Obuweereza

Oboolyawo tewali kitundu kya bumanyirivu bw’Omukristaayo kikyuka nnyo okusinga obuweereza, emmeeme bw’eyingira mu bulamu obukwekeddwa wamu ne Kristo mu Katonda. Mu mitendera egya wansi egy’obulamu bw’Ekikristaayo, obuweereza buyinza okuwulirwa ng’ekisiba. Emirundi mingi buba buvunaanyizibwa, n’okugezesebwa, era omusaalaba. Mu kusooka, ebintu ebimu biyinza okuleeta essanyu. Naye bifuuka emirimu egikooya. Gikolebwa n’obwesigwa, naye ng’omutima mu kyama tegugyagala. Wabaawo okwegomba kungi, okwatulwa n’okutayatulwa, nti singa tegyetaagisa kukolebwa, oba waakiri obutakolebwanga emirundi mingi bwe gityo. Emmeeme yeesanga, mu kifo ky’okugamba “Nnyinza okukikola?” okw’okwagala, ng’egamba “Nteekwa okukikola?” okw’obuvunaanyizibwa. Ekikoligo, ekyali ekyangu mu kusooka, kitandika okuluma, n’omugugu ne guwulirwa nga guzitowa mu kifo ky’okuba omwangu.

Omukristaayo omu omwagalwa yali ankitegeezezaako bwe kiti. “Bwe nnamala okukyuka,” bwe yagamba, “nnali njjudde essanyu n’okwagala. Nnali musanyufu nnyo era nga nneebaza okukolera Mukama wange ekintu kyonna. Kale nnayingiranga n’obunyiikivu mu buli mulyango ogwaggulwangawo.” Naye essanyu lyange erisooka bwe lyakendeera n’okwagala kwange ne kunnyogoga, ne ntandika okwejjusa obunyiikivu bwange obwo. Nneesanga mu buweereza obwali bufuuka obw’okukyayibwa ennyo era obuzitowa. Nnali sisobola kubuleka, kubanga nnali mbutandise; kyandireese okwogerwako ennyo. Kyokka nnayongeranga okwegomba okubuleka. Nnali nsuubirwa okulambulanga abalwadde, n’okusabira ku mabbali g’ebitanda byabwe.

Nnali nsuubirwa okubeeranga mu nkuŋŋaana z’okusaba, n’okwogeramu. Nnali nsuubirwa okubeeranga bulijjo mwetegefu okwenyigira mu buli kaweefube ow’omulimu gw’Ekikristaayo. Obuzito bw’ebyo bye bansuubirangamu bwankutamyanga buli kiseera. Ku nkomerero, ne kifuuka ekitagumiikirizika okubeera mu bulamu bw’Ekikristaayo bwe nnali ntandise, era buli muntu bwe yali ansuubiramu. Nnandisinze nnyo okwagala okwoza wansi olunaku lwonna nga nfukamidde ku mavi n’emikono, okusinga okugumiikiriza omulimu gwange ogw’Ekikristaayo ogwa buli lunaku. Nnakwatirwanga obuggya,” bwe yagamba, “abaweereza ab’omu ffumbiro, n’abakazi abooleza engoye mu mabaafu.”

Kino kiyinza okulabika ng’ekigambo ekikakali. Naye tekikujjukiza ebimu ku bye wayitamu ggwe kennyini, Omukristaayo omwagalwa?

Tewagendangako ku mulimu gwo ng’omuddu bw’agenda ku mulimu gwe ogwa buli lunaku, ng’omanyi nti buvunaanyizibwa bwo? Oteekwa okugukola. Naye ng’omupiira bwe gubuuka ne gukomawo, n’oddayo amangu ago ku bintu by’oyagala ddala n’ebikusanyusa, omulimu gwo nga gwakaggwa.

Omanyi nti eyo si ye ngeri gye wandiwulidde. Okikwatirwa ensonyi, naye tosobola kukyeziyiza. Omulimu gwo tewaguyagalanga. Singa kyali kisoboka, wandigulese n’essanyu. Oba, bino bwe biba nga tebikwogerako, oboolyawo ekifaananyi ekirala kinaakwogerako. Omulimu gwo ogwagala mu birowoozo. Naye bw’oba ogukola, osangamu ebikweraliikiriza bingi n’obuvunaanyizibwa bungi. Obuusabuusa obusobozi bwo. Kino kigufuula omugugu omuzito.

Ogugendako ng’okooye era ng’okutamye, omulimu nga tegunnaba na kutandika.

Era weeraliikirira olw’omulimu gwo. Oteganyizibwa ebivaamu bwe biba nga si bye wandyagadde. Kino nakyo mugugu ogutaggwaawo. Kaakano emmeeme esumululwa ddala okuva mu buddu buno bwonna, bw’eyingira mu bujjuvu mu bulamu obw’omukisa obw’okukkiriza. Okusooka, esanyukira buli buweereza. Ewaddeyo okwagala kwayo eri Mukama.

Akolera mu yo okwagala n’okukola by’asiima. Kaakano emmeeme eyagala okukola Katonda by’ayagala. Bulijjo kiba kirungi okukola bye twagala, ne bwe biba bizibu oba bikooya bitya. Omuntu bw’aba amaliridde ddala ku kintu, akikola. Tafaayo ku biziyiza mu kkubo lye. Asekerera ekirowoozo nti okuwakanyizibwa kwonna oba ebizibu biyinza okumulemesa.

Basajja bameka abatambudde ensi yonna n’essanyu n’okwebaza nga banoonya obugagga oba okutuukiriza ebigendererwa byabwe?

Ekirowoozo kyonna eky’omusaalaba ogwali mu kyo baakinyooma! Bamaama bameka abeeyozaayozezza olw’abaana baabwe ab’obulenzi okukuzibwa ne bafuna emirimu egy’obuyinza mu gavumenti? Basanyuse. Naye kiyinza okuba nga kyategeeza emyaka mingi egy’okwawukana n’okubonaabona eri abaagalwa baabwe. Kyokka abasajja abo ne bamaama baabwe bandikiyise omusaalaba ogutagumiikirizika singa obuweereza bwa Kristo bwabeetaagisa okwefiiriza okwo kwennyini okw’amaka, emikwano, n’obweyagaze.

Byonna bisinziira ku ngeri gye tutunuuliramu ebintu, oba nga tubiyita emisaalaba oba nedda. Nkwatibwa ensonyi okulowooza nti Omukristaayo yenna yandinakuwadde olw’okukolera Kristo ekintu, omuntu ow’ensi ky’andikoze olw’ensimbi.

Kye twetaaga mu bulamu bw’Ekikristaayo kwe kuleetera abakkiriza okwagala okukola Katonda by’ayagala, ng’abantu abalala bwe baagala okukola bye beeyagalira. Era kino kye kirowoozo ky’Enjiri. Kye kyo Katonda kye yatuteekerateekera; era kye yasuubiza. Ng’annyonnyola endagaano empya mu Abaebbulaniya 8:6-13 “Naye kaakano omulimu Yesu gwe yaweebwa, gusinga nnyo ogwa bali obukulu, kubanga n’endagaano gy’alimu ng’omutabaganya y’esinga obulungi, n’ebisuubizo kw’enyweredde, bye bisinga obulungi. Singa endagaano eyasooka teyaliiko kyakunenyezebwa, tewandibaddewo kyetaagisa yaakubiri. Kubanga bw’abanenya ayogera nti, “Laba ennaku zijja,” bw’ayogera Mukama, “ndiragaana endagaano empya n’ennyumba ya Isirayiri, awamu n’ennyumba ya Yuda. Endagaano eno empya terifaanana n’eri gye nalagaana ne bajjajjaabwe lwe nabakwata ku mukono okubaggya mu nsi y’e Misiri. Olw’okubanga tebaagoberera ndagaano yange, nange ssaabassaako mwoyo,” bw’ayogera Mukama. “Eno y’endagaano gye ndiragaana n’ennyumba ya Isirayiri, oluvannyuma lw’ennaku ezo, bw’ayogera Mukama. Ndissa amateeka gange mu birowoozo byabwe era ndiwandiika amateeka gange ku mitima gyabwe, nange nnaabeeranga Katonda waabwe, nabo banaabeeranga bantu bange.”

“Era tewaliba nate muntu ayigiriza munne oba muliraanwa we, oba muganda we ng’agamba nti, ‘Manya Mukama,’ Kubanga okuva ku muto okutuuka ku mukulu bonna balimmanya. Era ndibasaasira, n’ebibi byabwe siribijjukira nate.” “Katonda bw’ayogera ku ndagaano empya, olwo ng’andibizza ey’edda; n’eyo gy’adibizza n’okukaddiwa n’ekaddiwa, eriggwaawo.

“Agamba nti tekiriba nate ndagaano enkadde eyakolebwa ku Sinaayi; kwe kugamba, etteeka eriweebwa okuva ebweru, erifuga omuntu lwa maanyi. Naye liriba etteeka eriwandiikiddwa munda, erikubiriza omuntu olw’okwagala. “Ndissa amateeka gange mu birowoozo byabwe,” bw’agamba, “era ndiwandiika amateeka gange ku mitima gyabwe.” Kino tekiyinza kutegeeza kirala kyonna wabula nti tuliyagala amateeka ge, kubanga buli ekiwandiikiddwa ku mitima gyaffe tuteekwa okukyagala.

Okugateeka mu birowoozo byaffe kye kimu ne Katonda okukolera mu ffe nga bwe kyogerwa nti “Kubanga Katonda yakolera mu mmwe, era yabaagazisa n’abasobozesa okukola by’ayagala, olw’okumusanyusa.” (Abafiripi 2:13). Kitegeeza nti tujja kwagala Katonda by’ayagala. Tujja kugondera ebiragiro bye, si lwa buvunaanyizibwa, wabula kubanga twagala okukola by’ayagala. Tewali kintu kyonna kyandirowoozeddwako ekisinga kino okukola obulungi. Emirundi emeka gye tulowoozezza nti, “Singa nnali nsobola okuyingira munda mu baana bange ne mbaagaza okukola bye njagala, okubakulembera kwandibadde kwangu nnyo!” Mu bikolwa tukizudde nti okusobola okukolagana n’abantu abakakanyavu, tuteekwa okwewala okubateekako bye twagala. Wabula tuteekwa okubaleetera bo bennyini okubireeta ng’ebirowoozo byabwe. Olwo tetujja kusanga kuwakanyizibwa kwonna. Ffe, abantu ab’ensingo enkakanyavu mu buzaaliranwa, bulijjo tujeemera etteeka eriva ebweru. Naye etteeka erisibuka munda mu ffe tulyaniriza.

Enteekateeka ya Katonda kwe kweddiza omuntu ow’omunda. Ayagala okufuga n’okuluŋŋamya okwagala kwe, era n’akumukolera. Olwo okugondera kufuuka kwangu era kwa ssanyu. Obuweereza bufuuka eddembe erituukiridde. Omukristaayo ateekwa okuleekaana nti, “Obuweereza buno obw’essanyu!” Ani yandiloose nti ensi erina eddembe bwe lityo?” Kale, Omukristaayo omwagalwa, bw’oba ng’oli mu buddu, oteekwa okuwaayo okwagala kwo eri Mukama wo. Mukirize akufugire ddala. Gamba nti, “Weewaawo, Mukama, WEEWAAWO!” Ku buli kintu. Mwesige akolere mu ggwe okwagala; okuleeta okwegomba kwo n’okwagala kw’omutima gwo okukwatagana n’ebyo by’ayagala ebirungi ennyo. Ndabye kino nga kikolebwa emirundi mingi, mu mbeera ze kyalabika nga tekisoboka n’akatono nga tekinnabaawo.

Mu mbeera emu, omukyala yali amaze ebbanga ddene ng’atya era ng’akyawa ekintu kye yali amanyi nti kituufu. Namulaba, ng’aweddemu essuubi era nga tewali ky’awulira, ng’awaayo okwagala kwe eri Mukama we. Yatandika okumugamba nti, “Ky’oyagala kye kiba kikolebwa; ky’oyagala kye kiba kikolebwa!” Era mu ssaawa emu yokka, ekintu ekyo kyennyini ne kitandika okumulabikira ng’ekiwoomu era eky’omuwendo. Kya kitalo nnyo ebyamagero Katonda by’akola mu kwagala okumuweereddwayo ddala. Ebizibu abifuula ebyangu, n’ebikaawa abifuula ebiwoomu. Si nti ateeka ebyangu mu kifo ky’ebizibu, wabula akyusa ddala ekizibu ne kifuuka ekyangu. Era buno bwe bulokozi. Bwa kitalo. Kale gezaako. Ggwe asanga obulamu bw’Ekikristaayo obwa buli lunaku nga buzibu, ojja kusanga nga Mukama wo akyusizza obuddu bwo ne bufuuka eddembe erisinga okuwooma!

Oba, bw’oba ng’oyagala by’ayagala mu birowoozo, naye ng’okisanga nga kizibu okubikola, waliwo okununulibwa mu bulamu obw’ekitalo obw’okukkiriza. Kubanga mu bulamu buno tewali migugu gyetikkibwa, wadde okweraliikirira okuwulirwa. Mukama ye mwetissi w’emigugu gyaffe, era ku ye tuteekwa okussa buli kitweraliikiriza. Mu makulu, agamba nti temweraliikiriranga kintu na kimu, wabula mutegeezenga nze bye mwetaaga, nange ndibikolako byonna. Temweraliikiriranga kintu na kimu, bw’agamba, wadde obuweereza bwammwe.

Okusinga byonna, nga bwe ndowooza, obuweereza bwaffe. Mu kino tetulina kye tusobola n’akatono. Kale ne bwe twandyeraliikiridde, tekyandigasizza. Kiki ekitukwatako ffe okulowooza oba nga tusaanidde oba nedda!

Mukama w’omulimu alina obuyinza okukozesa ekikozesebwa kyonna mu mulimu gwe. Si kifo ky’ekikozesebwa okusalawo oba nga kye kituufu. Ye amanyi; era bw’asalawo okutukozesa, awatali kubuusabuusa tuteekwa okuba nga tusaanidde. Era mu mazima, singa twali tumanyi, okusaanira kwaffe okusinga obukulu kuli mu kuba nti tetulina kye tusobola n’akatono. Amaanyi ge gasobola okutuukirira mu bunafu bwaffe bwokka. Nsobola okukuwa ekyokulabirako ekikakasa kino.

Lumu nnalambula ennyumba ejjanjabirwamu abantu abaliko obulemu ku magezi. Nnalaba abaana nga bakola dduyiro n’ebyuma ebizito eby’emikono. Tumanyi nti kizibu eri abantu abaliko obulemu ku magezi okufuga entambula y’emibiri gyabwe.

Batera okuba ab’amaanyi, naye tebalina bukugu bwa kukozesa maanyi ago. N’olwekyo tebasobola kukola bingi. Mu dduyiro oyo ow’ebyuma, ekizibu kino kyali kyeyoleka bulungi. Baakolanga entambula za buli ngeri ezitali za ntegeka.

Oluusi baatambuliranga wamu n’ennyimba n’ebiragiro by’omusomesa, naye ebiseera ebisinga, byonna byali bitabuddwatabuddwa.

Kyokka nnalaba akawala akamu akatono, akaakolanga entambula entuukirivu. Tewaali kukankana wadde kukutuka kwonna okwatabula enkwatagana ya dduyiro wako. Era ensonga yali nti, si lwa kuba nti kaalina amaanyi okusinga abalala, wabula nti kaali tekalina maanyi n’akatono. Kaali tekasobola kukwata byuma ebyo mu ngalo zaako, wadde okusitula emikono gyako. Omusomesa yalinanga okuyimirira emabega wako n’akakolera byonna. Kaawaayo ebitundu byako ng’ebikozesebwa gy’ali, era amaanyi ge ne gatuukirira mu bunafu bwako. Yali amanyi okukola entambula ezo. Ye yali azitegese. N’olwekyo, bwe yazikola, zaakolebwa bulungi. Kyo tekaakola kirala wabula okwewaayo ddala mu mikono gye, ye n’akola byonna.

Okwewaayo kwe kwali omugabo gwako, obuvunaanyizibwa bwonna bwali bubwe. Si bukugu bwako bwe bwali bwetaagisa okukola entambula ezikwatagana, wabula obubwe bwokka. Ekibuuzo tekyali kya busobozi bwako, wabula bwe. Obunafu bwako obw’enkomeredde bwe bwali amaanyi gako agasinga. Bwe kiba nga kino kiraga obulamu bwaffe obw’Ekikristaayo, tekyewuunyisa. Pawulo yali asobola okugamba nti, “Noolwekyo kyennaavanga nneegulumiza n’essanyu lingi olw’obunafu bwange, amaanyi ga Kristo galyoke galabisibwe.”

Ani atandisanyuse okwegulumiza olw’okuba omunafu era atalina kye asobola bw’atyo, Mukama Yesu Kristo aleme okusanga kiziyiza kyonna mu kukola okutuukiridde okw’amaanyi ge amangi ennyo okuyita mu ffe ne mu ffe?

Ate era, omulimu bwe guba ogugwe, obuvunaanyizibwa bubwe, era tetusigaddeeko kifo kya kugweraliikirira.

Buli kintu ekigukwatako akimanyi, era asobola okukiddukanya kyonna. Kale lwaki tobimulekera byonna, n’okkiriza okuyisibwa ng’omwana n’oluŋŋamizibwa gy’oteekwa okugenda? Abakozi abasinga okukola obulungi be mmanyi tebeeraliikirira mulimu gwabwe. Bagukwasa Mukama waabwe omwagalwa. Bamusaba abaluŋŋamye era bamwesiga abawe amagezi n’amaanyi bye beetaaga, buli kaseera.

Omuntu ayinza okulowooza nti tebafaayo nnyo, ng’ate bingi nnyo biri mu kabi. Naye bw’onooyiga ekyama kya Katonda eky’okwesiga, ojja kulaba obulungi n’amaanyi ag’obulamu obuweereddwayo eri omulimu gwe. Ojja kulekera awo okusalira omusango. Ojja kwewuunya engeri omuweereza wa Katonda yenna gy’ayinza okwetantala okwetikka emigugu oba obuvunaanyizibwa Ye yekka bw’asobola okwetikka.

Waliwo enjegere endala emu oba bbiri ez’obuweereza obulamu buno obw’okwesiga mwe butununula. Tuzuula nti tetuvunaanyizibwa ku mulimu gwonna ogw’ensi. Ebiragiro birekera awo okuba eby’awamu, ne bifuuka eby’omuntu ssekinnoomu.

Mukama tatuteekerateekera kkubo lya wamu ery’ebikolwa n’atuleka tuliyitemu ku bwaffe nga twesigama ku magezi gaffe n’obukugu bwaffe nga bwe tusobola. Atukulembera mutendera ku mutendera, ng’atuwa buli ssaawa obulagirizi obw’enjawulo obwetaagisa mu ssaawa eyo.

Omwoyo we ow’omukisa ali mu ffe atujjukiza ekiragiro, bwe kiba kyetaagisa. Kale tetwetaaga kulowooza bya mu maaso. Tusaanidde okutwala buli mutendera nga bwe gutubikkulirwa, nga tugoberera Mukama waffe yonna gy’atukulembera. “Mukama bw’asanyukira ekkubo ly’omuntu, aluŋŋamya entambula ye.” si kkubo lye lyokka, wabula buli kigere kye kinnakimu mu kkubo eryo. Abakristaayo bangi bakola ensobi ey’okusuubira okufuna ebiragiro bya Katonda byonna omulundi gumu, ng’ekifunvu. Balowooza nti, kubanga abagambye okuwa omuntu omu akatabo k’enjiri mu ggaali y’omukka, bateekwa bulijjo okuwa buli muntu obutabo. Beetikka ekiragiro ekitasoboka.

Lumu, Omukristaayo omuto yasisinkana omuntu ng’atambula. Mukama yali amutumye okumutuusaako obubaka. Yakitwala ng’ekiragiro eky’okwogera ne buli gw’asisinkana ku by’emmeeme ye. Kino, awatali kubuusabuusa, kyali tekisoboka, era olw’ekyo, amangu ddala yali mu buddu obutaliimu ssuubi ku nsonga eyo. Yali atya nnyo okufuluma ebweru. Yabeeranga mu nsonyi buli kiseera.

Ku nkomerero, ennaku ye n’agitegeeza mukwano gwe. Mukwano gwe oyo, omuweereza wa Katonda, n’amugamba nti yali akoze ensobi. Mukama alina omulimu ogw’enjawulo eri buli mukozi. Mu maka agaddukanyizibwa obulungi, buli muweereza tasaanidde kugezaako kukola mirimu gya balala. Bwe kityo bwe kiri n’abaweereza ba Mukama. Tebateekwa kukola buli kintu. N’amugamba anoonye obulagirizi bwa Mukama ku mulimu gwe. Amwesige amulage gw’aba ayogera naye. N’amukakasa nti Mukama aluŋŋamya endiga ze. Azikulembera era azitemera ekkubo.

Yagoberera amagezi gano. Omulimu gwe yagukwasa Mukama. Ekyavaamu lwali lugendo olw’essanyu olw’obulagirizi obwa buli lunaku.

Yakulemberwa mu mulimu mungi ogw’omukisa eri Mukama we. Yagukola gwonna awatali kweraliikirira, kubanga Ye yamuteekerateekeranga ekkubo. Okwesiga Katonda kufaanana ng’okuyunga ebyuma ku yingini ekola n’omukka. Amaanyi tegali mu byuma, wabula mu mukka. Ebyuma tebigasa nga tebiyungiddwa ku yingini. Naye bw’obiyunga, ebyuma bijja kukola bulungi awatali buzibu. Biba n’amaanyi mangi ennyo emabega waabyo. Bwe kityo n’obulamu bw’Ekikristaayo bufuuka bwangu era obw’obuzaaliranwa. Bukulaakulanya omulimu gwa Katonda munda.

Abakristaayo abasinga beerumya nga bakola. Okwagala kwabwe kulwanagana n’okwa Katonda. Okuyungibwa tekuli kutuukiridde. Kyetaagisa okufuba okusobola okutambuza ebyuma. Naye okuyungibwa bwe kumala okukolebwa, etteeka ery’Omwoyo aleeta obulamu mu Kristo Yesu lisobola okukola mu ffe n’amaanyi gaalyo gonna. Olwo tuba tunuluddwa okuva mu tteeka ly’ekibi n’okufa. Tujja kumanya eddembe ery’ekitiibwa ery’abaana ba Katonda. Tujja kubeera mu bulamu obutaliimu kukuubagana.

Waliwo engeri endala ey’obuddu mu buweereza. Obulamu obw’okukkiriza bununula emmeeme okuva mu bwo. Bukwata ku birowoozo eby’okwetunuulira ebigoberera bulijjo buli mulimu gw’Ekikristaayo. Okwetunuulira kuno kuli kwa ngeri bbiri. Emmeeme oba yeeyozaayoza olw’obuwanguzi bwayo n’eyegulumiza, oba ennyolwa olw’okulemererwa kwayo n’eggwaamu amaanyi.

Ekimu ku bino kitera okujja ddala. Ku byombi, ekisooka kye nsinga okutya. Ekyokubiri kye kireeta okubonaabona okusinga mu kiseera ekyo. Naye mu bulamu obw’okwesiga, tewali na kimu ku byo kijja kututawaanya. Twewaddeyo ffe n’omulimu gwaffe eri Mukama. Tujja kumatira okubimulekera, ne tutalowooza ku ffe n’akatono.

Emyaka mingi emabega, nnasanga sentensi eno mu kitabo ekikadde: “Tokkirizanga, ng’omaze okukola ekintu, kwetunuulira kwonna, oba kwa kweyozaayoza oba kwa kuggwaamu ssuubi.” Weerabire ebyo ebiri emabega, amangu ddala nga biyise. Bireke ne Katonda.” Kibadde kya muwendo nnyo gye ndi okusinga bwe nsobola okwogera. Okukemebwa bwe kujja, nga bwe kujja bulijjo, okwemalira mu birowoozo ebyo, mbivaako amangu ago. Ngaana okulowooza ku mulimu gwange n’akatono. Ndekera Mukama okutereeza ensobi zange n’okugwawa omukisa nga bw’asiima.

Mu bufunze, okusobola okuweereza mu ssanyu era nga kivaamu ebibala, kwasa bukwasa Mukama omulimu gwo era oguleke awo. Tosabanga nti, “Mukama, nnuŋŋamya; mpa amagezi; ntegekera.” Olwo n’oyimuka okuva ku maviivi go n’oddamu okwetikka omugugu. Togezaako kwenuŋŋamya na kwetegekera. Bireke ne Mukama, era jjukira nti ky’omukwasizza, tosaanidde kukyeraliikirira wadde okukitya. Okwesiga n’okweraliikirira tebiyinza kubeerawo wamu.

Omulimu gwo bwe guba omugugu, kiri bwe kityo kubanga togumukwasizza. Bw’onoogumukwasa, ojja kusanga ng’ekikoligo ky’akuteekako kyangu. Omugugu gw’akuwa teguzitowa. Ne wakati mu bulamu obw’okukola obutawummula, emmeeme yo ejja kufuna ekiwummulo.

Naye abamu bayinza okugamba nti enjigiriza eno yanditufudde ebikinisi ebizannyisibwa obuzannyisibwa. Nziramu nti, Nedda, yanditufudde baweereza bwokka. Omuweereza tasaanidde kuteekateeka, kutegeka, kusalawo, wadde okuleeta ebikozesebwa. Ateekwa kugondera kyokka. Kya mukama we okukola ebirala byonna. Era omuweereza tavunaanyizibwa ku bivaamu. Mukama we yekka y’amanyi ebivaamu bye yali ayagala bivemu, n’olwekyo ye yekka y’asobola okubisalirako. Obuweereza obw’amagezi, kya lwatu, buteekwa okukwatagana n’enteekateeka za mukama. Naye tewayinza kubaawo kutegeera kujjuvu.

Mukama tasobola kusindika buvunaanyizibwa bwe ku muweereza. Olw’okulaba kwaffe okutono n’obutamanya bwaffe obungi, tetuyinza kukola kirala kinene wabula okukkiriza Katonda by’ayagala. Tetusaanidde kusuubira kubitegeera mu bujjuvu. Tuteekwa okumulekera ebivaamu byonna.

Ekirabika ng’okulemererwa ku ngulu, emirundi mingi, ku ludda olutalabika, buba buwanguzi bunene. Bwe twerekera okukungubaga n’okweraliikirira, tujja kuba basirusiru. Twandibadde tuyimba era nga tusanyuka, so si kukaaba. Kisinga nnyo okwewala okwetunuulira kwonna. Tetusaanidde kulowooza ku ffe n’akatono, oba ku bulungi oba ku bubi.

Tetuli bya bugagga bwaffe ffe, era tetuli nsonga yaffe ffe. Tuli ba Katonda. Tuli bikozesebwa bye era tuli nsonga ye. Bulijjo afaayo ku nsonga ze. N’olwekyo, awatali kubuusabuusa, ajja kufaayo ku ffe.

Lumu nnawulira ku muddu eyali ku kyombo mu kibuyaga eky’amaanyi ennyo. Bonna abalala bwe baali batidde, ye yali akuba oluwa n’essanyu. Ku nkomerero, omuntu omu n’amubuuza oba nga yali atya okubbira. N’amwenya n’agamba nti, “Wamma, oboolyawo ntya.

Naye nze siri wange, era kyandibadde kufiirwa kwa mukama wange kwokka.” Endowooza eno yandituyambye okwewala okweraliikirira kungi mu mulimu gwaffe. Teebereza Mukama waffe ky’asobola okukola n’ekibinja ky’abantu abeewaddeyo ddala okumuweereza n’okumwesiga! Omuntu omu bw’atyo yandigobye olukumi, n’ababiri ne badumya omutwalo ne badduka. Tewandibaddewo kibalema, kubanga eri Mukama, tekirina njawulo oba tuli bangi oba batono.

Katonda ayimuse eggye ng’eryo mangu! Era ggwe, omusomi wange omwagalwa, weewandiise mu ggye lino leero. Weewaayo eri Katonda ng’omuntu omulamu eyava mu bafu. Buli kitundu kyo kibe kikozesebwa kye eky’obutuukirivu, akikozese nga bw’ayagala.