Olw’Obutakkiriza Bwammwe

“Awo oluvannyuma abayigirizwa ne bajja eri Yesu mu kyama ne bamubuuza nti, Lwaki ffe tetwasobodde kugoba dayimooni oyo?

“Yesu n’abaddamu nti, Olw’okukkiriza kwammwe okutono. Kubanga ddala ddala mbagamba nti, bwe muba n’okukkiriza okufaanana ng’akaweke ka kaladaali, mwandiyinzizza okugamba olusozi luno nti, ‘Vvaawo wano,’ era ne luvaawo era tewandibaddewo kye mulemwa” (Matayo 17:19, 20).

Mukama Yesu bwe yatuma abayigirizwa be mu bitundu eby’enjawulo ebya Palesitayini, yabawa obuyinza obw’emirundi ebiri: okugoba emyoyo emibi n’okuwonya buli ndwadde na buli bunafu (Matayo 10:1). Bw’atyo bwe yakola ne ku nsanvu abaakomawo gy’ali nga basanyuka nga bagamba nti, “Mukama waffe, ne baddayimooni baatugondera mu linnya lyo” (Lukka 10:17). Ku lunaku Yesu lwe yafuusibwa, Mukama bwe yali akyali ku lusozi, kitaawe w’omulenzi eyaliko dayimooni yamuleeta eri abayigirizwa be, ng’abeegayirira okugoba omwoyo omubi, naye ne batasobola. Yesu bwe yamala okuwonya omwana, abayigirizwa ne bamubuuza lwaki bo baali balemereddwa okukikola nga bwe baakolanga mu mirundi emirala, n’abaddamu nti, “Olw’okukkiriza kwammwe okutono.” Kale bwali butakkiriza bwabwe, so si by’ayagala Katonda, bwe bwabalemesa.

Mu biseera byaffe okuwonya kwa Katonda tekukkirizibwa nnyo, kubanga kumpi kwabula ddala mu Kkanisa y’Ekikristaayo. Omuntu ayinza okubuuza ensonga, era wano waliwo okuddamu okubiri okubaddewo. Abasinga obungi balowooza nti eby’amagero, nga mw’otwalidde n’ekirabo ky’okuwonya, byali bya kukoma ku kiseera ky’Ekkanisa eyasooka, nti ekigendererwa kyabyo kyali kuzimba musingi gwa Bukristaayo ogwasooka, naye nti okuva olwo embeera yakyuka. Abakkiriza abalala bagamba awatali kuwankawanka nti oba Ekkanisa yabulwa ebirabo bino, lwa nsobi yaayo yokka; kubanga yafuuka ya nsi, Omwoyo kyava akolera mu yo mu bunafu bwokka; kubanga teyasigala mu nkolagana etereevu era ey’olubeerera n’obuyinza bwonna obw’ensi etalabika; naye nti singa yongera okulaba nga mu yo musituka abasajja n’abakazi abali mu bulamu obw’okukkiriza n’obw’Omwoyo Omutukuvu, abeewaddeyo ddala eri Katonda waabwe, yandiddamu okulaba ebirabo bye bimu nga bwe byeyolekanga edda. Ku ndowooza zino ebbiri, eruwa esinga okukwatagana n’Ekigambo kya Katonda? Katonda ye yayagala “ebirabo eby’okuwonya endwadde” biggibweewo, oba omuntu y’avunaanyizibwa? Katonda ayagala eby’amagero obutabaawo? N’olwekyo takyawa kukkiriza okubireeta? Oba nate, Ekkanisa y’erina omusango olw’okubulwa okukkiriza?

Ebyawandiikibwa Byogera Ki?

Bayibuli tetukkiriza, ka kibe mu bigambo bya Mukama oba eby’abatume be, okukkiriza nti ebirabo by’okuwonya byaweebwa mu biseera by’Ekkanisa ebyasooka byokka; wabula ebisuubizo Yesu bye yawa abatume bwe yabawa ebiragiro ebikwata ku mulimu gwabwe, nga yakamala ekiseera kitono okulinnya mu ggulu, birabika gye tuli nga bikwata ku biseera byonna (Makko 16:15—18). Pawulo ateeka ekirabo ky’okuwonya mu bikolwa by’Omwoyo Omutukuvu. Yakobo awa ekiragiro ekituufu ku nsonga eno awatali kukomya kiseera. Ebyawandiikibwa byonna birangirira nti ebirabo bino eby’ekisa biriweebwa okusinziira ku kigero ky’Omwoyo n’eky’okukkiriza.

Era kigambibwa nti ku ntandikwa ya buli ndagaano empya Katonda akola eby’amagero, nti eyo ye ngeri gy’akola bulijjo; naye si bwe kiri n’akatono. Lowooza ku bantu ba Katonda mu ndagaano eyasooka, mu kiseera kya Ibulayimu, mu bulamu bwonna obwa Musa, mu kuva mu Misiri, wansi wa Yoswa, mu kiseera ky’Abalamuzi ne Samwiri, mu bufuzi bwa Dawudi ne bakabaka abalala abaatyanga Katonda okutuuka ku kiseera kya Danyeri; mu bbanga erisoba mu myaka lukumi eby’amagero byabangawo.

Naye kigambibwa nti eby’amagero byali byetaagisa nnyo mu nnaku ez’olubereberye ez’Obukristaayo okusinga oluvannyuma. Naye ate obuyinza bw’obukaafiiri ne leero, wonna Enjiri gy’egezaako okubulwanyisa? Tekisoboka kukkiriza nti eby’amagero byali byetaagisa nnyo abakaafiiri b’omu Efeso (Ebikolwa by’Abatume 19:11, 12) okusinga abakaafiiri ba Afirika mu kiseera kino. Era bwe tulowooza ku butamanya n’obutakkiriza ebifuga ne wakati mu mawanga ag’Ekikristaayo, tetuwalirizibwa kugamba nti waliwo obwetaavu bw’ebikolwa eby’obuyinza bwa Katonda ebyeyoleka okuwanirira obujulirwa bw’abakkiriza n’okukakasa nti Katonda ali nabo? Ate era, mu bakkiriza bennyini, okubuusabuusa kungi nnyo, n’obunafu bungi nnyo! Okukkiriza kwabwe nga kwetaaga okuzuukusibwa n’okukubirizibwa n’obukakafu obweyoleka nti Mukama ali wakati mu bo! Ekitundu ekimu eky’obulamu bwaffe kya mubiri na musaayi; n’olwekyo mu mubiri ne mu musaayi Katonda mw’ayagala okweyolekera.

Okukakasa nti obutakkiriza bw’Ekkanisa bwe bwabuza ekirabo ky’okuwonya, ka tulabe Bayibuli ky’ekyogera ku nsonga eyo. Ebyawandiikibwa tebitulabula emirundi mingi ku butakkiriza, ne ku buli kiyinza okutwawukanya ne Katonda waffe n’okutukyusa okumuvaako? Ebyafaayo by’Ekkanisa tebitulaga bwetaavu bwa kulabula kuno? Tebituwa byakulabirako bingi eby’okudda emabega, eby’okusanyusa ensi, okukkiriza mwe kwanafuwira ddala nga omwoyo gw’ensi bwe gwagenda gufuna amaanyi? Kubanga okukkiriza okw’engeri eyo kusoboka yekka eri oyo abeera mu nsi etalabika. Okutuusa ku kyasa eky’okusatu, okuwonya olw’okukkiriza mu Kristo kwali kungi, naye mu byasa ebyaddirira ne kugenda kukendeera. Tetumanyi okuva mu Bayibuli nti bulijjo obutakkiriza bwe buziyiza emirimu gya Katonda egy’amaanyi?

Singa twayiga okukkiriza ebisuubizo bya Katonda! Katonda tavudde ku bisuubizo bye; Yesu akyali Oyo awonya emmeeme n’omubiri byombi; obulokozi ne kaakano butuwa okuwonya n’obutukuvu, era Omwoyo Omutukuvu bulijjo mwetegefu okutulaga ebimu ku bikolwa by’obuyinza bwe. Ne bwe tubuuza lwaki obuyinza buno obwa Katonda tebulabika nnyo, atuddamu nti: “Olw’okukkiriza kwammwe okutono.” Gye tukoma okwewaayo okufuna mu bulamu bwaffe okutukuzibwa olw’okukkiriza, gye tujja okukoma n’okufuna okuwonya olw’okukkiriza. Enjigiriza zino zombi zitambulira wamu. Omwoyo wa Katonda gy’akoma okubeera n’okukolera mu mmeeme z’abakkiriza, n’eby’amagero by’akola mu mubiri gye bijja okukoma okweyongera. Mu ngeri eyo ensi esobola okutegeera okununulibwa kye kitegeeza.