Okutuuka ku Kigendererwa Kyo

Osobola okubuuka ng’empungu! Ekyo kye kigendererwa Katonda kye yakuteekerateekera, naye ojja kumanya essanyu lyakyo lwokka ng’ogoberera enteekateeka ze, ng’okikola mu ngeri ye, nga bwe kinnyonnyolwa obulungi mu Byawandiikibwa.

Tujja kwetegereza emitendera mukaaga egy’okutuuka ku kigendererwa kyo mu Kristo, era tujja kukozesa olugero oluli mu 2 Bassekabaka 4:1-7 ng’ekitulambika.

Mukazi w’omu ku bannabbi n’ajja eri Erisa n’amugamba nti, “Omuddu wo, baze yafa. Yatyanga Mukama, naye yatulekera amabanja mangi ge sisobola kusasula, era kaakano eyali amubanja azze, ng’ayagala okutwala batabani bange okubafuula abaddu be.” Erisa n’amugamba nti, “Oyagala nkuyambe ntya? Ntegeeza, olina ki mu nnyumba?” “Tewali,” n’addamu, “okuggyako otufuta otutono ennyo mu kacupa.” Awo n’amugamba nti, “Genda mu baliraanwa bo bonna obeeyazikeko ebintu ebyereere, nga bingi ddala. Ebya buli ngeri na buli bunene, kyokka nga byereere, nga bingi nga bwe kisoboka. Olyoke oyingire mu nnyumba yo weggaliremu, ottululire amafuta okuva mu kacupa ko akatono mu bintu ebyo byonna eby’abaliraanwa bo, ng’ekijjula ky’ossa wa bbali.”

N’agenda n’akola nga bwe yamugamba, ng’attulula amafuta mu buli kintu okutuusa nga kijjudde. Ku nkomerero, tewaali bintu birala bya kujjuza, awo amafuta ne gakoma. N’ajja n’ategeeza nnabbi Erisa ekyabaddewo. “Genda otunde amafuta ago,” n’amugamba, “osasule amabanja go, ebinaafikkawo bikuliisenga ggwe ne batabani bo obulamu bwammwe bwonna.”

Embeera yali ya kabi nnyo eri nnamwandu ono. Teyalaba kkubo lya kuvaamu mu kizibu kye, kubanga embeera zaali zimuzitoowerera. Kye yalaba kyokka kyali kizikiza ekitaliimu ssuubi. Kyalabika nga tewali kkubo lya kuva mu kiwonvu kye. Yali yeetaaga OKWOLESEBWA okuggya Abasajja babiri mu kasenge k’ekkomera, nga batunuulira mu byuma Omu yalaba kizikiza kyokka, omulala n’alaba emmunyeenye!

Abasajja bombi baalina ekifaananyi kye kimu mu maaso gaabwe, naye okwolesebwa kwabwe kwali kwa njawulo! Embeera zaabwe zaali zimu, naye endowooza zaabwe zaali za njawulo.

Omutima gwa nnamwandu gwali guzitowa, ng’anaatera okufiirwa batabani be bombi eri abaali bamubanja. Yali asitudde omugugu ogwamuzitoowerera. Yali yeetaaga OMUGUGU ogw’enjawulo Omulenzi yalabibwa ng’alinnya olusozi ng’asitudde omulenzi munne omulema ku mugongo gwe.

Omuyise n’agamba nti, “Ng’ositudde omugugu omuzito!” Omulenzi n’addamu nti, “Ogwo si mugugu! Oyo muganda wange!”

Yesu ayagala tusitule omugugu - omugugu gwe ogutazitowa. Omugugu gw’ositula gujja kuzitowa lwokka nga si gwe yakuteekerateekera (era naawe gwe wategekerwa!)

Nnabbi yalabika ng’atafaayo ku mbeera ye bwe yamubuuza ky’alina mu mikono gye. “Otufuta otutono ennyo mu kacupa kwokka!” Teyategeera nti akacupa ako akatono kaalimu byonna ebyali byetaagisa okumalawo obwetaavu bwe obunene. Kiki ekiri mu ngalo zo - EKIRABO kyo?

“Ekyo kiki ekiri mu ngalo zo, Musa?” Katonda bwe yabuuza. “Muggo gwa musumba gwokka,” omuweereza we bwe yaddamu. “Ekyo kimala,” Katonda bwe yagamba, “kubanga njagala oggyeyo ekisibo ky’endiga zange mu buddu bwazo mu Misiri” Katonda bulijjo ateeka mu mikono gyaffe obusobozi n’ebirabo bye twetaaga okusitula omugugu gwe.

Nnabbi n’alyoka awa nnamwandu omulimu ogw’okukola - obuweereza eri baliraanwa be bonna. Kyalabika ng’ekintu eky’obusirusiru. Lwaki okuyingiza ensuwa n’ensaka nnyingi bwe zityo, ne bipipa, ne bensani? Kye yalina kyokka kaali kacupa k’amafuta akatono, - naye yakola kye yasabibwa okukola. Buli omu ku ffe yeetaaga OBUWEEREZA.

“Yesu bwe yamanya nti Kitaawe yateeka byonna mu mikono gye, era nga yava wa Katonda ate gy’adda, n’asituka ku mmere, .... n’atandika okunaaza abayigirizwa be ebigere.”

Yesu yagamba nti teyajja kuweerezebwa wabula okuweereza - era asuubira kye kimu okuva mu bayigirizwa be. Nnamwandu bwe yali attulula amafuta, ekintu eky’ekitalo ne kibaawo! Oyinza okuteebereza endabika y’amaaso gaabwe ng’ensuwa n’ensaka zijjuzibwa ne zibooga okuva mu kacupa k’amafuta akatono? Katonda yali awadde obuwulize bwe omukisa n’AMAFUTA ge!

“Mukama, ffe tulinawo emigaati etaano gyokka n’ebyennyanja bibiri!” “Mubigabule ekibiina,” Omuyigiriza bwe yagamba. Bonna ne balya ne bakkuta - obutundutundu obwafikkawo ne babukuŋŋaanya wamu ne bujjuza ebisero kkumi na bibiri!

Nnamwandu ne batabani be bombi baatunda amafuta gonna eri baliraanwa baabwe. Waaliwo ssente ezimala okusasula amabanja gonna, era n’ebyafikkawo ne bibaliisa bulungi obulamu bwabwe bwonna. Baaweebwa omukisa, baliraanwa baabwe baaweebwa omukisa, era Katonda n’aweebwa ekitiibwa.

Baali bayize okubeera mu KIGENDERERWA kyabwe ekituufu - eddembe n’emikisa gya Katonda - nga babuuka ng’empungu. Omutume Pawulo yawandiikira abakkiriza ab’e Firipi nti: “Nkakasiza ddala nti oyo eyatandika omulimu omulungi mu mmwe, aligutuukiriza okutuusa ku lunaku lwa Kristo Yesu.”

Kale tulambika EMITENDERA OMUKAAGA: OKWOLESEBWA OMUGUGU EKIRABO OBUWEEREZA AMAFUTA OKUBUUKA!

Tujja kubyetegereza mu bujjuvu mu ssuula ezijja.