Empaka

Maliya yali amaze emyezi mitono nga mulwadde endwadde eyitibwa Epstein Barr Syndrome, gy’abantu abasinga gye bayita “Yuppie flu,” oba “endwadde ey’emyaka gy’ekyenda.”

Basawo be baali bagezezzaako eddagala erya buli ngeri okumuzza mu bulamu obulungi nga bwe yali omuwala omuto ow’amaanyi omwaka gumu emabega, naye baali basobeddwa, era n’abasawo bonna nga bwe baali, olw’endwadde eno erumba enteekateeka y’omubiri ey’okwerwanako endwadde, ekireetera oyo gw’erumba okubulwa amaanyi n’okukoowa okutakoma.

Tewaali ddagala limanyiddwa, era obutamanya ensibuko zaayo ne butandika okuleeta okutya mu mikwano mingi egya Maliya. Abamu baagifananya ne Silimu, endwadde endala embi erumba enteekateeka y’omubiri ey’okwerwanako. Yali munyiikivu nnyo mu kkanisa ye, naye kaakano yeewala okugendayo kubanga tewaali n’omu eyali akakasa oba endwadde eno yali ekwatibwa.

Yasoma ebitabo bingi n’alaba ne pulogulaamu za tterevisoni ezikwata ku ndwadde eno, era n’agezaako n’ebimu ku ‘ddagala’ ery’okugezesa lye baamuwabula. Mikwano mitono gy’eyajja okumulaba, wadde ng’abamu baamukubira essimu buli kiseera okulaba nga bw’ali. Baamugamba nti ekkanisa yali emusabira era nti asaanidde okusigala ng’aguma.

Okuva mu buvubuka bwe, Maliya yali mukkiriza mu Mukama Yesu, ng’amaze okuwaayo obulamu bwe gy’ali mu kukuŋŋaana kwa kkanisa. Bwe waayitawo emyaka, okukkiriza kwe n’obwesige bwe ne bikula ng’ayiga Ebyawandiikibwa, ng’asaba, era ng’agenda mu kukuŋŋaana kwa kkanisa n’obwesigwa.

Mu myezi egy’okugezesebwa egy’obulwadde bwe, yali anywereye ku bwesige bwe mu Mukama, ng’akkiriza nti “ebintu byonna bikolagana wamu okuleeta obulungi eri abo abaagala Mukama” (Abaruumi 8:28). Newankubadde nga teyategeera, yali akyamwesiga.

Newankubadde nga teyali wa mu kkanisa yange, kyali mpisa yange okukyalira Maliya emirundi ebiri oba esatu mu mwezi. Twali tufuuse mikwano olw’obuweereza obulala mwe twali twenyigidde, bwe kityo ne kimeeka okumulaba ng’anafuye bw’atyo mu ndwadde eno enkambwe. Bulijjo yabanga musanyufu era ng’eyeebaza nga mmutwala mu bbanka ye oba mu dduuka, ekintu ky’atayinza kwekolera yekka mu mbeera eyo enafuya.

Naye olunaku lumu, bwe natuuka ewuwe, ne mmusanga mu nnaku nnyingi nnyo. Kyamutwala ekiseera kiwanvu okwetereeza okusobola okumbuulira ekyaliwo. Yali afunye essimu okuva ku omu ku ‘mikwano’ gye egy’oku lusegere mu kkanisa, ng’amugamba nti ekibiina eky’okusaba kyali kisazeewo okulekera awo okumusabira okuwona. Ensonga eyaweebwa yali nti, “kya lwatu teyalina kukkiriza, kubanga singa yalina kwo yandiwonye dda.”

Ekyagambibwa kyali nti olwokubanga yali ‘atalina kukkiriza’ tebandikyamubaze nga omu ku ba mu maka gaabwe!

Nga kuno kutategeera kubi nnyo obutonde bw’okukkiriza n’engeri gye kukolamu mu bulamu bwaffe! Bwe nsoma Ebyawandiikibwa, tewali kye ndaba ekikakasa ebikolwa oba enzikiriza y’ekibiina eky’okusaba ekya kkanisa ekyo.

Gye bali, kyeyoleka nti, okukkiriza kyali kintu omuntu ky’ayinza okwekolera olw’okufuba kwe oba obunyiikivu bwe. Singa Maliya yasobodde okwekolera ‘ekintu’ kino ekyekusifu ekiyitibwa okukkiriza mu bungi obumala, Katonda yandiwalirizibbwa okutuukiriza obwetaavu bwe obw’okuwona! Mu butuufu, baali bakkiriza nti okukkiriza kupimibwa mu bungi era nti ekigero ekimala kisanyusa Katonda; noolwekyo, kye yali yeetaaga kwali kwongera bwokka okukkiriza!

Nzikiriza mu kuwonya okuva eri Katonda ng’obumu ku bugagga bwe twaweebwa mu buwanguzi bw’omusaalaba, naye nkizudde nti tewali nkola ya kugoberera okukufuna. Katonda akyali w’obuyinza bwonna mu kuwa okuwona n’obulamu obulungi, era tewali kukkiriza kwenkana wa, saawa z’okusaba mmeka, oba ndobo z’amaziga zenkana wa eziyinza okwenkanankana n’ekisa kye eky’obwakabaka.

Nga kitaawe w’omwana eyaliko dayimooni ng’olugero lwe bwe luwandiikiddwa mu Makko 9, Maliya yakaaba nti “Mukama wange, nzikiriza; yamba obutakkiriza bwange!”

Mu lugero olwo, abayigirizwa baali bakkirizza nti basobola okuwonya omulenzi, naye baali balemereddwa. Yesu yabalaga nti kye baali beetaaga kwali kukkiriza okwa nnamaddala, so si kukkiriza kwa birowoozo bwokka. Omuntu ayinza okugattako nti, “ne baddayimooni bakkiriza!”

Okukkiriza mu Birowoozo Si Kukkiriza. Omusumba Yokaana yali yeeraliikiriddwa! Emyaka ebiri gyokka emabega yali alabye omuwendo gw’abantu abazze mu kkanisa ye entono nga gukula mangu ng’abantu bangi abapya bajja mu kussakkanya. Amaka gamalirivu gaali gakyusiddwa era waaliwo okwogera ku kuzuukuka kw’eddiini. Amangu ago baali basukkidde omuwendo gw’ebikumi bibiri mu bajja buli lwatuukira; ebiweebwayo eby’ensimbi byali byeyongedde okusukka ku 100% okusinga emyaka egyayita, era essanyu lyali lijjudde mu kkanisa buli wiiki. Kyali kyangu okubuulira era bulijjo waabangawo abeewaayo okuvunaanyizibwa obuweereza obungi obwali buvaayo mu buli kitongole kya kkanisa.

“Musumba, twetaaga okuzimba ekkanisa ennene,” bwe baagamba abakadde be.

“Kya lwatu Katonda akola omulimu munene mu kitundu kyaffe.” Tekyali kizibu okusendasenda ekkuŋŋaana okukkiriza kino era amangu ago ne bakola enteekateeka ez’ekkanisa eyandisobodde okusenga abasinza abasukka mu lukumi. Buli eyalaga okutya olw’enteekateeka zino enkulu ennyo yayitibwanga nti ‘talina kukkiriza.’ Mazima ddala, olwokubanga Katonda kya lwatu yali mu kino, kyali kisaanidde okukozesa okukkiriza okusingawo. Bwe kityo, enteekateeka ne zeeyongera okwaza okutuusa lwe baateekateeka ekizimbe ekyandisaasaanyizza obukadde busatu obwa doola!

Ekyo Yokaana kye yali tateekateeseeko kwali kweyongera okunene kw’ebisale by’amabanja g’ennyumba mu kiseera kye kimu ng’ekkampuni enkulu eyali ekozesa abantu bagivuddemu mu kibuga ekitono ekyo, n’ereka bangi nga tebalina mirimu, era abamu ku bo nga baali ba mu kkanisa ya Yokaana.

Amangu ago ebisale by’amagoba ne biba binene nnyo eri ekkuŋŋaana, era ekizibu ne kyeyongera ng’abantu batandika okuva mu kussakkanya olwo mu kifo ky’okubeera mu kkanisa esibiddwa n’omugugu munene ogw’ensimbi ogwali, mu ndowooza yaabwe, nga si gwe baaleeta ku bo bokka.

Kiki ekyali kikyamye? Katonda yali abalemereddwa nga baali bakozesezza okukkiriza okungi bwe kityo? Oba Yokaana – n’abakadde be – baali basobezza okuyita okwekakasa okukkiriza? Mazima ddala, baali bamanyiddeko ddala okukkiriza kye kiri? Gye bali, okukkiriza kwali kwe kwolekera obulabe okutukuziddwa nga waliwo n’ekintu ekitayogerwako nti, singa ebintu tebigenda bulungi, kiba nsobi ya Katonda.

Mu kukemebwa kwe Setaani, okwatuwandiikirwa mu Lukka 4:1-13, Yesu atulaga bulungi enjawulo eri wakati w’okukkiriza n’okwekakasa.

Yesu yalina obwetaavu obw’amazima; yali alumwa enjala oluvannyuma lw’okumala ng’ewiiki mukaaga mu ddungu. Yali atwaliddwa eyo Omwoyo Omutukuvu oluvannyuma lw’okubatizibwa kwe mu Yoludaani.

Newankubadde ng’Ebyawandiikibwa tebyogera, nzikiriza nti eyo we yayogeregera ne Kitaawe ow’omu ggulu ku bintu ebyali biteekwa okumutuukako. Yamanya nti ekikompe kye kyandibadde kikaawu. Era yamanya nti yalina okulonda – okwagala kwe oba okwa Kitaawe. Oluvannyuma lw’ennaku ezo, Setaani amusoomooza n’okukemebwa okw’amazima.

“Oba ng’oli Mwana wa Katonda, lagira ejjinja lino lifuuke omugaati” (Lukka 4:3).

Singa yakikola, enjala ye yandimaze era yandyeragidde nti wa maanyi okusinga omulabe we; mazima ekyo kyandimulaze nti ye Mwana wa Katonda mazima. Yamanya nti yasobola okukikola! Lwaki takituuma n’akikwata (name it and claim it)? Yasobola, naye ekyo kyandibadde si kukkiriza – kyandibadde kwekakasa era kyandivunye okwagala kwa Kitaawe.

Mu kukemebwa okwokusatu, Setaani ne yee ajuliza Ebyawandiikibwa eri Yesu.

“Omanyi nti Katonda tajja kukkiriza kikukole kabi. Ne bw’oyeddusa okuva ku ntikko ya yeekaalu waggulu ennyo, tewali kabi kanaakutuukako. Bamalayika banaakuwanirira. Lowooza abantu bye banaalowooza singa okikola!

Bonna banajja gy’oli okukugoberera, kale toweetaaga kubonaabona na kufiira ku musaalaba” (Lukka 4:9-11).

Yesu yandisobodde okukola ekyamagero, ng’akwata ku bisuubizo by’Ekigambo kya Katonda, naye kyandibadde si kukkiriza; kyandibadde kwekakasa, ate nate nga kivunye okwagala kwa Kitaawe.

Okwekakasa Si Kukkiriza. Nga Setaani, waliwo abakkiriza bangi abajuliza Ebyawandiikibwa ng’omusingi gw’ ‘okukkiriza’ kwabwe. Okugeza, nawulira Yakobo 3:2 nga kiyigirizibwa ku tterevisoni yange mu wiiki eyita eno.

“Ebbaluwa ya Yakobo egamba nti omuntu bw’asobola okufuga olulimi lwe, aba asobola okufuga omubiri gwe gwonna. Noolwekyo, weegendereze oyogere ebintu ebirungi byokka. Bw’okola bw’otyo, tolirwala n’akatono!”

Abayigiriza ng’abo bakakasa endowooza yaabwe n’ebigambo eby’okukkiriza.

“Baibuli kigamba, nkikkiriza, kimaze awo!”

Mmanyi amadiini amanene agasinziza enjigiriza zaago ku butategeera bw’okukkiriza obwo. Beeyita wamu ng’ekibiina eky’amakkanisa “ag’Ekigambo eky’Okukkiriza” (Word of Faith), agakyayibwa nga gayitibwa n’amannya nga “Kituume okikwate!” (Name it, claim it) oba “Kyogere okikwate!” (Blab it, grab it) oba “Kyatule okifune!” (Confess it, possess it). Sitera kulaba tterevisoni ya Bakristaayo naye, bwe nkyusa akaddebe kange ku Ssande makya, buli kiseera nsanga poologulaamu emu mw’obubaka ng’obwo mwe bubuulirwa.

Nteekwa okwatula nti mu bye boogera mulimu okuyigiriza okulungi okungi. Twetaaga okuba abantu abasobola okusimba obulamu bwaffe ku musingi omunywevu ogw’Ekigambo kya Katonda, n’ebisuubizo byakyo ebingi eby’ekitalo n’obugagga bwe tulina mu Kristo; Naye kitugwanidde okwegendereza nnyo okutaputa Ekigambo obulungi, nga tukwata ku bisuubizo ebyo byokka ebitukwatako, era nga tugondera embeera ez’ebisuubizo ng’ebyo we ziba nga zisaanira.

Okwatula nti tewali kintu kiyinza kutwawukanya n’okwagala kwa Katonda okuli mu Kristo Yesu kwe mukisa ogutalina mpaka eri abakkiriza bonna. Naye ebisuubizo eby’Ekisenge eky’Waggulu – emirembe egyo ensi gy’etayinza kuwa oba kuggyawo, n’essanyu erijjuvu – biri ku ndagaano ey’Ekisenge eky’Waggulu. Eyo abayigirizwa gye baalagaanira okugumyagana n’okuwummuzaganya (okunaazaganya ebigere), okugondera etteeka lye, okwagalana, n’okugondera Ekigambo kye.

Nkakasa nti waliwo ensobi endala mu ntegeera yaabwe ey’okukkiriza. Mu butuufu, baali basaanidde okweyita amakkanisa “ag’Ekigambo eky’Essuubi” (Word of Hope), kubanga essuubi lirina kye likolagana n’okukkiriza mu birowoozo okusinga okukkiriza okwennyini! Essuubi lye ligamba nti, “Katonda yakyogera! Nkikkiriza! Ekyo kimmala!”

Twogera katono nnyo ku ssuubi ery’Ekikristaayo kubanga tulitabudde n’essuubi ery’ensi. Buli ensi lw’eyogera ku ssuubi, wabaawo ekiyinzika okubaawo ekibi. “Nsuubira nga tekugwa nkuba nkya.” (Kiyinza okugwa!) “Nsuubira okuyita mu bibuuzo byange!”

(Nnyinza okugwa!) “Nsuubira nga onoosanyuka mu bufumbo bwo.”

(Wayinza okubaawo okugattululwa!) Essuubi ery’Ekikristaayo teririna kutegeeza kubi kwa ngeri eyo. Kwe kusuubira n’obwegombe ekyo ekikakafu! Kale, bwe twatula amazima g’Ekigambo kya Katonda, era bwe tukwata ku bisuubizo byakyo, tuba twoleka ssuubi, so si kukkiriza.

Essuubi kye kimu ku bya mu birowoozo era kirabikira mu bwesige. Okukkiriza kwe kimu ku bya mu mutima era kulabikira mu buwulize.

Essuubi Si Kukkiriza. Ekintu ekirala eky’amaanyi ag’okukkiriza mu birowoozo kirabikira mu kufumiitiriza okulungi (positive thinking). Ensi etegeera nti ‘ekyo ky’okkiriza nti bw’oli, bw’oli,’ bwe kityo abakulembeze b’ebibiina by’obusuubuzi batera okugenda mu masomo ku kufumiitiriza okulungi. “Engeri y’okulowoozaamu okutuuka ku buwanguzi.” Kaakano, tulina n’emisomo egy’abakulembeze ba kkanisa egyesigamiziddwa ku nnono n’enkola ze zimu.

Eky’ennaku, waliwo amakkanisa mangi, agamu manene nnyo agalina obuweereza obwa tterevisoni, agandibuulira ku kukkiriza naye, mu butuufu, ne bayigiriza okufumiitiriza okulungi. Mu myaka egiyise, twayingiza n’enkola ez’eddiini empya (New Age) nga ‘enkola ez’okwekubira ebifaananyi mu birowoozo’ okuleeta okuwona okuva mu bulwadde, nga tukyamu bwe twenkanyankanya okufumiitiriza okulungi okw’okwekubira ebifaananyi n’okukkiriza.

Nga bwe kiyinza okwewuunyisa, waliwo abantu bangi leero abanaakuwa obujulizi nti Mukama yabakolera okuwona okwa ngeri eyo. Banaakigamba nti kyava mu kukkiriza – okwakozesebwa mu kwekubira ebifaananyi.

Nnali ndiwo mazima mu kabinja akatono we baasabira kino ku mukazi eyali azze mu maaso okusabirwa: “Kubira ekifaananyi kya kkansa eri mu mubiri gwo. Osobola okugiraba? Kaakano kubira ekifaananyi ky’omukono gwa Yesu nga gutuuka mu kifo ekyo ekirwadde nga guggyamu obutoffaali obwa kkansa. Akikola kaakano nga bw’omulaba!

Aleruya! Kaakano owonye!”

Okufumiitiriza Okulungi Si Kukkiriza. Waliwo empaka nnene ezisituka buli abantu lwe boogera ku kukkiriza. Kale okukkiriza kye ki ddala? Omulimu ogw’okukkiriza ogwogerwako mu 1 Abasessaloniika 1:3 gwe guluwa, ate n’okutambula mu kukkiriza okwogerwako mu 2 Abakkolinso 5:7 kwe kuluwa? Olwokubanga, “tekiyinzika kusanyusa Katonda awatali kukkiriza” (Abaebbulaniya 11:6), okwegomba kwa buli mukkiriza kusaanidde kubeera kutegeera okukkiriza kye kiri.

Pawulo agamba emirundi mingi nti “tuweebwa obutuukirivu olw’okukkiriza” (Abaefeso 2:8-9 ne mu Abaruumi), ne Yakobo n’awakana nti “okukkiriza awatali bikolwa kufu” (Yakobo 2:17). Abamu abawagira Pawulo (oba nga bwe bategeera Pawulo), balowooza nti Yakobo talina kifo mu Byawandiikibwa Ebitukuvu! Martin Luther, ekyokukozesa ekikulu mu kuzza obuggya eddiini, yagamba nti ekitabo kya Yakobo “kitabo kya ssubi,” era nti tekyandibadde mu Byawandiikibwa! Abalala bandiwagidde Yakobo (oba nga bwe bategeera Yakobo), nga bayita abakkiriza bonna aba Pawulo n’amannya ag’okunyooma nga “fundamentalists.”

N’ebigambo bya Yesu byennyini biyingira mu mpaka!

Eri Nikodemo yayogera ebigambo biri eby’ekitalo, “Kubanga Katonda bwe yayagala ensi, yawaayo Omwana we omu yekka, buli amukkiriza aleme okuzikirira wabula abeere n’obulamu obutaggwaawo” (Yokaana 3:16). Naye, bwe yatuma abayigirizwa be okugenda mu nsi yonna okubuulira enjiri ennungi, yagattako nti, “Akkiriza n’abatizibwa alirokolebwa” (Makko 16:16).

Pawulo ayongera okutabula. “Bw’oyatula n’akamwa ko nti Yesu Kristo ye Mukama, era n’okkiriza mu mutima gwo nti Katonda yamuzuukiza mu bafu, olirokolebwa” (Abaruumi 10:9).

Kale, tuweebwa obutuukirivu olw’okukkiriza? Bwe kiba bwe kityo, okukkiriza kwe kukkiriza mu birowoozo? Oba kwe kwesiga, oba mpozi kwe kwatula, oba mpozi kwe kubatizibwa? Oba kiyinza okuba ekintu ekirala?

N’abavvuunuzi ba King James Version baalaga okutabuka kwabwe bwe, mu Abaebbulaniya 10:23, baawandiika nti, “Tunywerere ku kwatula kw’okukkiriza kwaffe,” nga bavvuunula ekigambo ky’Oluyonaani ‘elpis’ nti ‘okukkiriza’ songa mu bifo ebirala byonna kivvuunulwa nti ‘essuubi.’ Mazima ddala, kirabika gye ndi nti okukkiriza n’essuubi bitera okutabukibwa omukkiriza wa bulijjo! Essuubi lirina kye likolagana n’okukkiriza mu birowoozo okusinga okukkiriza okwennyini!

Ka nziddemu, essuubi kye kimu ku bya mu birowoozo era kirabikira mu bwesige, ate okukkiriza kwe kimu ku bya mu mutima era kulabikira mu buwulize.