maayi 18

Akamwa kange kanaamutenderezanga bulijjo. Zabbuli 34:1.

Okutendereza kwo kuleme kuba kwa kaseera buseera—ennyimba ez’akaseera, ate ekivuga ne kiwanikibwa ku kisenge okutuusa olunaku olulala olw’embaga, olw’okulabirira kwa Katonda okw’ekitalo, lwe lunaakuleetera okukiwanula. Katonda tajja mu nnyumba y’abatukuvu be ng’omugenyi, wabula okubeera nabo. Dawudi kino yakitwala ng’omulimu gw’obulamu bwe bwonna: “Nnaakutenderezanga obulamu bwange bwonna.”—Gurnall.

Maayi 19

Sisobola kusitula bantu bano bonna bw’omu kubanga obuzito bwabwe buyinza okummenya nga ndi nzekka. Okubala 11:14.

Kyetaagisa nnyo abaweereza ba Kristo bonna okujjukira nti buli Mukama lw’ateeka omuntu mu kifo eky’obuvunaanyizibwa, amusaanyiza okukibeeramu era amunyweza mu kyo.

Kya njawulo ddala, mazima, omuntu bw’ayanguwa okugenda nga tatumiddwa mu nnimiro yonna ey’omulimu, oba mu kifo kyonna ekizibu oba eky’akabi. Mu mbeera ng’eyo tuyinza okusuubira ddala okugwa okw’amaanyi, amangu oba nga wayiseewo ekiseera. Naye Katonda bw’ayita omuntu mu kifo ekimu, amuwa ekisa ekyetaagisa okukibeeramu.

Kino kiri bwe kityo buli wamu. Tetuyinza kulemererwa bwe tunywerera ku Katonda omulamu. Tetuyinza kukalira bwe tuba nga tusena ku nsulo. Obunsulo bwaffe obutono bujja kukalira mangu; naye Mukama waffe Yesu Kristo agamba nti, “Ng’Ekyawandiikibwa bwe kigamba nti buli akkiriza Nze emigga egy’amazzi amalamu girikulukuta nga gifuluma mu mutima gwe!”—C. H. M.

Maayi 20

Ne ndyoka nkaaba nti, Zinsanze nze! Nfudde mpeddewo! Kubanga ndi muntu ow’emimwa egitali mirongoofu, era mbeera wakati mu bantu ab’emimwa egitali mirongoofu; kubanga amaaso gange galabye Kabaka, Mukama Katonda ow’Eggye! Isaaya 6:5.

Si kulaba mutima gwaffe ogw’ekibi okututoowaza; kwe kulaba Yesu Kristo. Nfudde mpeddewo kubanga amaaso gange galabye Kabaka.—Andrew A. Bonar.

Maayi 21

Bwe nnali nkyakifumiitirizaako, omuliro ne gukoleera munda yange. Zabbuli 39:3.

Emmeeme yange, singa wafumiitirizanga nnyo, omuliro gwandyase nnyo. Lwaki toyawukananga emirundi mingi okubeera wekka? Wandibadde mutegeke okusinga eri ensi singa tewabadde wa nsi nnyo. Singa wabadde n’omuliro ogw’omu ggulu omungi, wandibadde n’amaanyi mangi ku nsi.

Tewali weema ya kyama gy’oyinza okuyingira n’owota omuliro? Tewali kifo kitukuvu ekisinga obutukuvu gy’oyinza okufunira ebbugumu ery’okukubirizibwa erinaakufuula ow’amaanyi? Tekyawandiikibwa ku Mwana w’Omuntu nti “Bwe yali ng’asaba endabika y’amaaso ge n’ekyusibwa”? Ye; okusaba kwe kwe kwavaamu ekitiibwa kye eky’okufuusibwa. Ebbugumu ery’omu mutima gwe lye lyavaamu okwaka kw’amaaso ge. Bwe yali ng’afumiitiriza, omuliro ne gukoleera.

Ayi emmeeme yange, oyagala obulamu bwo bugulumizibwe, bulungiwazibwe, bufuusibwe mu maaso g’abantu? Yambuka ogende mu kifo eky’ekyama eky’eweema ya Katonda, omuliro gw’okwagala gye gwakira. Obulamu bwo bulyaka n’ekitiibwa eri abo ababeera mu lusenyi. Essaala zo zirijjula ekitangaala; ziryakira obwenyi bwo ng’obwenyi bwa Musa bwe yali tamanyi ng’obwenyi bwe bumasamasa. Ebigambo byo biryokya; birikoleeza emitima mingi egitambula mu kkubo erigenda e Emawu. Ekkubo lyo liryakaayakana; bw’olimala okusaba mu kyekusifu kya Eriya, olifuna eggaali ey’omuliro eya Eriya.—George Matheson.

Maayi 22

Ddala ddala mbagamba nti buli aliwa omu ku baana bano abato egiraasi y’amazzi agannyogoga olw’erinnya ly’omuyigiriza talirema kuweebwa mpeera ye. Matayo 10:42.

Tuli mu kabi ak’okunoonyeza ewala ennyo emikisa egy’okukola ebirungi n’okugabana. Nga tugolola emikono okunoga ebimuli ebinene ku miti, tulinnyirira obumuli obutono obw’omu muddo.—Selected.

Maayi 23

Weekweke ku kagga. 1 Bassekabaka 17:3.

Si ku mugga, wabula ku kagga. Omugga gwandibaddemu bulijjo amazzi amangi, naye akagga kaali kayinza okukalira essaawa yonna.

Kino kituyigiriza ki? Katonda tateeka bantu be mu bugagga obuyitiridde wano. Obungi bw’ensi buyinza okuggya emitima gyabwe ku ye. Tabawa mugga, wabula akagga. Akagga kayinza okuba nga kakulukuta leero, enkya ne kakalira.

Era lwaki Katonda akola bw’atyo? Okutuyigiriza nti tetuteekwa kuwummulira mu birabo bye n’emikisa gye, wabula mu ye yennyini. Kino emitima gyaffe kye gikola bulijjo—okuwummulira mu kirabo, mu kifo ky’Omugabi. Noolwekyo Katonda tayinza kutwesiga ku mugga, kubanga omugga gutwala ekifo kye mu mutima nga tetumanyi. Kyayogerwa ku Isirayiri nti bwe bakkuta ne beerabira Katonda.—F. Whitfield.

Maayi 24

Obwakabaka bwe bufuga ensi yonna. Zabbuli 103:19.

Obwakabaka bwe bufuga ensi yonna—noolwekyo toyinza kulaba kintu kyonna ekitali kya kutenderezesa, kubanga tewali kintu kyonna ekitali mu kukkiriza kwa Mukama wo okw’ekisa, oba mu nteekateeka ye, oba mu buyinza bwe. Ensi yonna—tewali w’oyinza kulinnya n’ofuluma ebweru w’obwakabaka bwe, era tewali kintu kyonna mw’oyinza kuyita ebweru w’okulabirira kwe n’okufuga kwe. Ensi yonna—noolwekyo buli kintu kitwale ng’ekiva eri Katonda; buli kintu kikwate ng’ekiva eri Katonda; era olw’okwebaza kwo byonna obizzeeyo eri Katonda nate, bw’otyo omaliriza enkulungo, ng’omufuula Alufa ne Omega, Entandikwa era Enkomerero y’ebintu byonna.—Mark Guy Pearse.

Maayi 25

Obanga tugumiikiriza awamu naye, era tulifugira wamu naye. 2 Timoseewo 2:12.

Oyo asinga okuwaayo omuwendo omunene okufuna engule ey’ekitiibwa, y’oyo asinga obwetoowaze ng’ayambadde omusaalaba ogw’okwefiiriza.—A. J. Gordon.

Maayi 26

Ekisinga byonna kuuma omutima gwo, kubanga y’ensulo y’obulamu bwo. Engero 4:23.

Oyo ayagala okukuuma omutima gwe nga mulongoofu era mutukuvu, ateekwa okuteeka omukuumi ku buli mulyango ekibi mwe kiyinza okuyita okuguyingira, nga tewali by’asinga kwekuuma okusinga ebibi “ebitono,” nga bwe biyitibwa.

Omuntu wa Katonda alina amaaso ge okukuuma, era bw’atyo Yobu n’agamba nti, “Nakola endagaano n’amaaso gange”—olulimi lwe, kye kyava okubuulirirwa nti, “Olulimi lwo lukuumenga luleme okwogera ebitasaana, n’akamwa ko kaleme okwogera eby’obulimba.”—amatu ge, kye kyava okulabulwa nti, “Mwana wange konoolekayo okuyigirizibwa, onoowaba okuva ku bigambo by’okumanya.”—ebigere bye, kye kyava Dawudi okugamba nti, “Neekuumye obutatambulira mu kkubo lyonna ekyamu, nsobole okugondera ekigambo kyo.” Era okuva bwe watali mulyango n’ogumu ku miryango etaano egy’okuwulira kw’omubiri omulabe gw’atayinza kuyingiramu ng’amataba, Omwoyo bw’atayimusa bbendera okumulwanyisa, twetaaga okukuuma buli mulyango, era tuwandiike ku buli mulyango nti, “Wano tewayingira kintu kyonna kya kulumya wadde okwonoona.”—Guthrie.

Maayi 27

Na buli kye munaakolanga, . . . byonna mubikolenga mu linnya lya Mukama waffe Yesu. Abakkolosaayi 3:17.

Kola ebintu ebitono ng’ebinene, olw’obukulu bwa Mukama waffe Yesu Kristo, abeera mu ggwe; era kola ebintu ebinene ng’ebitono era ebyangu, olw’obuyinza bwe obutaliiko kkomo.—Pascal.

Maayi 28

Ne bamulagira lwa maanyi yeetikke omusaalaba gwa Yesu. Matayo 27:32.

Waliwo Abakristaayo bangi kino be kikwatako. Bawalirizibwa okwetikka omusaalaba, naye kijja kitya? Kijja olw’okugudduka. Basalawo nti tebajja kukkiriza musaalaba gwa Kristo; era bazuula nti omusaalaba bwe gujja, gujja mu ngeri ey’entiisa ennyo, n’obuzito obubetenta okusinga bwe gwandizze singa baali bakkirizza okwewaayo eri obulagirizi bwa Katonda; kubanga omusaalaba guteekwa okujjira bonna abategekebwa olw’ekitiibwa eky’oluvannyuma.—W. Hay Aitken.

Maayi 29

Mukama waffe Yesu Kristo . . . eyeewaayo ku lw’ebibi byaffe, alyoke atununule mu mulembe guno omubi. Abaggalatiya 1:4.

Okwegatta ne Kristo kye kyama kyokka eky’okwawukana n’ensi.—A. J. Gordon.

Maayi 30

Mmwe muli musana gwa nsi. Ekibuga tekikwekebwa ku lusozi. Matayo 5:14.

Ettabaaza teyogera, naye yaka. Ekiyumba ky’ettaala ekiragirira emmeeri tekikuba ŋŋoma, tekikuba kide; naye ewala ennyo ku mazzi, akasana kaakyo ak’omukwano kalabibwa omugoba w’emmeeri. Bw’otyo, leka ebikolwa byo byakize eddiini yo. Okubuulira okukulu okw’obulamu bwo kulagibwenga mu nneeyisa yo yonna.—Spurgeon.

Maayi 31

Awatali Nze temuliiko kye muyinza kukola. Yokaana 15:5. Nnyinza okukola byonna mu oyo ampa amaanyi. Abafiripi 4:13.

Awatali ye tetuyinza kukola kintu. Bwe tuba nga tubeera mu ye, tewali kitasoboka. Ekigendererwa kimu kyokka eky’obulamu bwaffe kye kino: okusigala mu kwegatta okulamu era okw’amaanyi ne Kristo, nga twekuuma buli kintu ekyandikumenya, era nga tukozesa buli kkubo okukunyweza n’okukugaziya. Era nga bwe tukola bwe tutyo, bwe tutyo bwe tulizuula amaanyi ge nga gakulukuta mu ffe olwa buli kizibu ekiyinza okujja. Tuyinza obutawulira nga gali waali; naye tulizuula nga gali waali buli lwe tunaatandika okugasenako. Tewali kukemebwa kwe tutayinza kuwangula; tewali bwetaavu bwe tutayinza kugumiikiriza; tewali buzibu bwe tutayinza kwolekera; tewali mulimu gwe tutayinza kukola; tewali kwatula wadde obujulirwa bwe tutayinza kuwa, singa emmeeme zaffe zibeera mu kwegatta okulamu ne Yesu Kristo; kubanga ng’olunaku lwaffe oba essaawa yaffe bwe biri, n’amaanyi gaffe bwe galiba.—F. B. Meyer.