Obuweereza

Endowooza eno nti ‘obuweereza’ mulimu gw’abasumba abaateekebwako emikono, era nti abakkiriza aba bulijjo bali wa kubayambako mu buweereza obwo, twagiggya wa? Mu kkanisa ey’olubereberye tekyali kityo n’akatono! Eyo, bonna baalina ebintu byonna awamu nga bwe baali mu kwegatta okw’olukale, era baayambagananga nga ebirabo eby’obuweereza bwe byeyolekanga.

Kabaka Constantine bwe yalangirira nti Obukristaayo bwe bujja okuba eddiini y’Obwakabaka bw’Abaruumi, olwo Ensi y’Abakristaayo (Christendom) n’ezaalibwa n’enzimba yaayo ey’amadaala, eyatandika okukulemberwa ba Paapa, ba Kaddinaali n’abalala - era ebiseera eby’ekizikiza ne bigwa ku nsi. Okuzza obuggya ekkanisa (Reformation) okw’ekyasa eky’16 kwaleetera ekkanisa ekitangaala, naye obukulembeze bwayo obw’amadaala bwali bwesimbye nnyo nga n’amakanisa g’Abapolotesitanti gakwata engeri y’obukulembeze y’emu. Ensonga 95 za Martin Luther ez’omwaka 1517 zaali kuwakanya Kkanisa ya Roma Katolika olw’okutunda okusonyiyibwa kw’ebibi (indulgences), naye zaazaalibwa okuva mu kwesittala okwa buli muntu eri ebintu ebingi ebyali bikyamu mu kkanisa.

Emyaka egyaddirira, mu 1530, yannyonnyola endowooza ze mu ngeri ey’ekikkakkamu etaleeta mpaka, ng’anoonya okuba omutabaganya mu kwekalakaasa okwali kweyongera okuwulirwa mu Bulaaya yonna. Kyokka mu kiseera ekyo ekibiina kye kyali kimaze okwawulamu Bulaaya mu bitundu bibiri, ne kizaala amakanisa agamanyiddwa ng’aga bannanjiri (evangelical) oba Abapolotesitanti.

Ebibinja ebikulu bisatu bye byavaamu: Abalutere (mu Bugirimaani ne Scandinavia); aba Zwingli n’aba Calvin (mu Switzerland, Bufalansa, Holland ne Scotland) n’Ekkanisa ya Bungereza. Erinnya bannanjiri lireme kukulimba - amakanisa gano emirundi mingi tegaalina njawulo na kkanisa nnyina, nga gasinga kufaayo ku bya bufuzi okusinga eby’omwoyo.

Ekigambo bannanjiri kyali kisinga kutegeeza nti bo baali beesigamye ku njiri (Enjiri - kwe kugamba Bayibuli) ng’obuyinza bwabwe, mu kifo kya Paapa ne ba Kaddinaali b’Ekkanisa ya Katolika.

Buli kimu ku bibinja bino bwe kyagezaako okwesimba, eby’obufuzi eby’entalo bye byakozesebwa, era omusaayi mungi ne guyiika. Okusobola okusigala nga bafuga ensi zaabwe n’abantu baabwe, abakulembeze b’ekkanisa baakifuula etteeka nti buli muntu ateekwa okuba ow’ekkanisa ya ‘Gavumenti’, nga bw’otakikola ogobebwa mu bantu, tosobola kufuna mulimu wadde okugusigazaawo, era n’okufa ofa. Eky’omukisa, ekiseera kireese okusumululwa okumu okuva mu buddu obwo obutali bwa Katonda, wadde ng’enzimba y’ekkanisa emirundi mingi ekyali ya madaala, obuyinza nga buva mu batono (abasumba abaateekebwako emikono) abali ku ‘ntikko’.

Okutuusa mu kitundu ekisembayo eky’ekyasa kino, kwe waabaddewo okukyuka okw’amaanyi okuva ku bukulembeze obw’okukaka obw’engeri eyo, ne kuleetawo amakanisa mangi ag’omu maka n’ebibiina ebyeetongodde. Eky’ennaku, ne mu kibiina kino ekiggya ekyavudde mu kwesittala, emirundi mingi omukulembeze asituse n’ekitone kye eky’okusikiriza, n’afuuka omulala eyeetuuza ng’ow’obuyinza.

Nnali nyitiddwa e London okumalayo wiiki ntono nga ntambula mu bubinja obw’enjawulo obw’abakkiriza abaali bakozi ba bbanka ya National Westminster. Waliwo obubinja bungi obw’engeri eno mu ‘City’ - ekitundu ky’ebyobusuubuzi ekya London nga bwe kimanyiddwa - obukuŋŋaana omulundi gumu oba ebiri mu mwezi okuzzaŋŋanamu amaanyi n’okussa ekimu. Ekiseera kyange mu Bungereza kyali kya kuggwa n’olukuŋŋaana olw’okwewummuza olwa wiikendi e Haythrope Hall, ennyumba ennene ey’omu byalo mu Oxfordshire, eya bbanka ya NatWest.

Olukuŋŋaana lwange olusooka olw’essaawa y’ekyemisana lwali n’abakozi ba bbanka nga kkumi na babiri ab’ekibinja ky’e Square Mile, okumpi ddala ne Bank of England. Nnayogera nga musumba mu ddakiika amakumi abiri ze nnaweebwa, ne mpulira nga bulungi ku lukuŋŋaana olwo. Wiiki ttaano oluvannyuma, ekiseera kyange mu Bungereza nga kinaatera okuggwaako, nnaddayo e Square Mile olw’olukuŋŋaana olwokubiri, naye ku mulundi guno, nneetonda eri abaali bampuliriza. “Bwe nnayogera nammwe wiiki ttaano emabega,” bwe nnagamba, “nnali simanyi kunyigirizibwa kwe mukolamu. Okuyigiriza kwange kuteekwa okuba nga kwabalabikira nga kwa kungulu nnyo era nga tekukwatagana na mbeera yammwe. Mwali muleeseeko omusumba wammwe okulaba kye mukola mu lunaku olwa bulijjo olw’omulimu?”

Nneeyongerayo okubakubiriza okuyita abakulembeze b’amakanisa gaabwe okumala ekiseera nabo ku mirimu, balabe obuzito bangi ku bo bwe bakolamu.

Nnali nzudde nti bangi ku bakozi abato bakola essaawa kkumi oba n’okusingawo buli lunaku, mu kisenge ekijjudde abakozi abalala abasukka mu bibiri, amaaso ga bonna nga gasimbye ku kompyuta zaabwe, nga batya n’okuva ku ntebe zaabwe mangu, si kulwa nga be baddako okuweebwa ebbaluwa ebagoba ku mulimu! Abakulu abasingako ddaala emirundi mingi bakola essaawa nnyingi n’okusingawo okusobola okutuukiriza ebisaanyizo by’emirimu gyabwe.

Ku wiikendi emirundi mingi baba bakooye nnyo nga tebasobola kwenyigira mu makanisa gaabwe, era nteebereza nti abasumba baabwe babatwala ng’abatafaayo nnyo ku mulimu gwa Mukama.

Nzikiriza nti bano, ng’abo bonna abayitibwa ‘abakkiriza aba bulijjo,’ be baweereza ab’amazima ab’ekkanisa, abakolera ku mbibi zaayo ez’omu maaso mu lutalo olw’okulwanyisa ekizikiza ky’ensi, era obuvunaanyizibwa bw’abasumba kwe kubatendeka okusobola okwaŋŋanga okunyigirizibwa n’okuba ng’omusana wakati mu kizikiza ekyo. Abasumba, ka mbakubirize okufuna ekiseera okukyalira abantu bammwe ku mirimu gyabwe, mwerabire mmwe bennyini obujulirwa obw’amazima gye bulabikira.

Alan akolera mu bbanka ku limu ku madaala gaayo agasinga okuba n’emirimu emingi. Omwaka ogwayita, yali anyiiziddwa nnyo ekkanisa ye kubanga yawulira ‘okuyitibwa’ okuyingira mu buweereza obw’obudde bwonna nga musumba. Kino yali akitegeera ng’okuyimirira mu kituuti ky’ekkanisa y’omu kitundu, naye ekitundu ky’eddiini kye tekyakkiriza kuta bakkiriza ba bulijjo mu kifo ekikulu bwe kityo, era emikisa mu makanisa amalala gyali mitono.

Yayogera n’omukulembeze w’akabinja k’abakkiriza ak’ewaabwe, eyamugamba nti waliwo obwetaavu bungi obw’omusumba okuweereza abantu abangi abaali bamwetoolodde ku mulimu.

“Tunuulira omukyala oli” bwe yagamba, “Yaakafiirwa bba. N’omusajja oli yaakaweebwa ebbaluwa emugoba ku mulimu ng’amaze wano emyaka kkumi n’ebiri. Omukyala atudde ku mmeeza eri alina omwana afa kkookolo, n’omusajja amuliraanye ali mu kugattululwa ne mukazi we.”

Amangu ago Peter n’alaba n’okwolesebwa okuggya. Eno ye yali ennimiro gye yali ateekwa okubeeramu omusumba.

Yatandika okusemberera abo be yazuula nga balumwa, era yeewuunya nnyo bwe baatandika okumweyabiza n’okumukkiriza okwogera mu nnaku zaabwe. Ddala Mukama yali amuggulira emitima gy’abantu! Omwaka gumu oluvannyuma talina kwagala kuleka mulimu ogwo, wabula ajjudde essanyu ery’amazima mu buweereza obw’obusumba Mukama mwe yamuteeka.

Buvunaanyizibwa bwo okulambulula omugugu gwo; mikwano gyo n’abakuwabula be banaalambulula ebirabo byo, naye obuweereza bwo busaanidde okulambululwa abakulembeze b’ekkanisa, abasumba n’abakadde. Si kulondebwa wadde okuteekebwawo, wabula okulambululwa! Obuvunaanyizibwa bw’omukulembeze obusooka kwe kutegeera obuweereza Mukama bwe yategekera buli emu ku ndiga ze. Wano enteekateeka ey’okuyigirizibwa okutuuka ku kigendererwa kyo ng’empungu ezibuuka we yeeremerera emirundi mingi, ne kizaala abakkiriza abanyiize, abalumwa era abatakyakkiriza muntu.

Empungu nnyina bw’emanya nti ekiseera kituuse abaana baayo okuva mu kisu, eggyamu ebyoya byonna ebigonvu n’ebyoya ebyali bisaliddwa mu kisu, olwo n’esindiikiriza akaana k’empungu okutuuka ku mabbali gaakyo. N’okusindika okutali kwa kisa nnyo, akaana kasuulibwa mu bbanga! Obutamanya - n’Etteeka ly’Amaanyi g’Ensi Agasika - bireetera akanyonyi akato okugwa okwolekera ettaka, nga kakuba ebiwaawaatiro byako mu kugezaako okw’obwereere okuddayo mu kisu ekiwooma. Naye nga tekannatuuka ku ttaka, empungu nnyina eserengeta n’ekwata omwana waayo ku biwaawaatiro byayo, n’emusitula nate okudda waggulu!

Eyo tewali bukuumi, kubanga nga bwe kaakawonyezebwa amangu ago okutomera ettaka, akaana kaddamu okusuulibwa mu bbanga ne katandika okugwa.

Kino kiddiŋŋanwa okutuusa akanyonyi akato lwe katandika okuwulira empewo wansi w’ebiwaawaatiro byako ng’ekasitula, kaleme kugwa ku ttaka.

Ku nkomerero, empungu nnyina eddayo mu kisu kyayo okuyimirira n’okutunula ng’eyenyumiriza, ng’omwana waayo atandika okumanya essanyu ery’okutumbiira ku mpewo okutuuka waggulu mu ggulu.

Omulimu gw’omusumba gufaanana ddala ng’ogwa nnyina w’empungu. Tuyitibwa ‘okutendeka abantu ba Katonda olw’omulimu ogw’obuweereza’. Tuteekwa okunoonya abo mu bibiina byaffe abalaga ebirabo ebyetaagisa okusitula omugugu gwe boogeddeko, olwo ne tubateekawo obuweereza obunaabasobozesa okuyiga okubuuka ku mpewo z’amafuta ez’Omwoyo Omutukuvu. Kino kya bulabe! Kiyinza okutegeeza nti bajja kulemererwa ne baleetera abantu okubuusabuusa okusalawo kwaffe; oba kiyinza okutegeeza nti bajja kuwangula ne batusukkulumako mu kumanyika ne mu buwanguzi. Abasumba abo bokka abanywevu mu kuyitibwa kwabwe, abamanyi omukisa gwabwe ogw’okumatizibwa mu buweereza, be basobola okuta abalala mu ddembe. Okuta kuno si kya mulundi gumu; kyetaagisa okwewaayo okulabirira, okuwagira, okulwanirira n’okuluŋŋamya okutuusa lwe batandika okubuuka.

Olw’okuba abasumba n’abakulembeze b’ekkanisa balemereddwa okuta abantu baabwe, bangi kyebavudde beeyawula ne ‘bakola ebyabwe’ nga tebalina buyambi bunene okuva mu kkanisa era nga n’amafuta ku mulimu gwabwe matono. Nkoze n’abavubuka bangi abaalina omugugu ogw’ebibuulizi (missions) era abaalaga okuyitibwa n’ebirabo ebyeyoleka eby’omulimu ogwo, naye abaalwana n’ebizibu eby’ensimbi era nga tebalina buyambi bwa kusabirwa, oba nga butono, okuva mu kkanisa yaabwe ey’ewaabwe, kubanga ekkanisa yalina pulogulaamu y’ebibuulizi ewedde okuteekebwawo - oba nga tewali n’akatono - era omuntu w’ekkanisa oyo nga tatuukana na nteekateeka zaabwe.

Era ndabye bangi abataalina kutebwa mu mulimu gwa bibuulizi n’akatono naye abajja n’omwoyo ogw’obujeemu. Kino kitutwala mu kitundu kyonna eky’obuyinza, obuvunaanyizibwa n’okuvunaanibwa munda mu kkanisa.

Nfunye ebiseera bingi eby’ennaku nga mpabula abo abalumiziddwa okukozesa obuyinza mu ngeri enkyamu mu bukulembeze bw’ekkanisa oba obw’ebibiina ebikolera awamu n’ekkanisa. Okuba omusumba oba omukadde mu kkanisa tekikuwa buyinza kulagira balala nga bw’oyagala - okuyitibwa kwaffe kwa muddu, era muddu ki akozesa obuyinza obw’obukambwe? Obuyinza tebuli mu kifo, wabula mu kirabo ky’obuweereza ekifukiddwako amafuta.

Yesu yajja mu bantu ng’omuddu omuwombeefu, naye bwe yayogera, abantu baagamba nti yayigiriza nga nannyini buyinza. Omukulu w’ekitongole Omuruumi ye yali omusajja asinga amaanyi mu kitundu kye, naye omwana we bwe yalwala, yajja eri Yesu n’amusaba akozese obuyinza obwo awonye omwana we. Yesu yali muyigiriza muwombeefu atambulatambula, eyeetooloozanga abagobeddwa mu bantu, era nga tafunanga buyinza bwonna okuva mu Lukiiko Olukulu (Sanhedrin) wadde okuva eri Kabona Asinga Obukulu.

Kyokka omukulu w’ekitongole yalina okutegeera okulaba obuyinza bwe. Abantu bajja kugoberera n’essanyu omusumba gwe balabamu amafuta ag’omutima gw’omusumba, naye tebajja kukkiriza mangu musajja kubafuga alina ekitiibwa ky’erinnya naye nga talaga kirabo kya ngeri eyo. Bajja kuba beetegefu okuyiga okuva eri omuyigiriza afukiddwako amafuta, naye bajja kugaana obuyinza bw’oyo atasobola kubatwala mu mazima amawanvu ag’Ekigambo, newankubadde alina ekitiibwa ky’erinnya ly’omukadde.

Newankubadde nze nnali musumba, nnasanyuka okutuula wansi w’obuweereza bwa Jim (Essuula 6) nga bw’atutwala mu kusaba okw’amakulu n’okwegayiririra abalala, kubanga ye yali alina amafuta n’obuyinza mu kitundu ekyo. Kyokka naye yalaga okutegeera obuyinza bwange ng’omuntu Katonda gwe yayita okuba omusumba we, era emirundi mingi yambuuzanga ku bintu bye yali ayigiriza. Byali bituufu mu Byawandiikibwa era nga bizimba ekkanisa? Yali amanyi nti obuvunaanyizibwa bwange kwe kukuuma obulamu bw’omwoyo obw’ekibiina kyaffe, kyeyava yeegendereza obutaleeta nsonga za kwesittala.

Nnamuwa ekigero ky’obuyinza, naye yeeteeka wansi wange okuvunaanibwa. Obuyinza tebusaanira kukozesebwa muntu atali wansi wa buyinza naye.

Nga sinnafuuka musumba, nnaweereza nga mukadde mu kkanisa emu e Toronto. Lumu, nga tetulina musumba, abakyala babiri bajja mu kkanisa nga banoonya okuwabulwa ku muntu waabwe gwe baalowooza nti aliko dayimooni. Kino ssaali nkimanyi nnyo, naye twalina omusajja mu kibiina eyali mugezi nnyo mu kitundu kino. Ron mu kiseera ekyo yali ayita mu kugattululwa okw’ennaku, nga tasobola kuweereza nga omu ku bakadde baffe, wadde nga, awatali kubuusabuusa, yali amanyi bulungi Ebyawandiikibwa era nga ‘amanyi okuyigiriza’. Nnamusaba ayogere n’abakyala bombi mu kimu ku bisenge byaffe eby’okuyigirizaamu, nga nze ntudde awo mpuliriza.

Nnali nkimanyi bulungi nti buli Ron kye yandibagambye, kyanditegeereddwa ng’okuwabula kw’ekkanisa yaffe. Ron yali ayigiriza n’obuyinza bw’obukadde bwange, era nze, so si ye, nze nnandivunaaniddwa abakadde abalala olwa buli ekyayogerwa. Yali ateebwa okukola obuweereza bwe nnali sisobola kukola.

Nnamuwa ekigero ky’obuyinza, naye obuvunaanyizibwa bwasigala nga bwange. Emirundi mingi tuwa omuntu obuvunaanyizibwa bw’obuweereza munda mu kkanisa, naye ne tutamuwa buyinza bwa kutuukiriza buweereza obwo. Toyinza kusigira muntu mulala buvunaanyizibwa; busigala nga bwo bulijjo. Obuyinza bwokka bwe busobola okusigirwa, era ekyo kitegeeza okuwa eddembe ery’okukola ensobi. Kya lwatu, waliwo emitendera mingi egy’obuyinza, okusinziira ku kukula kw’omuyigirizwa, empungu yaffe eyiga okubuuka, era omukulembeze omuweereza ow’amagezi ajja kulabirira abo b’ata mu buweereza ng’abawa ekigero ky’obuyinza ekituufu awamu n’okuvunaanibwa okusaanira.

Ebigambo bino ebisatu, obuyinza, okuvunaanibwa, n’obuvunaanyizibwa tebiyinza kwawukanyizibwa. Tosaanira kuba na kimu nga tolina birala. (Laba Ekyongerezeddwako 1 okumanya ebisingawo ku Buyinza, n’ebirala.)

Nzikiriza nti buli lukuŋŋaana lw’abakadde b’ekkanisa lusaanidde okubaamu ensonga zino ebbiri. Okusaba, okunoonya Katonda ky’alowooza, n’ekiseera eky’okubuuza nti ‘ani mu kibiina kyaffe eyeetegefu okutebwa mu buweereza bwe?’ Abantu basaanidde okukubirizibwa okwogera emigugu egiri ku mitima gyabwe, era abakulembeze basaanidde okuba nga batunula bulijjo okulaba oba waliwo obukakafu bw’ebirabo ebituukana n’omugugu ogwo. Si buli alina omugugu asaanidde okutebwa amangu ago - waliwo obwetaavu bw’okukula mu bukulu, mu kibala ky’Omwoyo.

Kyokka Katonda akyali mwetegefu okutwala ebinafu n’ebisirusiru eby’ensi eno, akwase abagezi n’ab’amaanyi ensonyi. Emirundi mingi aba mwetegefu nnyo okukozesa ekibya ekinafu okusinga ffe abasumba bwe tuba abeetegefu okubata.

Nnali ntambula ebweru n’omusumba omuto eyali alaga okwagala kungi okuyigiriza kuno. Nnamubuuza nti, “Ani gw’olina mu kkanisa yo alina omugugu ogw’amazima okuva eri Mukama?” “Ekyo kyangu,” n’agamba, “Peter alina, naye tetusobola kumuyamba kubanga alina obuweereza obw’oku nguudo mu makkati g’ekibuga kyaffe, ate ekkanisa yaffe eri ku bukubo bw’ekibuga.”

“Kirabika Katonda yakola ensobi” bwe nnagamba, “Kubanga yatuma Peter mu kkanisa yo so si mu kkanisa ey’omu makkati g’ekibuga! Lwaki tobuuza Peter ekkanisa yo bw’esobola okumuyamba okusitula omugugu gwe?”

Peter yali yajja eri Mukama emyaka ebiri gyokka emabega, ng’abeera ng’omuntu eyava mu bantu era omujeemu. Yali yeeyawula ng’ow’enjawulo mu kkanisa eno ey’oku bukubo bw’ekibuga, kubanga yamwa omutwe gwe era ng’ayambala empeta y’oku kutu. Kyokka tewali yandiwakanyizza nti okwagala kwe eri Mukama kwali kwa mazima, era yali akula buli lunaku mu kutambula kwe okw’Obukristaayo. Yali ayagala okuddayo mu bifo bye eby’edda okugabana amawulire ge amalungi ne banne ab’edda ab’oku nguudo.

Omusumba n’agenda okulaba Peter n’amusaba annyonnyole omugugu gwe nate era amugambe ekkanisa gy’eyinza okumuyambira. “Musumba, kye nneetaaga ddala vvaani enkadde. Kirabika buli muntu bw’ayimirira okwogera nange, tukyusibwa omuntu omulala. Kyandibadde kirungi singa nsobola okubatwala mu kifo eky’ekyama, nga vvaani, mwe nnyinza okutereka obutabo n’akaawa ennungi.” Kino kyatwalibwa eri abakadde, vvaani enkadde n’egulibwa n’eddaabirizibwa, ow’oluganda omulala mu kkanisa ne yeewaayo okukola ku kaawa mu kitundu kya vvaani eky’omu maaso ekyawuliddwamu, era Peter n’afuna obuweereza bwe. Era Mukama n’afuka amafuta ku mulimu ogwo!

Emyaka egyaddirira bwe nnaddayo mu kibuga ekyo, nnalaba vvaani ya Peter emabega w’ekkanisa, ne mbuuza gye nnandimusanze. Nnagambibwa nti yali agenze mu Ssomero lya Bayibuli. Oluvannyuma nate, ku lukyala olulala mu kifo ekyo, nnakyalira Peter ku mulimu gwe – ng’akulembera ekkanisa ey’omu makkati g’ekibuga eweereza mu bantu be yayagala – era be yalina omugugu ogw’obwakatonda.