Amaanyi g’Okusabira Awamu

‘Era ddala ddala mbagamba nti bwe munaabanga babiri mu nsi ne mukkiriziganya ku ekyo kye mwagala okusaba, Kitange ali mu ggulu alikibakolera. Kubanga abantu ababiri oba abasatu bwe banaakuŋŋaananga mu linnya lyange, nange nnaabeeranga awo wakati waabwe.—Matayo 18:19-20.

ERIMU ku masomo agasooka Mukama waffe ge yatuyigiriza mu ssomero lye ery’okusaba lyali: Obutasaba kulabibwa bantu. Yingira mu kisenge kyo eky’omunda; beera wekka ne Kitaffe. Bw’amala okutuyigiriza bw’atyo nti amakulu g’okusaba kwe kukwatagana kw’omuntu kinnoomu ne Katonda, ajja n’essomo ery’okubiri: Teweetaaga kusaba kwa kyama okw’omuntu ali yekka kwokka, wabula n’okusaba okw’awamu mu lujjudde. Era atuwa ekisuubizo eky’enjawulo ennyo olw’okusaba okw’awamu okw’abantu ababiri oba abasatu abakkiriziganya ku kye basaba. Ng’omuti bwe gulina emirandira gyagwo egikwekeddwa mu ttaka n’enduli yaagwo ng’ekula ng’eraga waggulu mu musana, bwe kityo n’okusaba, okusobola okukula mu bujjuvu, kwetaaga byombi mu kigero kye kimu: ekyama ekikwekeddwa emmeeme mw’esisinkanira ne Katonda yekka, n’okussa ekimu mu lujjudde n’abo abafuna mu linnya lya Yesu ekifo kyabwe eky’awamu eky’okukuŋŋaanirangamu.

Ensonga lwaki kino kiteekwa okuba bwe kityo etegeerekeka bulungi. Omukago ogugatta omuntu ne bantu banne nagwo gwa ddala era gunywevu nga ogwo ogumugatta ne Katonda: ali omu nabo. Ekisa tekizza buggya nkolagana yaffe ne Katonda yokka, wabula n’ey’abantu nayo. Tetuyiga kugamba nti ‘Kitange,’ kyokka, wabula n’okugamba nti ‘Kitaffe.’ Tewali kyandibadde kikyamu okusinga abaana b’amaka okusisinkananga kitaabwe kinnoomu bulijjo, naye nga tebamulaga wamu bye beegomba oba okwagala kwabwe. Abakkiriza si bammemba ba maka gamu gokka, wabula era bitundu bya mubiri gumu. Nga buli kitundu ky’omubiri bwe kyesigama ku kinnaakyo, era n’omwoyo obeera mu mubiri okukola mu bujjuvu bwe kwesigama ku bumu n’okukolera awamu kw’ebitundu byonna, bwe kityo n’Abakristaayo tebasobola kutuuka ku mukisa omujjuvu Katonda gw’ayagala okubawa ng’ayita mu Mwoyo we, okuggyako nga bagunoonya era nga bagufunira wamu mu kussa ekimu. Mu bumu n’okussa ekimu kw’abakkiriza Omwoyo mw’asobola okulaga amaanyi ge mu bujjuvu. Abantu kikumi mu abiri abaali babeera wamu mu kifo kimu, nga basaba n’omutima gumu, be Omwoyo yajjira okuva ku ntebe ya Mukama eyagulumizibwa.

Obubonero bw’okusaba okw’awamu okwa nnamaddala butuweebwa mu bigambo bino ebya Mukama waffe. Akabonero akasooka kwe kukkiriziganya ku kintu ekisabibwa. Tekimala kukkiriza mu ngeri ya bulijjo kwegatta ku kyonna omulala ky’ayinza okusaba: wateekwa okubaawo ekintu ekimu eky’enjawulo, ekyetaago ekitegeerekeka bulungi kye mwegomba mwenna awamu; okukkiriziganya okwo kuteekwa okuba, ng’okusaba kwonna, mu mwoyo ne mu mazima. Mu kukkiriziganya ng’okwo kijja kututegeerekera bulungi ddala kye tusaba, oba nga tuyinza okukisaba n’obuvumu nga kituukana n’okwagala kwa Katonda, era oba nga tuli beetegefu okukkiriza nti kye tusabye tukifunye.

Akabonero ak’okubiri kwe kukuŋŋaanira mu Linnya lya Yesu. Oluvannyuma tujja kuyiga bingi nnyo ku bwetaavu n’amaanyi g’Erinnya lya Yesu mu kusaba; wano Mukama waffe atuyigiriza nti Erinnya eryo liteekwa okuba ekifo eky’omu makkati abakkiriza mwe bakuŋŋaanira, omukago ogubagatta ne bafuuka omu, ng’ennyumba bw’ezingiramu era n’egatta bonna abagirimu. ‘Erinnya lya Mukama kigo ky’amaanyi, omutuukirivu addukira omwo n’afuna emirembe.’ Erinnya eryo kintu kya ddala nnyo eri abo abalitegeera era abalikkiriza, ne kiba nti okukuŋŋaanira mu lyo kwe kubeera naye Yennyini. Okwagala n’obumu bw’abayigirizwa be bimusikiriza Yesu nnyo nnyo: ‘Abantu ababiri oba abasatu bwe banaakuŋŋaananga mu linnya lyange, nange nnaabeeranga awo wakati waabwe.’ Okubeerawo kwa Yesu okulamu, mu kussa ekimu kw’abayigirizwa be abaagalana era abasaba, kwe kuwa okusaba okw’awamu amaanyi gaakwo.

Akabonero ak’okusatu kwe kuddibwamu okutaliimu kubuusabuusa: ‘Kitange ali mu ggulu alikibakolera.’ Olukuŋŋaana lw’okusaba olw’okukuuma enkolagana mu by’eddiini, oba olw’okwezimba ffekka, luyinza okuba n’omugaso gwalwo; naye ekyo si kye Omulokozi yali agenderera bwe yaluteekawo. Yali ayagala lubeere ekkubo ery’okufuna okuddibwamu okw’enjawulo mu kusaba. Olukuŋŋaana lw’okusaba olutaliimu kuddibwamu okulabika lwandibadde kintu kikyamu ekitasaanidde. Bwe wabaawo omu ku ffe alina ebyetaago ebimanyiddwa bulungi, naye ne yeewulira nga munafu nnyo okukozesa okukkiriza okwetaagisa, tusaanidde okunoonya amaanyi mu buyambi bw’abalala. Mu bumu bw’okukkiriza, n’obw’okwagala, n’obw’Omwoyo, amaanyi g’Erinnya n’Okubeerawo kwa Yesu bikola nga tebiriiko kiziyiza, era okuddibwamu kujja mu ngeri ekakafu. Akabonero akalaga nti wabaddewo okusaba okw’awamu okwa nnamaddala kye kibala, kwe kuddibwamu, kwe kufuna ekyo kye twasabye: ‘Mbagamba nti, Kitange ali mu ggulu alikibakolera.’

Nga kino eky’okusabira awamu kya kitiibwa ekitayogerekeka, era nga kyandibadde maanyi ga kitalo! Singa omwami n’omukyala abakkiriza bamanya nti bagattiddwa wamu mu Linnya lya Yesu okulaba okubeerawo kwe n’amaanyi ge mu kusabira awamu (1 Peetero); singa ab’emikwano bakkiriza obuyambi obw’amaanyi ababiri oba abasatu abasabira awamu bwe bayinza okuwaŋŋana; singa mu buli lukuŋŋaana lw’okusaba okukuŋŋaanira mu Linnya, okukkiriza mu Kubeerawo kwe, n’okusuubira okuddibwamu byali bisooka mu maaso; singa mu buli Kkanisa okusaba okw’awamu okw’amaanyi kwatwalibwa ng’ekimu ku bigendererwa ebikulu bye beegattira, era ng’omulimu ogw’oku ntikko ogw’amaanyi gaabwe ng’Ekkanisa; singa mu Kkanisa ey’ensi yonna okujja kw’obwakabaka, okujja kwa Kabaka Yennyini, okusooka mu kufukibwa okw’amaanyi okw’Omwoyo we Omutukuvu, oluvannyuma mu buntu bwe obw’ekitiibwa, ddala kwali nsonga ya kukaabirira Katonda wamu awatali kuwummula;—Ai, ani ayinza okwogera omukisa oguyinza okujjira abo, n’okuyita mu bo, abakkiriziganya batyo okugezesa Katonda mu kutuukiriza ekisuubizo kye.

Mu mutume Pawulo tulaba bulungi nnyo nga okukkiriza kwe mu maanyi g’okusabira awamu bwe kwali okwa nnamaddala. Eri Abaruumi awandiika (15:30): ‘Mbakuutira abooluganda, mu kwagala kw’Omwoyo, okufubiranga awamu nange, nga munsabira eri Katonda.’ Asuubira, ng’okuddibwamu, okuwonyezebwa abalabe be, n’omulimu gwe okukulaakulana. Eri Abakkolinso (2 Abakkolinso 1:11), ‘Katonda anaatulokolanga, nammwe nga mutusabira;’ okusaba kwabwe kulina okuba n’omugabo gwa ddala mu kuwonyezebwa kwe. Eri Abaefeso awandiika: ‘Nga musabiririranga mu ssaala zonna nga mwegayiririranga mu mwoyo buli kiseera, nga mwegayiririranga abatukuvu, era nange munsabirenga mpeebwe eby’okwogera.’ Amaanyi ge n’obuwanguzi mu buweereza bwe abifuula okwesigama ku kusaba kwabwe. Ku Bafiripi (1:19) asuubira nti ebizibu bye birifuuka obulokozi bwe n’okukulaakulana kw’enjiri ‘olw’okunsabira n’olw’amaanyi g’Omwoyo wa Yesu Kristo.; Eri Abakkolosaayi (4:3) ku kiragiro eky’okunyiikiriranga mu kusaba ayongerako: ‘Era nga mwenna awamu mutusabira Katonda atuggulirewo oluggi okubuulira Enjiri.’ Era eri Abasessaloniika (2 Basessaloniika 3:1) awandiika: ‘Abooluganda, eky’enkomerero, mutusabirenga, ekigambo kya Mukama kibune mangu era Mukama agulumizibwenga, tulyoke tununulibwe okuva mu bakozi b’ebibi.’ Kyeyoleka buli wamu nti Pawulo yeetwala ng’ekitundu ky’omubiri, ogw’okusaasira n’okukolera awamu kwagwo kwe yali yeesigamye, era nti yali yeesiga okusaba kw’Ekkanisa zino okumufunira ebyo ebitandibadde bimuweebwa. Eri ye, okusaba kw’Ekkanisa kwali kintu kya ddala mu mulimu gw’obwakabaka, nga amaanyi ga Katonda bwe gali.

Ani ayinza okwogera amaanyi Ekkanisa ge yandisobodde okukulaakulanya n’okukozesa, singa yeewaayo eri omulimu gw’okusaba emisana n’ekiro olw’okujja kw’obwakabaka, olw’amaanyi ga Katonda ku baweereza be n’ekigambo kye, olw’okugulumizibwa kwa Katonda mu kulokolebwa kw’emmeeme? Ekkanisa ezisinga obungi zirowooza nti bammemba baazo bakuŋŋaanyizibwa wamu lwa kulabiriragana n’okuzimbagana kyokka. Tezimanyi nti Katonda afuga ensi ng’ayita mu kusaba kw’abatukuvu be; nti okusaba ge maanyi agawangula Setaani; nti olw’okusaba Ekkanisa ku nsi efuna obuyinza ku maanyi ag’ensi ey’omu ggulu. Tezijjukira nti Yesu, olw’ekisuubizo kye, yatukuza buli lukuŋŋaana mu Linnya lye okubeera omulyango gw’eggulu, Okubeerawo kwe gye kuwulirirwa, n’Amaanyi ge gye gamanyirwa nga Kitaffe atuukiriza bye beegomba.

Tetuyinza kumala kwebaza Katonda olwa wiiki ey’omukisa ey’okusabira awamu, Obukristaayo mu biseera byaffe bw’eggulawo nayo buli mwaka. Ng’obukakafu bw’obumu bwaffe n’okukkiriza kwaffe mu maanyi g’okusabira awamu, ng’essomero ery’okugaziya emitima gyaffe gisobole okuzingiramu ebyetaago byonna eby’Ekkanisa ey’ensi yonna, era ng’obuyambi eri okusabira awamu n’obugumiikiriza, ya mugaso ogutayogerekeka. Naye okusinga ennyo ng’ekikubiriza okwongera okwegatta mu kusaba mu bibinja ebitono, omukisa gwayo gubadde munene. Era gujja kweyongera okuba omunene, ng’abantu ba Katonda bategedde kye kitegeeza, bonna okukuŋŋaana nga omu mu Linnya lya Yesu okufuna okubeerawo kwe wakati mu mubiri ogwegasse gwonna mu Mwoyo Omutukuvu, n’okwesigamiza n’obuvumu ku kisuubizo nti Kitaffe alibakolera kye bakkiriziganyizzaako okusaba.

‘MUKAMA, TUYIGIRIZE OKUSABA’

Mukama Omutendereze! ggwe eyasaba ennyo mu kusaba kwo okwa Kabona Asinga Obukulu olw’obumu bw’abantu bo, tuyigirize engeri gy’otuyita era gy’otukubiriza okubeera mu bumu buno olw’ekisuubizo kyo eky’omuwendo ekiweereddwa okusabira awamu. Bwe tuba omu mu kwagala ne mu bye twegomba, okukkiriza kwaffe lwe kufuna okubeerawo kwo n’okuddibwamu kwa Kitaffe.

Ai Kitaffe! tusabira abantu bo, na buli kibinja ekitono eky’abo abakuŋŋaana awamu, babeerenga omu. Tukwegayiridde, ggyawo okwefaako kwonna n’okwenoonyeza ebyaffe, obufunda bw’omutima bwonna n’okwawukana, ebiziyiza obumu obwo. Goba omwoyo gw’ensi n’ogw’omubiri, ebireetera ekisuubizo kyo okufiirwa amaanyi gaakyo gonna. Ai, ekirowoozo eky’okubeerawo kwo n’ekisa kya Kitaffe kitusembeze ffenna kumpi buli omu ku munne.

Okusinga byonna, Mukama Omutendereze, wa Ekkanisa yo ekkirize nti olw’amaanyi g’okusabira awamu esobola okusiba n’okusumulula mu ggulu; nti Setaani asobola okugobebwa; nti emmeeme zisobola okulokolebwa; nti ensozi zisobola okusiguukululwa; nti obwakabaka busobola okwanguyizibwa. Era wa, Mukama omulungi! mu kibinja kye nsabira nakyo, okusaba kw’Ekkanisa kubeerere ddala amaanyi Erinnya lyo n’Ekigambo kyo mwe bigulumizibwa. Amiina.