Obukulu bw’Okusaba

Bw’omala okumanya ekintu nga bwe kiri eky’ekitalo, tewabaawo akuwaliriza kukyegomba!

Emigaso gy’okusaba mingi nnyo gisukkiridde. Ng’omuyizi, okumanya kino kikulu kubanga kijja kukuluŋŋamya ku ky’osuubira. Bw’oyiga engeri y’okusabamu, omwoyo gwo gujja kukoleezebwa okusaba okusinga bulijjo. Ng’osoma ssuula eno by’erimu, leka omutima gwo n’omwoyo gwo bibeere biwombeefu era nga bigguse okuliisa omwoyo gwo. Tunuulira obukulu buno obw’okusaba, era leka omwoyo gwo gusanyuke nnyo!

1. Okusaba kutuyamba okussa ekimu ne Katonda. Nga kirungi okuba obumu ne Katonda, ng’ogatte n’Omutonzi w’ebintu byonna, ng’omanyi ekiri mu birowoozo bye, era ng’omanyi ddala engeri gy’oyinza okutuukirizaamu by’ayagala ku nsi. Kino kya kitalo nnyo!

2. Wali okimanyi nti oluusi abantu tebatuukibwako bibonerezo bya bikolwa byabwe kubanga omuntu oba abantu abamu baasabye Katonda okusaasira omuntu oyo omusobya? Okusaba bwe kutyo bwe kulina amaanyi! Kitaawo, maama wo, ow’eŋŋanda yenna oba mukwano gwo ayinza okuba ng’akoze ekintu ky’olowooza nti ne Katonda tayinza kukisonyiwa; ekintu ekinene ensi yonna ky’eyinza okuvuma, naye ng’oyita mu kusaba, osobola okusaba Katonda okubasaasira, era Katonda awulira bwe tusaba. Katonda asobola okuwonya ab’omu maka go ne mikwano gyo ekibonerezo kye bandibonerezebbwa olw’ebikolwa byabwe. Katonda agulumizibwe! Wano waliwo ekyokulabirako ekirungi ennyo mu Bayibuli, Yesu we yasabira Katonda era abantu ne basonyiyibwa.

“Awo bwe baatuuka mu kifo ekiyitibwa Ekiwanga, ne bamukomerera awo ku musaalaba, awamu n’abamenyi b’amateeka, omu ku ludda lwa Yesu olwa ddyo n’omulala ku ludda olwa kkono. Yesu n’agamba nti, ‘Kitange, basonyiwe, kubanga kye bakola tebakimanyi.’” Lukka 23:33-34.

Kale bw’oba olina omuntu gw’oyagala Katonda okusonyiwa, genda mu maaso omusabire. Katonda asobola okumusaasira n’okuggyawo n’ekibonerezo kye yandibonerezebbwa singa tewasaba.

3. Obukulu obulala obw’okusaba kwe kuba nti kutuyamba okussa amaaso gaffe ku Katonda.

“Mulowoozenga ku ebyo ebiri mu ggulu, so si ebiri ku nsi.” Abakkolosaayi 3:2. Tusobola okulowooza ku ebyo ebiri mu ggulu nga tuyita mu kusaba, kubanga okusaba kutuyamba okussaayo omwoyo, n’okulaba Katonda by’alaba. Omuntu ne Katonda ba mwoyo, noolwekyo mu kusaba ossa omwoyo ku by’omwoyo kubanga oba ossa ekimu ne Katonda, Omwoyo.

4. Bwe tusaba, Omwoyo Omutukuvu naye atuwa ebiragiro n’okutuluŋŋamya. Mu Abaruumi 8:26 tusoma nti, “N’Omwoyo bw’atyo atubeera mu bunafu bwaffe. Tetumanyi kusaba nga bwe kitugwanira, naye Omwoyo yennyini atwegayiririra n’okusinda okutayogerekeka.”

Olwokubanga Omwoyo Omutukuvu amanyi Kitaffe ali mu ggulu by’ayagala, atuyamba okwogera by’ayagala Kitaffe, era mu ekyo tufuna okuluŋŋamizibwa ku ngeri y’okutuukirizaamu oba okukolamu Katonda by’ayagala. Ekyo tekirungi nnyo? Awatali Mwoyo Mutukuvu, tekisoboka kutegeera mu bujjuvu Katonda by’ayagala.

Ebikolwa by’Abatume 13:2 kitulaga engeri abayigirizwa gye baafunamu ekiragiro okuva eri Omwoyo Omutukuvu nga bali mu kussa ekimu naye.

“Awo bwe baali nga basinza Mukama era nga bwe basiiba, Mwoyo Mutukuvu n’agamba nti, ‘Munjawulire Balunabba ne Sawulo olw’omulimu gwe mbayitidde.’”

Eno y’ensonga lwaki buli Mukristaayo asaanidde okussaayo omwoyo eri Omwoyo Omutukuvu n’okumuwuliriza.

Bw’osaba, leka Omwoyo Omutukuvu akuluŋŋamye kubanga amanyi Katonda ky’ayagala era n’ekyo ky’weetaaga.

5. Mu kusaba, tuwangula! Aleruya! Katonda atenderezebwe! Ng’Omukristaayo, kikulu okumanya nti buli ekibaawo mu nsi eno erabika kisooka kubaawo mu by’omwoyo. Bwe tusaba, Katonda atwongera amaanyi. Tulina amaanyi ag’enjawulo agava gy’ali agatuyamba okuwangula n’okusigala nga tuli balamu bulungi. Amaanyi gano gatusobozesa okulinnya ku bintu eby’akabi, okugoba baddayimooni mu linnya lya Yesu, n’okukola ebintu ebirabika ng’ebitasoboka eri abalala.

Olina ekizibu ky’oyolekedde? Saba era okkirize nti ebintu bijja kugenda byeyongera okulongooka buli lunaku. Katonda awuliriza bwe tusaba, era addamu. Alina entegeka ennungi gye tuli, era atuyamba okuwangula n’okusoomoozebwa okusinga obuzibu.

6. Okusaba kutunyweza. Ng’Abakristaayo, tetusaba kukyusa Katonda — Ye takyuka n’akatono.

Era tetusaba kufuna kufaayo kwe kubanga tuli ba muwendo gy’ali dda. Tubeera mu maaso ge bulijjo. Katonda atenderezebwe! Wabula, okusaba kutuyamba okussa amaaso gaffe ku Ye. Kutujjukiza nti tuli mirembe naye, ka kibeere ki. Eyo y’ensonga lwaki kikulu ennyo okusaba ebbanga lyonna, tuleme kulekulira oba okuggwaamu essuubi, wabula tusigale nga tunyweredde ku Katonda. Tunuulira ekyawandiikibwa kino mu Lukka 18:1, “Awo Yesu n’agerera abayigirizwa be olugero ng’agamba nga bwe bagwanidde obutakoowanga kusaba n’obutaggwaamu mwoyo.”

7. Bwe tusaba, tusobola okwogera ebintu ne bibaawo. Obulamu bwo buvunaanyizibwa bwo, era Katonda yakuwa Omwoyo Omutukuvu n’Ekigambo kye osobole okubumba ensi yo. Ky’oli ne by’oyitamu bye bibala bya bigambo byo. N’Ekigambo kya Katonda, osobola okukyusa embeera n’okutonda ebintu ebipya.

Katonda bwe yakukola, yakutonda mu kifaananyi kye, ekitegeeza nti ayagala obeere nga Ye — omutonzi. Olina amaanyi okutonda embeera y’obulamu bwo. Okugeza, osobola okugaana okulwala kubanga oyo gw’olina ekifaananyi kye (Katonda) tayinza kulwala. Osobola okulondawo okuba n’obulamu obulungi ennyo buli lunaku, ka owulire otya.

Abantu abamu bagamba nti obulamu bulina okulinnya n’okukka, naye mbabuuza nti, “Bayibuli ekyo ekyogerera wa?” Si bwe kisaanidde okubeera eri omukkiriza. Bwe namala okuyiga amazima, obulamu bwange bugenze bweyongera waggulu era mu maaso bwereere! Mukama atenderezebwe! Olina obuyinza ku bulamu bwo ne byonna ebibulimu. Kisoboka okuba n’obulamu obw’okuwangula okutasalako, ekiseera ku kiseera, omwaka ku mwaka.

Yogera ebirungi ku bulamu bwo era okozese Katonda ky’akuwadde. Jjukira, Katonda tayagala ggwe kuwandiika Bayibuli mpya; ayagala otegeere Ekigambo kye era okigobererenga. Langirira okukulaakulana n’okugaggawala n’akamwa ko wennyini kubanga ggwe nnabbi w’obulamu bwo! Aleruya!