Okusonyiwa n’Okuwonya

“Naye mutegeere nga Omwana w’Omuntu alina obuyinza ku nsi okusonyiwa ebibi.” Awo n’agamba akoozimbye nti, “Yimirira weetikke akatanda ko, weddireyo ewammwe!” (Matayo 9:6).

Mu muntu mulimu obutonde bubiri obugattiddwa awamu. Mu kiseera kye kimu wa mwoyo era wa nfuufu, wa ggulu era wa nsi, wa mmeeme era wa mubiri. Kyova olaba nti ku ludda olumu mwana wa Katonda, ate ku ludda olulala asaliddwako okuzikirira olw’Okugwa; ekibi mu mmeeme ye n’obulwadde mu mubiri gwe bijulira obuyinza okufa bwe kulina ku ye. Obutonde buno obw’emirundi ebiri bwe bwanunulibwa ekisa kya Katonda. Omuwandiisi wa Zabbuli bw’akowoola byonna ebiri mu ye okwebaza Mukama olw’ebirungi bye, ayogerera waggulu nti, “Weebaze Mukama, ggwe emmeeme yange, . . . Asonyiwa ebibi byo byonna, n’awonya n’endwadde zo zonna” (Zabbuli 103:3). Isaaya bw’alagula okununulibwa kw’abantu be, ayongerako nti, “Tewali abeera mu Sayuuni alyogera nti, “Ndi mulwadde,” n’abo ababeeramu balisonyiyibwa ekibi kyabwe” (Isaaya 33:24).

Obunnabbi buno bwatuukirira okusinga ku byonna abantu bye baali basuubira, Yesu Omununuzi bwe yakka ku nsi kuno. Nga bangi nnyo abaawonyezebwa Oyo eyajja okuteekawo obwakabaka obw’omu ggulu ku nsi! Ka kibe mu bikolwa bye ye kennyini, oba oluvannyuma mu biragiro bye yalekera abayigirizwa be, tatulaga lwatu nti okubuulira Enjiri n’okuwonya abalwadde byatambulira wamu mu bulokozi bwe yajja okuleeta? Byombi biweebwa ng’obukakafu obweyoleka nti ye Masiya: “Abazibe b’amaaso balaba, n’abalema batambula. . . n’abaavu babuulirwa Enjiri” (Matayo 11:5). Yesu, eyeetwalira emmeeme n’omubiri by’omuntu, abiwonya byombi kyenkanyi okuva mu bivudde mu kibi.

Amazima gano tegeeyoleka wadde okukakasibwa obulungi wonna okusinga mu byafaayo by’omuntu eyali akoozimbye. Mukama Yesu atandika n’amugamba nti, “ebibi byo bikusonyiyiddwa,” oluvannyuma n’ayongerako nti, “situka otambule.” Okusonyiyibwa ebibi n’okuwonyezebwa obulwadde byetaagana, kubanga mu maaso ga Katonda, alaba obutonde bwaffe bwonna, ekibi n’obulwadde bigattiddwa wamu ng’omubiri n’emmeeme bwe bigattiddwa. Nga Ebyawandiikibwa bwe biri, Mukama waffe Yesu yatunuulira ekibi n’obulwadde mu ngeri ndala okusinga ffe bwe tubitunuulira. Gye tuli ekibi kya mu by’omwoyo; tukkiriza nti kiri wansi w’obusungu bwa Katonda obw’obwenkanya, era nti akisalira omusango mu bwenkanya, so ng’obulwadde ate kirabika nga kitundu butundu ku mbeera obutonde bwaffe mwe buli kati, era nga tekirina kakwate na kusalira musango kwa Katonda wadde obutuukirivu bwe. Abamu batuuka n’okugamba nti obulwadde bukakasa okwagala n’ekisa kya Katonda.

Naye Ebyawandiikibwa wadde Yesu Kristo yennyini tebyogerangako ku bulwadde mu ngeri eyo, era tebiraga bulwadde ng’omukisa, ng’obukakafu bw’okwagala kwa Katonda obusaana okugumiikirizibwa. Mukama yayogera n’abayigirizwa ku bibonoobono eby’enjawulo bye baalina okugumira, naye bw’ayogera ku bulwadde, buli kiseera abwogerako ng’akabi akaleetebwa ekibi ne Setaani, era kye tusaana okununulibwako. Yalangirira mu bukulu bungi nti buli muyigirizwa we alina okwetikka omusaalaba gwe (Matayo 16:24), naye teyayigirizaako mulwadde n’omu kwewaayo okusigala nga mulwadde. Buli wantu Yesu yawonya abalwadde, buli wantu yatwala okuwonya ng’ekimu ku birabo by’ekisa ebiri mu bwakabaka obw’omu ggulu. Ekibi mu mmeeme n’obulwadde mu mubiri byombi bijulira obuyinza bwa Setaani, era “Omwana wa Katonda kyeyava ajja mu nsi azikirize ebikolwa bya Setaani” (1 Yokaana 3:8).

Yesu yajja okununula abantu okuva mu kibi ne mu bulwadde alyoke amanyise okwagala kwa Kitaffe. Mu bikolwa bye, mu ngeri gye yayigirizaamu abayigirizwa, ne mu mulimu gw’abatume, okusonyiwa n’okuwonya bulijjo bisangibwa wamu. Awatali kubuusabuusa, ekimu kiyinza okweyoleka okusinga ekirala, okusinziira ku kukula oba ku kukkiriza kw’abo be baayogeranga nabo. Oluusi okuwonya kwe kwateekateeka ekkubo okukkiriza okusonyiyibwa, oluusi okusonyiyibwa kwe kwasooka okuwonya, okwo ne kujja oluvannyuma ne kuba ng’akabonero akakakasa okusonyiyibwa okwo. Mu ntandikwa y’obuweereza bwe, Yesu yawonya abalwadde bangi, ng’abasanze nga beetegefu okukkiriza nti basobola okuwona. Mu ngeri eno yayagala okukwata ku mitima gyabwe bamwaniriza ng’Oyo asobola okusonyiwa ebibi. Bwe yalaba nti eyali akoozimbye yali asobola okufuna okusonyiyibwa amangu ddala, yatandikira ku ekyo ekisinga obukulu; oluvannyuma ne kujja okuwonya, ne kuba akabonero akakakasa okusonyiyibwa kwe yali aweereddwa.

Tulaba, okuva mu bigambo by’Enjiri, nti mu biseera ebyo kyali kizibu eri Abayudaaya okukkiriza okusonyiyibwa ebibi byabwe okusinga okukkiriza okuwonya kwa Katonda. Kaakano kiri kifuulannenge. Ekkanisa y’Ekikristaayo ewulidde nnyo okubuulira ku kusonyiyibwa ebibi, n’olwekyo emmeeme erumwa ennyonta efuna bulungi obubaka buno obw’ekisa; naye si bwe kiri ku kuwonya kwa Katonda; tekwogerwako nnyo; abakkiriza abakulabyeko si bangi. Kya mazima nti mu kiseera kino okuwonya tekuweebwa nga mu biseera biri, eri ebibiina by’abantu Kristo be yawonyanga nga tebasoose kukyuka. Okusobola okukufuna, kyetaagisa okutandika n’okwatula ebibi n’okumalirira okubeera mu bulamu obutukuvu. Kino awatali kubuusabuusa y’ensonga lwaki abantu kibazibuwalira okukkiriza okuwonya okusinga okusonyiyibwa; era kino ye nsonga lwaki abo abawonyezebwa bafunira wamu omukisa omuggya ogw’omwoyo, ne beewulira nga bagattiddwa nnyo ne Mukama Yesu, ne bayiga okumwagala n’okumuweereza obulungi okusingawo. Obutakkiriza buyinza okugezaako okwawula ebirabo bino ebibiri, naye mu Kristo bulijjo bigattiddwa wamu. Ye bulijjo Omulokozi y’omu ow’emmeeme n’ow’omubiri, mwetegefu kyenkanyi okuwa okusonyiwa n’okuwonya. Abanunule bayinza bulijjo okwogerera waggulu nti: “Weebaze Mukama, ggwe emmeeme yange. . . Asonyiwa ebibi byo byonna, n’awonya n’endwadde zo zonna” (Zabbuli 103:3).