Marisi

Marisi 1

Weetegeke mu makya, ojje mu makya ago . . . onneeyanjulire eyo ku ntikko y’olusozi. Okuva 34:2.

Amakya bwe budde obwateekebwawo nsisinkane Mukama. Ekigambo kino kyennyini amakya kiringa ekirimba ky’ezzabbibu engimu. Ka nzibetente, nnywe envinnyo entukuvu.

Mu makya! Kale Katonda ayagala mbeere ng’amaanyi gange n’essuubi lyange we bisingira. Sirina kulinnya nga ndi munafu. Ekiro nnaziise obukoowu bw’eggulo, ne mu makya ne nfuna amaanyi amaggya.

Amakya amalungi! Mu luyimba lwago mulimu essuubi. Lulina omukisa olunaku olw’amakya agatukuziddwa! Lwa buwanguzi olunaku obuwanguzi bwalwo obusooka bwafunibwa mu kusaba! Lutukuvu olunaku obudde bwalwo bwe bukya ne bukusanga ku ntikko y’olusozi! Obulamu obulungi bunywezebwa mu makya. Obugagga bufunibwa mu makya. Ekitangaala kisinga okwaka mu makya. “Zuukuka ggwe ennanga ey’enkoba, naawe entongooli, ndyoke nnyimbe okukeesa obudde.”—Joseph Parker.

Marisi 2

Omuntu ky’asiga era ky’alikungula. Abaggalatiya 6:7.

Ebikolwa by’obulamu ebya bulijjo ennyo, buli lunaku lwabwo na buli ssaawa, byambazibwa ekitiibwa ekisingirayo ddala, bwe tulowooza engeri ebiva mu byo gye bituuka mu mirembe n’emirembe. Emikono gyaffe kaakano gisiga ensigo ez’amakungula ago amanene. Tulisisinkana nate byonna bye tukola ne bye twakola. Amalaalo galiwaayo abafu baago, era okuva mu ntaana ez’okwerabirwa, ebyayita biriwaayo byonna bye bitereka, bitujulire mu mazima, oba ku lwaffe oba okutulumiriza.—Guthrie.

Marisi 3

Waliwo olugendo lwa nnaku kkumi na lumu okuva e Kolebu okutuuka e Kadesubanea, ng’okutte ekkubo eriyitira ku Lusozi Seyiri. Ekyamateeka Olwokubiri 1:2.

Ennaku kkumi na lumu, naye ne kibatwalira emyaka amakumi ana! Kyali kitya? Woowe! Tetwetaaga kugenda wala okufuna eky’okuddamu. Kifaanana nnyo ffe ffennyini. Nga tutambula mpola nnyo! Nga mulimu okwetooloola n’okukyuka kungi! Emirundi emeka gye tuteekwa okuddayo ne tutambulira mu kkubo lye limu, emirundi n’emirundi. Tutambula mpola kubanga tuyiga mpola. Katonda waffe Musomesa mwesigwa era wa magezi, era wa kisa era mugumiikiriza. Tajja kutuganya kuyita buyisi mu masomo gaffe. Oluusi, oboolyawo, tulowooza nti essomo tulimanyidde ddala ne tugezaako okweyongerayo ku ddala, naye Omusomesa waffe ow’amagezi amanyi ekisingako, era alaba nga kyetaagisa okulima wansi ennyo. Tayagala tubeere bamanya bya ku mimwa oba abamanyiiko obutundutundu; ajja kutukuuma, bwe kiba kyetaagisa, mwaka ku mwaka nga twegezaamu amaloboozi g’ennyimba okutuusa lwe tuyiga okuyimba.—C. H. M.

Marisi 4

Bwe twatula ebibi byaffe, ye mwesigwa era mutuukirivu okutusonyiwa n’okutunaazaako obutali butuukirivu bwonna. 1 Yokaana 1:9.

Akaseera kwe kamu akaleeta okutegeera ekibi kwandisanidde okuleeta n’okukyatula, n’okutegeera nti kisonyiyiddwa.—Smith.

Marisi 5

Nze mukulu w’eggye lya Mukama era ntuuse. Yoswa 5:14.

Mazima Isirayiri kaakano yali esobola okwolekera omulabe n’obwesige obutakankana, n’eyimba ku buwanguzi olutalo nga terunnawangulwa. Era bw’atyo n’Omukristaayo bw’asobola. Tagenda mu lutalo olutamanyiddwa nkomerero yaalwo; ebiriva mu lutalo tebiriimu kubuusabuusa. Okulwana kuyinza okuba okw’amaanyi, n’olutalo ne luwangaala; oluusi ayinza, ng’omutambuze omulamazi, okukubibwa wansi, n’abulako katono okufiirwa ekitala kye; naye ayinza okugamba nti “Tusuulibwa wansi,” kyokka “ne tutabetentuka.” Omukulembeze w’obulokozi ali ku ludda lwe, era wakati mu lutalo olusingayo obukambwe ayinza okugamba nti, “Kyokka Katonda yeebazibwe atuwanguza ffe ku bwa Mukama waffe Yesu Kristo.”—S. A. Blackwood.

Marisi 6

Nze mba mulamu lwa Kristo era ne bwe nfa mba ngobolodde. Abafiripi 1:21.

Beera mu Kristo, olwo ng’oli mu mbiriizi z’eggulu. Wakati wo n’ensi ey’okutendereza waliwo bbugwe mutono nnyo yekka. Osigaddeyo olugendo lwa ssaawa emu yokka ku mazzi okutuuka ku lubalama lwa Kanani empya.—William Rutherford.

Marisi 7

Oyo eyantuma ali nange, tandekanga bw’omu, kubanga bulijjo nkola by’ayagala. Yokaana 8:29.

Oyo asinga okussa ekimu n’eggulu y’asinga okusobola okutuukiriza emirimu gy’obulamu obwa bulijjo.—Selected.

Marisi 8

Temuzikizanga Mwoyo Mutukuvu. 1 Basessaloniika 5:19.

Bw’oba tozikiza Mwoyo, oteekwa buli kiseera okufuba okumanya Omwoyo ky’ayagala. Oteekwa okwawula n’obwegendereza bwonna wakati w’ebyo by’akulungamya n’ebyo omutima gwo omulimba bye gukuteesa. Ojja kujjukiranga buli kiseera emirimu gy’Omwoyo nga Kristo bwe yaginnyonnyola mu Njiri ya Yokaana. Ojja kwekuumanga ebikolwa eby’okwanguyiriza, ebikolwa eby’obutalowooza, n’ebigambo eby’ekiboggwe. Ojja kunyiikiriranga okusaba. Noonyereza mu Kigambo. Yatula Kristo buli lw’ofuna akakisa. Noonya okubeera wamu n’abantu be. Ewalira ddala okufaanana ensi, n’emisono gyayo egitaliimu, n’empisa zaayo ez’obulombolombo ezitalina makulu. Beera mwegendereza mu by’osoma. “Kye mbagamba mmwe, kye ŋŋamba buli muntu, mwekuume.” “Mubeerenga n’amafuta mu ttaala zammwe.” “Temuzikizanga Mwoyo Mutukuvu.”—Bowen.

Marisi 9

Kristo bwe yali ng’ajja mu nsi kyeyava agamba nti,. . . Wanteekerateekera omubiri. Abaebbulaniya 10:5.

Ekigambo kino ekya Kristo kiteekwa okutwalibwa buli omu ku bagoberezi be. Tewali kijja kutuyamba kubeera mu nsi muno ne twekuuma nga tetuliiko bbala, wabula Omwoyo eyali mu Kristo, eyatunuulira omubiri gwe ng’ogwamuteekerwateekerwa Katonda olw’okumuweereza; era atunuulira n’omubiri gwaffe ng’ogwateekebwateekebwa Ye, tulyoke tuguwaayo gy’ali. Nga Kristo, naffe tulina omubiri Omwoyo Omutukuvu mw’abeera. Nga Kristo, naffe tuteekwa okuwaayo omubiri gwaffe, na buli kitundu kyagwo, buli maanyi, buli kikolwa, okutuukiriza by’ayagala, okuweebwayo gy’ali, n’okumugulumiza. Nga Kristo, tuteekwa okukakasa mu mubiri gwaffe nti tuli batukuvu eri Mukama.—Andrew Murray.

Marisi 10

Nga musajja awangaalidde ddala obulungi [ng’amatidde emyaka]. Olubereberye 25:8.

Ebisaaliro, emiti egisimbibwa okwetooloola ekizimbe, bya kuzimba; era obudde, ennaku n’emyaka egy’obulamu bwaffe ku nsi bye bisaaliro ebyo. Kiki ky’ozimba munda mu byo? Kizimbe kya ngeri ki ekirirabika ng’ebisaaliro bimaze okusimbulwa? Ennaku n’emyaka byaffe, bituwe ekyo obulamu obutaggwaawo kye butayinza kututwalako—empisa ezizimbibwa ku kwagala kwa Katonda mu Kristo, era ezibumbibwa mu kifaananyi kye.

Obulamu bwo bukuyambye okukola ekyo? Bwe kiba bwe kityo, ofunye ekisingayo obulungi mu bwo, era obulamu bwo butuukiridde, ennaku zaabwo ne bwe ziba mmeka. Obulungi, so si obungi, bwe busalawo okutuukirira kw’obulamu. Obulamu bwo bulina obujjuvu buno?—Alex. McLaren.

Marisi 11

Nga mwekuumira mu kwagala kwa Katonda. Yuda 21.

Ekibala ekyengera mu musana kye kisinga okuwooma.—Selected.

Marisi 12

Muliweebwa amaanyi, Mwoyo Mutukuvu bw’alimala okubakkako, era munaabanga bajulirwa bange. Ebikolwa by’Abatume 1:8.

Mukitunuulire! Mukirowoozeeko! Abasajja n’abakazi kikumi mu abiri abatalina bakulu babawanirira, abatalina kisuubizo kya kuganja kwonna okw’ensi, abatalina bya busika, abatalina bugagga—ekibiina ky’abasajja n’abakazi abateekwa okwenoonyeza eby’okulya mu mirimu egya bulijjo, era abatawaanyizibwa emirimu gyonna egy’awaka egy’obulamu obwa bulijjo—era naye bo be balina okutandika okuwangula kw’Obukristaayo! Bo be bakwasiddwa omulimu ogugenda okutabulatabula ensi yonna. Tewali muntu wa waggulu nnyo nti amaanyi g’ekibiina kino ekyetoowaze tegajja kumutuukako, okutuusa entebe ey’obwakabaka eya Bakayisaali lw’eriweebwa Kristo. Tewali ali wala nnyo nti amaanyi g’akabinja kano akatono akakuŋŋaanidde mu kisenge ekya waggulu tegajja kumutuukako, okutuusa ensi yonna lw’erigattibwa wamu n’efuuka luganda lumu! Tewali maanyi gonna ku nsi, ag’abantu oba aga badayimooni, ge batalisobola kuwangula, okutuusa buli vviivi lwe lirifukaamirira Mukama waabwe, era buli lulimi lwe lulyatula nga ye Mukama.

Kintu ekitasoboka, eky’obusirusiru, ne bw’okitunuulira otya, okutuusa lw’okkiriza kino—balina okujjuzibwa Omwoyo Omutukuvu. Olwo ebizibu ne bisaanuukira mu bbanga. Olwo essuubi lyabwe teririna kkomo, kubanga amaanyi gaabwe tegalina kkomo. Amaanyi gaabwe tegali “ng’amaanyi g’abantu kkumi” kyokka, wabula gali ng’amaanyi g’Ayinzabyonna.

Eno ye ndowooza ya Kristo ku Bukristaayo; si ndowooza ya muntu—esukkiridde nnyo obugulumivu—ye ndowooza ya Katonda!—Mark Guy Pearse.

Marisi 13

Buli abeera mu Nze nange ne mbeera mu ye oyo abala ebibala bingi. Kubanga awatali Nze temuliiko kye muyinza kukola. Yokaana 15:5.

Bwe tutwalirizibwa ennyo omulimu gwaffe, tuyinza okwerabira Mukama waffe; kisoboka emikono okujjula, omutima ne guba bwereere. Bwe tutwalirizibwa Mukama waffe, tetuyinza kwerabira mulimu gwaffe; omutima bwe gujjula okwagala kwe, emikono giyinza gitya obutanyiikira kumuweereza?—Adolphe Monod.

Marisi 14

Oyo alya ku nze naye aliba mulamu ku bwange. Yokaana 6:57.

Okulya ku Kristo kwe kuyingiza amaanyi ge mu ffe gabeere amaanyi gaffe. Olya ebiva mu nnimiro y’emmere ey’empeke, amaanyi g’ennimiro eyo ne gakuyingira, ne gaba amaanyi go. Olya ku Kristo, olwo n’ogenda n’obeera mu bulamu bwo; era Kristo ali mu ggwe y’abeera obulamu bwo, y’ayamba abaavu, y’ayogera amazima, y’alwana entalo, era y’awangula engule.—Phillips Brooks.

Marisi 15

Ne munoonya naye saamulaba. Oluyimba 3:1.

Mbuulira w’ewafiirwa okubeera ne Kristo, nange nkubuulire ekifo w’osinga okumusanga. Kristo wamufiirwa mu kisenge ky’okusabiramu, ng’oziyiza okusaba? Kale eyo gy’oteekwa okumunoonyeza n’omusanga. Wamufiirwa olw’ekibi? Tolimusanga mu ngeri ndala yonna wabula ng’olekayo ekibi ekyo, era ng’onoonya, ku bw’Omwoyo Omutukuvu, okutta ekitundu ky’omubiri okwegomba mwe kubeera. Wamufiirwa olw’okulagajjalira Ebyawandiikibwa? Oteekwa okumusanga mu Byawandiikibwa. Lwe lugero olw’amazima nti, “Ekintu kinoonyeze w’ewakigwiriza; we kiri.” Bw’otyo noonyeza Kristo w’ewamufiirira, kubanga tavuddewo.—Spurgeon.

Marisi 16

Muleme kubaako kye mwetaaga mu kirabo kyonna. 1 Abakkolinso 1:7.

Ebyawandiikibwa biwa Abakristaayo amannya ana, agaggyibwa mu birabo by’ekisa ebina ebikulu ebyetaagisa ennyo olw’obulokozi bw’omuntu: abatukuvu olw’obutukuvu bwabwe, abakkiriza olw’okukkiriza kwabwe, abooluganda olw’okwagala kwabwe, abayigirizwa olw’okumanya kwabwe.—Thomas Fuller.

Marisi 17

Emisana n’ekiro, awatali kuwummula. Okubikkulirwa 4:8.

Ggwe ekiwummulo eky’omukisa! Lwe tutaliwummula emisana n’ekiro, nga tugamba nti, “Mutukuvu, Mutukuvu, Mutukuvu, Mukama Katonda Ayinzabyonna!”—lwe tuliwummula okuva mu kibi, naye si okuva mu kusinza; okuva mu kubonaabona n’ennaku, naye si okuva mu ssanyu! Ggwe olunaku olw’omukisa, lwe ndiwummulira wamu ne Katonda; lwe ndiwummulira mu kumanya, mu kwagala, mu kusanyuka, ne mu kutendereza; emmeeme yange n’omubiri gwange nga bituukiridde lwe biriryoherwa wamu mu bujjuvu Katonda asingira ddala okutuukirira; Katonda, kwagala kwennyini, lw’aliriyagala mu bujjuvu, n’awummulira mu kwagala kwe gye ndi, nange ne mpummulira mu kwagala kwange gy’ali; lw’alinsanyukira n’essanyu, n’ansanyukira n’okuyimba, nange ne musanyukiramu!—Baxter.

Marisi 18

Abo abalindirira Mukama baliddamu buggya amaanyi gaabwe, balitumbiira n’ebiwaawaatiro ng’empungu; balidduka mbiro ne batakoowa, balitambula naye ne batazirika. Isaaya 40:31.

Empungu etumbiira mu bbanga waggulu teyeeraliikirira ngeri gy’eneesomokamu emigga.—Selected.

Marisi 19

Tebaamutegeera, kubanga ekyo Katonda yali akibakisizza. Lukka 24:16. Amaaso gaabwe ne gazibuka. Lukka 24:31.

Kino kirimu amakulu mangi ag’omuwendo. Emirundi mingi Mukama abeera mu bulamu bwaffe mu bintu bye tutalowooza nti birina makulu gonna. Tusaba Katonda ku kintu ekyetaaga okukola kwe okw’amaanyi, ate nga ekyo kyennyini ky’agenda okukozesa kiri ku mabbali gaffe, oboolyawo okumala wiiki n’emyezi n’emyaka nga tetukitegeera, okutuusa lumu, kimpowooze, lwe kitandika okwakaayakana n’okumasamasa olw’okubeerawo kwa Mukama kwennyini, ne kifuuka ekikozesebwa eky’amaanyi eky’okukola kwe okw’obuwanguzi. Ayagala okulaga omukono gwe mu bintu bye tutasuubira. Emirundi mingi atuziyiza okulaba ekkubo lye okutuusa nga anaatera okuliggulawo, olwo amangu ddala nga limaze okweyoleka, ne tukizuula nti yali atambula ku mabbali gaffe mu kintu ekyo kyennyini, edda ddala nga tetunnaba na kuteebereza makulu gaakyo.—A. B. Simpson.

Marisi 20

Tumanyi nga eri abo abaagala Katonda, era abo abayitibwa ng’okuteesa kwe bwe kuli, ebintu byonna bibatuukako olw’obulungi. Abaruumi 8:28.

Embeera zaffe bwe zitusanga nga tuli mu Katonda, tujja kusanga Katonda mu mbeera zaffe zonna.—Selected.

Marisi 21

Annuŋŋamya okukola eby’obutuukirivu olw’erinnya lye. Zabbuli 23:3.

Bulijjo alina ekigendererwa mu kukulembera kwe. Amanyi obulundiro obutono obw’omuddo omubisi we buli, era ayagala okutwalayo ekisibo kye. Ekkubo liyinza okuba ery’amayinja, naye lye kkubo ettuufu erigenda mu ddundiro. Amakubo g’okukola “eby’obutuukirivu” gayinza obutaba magolokofu; naye makubo agatuusa awantu—mu kifo ekituufu. Amakubo mangi ag’omu ddungu galimba. Gatandika nga matangaavu era nga galabika bulungi, naye mangu ddala ne gabula mu musenyu. Tegatuuka wantu. Naye amakubo g’obutuukirivu galina ekigendererwa kye gatuusaako awatali kukyama.—J. R. Miller.

Marisi 22

Naye Musa n’agamba nti, Mukama wange, nkwegayiridde tuma omuntu omulala. Okuva 4:13.

Kwali kukkiriza kwa nkenyera nnyo. Kyali ng’okugamba nti, “Okuva lw’omaliridde okuntuma, era nga nteekwa okukola omulimu guno, kale kibe bwe kityo; naye nandyagadde kibe omulala, era ŋŋenda kubanga mpaliriziddwa.” Emirundi mingi bwe tutyo bwe tuddirira ssaddaaka oba obuvunaanyizibwa Katonda bw’atuyitamu, ne tulowooza nti tugenda mu kuzikirira kwaffe. Tunoonya buli nsonga ey’okwewala Katonda by’ayagala, nga tetumanyi nti atusindiikiriza okuva mu maka gaffe ag’emirembe, atuyingize mu bulamu obulimu, mu birala, oluyimba lw’obuwanguzi ku lubalama lw’Ennyanja Emyufu; okubeera yekka emirundi ebiri, ennaku amakumi ana buli mulundi, ng’ayogera ne Katonda; obwenyi obwakaayakana; okwolesebwa kw’ekitiibwa; okuziikibwa omukono gwa Mikayiri; n’ekitiibwa ekisingirayo ddala eky’okuyimirira ku mabbali ga Mukama ku lusozi kwe yafuusibwa.—F. B. Meyer.

Marisi 23

Mutunule nga mutambula n’obwegendereza. Abaefeso 5:15.

Tewali muntu abeera mu bantu nga tabakwatako n’akatono. Ffenna, buli omu mu kifo ky’alimu, tulina kye tukola ddala: tufuula ensi ennungi okusingawo oba embi okusingawo.—T. DeWitt Talmage.

Marisi 24

N’amufunira ekibaya eky’ebitoogo . . . n’akissa mu bitoogo ku lubalama lw’omugga Kiyira. Okuva 2:3.

Nnyina Musa yateeka ekibaya mu bitoogo ku lubalama lw’omugga. Weewaawo, naye nga tannakikola, yasooka kukiteeka ku mutima gwa Katonda! Teyandisobodde kukiteeka ku Kiyira n’obuvumu obwenkanidde awo, singa teyasooka kukiteeka, mu kwewaayo, mu mikono gya Katonda abilabirira era ayagala.

Emirundi mingi twewuunya obukkakkamu obw’okungulu obw’abantu abayitibwa okukola ebikolwa ebitasanyusa era ebizibu ennyo; naye singa twabalaba mu kyama, twandimanyi okweteekateeka kw’omwoyo kwe baayitamu nga tebannafuluma kulabibwa bantu. Beera mutuufu mu kifo ekitukuvu, bw’oba oyagala okubeera omutuufu mu katale. Nywerera mu kusaba, bw’oba oyagala okukkakkana mu kubonaabona. Tandika embiro zo ng’ova ku ntebe ya Katonda yennyini, bw’oba oyagala okudduka obulungi n’owangula empeera.—Joseph Parker.

Marisi 25

Muyambaganenga, bwe mutyo bwe munaatuukirizanga etteeka lya Kristo. Abaggalatiya 6:2.

Bwe tusitulira abalala emigugu gyabwe, egyaffe gituggwako.—Selected.

Marisi 26

Omulimu gwe wantuma okukola, ngumalirizza. Yokaana 17:4.

Omulimu gwa Mukama waffe gwali gumaze ddala okuggwa? Ekitundu kyagwo ekisinga obuzibu kyali tekinnajja? Yali tannasisinkana ssaawa ey’entiisa ey’okufa. Lwaki yagamba nti omulimu gwe guwedde? Kubanga yali amanyi nti, omutima bwe gumala okukkiriza, olutalo luba luwedde. Yali akyali mu bisiikirize by’ennimiro; naye okuwangula ebisiikirize ebyo kwali kumala dda okuwangula byonna. Oyo amaliridde okufa aba amaze okuwangula okufa. Ekimusigaliddeyo kye kikuta eky’ebweru kyokka, ekisosonkole.

Ekikompe Kitaffe ky’atuwa okunywa kiba kikompe ekiweebwa omutima ogusalawo. Kyangu emimwa okukinywa ne bakimalamu omutima bwe gumala okukikkiriza. Tekikwasibwa ku ntikko za Kalvaali, wabula mu bisiikirize bya Gesusemane; ekikolwa kyangu ng’omaze okusalawo. Ekifo eky’olutalo ekyennyini kiri mu kasirise k’omwoyo. Wangulira eyo, oba otikkiddwa engule.—George Matheson.

Marisi 27

Ekibiina ky’abantu ekinene ennyo . . . nga bayimiridde mu maaso g’entebe ey’obwakabaka. Okubikkulirwa 7:9.

Okuyimirira ku bigere mu maaso g’entebe mu ggulu kiva mu kubeeranga emirundi mingi ku maviivi mu maaso g’entebe ku nsi.—Selected.

Marisi 28

Katonda n’alaba obutangaavu nga bulungi; n’ayawula obutangaavu n’ekizikiza. Olubereberye 1:4.

Amangu ddala nga waliwo ekirungi mu nsi, okwawula kwetaagisa. Obutangaavu n’ekizikiza tebissa kimu; Katonda yabyawula, ka tuleme kubitabula. Abaana b’obutangaavu tebateekwa kussa kimu na bikolwa, enjigiriza, oba obulimba bw’ekizikiza. Abaana b’omusana bateekwa okubeera abateefu, abeesigwa, era abazira mu mulimu gwa Mukama waabwe, nga baleka ebikolwa by’ekizikiza eri abo abaliba mu kyo emirembe gyonna.

Twandyawudde obutangaavu n’ekizikiza nga twawukana ddala n’ensi. Mu kusalawo, mu kukola, mu kuwulira, mu kuyigiriza, mu kukolagana n’abalala, tuteekwa okwawula wakati w’eby’omuwendo n’ebitalina mugaso, ne tukuuma enjawulo ennene Mukama gye yassaawo ku lunaku olusooka olw’ensi.

Ai Mukama Yesu, beera ekitangaala kyaffe olunaku luno lwonna, kubanga ekitangaala kyo kye kitangaala eri abantu.—Spurgeon.

Marisi 29

Ekkubo ly’abatuukirivu liri ng’enjuba eyakavaayo, eyeeyongera okwaka okutuusa obudde lwe butangaalira ddala. Engero 4:18.

Ntandise kaakano ekkubo lino ery’okwagala n’okumanya okw’omu ggulu? Nkulaakulana mu lyo? Mpulira obutangaavu obw’omu ggulu nga butandika okukya, omusingo n’okuloza ku lunaku olujjuvu olw’ekitiibwa? Engeri zonna Katonda gy’ankolamu ka zinnyanguyize mu kkubo lyange. Buli kubonaabona kw’anaasiima okuntumira kubeere ng’empagi y’ekire ey’edda eyatambulanga, ng’enkoowoola okusimbula weema yange ŋŋende mu maaso, ng’egamba nti, “Muyimuke mugende, kubanga kino tekikyali kiwummulo kyammwe.” Ka mbeerenga emirundi mingi kaakano ku ntikko empanvu ez’okukkiriza, nga ndindirira “olunaku lwa Katonda”—enjuba evaayo etaliddayo kugwa mu bire ebikaaba. Okweyongerayo okw’ekyewuunyo! Okuyiga kwonna okw’ensi, obukugu bwayo bw’eyeewaanira, n’amagezi gaayo agalaba ewala ng’empungu, binaakendeera bitya ne bifuuka ebibogoota by’abaana abawere bw’onoobigeraageranya n’obukulu buno obw’okumanya! Eggulu liriba “Excelsior” ow’amazima, ng’oluyimba lwalyo “luyimba lwa kulinnya,” Yesu ng’akulembera abantu be okuva ku ntikko emu ey’ekitiibwa okudda ku ndala, ng’agamba, nga bwe yagamba Nassanayiri, “Oliraba n’ebisinga awo obukulu!”—Macduff.

Marisi 30

Tukwatire ebibe, obube obutono, obwonoona ennimiro ez’emizabbibu, kubanga ennimiro zaffe ez’emizabbibu zimulisizza. Oluyimba 2:15.

Obube obutono nga bungi! Okukkaanya okutono n’ensi; obutagondera ddoboozi ttono, ery’akaama, mu bintu ebitono; okwegabira obutono omubiri ne tulagajjalira obuvunaanyizibwa; obukodyo obutono obw’obugezigezi; okukola ekibi mu bintu ebitono ekirungi kiryoke kivemu; era obulungi n’ebibala by’omuzabbibu ne bifiirwa!—J. Hudson Taylor.

Marisi 31

Baana ba Kitammwe ali mu ggulu. Matayo 5:45.

Erinnya erisinga obulungi lye tuyinza okulowoozaamu Katonda ye Kitaffe. Lye linnya ery’okwagala, ery’ebuziba, eriwooma, erikwata ku mutima, kubanga erinnya lya taata mu buzaaliranwa bwalyo lijjudde obuwoomi n’okubudaabuda okuzaalibwa nalyo. Noolwekyo, naffe tuteekwa okwatula nti tuli baana ba Katonda, kubanga olw’erinnya lino tukwata nnyo ku mutima gwa Katonda waffe, kubanga tewali ddoboozi liwoomera taata okusinga eddoboozi ly’omwana we.—Martin Luther.