Ebirabo

Nkijjukira bulungi ekiseera eky’okweraliikirira kye nnayitamu nga nkulembera omulimu gw’abavubuka mu Wales.

Omuwendo gwaffe gwali gweyongedde, era twali tulowooza ku kugula ebbaala (ennyumba etundamu omwenge) eyali eriraanye ekkanisa, tugifuule ekifo ky’abavubuka. Olwokubanga ensimbi z’okugula ezo zaali zirina okuva mu kkanisa, olukiiko lw’ekibiina kyonna lwatuula. Kyali kizzaamu amaanyi okulaba obuwagizi obwava mu buli kitundu ky’ekkanisa. Omu ku bammemba baffe yali atendekebwa okufuuka munnamateeka, kale ebikwata ku mateeka mu kugula ne bikwasibwa ye. Omulala yalina kkampuni entono ezimba, kale obuvunaanyizibwa obw’okukebera obukuumi bw’ekizimbe n’ebyo ebyali byetaaga okuddaabirizibwa ne bufuulibwa obuvunaanyizibwa bwe. Tewali n’omu yabuusabuusa ‘okulondebwa’ okwo - kwatwalibwa ng’okweyoleka.

Ekitundu ekyo eky’olukiiko lw’ekibiina kyaggwa bulungi, kale omusumba n’akozesa akakisa ako okuleeta ensonga endala. Essomero lya Ssande lyali lyetaaga abasomesa. Bwe kyeyoleka nti abeeyama tebandituuse ku muwendo ogwali gwetaagibwa, ne wateesebwa, era ne kikkirizibwa n’essanyu lyonna, nti abaana abatiini basobola okuwuliriza amasomo agakwatiddwa ku kaseti! Nze nnakiwakanya nnyo, kubanga okuva mu bumanyirivu bwange obw’okusomesa nnali mmanyi nti ekitundu kitono nnyo ku ebyo bye tuyiga kye kiyingira mu kutegeera kwaffe ne mu kujjukira kwaffe nga kiyita mu ‘mulyango gw’okutu.’

Ekitundu ekisingako obunene kiyingira nga kiyita mu ‘mulyango gw’eriiso’ ate ekisinga byonna kijja nga kiyita mu kukola n’emikono gyaffe.

Tekyali kimala nti nnali ‘ku ntikko’ y’omulimu gwange ogw’okusomesa, nga bannange baali bannonze okuba ssentebe w’abasomesa, nga ndi ku Lukiiko lw’Abakulira Essomero, nga ndi musomesa avunaanyizibwa ku kibiina ekikulu mu ssomero, era nga ndi ku kakiiko k’abasomesa abalonde abaali bakola enteekateeka y’ensomesa y’eggwanga lyonna ey’essomo lyange, Physics. Tewali yali amanyi bingi ku bikwata ku mateeka mu kugula ebbaala, kale baasanyuka okukikwasa ‘omukugu.’

Tewali yali amanyi bingi ku nzimba y’ennyumba n’okuddaabiriza, kale nakyo baakikwasa omulala. Naye kyalabika nga buli omu mu lukiiko olwo yali alowooza nti amanyi okusomesa, era endowooza yange yali ekyo kyokka - endowooza endala, etaliiko buzito businga bwa ndala yonna. Bwe kiba nti buli omu asobola okusomesa, lwaki waliwo abasomesa abanafu abangi bwe batyo mu bibiina by’amasomero gaffe?

Omusingi gwe gumu gukola ne mu kkanisa. Katonda yateeka mu kkanisa ebirabo, ebitone n’obusobozi eby’enjawulo, era tuba bagezi bwe tubizuula mu bantu baffe. Okugeza, enjawulo yokka ey’amazima wakati w’omukadde w’ekkanisa n’omudiikoni eri nti eyasooka “amanyi okuyigiriza”. Kino si kya kuba ‘wa mwoyo nnyo okusinga’ wadde okuba waggulu mu ddaala, wabula kirabo kya njawulo.

Ekyo tekitegeeza nti omukadde w’ekkanisa alina kuba musomesa wa ssomero lya Ssande, ng’asomesa enteekateeka y’amasomo egerekeddwa, wabula nti buli lw’atuukirira embeera mu kkanisa oba mu bulamu bw’omuntu, kimujjira bujjizi okukyukira Bayibuli okuyigiriza omusingi gwa Bayibuli.

Abamu ku bammemba b’ekkanisa bwe baba n’ebizibu by’ensimbi, omukadde w’ekkanisa ayinza okubasindika mu Byawandiikibwa okubalaga engeri gye tuziyizaamu omulimu gwa Katonda mu bulamu bwaffe buli lwe twekkiriza okubeera mu mabanja. Ayinza n’oluvannyuma okubalaga endowooza ya Bayibuli ku nsimbi, n’alyoka abasindika eri omuntu asingako okumanya ebikwata ku kuwabula mu by’ensimbi. Omuntu oyo owookubiri ayinza bulungi okuba omudiikoni, aweereza mu by’ensimbi z’ekkanisa.

Nga kinakuwaza okulaba ‘abakadde b’ekkanisa’ nga bakolera mu nteekateeka y’ekkanisa ey’amadaala, nga bakulembera ekkanisa naye nga balina obusobozi butono obw’okulaga enkola n’enjigiriza za Bayibuli. Bangi baalondebwa mu kifo ekyo ng’okukuzibwa olw’obuweereza obwesigwa obw’obudiikoni oba olw’obukugu mu bya bizinensi, obumanyirivu mu bya bufuzi, oba olw’obusikiriza bw’omuntu, nga Bayibuli by’eyetaaga tebifiiddwako nnyo.

Gye buvuddeko nnali nkola mu buweereza obunene mu nsi emu eya South America, abakozi bonna gye baalina okwambala obupapula obulaga amannya gaabwe, abagenyi abajja mu ofiisi mwe twakoleramu babategeere mangu. Akange kaali kagamba nti Pasita Gareth Evans. Nnakateeka ku kkooti yange ne nkambala okumala akaseera, okutuusa lwe nnategeera nti n’abalala bangi baali bayitibwa ‘pasita’, newankubadde nga kumpi tewali n’omu ku bo eyali akoze omulimu ogwo. Nnannyonnyolwa nti olwokubanga bonna baali mu buweereza obw’engeri emu oba endala, bonna baali basumba. Nga bwe buli omu mu kkanisa yange mu Wales yalowooza nti asobola okusomesa, kati kyalabika nga buli omu mu ofiisi eyo yalowooza nti asobola okusumba! Nnaggyako akapapula kange mu kasirise ne nkakyusaamu akalala akaali kagamba bugambi nti, Gareth Evans.

Bwe tuyita abantu basumba oba bakadde b’ekkanisa nga Mukama tabalonze kutyo, tunafuya obuyinza bw’ekifo ekyo era tuteeka mu kabi amafuta gaakyo. Tekyewuunyisa nti abantu be bakulembera batera okubulwa ennyama y’Ekigambo kya Katonda, ne bakulira ku mata gaakyo ag’abaana abato.

Mukama “yawa abamu okuba abatume, n’abalala okuba bannabbi, n’abalala okuba ababuulizi b’enjiri, n’abalala okuba abasumba, n’abalala okuba abayigiriza. Ekyo yakikola olw’okutendeka abantu ba Katonda olw’omulimu ogw’obuweereza, okuzimba omubiri gwa Kristo. Ekyo kijja kutwongera okugenda mu maaso, okutuusa ffenna lwe tulibeera n’okukkiriza kumu, n’okumanyira ddala Omwana wa Katonda nga tukulidde ddala mu mwoyo okutuuka ku kigera eky’okubeera nga Kristo bw’ali.” (Abaefeso 4:11-13) Ebirabo bino ebitaano eby’obuweereza kitundu kitono nnyo ku birabo n’ebitone eby’enjawulo Mukama by’atadde mu kkanisa, omubiri gwe. Omutume Pawulo akozesa ekifaananyi ky’omubiri okunnyonnyola enkolagana erina okubeerawo mu bumu bw’abakkiriza bonna. Tuli mubiri gumu, Kristo gw’ali omutwe gwagwo.

(Ekyongerezeddwako: Ntera okubuuzibwa kitundu ki eky’omubiri kye ndi. Nga mmwenya nziramu nti, “Ndi ‘kigere ekisajja’!” Bwe mbuuzibwa okunnyonnyola, njjukiza abampuliriza nti ng’ekigere ekisajja, omusumba atera okukolera mu ‘bifo eby’ekizikiza ebiwunya’ eby’obulamu bw’abantu. Era bulijjo abeera ‘mu kunyigirizibwa’, naye ensonga namba 1 lwaki neetwala okuba ‘ekigere ekisajja’ eri nti njagala okuleeta enkwatagana mu Mubiri gwa Kristo.)

Kya kwetegereza nti ebifo ebisatu Pawulo mw’awandiikira ku mubiri gwa Kristo, bye bifo bye bimu ebisatu mw’aggumiza ebirabo by’Omwoyo Omutukuvu. Bwe tusoma ebyo, kyeyoleka nti ebirabo by’Omwoyo bya kugasa kkanisa, omubiri gwe, so si muntu ssekinnoomu.

Abaefeso 4 ejjuliziddwa waggulu.

ennyiriri 4 - 7 Omubiri gumu… olunyiriri olugatta, olunyiriri 7 “Buli omu ku ffe yaweebwa ekisa ng’okugera kwa Kristo bwe kuli.” ennyiriri 11-13 Ebirabo bitaano eby’okutendeka. Abaruumi 12 ennyiriri 4 - 5 ebitundu ebingi mu mubiri ogumu, era ebitundu ebyo byonna bikola emirimu gya njawulo.

Olunyiriri olugatta, olunyiriri 6 “Tulina ebirabo, ng’ekisa kye tulina bwe kyatuweebwa mu ngeri ey’enjawulo:” ennyiriri 6 - 8 Obunnabbi, obuweereza, okuyigiriza, okugumya banne, okugaba, okufuga, okulaga ekisa. 1 Abakkolinso 12 ennyiriri 12 – 27 ffenna twabatizibwa mu Mwoyo omu, ne tufuuka omubiri gumu ... omubiri tegulina kitundu kimu, naye gulina ebitundu bingi..... Okutu tekusobola kugamba liiso nti ‘Ggwe sikwetaaga’.... Naye kaakano Katonda yakola ebitundu bingi eby’enjawulo n’alyoka abifuula omubiri gwaffe nga bwe yayagala. Ennyiriri ezigatta, ennyiriri 4 – 7 “Waliwo ebirabo bya ngeri nnyingi .... engeri nnyingi ez’okuweererezaamu.... Okukola kwa ngeri nnyingi.... Mwoyo Mutukuvu yeeragira mu buli omu olw’okugasa bonna.”

ennyiriri 8 – 11 ekigambo eky’amagezi, ekigambo eky’okutegeera, (ekirabo eky’) okukkiriza, ebirabo eby’okuwonyanga abalwadde, okukolanga ebyamagero, okwogera eby’obunnabbi, okwawulanga emyoyo, okwogera ennimi ezitali zimu, okuvvuunula ennimi.

ennyiriri 28 – 30 abatume, bannabbi, abayigiriza (era ne mu Abaefeso 4) abakola eby’amagero, abalina ebirabo eby’okuwonya endwadde, aboogezi b’ennimi (era n’emabegako mu ssuula eno), okuyamba abali mu kwetaaga, abakulembeze, (era ne mu Abaruumi 12 - obuweereza, okufuga) Si kikulu ebirabo bwe biba bimeka, oba okusobola okunnyonnyola kaati buli kirabo kye kitegeeza. Ekikulu kwe kutegeera nti Obusatu Obutukuvu bwe bwateekawo ebirabo bino, so si muntu. (1 Abakkolinso 12:28 - “Katonda yabateekawo.” 1 Abakkolinso 12:11 - “Omwoyo y’agabira..” Abaefeso 4:11 - “Oyo eyalinnya.. yawa.”)

Mukama awa abantu be ebirabo, ebitone n’obusobozi okubasobozesa okwetikka omugugu gw’abatikkidde. Bifuula ekikoligo ‘kyangu’ n’omugugu ‘teguzitowa.’

Era ayagala okukozesa obusobozi bwaffe n’ebitone byaffe ‘eby’obuzaaliranwa’ era ayinza okubifukako amafuta ge bwe bikozesebwa awamu n’ebirabo eby’Omwoyo.

Katonda bwe yayita Musa okukulembera abantu be okubaggya mu buddu bwabwe mu Misiri, omuweereza we yalaga okutya. “Tebagenda kunzikiriza,” bwe yagamba. “Tebagenda kukkiriza nti ggwe wantumye.” Mu ngeri endala, bandibuusizzabuusizza obuyinza bwe.

Mukama n’agamba nti, “Ekyo kiki ekiri mu ngalo zo?”

“Muggo gwange gwokka ogw’obusumba.” “Kino kyokka kye nnina kubanga mmaze emyaka amakumi ana nga ndunda endiga.”

“Ddala,” Mukama ayinza okuba nga yaddamu. “Ogwo ke kabonero k’obuyinza bwo ng’omusumba. Omusumba gwe mbadde ntendeka era nga mbumba okumala emyaka amakumi ana egiyise, olyoke obeere ekyuma ekifukiddwako amafuta mwe nnaayita okukulembera endiga akakadde kamu ez’amagulu abiri ezikaaba, okumala emyaka amakumi ana egijja!”

“Dawudi, olina ki mu nsawo yo?”

“Nvuumuulo yokka ey’okugoba eddubu n’empologoma” omulenzi omusumba bwe yaddamu.

“Kirungi! Eyo ejja kumala okuwangula essajja eddene lino, Goliyaasi, kubanga mbadde nkutendekera olunaku luno!”

“Nnamwandu, olina ki mu nnyumba?”

“Tufuta otutono twokka.”

“Kuŋŋaanya ensuwa n’ebibya byonna by’osobola okufuna. Tugenda kuwa baliraanwa bo bonna omukisa!”

“Peetero, olina ki mu lyato lyo?”

“Katimba kange kokka ak’obuvubi.”

“Kasuule ku luuyi olulala olw’eryato ojja kukwasa ebyennyanja bingi nnyo.”

“Pawulo, ekiwandiiko ekyo kiki ky’okuuma ennyo bw’otyo?”

“Ye satifikeeti yange ey’obutuuze bw’e Ruumi.”

“Ekyo okyetaaga kubanga nkutwala e Ruumi obeere omujulirwa wange mu kibuga ekikulu eky’ensi eno.”

Nnali njigiriza ebintu bino abasajja nga amakumi ataano mu lukungaana lwa wiikendi. Mu kitundu kino eky’okuyigiriza omu ku baaliwo n’ayimirira n’asaba okubuulira olugero. “Sirowoozangako nti nnina ekirabo kyonna kye nnyinza okuwa Mukama,” bwe yatandika. “Okutuusa lumu mu kkanisa lwe nnalaba nti omuwala omuvubuka eyateranga okutuula mu maaso gange, teyaliiwo mu kusinza. Wiiki eyaddirira nnafuna akakisa okwogera naye, ne mmugamba nti twali tumusubiddwa. N’antegeeza nti yali tasobodde kujja mu kusinza, kubanga emmotoka ye yali yeetaaga bureeki empya era nga tasobola kusasulira kuzikola.

Mukwano gwe ye yali amuleese ku lunaku olwo, era emmotoka yali ekyali tekozeseka. Wiiki eyo nnatwala emmotoka ye eri mukwano gwange eyalina ggalaagi ne mmusaba akyuse bureeki ezo ng’ekisa gy’endi, nange mmusasule. Yakkiriza naye n’akakasa nti naye yandibadde ekitundu ku kuwa omuwala oyo omukisa, ng’ansasuza ebbeeyi y’ebyuma byokka. Bwe twalaba akamwenyumwenyu ku maaso ge emmotoka bwe yamuzzibwa, ffembi twafuna omukisa mungi. Twali tetumanyi Mukama kye yali ateekateeka.

Nnatandika okwetegereza mu kkanisa abalala be nnandiyambye mu ngeri eyo, naddala abavubuka abaalina obumanyirivu butono mu kukuuma emmotoka zaabwe nga zikola bulungi, ekintu kye nnali mmanyi bulungi okukola. Buli wiikendi nze ne mukwano gwange twakolanga awamu ku mmotoka enkadde ey’omuntu omulala, okutuusa lumu lwe nnayitibwa mu maaso g’omusumba omukulu.

‘Sisanyufu nti mmwe mwembi muwa abavubuka baffe omukisa bwe muti!’ bwe yagamba. Nneewuunya okutuusa lwe yayongerako nti, ‘Buli omu aboogerako, era abantu abapya bangi bajja mu kkanisa kubanga bawulidde okuva mu bavubuka bano, ekkanisa eno nga bw’ebafaako ennyo. Naye temutukkiriza kugabana nammwe mukisa guno! Njagala mweyongere okunoonya ebyetaago, mufune n’abalala okubayamba, era ebisale mubisasuze ekkanisa!’ Naffe tuweereddwa omukisa nga bwe tulabye abasajja baffe bangi nga bateereddwa mu buweereza obw’okuyamba abali mu kwetaaga!”

Nga musumba mugezi! Tekyewuunyisa nti ekkanisa eyo ekula mu muwendo ne mu kukwata ku kitundu ekyo!

Ow’oluganda oyo yawaayo obusobozi bwe n’ensimbi ze (ebirabo eby’obulijjo) naye Mukama yali amuwadde ekirabo eky’Omwoyo ekya ‘okuyamba abali mu kwetaaga’ okubyongerako. Bwe yaweereza mu mugugu gwe, amafuta gaamukkako ye n’ekkanisa.

“Pawulo, lwaki otambula era n’owandiika bwe muti?”

“Kubanga Mukama ampadde ekirabo eky’obutume eri Abaamawanga.”

“Firipo, lwaki wagenda mu ddungu okwogera n’omulaawe oli Omwesiyopya?”

“Kubanga Omwoyo wa Mukama yankulembera n’aŋŋamba eky’okwogera.”

“Okuva kati onoomanyibwa nga Firipo Omubuulizi w’Enjiri.”

“Timoseewo, ekyama ky’obuweereza bwo kye kiruwa?”

“Kye kirabo eky’okukkiriza kye nnafuna nga (Pawulo) ansseeko emikono.”

“Kale kiseese nate kubanga Mwoyo gwe waweebwa takufuula muti, wabula akuwa amaanyi, n’okwagala era n’okwegendereza.” (2 Timoseewo 1:6, 7) “Mwana wange, olina ki mu mwoyo gwo?”

“Nnina ‘tufuta twange’ - okubeerawo kw’Omwoyo wo Omutukuvu” (Mu Byawandiikibwa byonna, amafuta bulijjo googera ku Mwoyo Omutukuvu).

“Azze okukuwa ebirabo bye njagala obeere nabyo osobole okwetikka omugugu gwange, okusumulula abasibe, okuwangula amasajja amanene, okuwa baliraanwa bo omukisa, okubeera omuvubi w’abantu era n’okubeera omujulirwa wange mu Yerusaalemi yo, mu Samaliya ne mu Buyudaaya era okutuukira ddala ku nkomerero z’ensi.”

Ekirabo kyo

Kale, birabo ki Mukama by’akuwadde by’asobola okukozesa mu Bwakabaka bwe?

Buuza abakkiriza abalala abakuze oba balaba obujulizi bw’ekirabo kyonna eky’Omwoyo mu ggwe. Ggwe olina okunnyonnyola omugugu gwo, naye abalala be balina okunnyonnyola ekirabo kyo. Waliwo ebirabo, ebitone oba obusobozi eby’obuzaaliranwa Mukama by’asobola okukozesa bw’obimuwaayo. Ayinza ddala okubifukako amafuta ag’enjawulo naye tewali kimuwaliriza kukikola. Naye bulijjo afuka amafuta ge ku musajja oba omukazi omuwombeefu aweereza mu mugugu gwe, ng’akozesa ebirabo eby’Omwoyo by’awadde olw’ekigendererwa ekyo.

Luno lukalala lw’ebirabo ebirala ebimu: Eby’Omwoyo (tufuta twange): obudiikoni; obukkakkamu; obulungi; okufuga; okuyamba abali mu kwetaaga; essuubi; essanyu; okwagala; obuwombeefu oba okuyigirizika; okulaga ekisa; emirembe; okwefuga oba okwegendereza; ....

Eby’obulijjo (omuggo oguli mu ngalo zange): okuba omuwuzi w’ennyonyi oba omulunnyanja; obusobozi oba ekifo mu bya bizinensi; okufumba n’okugabula; kompyuta n’empuliziganya; okuvuga emmotoka n’ennyonyi; ebyenjigiriza; obumanyirivu; ensimbi; okusembeza abagenyi; ennimi; obufumbo obulungi; obujjanjabi; emirimu gya ofiisi; sayansi; okumanya okulala okw’enjawulo; emizannyo; okusomesa; entambula n’ebitabo; ....

.... Wandiika ebibyo.