Omwezi gwa Agusito

Agusito 1

ENDAGAANO ETUUKA KU BAANA

"Era ndituukiriza endagaano yange naawe, n’ezzadde lyo mbeere Katonda wo era Katonda w’ezzadde lyo eririddawo. Endagaano eno teriggwaawo emirembe n’emirembe." Olubereberye 17:7

Ayi Mukama, okoze endagaano nange, omuweereza wo, mu Kristo Yesu Mukama wange; ne kaakano, nkwegayirira, leka abaana bange nabo babeeremu mu birungi byayo eby’ekisa. Nzikiriza nkkirize ekisuubizo kino nga kye wankola nze, nga bwe wakikola ne Ibulayimu. Mmanyi nti abaana bange baazaalibwa mu kibi, era baabumbibwa mu butali butuukirivu, nga n’abantu abalala bwe bali; noolwekyo sisaba kintu olw’okuzaalibwa kwabwe, kubanga mmanyi bulungi nti "Ekizaalibwa omubiri kiba mubiri," so tekirina kirala. Ayi Mukama, bazaalire wansi w’endagaano yo ey’ekisa ku bw’Omwoyo wo Omutukuvu!

Nsabira ezzadde lyange mu mirembe gyonna. Beera Katonda waabwe nga bw’oli Katonda wange. Ekitiibwa kyange ekisinga kwe kuba nga onzikirizza okukuweereza; leka n’ezzadde lyange likuweererezenga mu myaka gyonna egijja. Ayi Katonda wa Ibulayimu, beera Katonda wa Isaaka we! Ayi Katonda wa Kaana, kkiriza Samwiri we!

Bw’oba, Ayi Mukama, ompadde omukisa mu maka gange, nkwegayirira ojjukire n’amaka amalala ag’abantu bo agakyali obutaweebwa mukisa. Beera Katonda w’ennyumba zonna eza Isirayiri. Toleka n’omu ku abo abatya erinnya lyo okugezesebwa n’amaka agatatya Katonda era amabi, ku bw’Omwana wo Yesu Kristo. Amiina.

Agusito 2

YOGERA BY’AKUYIGIRIZA

"Kaakano, genda! Nnaakuyambanga ng’oyogera, era nnaakuyigirizanga by’onooyogeranga." Okuva 4:12

Abaweereza ba Mukama abamu ab’amazima ba lulimi luzito, era bwe basabibwa okuwolereza Mukama waabwe, batabukatabuka nnyo nga batya baleme kwonoona nsonga nnungi olw’obutamanya kugiwolereza bulungi. Mu mbeera ng’eyo kirungi okujjukira nti Mukama ye yakola olulimi olwo oluzito, era tuteekwa okwegendereza tuleme okunenya Omutonzi waffe. Kiyinza okuba nti olulimi oluzito si kibi kinene nga bwe kiri olulimi olw’amangu, era obungi bw’ebigambo obutono buyinza okuba omukisa okusinga ebigambo ebingi ebikulukuta. Era kya kakafu ddala nti amaanyi ag’amazima agalokola tegali mu buyiiya bw’abantu obw’okwogera, n’ebigambo byabwe ebiwooma, n’okwerayaganya kwabwe. Obutamanya kwogera bulungi si kyetaagisa kinene nga bwe kirabika.

Katonda bw’abeera n’akamwa kaffe, era n’ebirowoozo byaffe, tulifuna ekintu ekisinga ekikomo ekivuga eky’obumanyirivu mu kwogera, oba ekitaasa ekivuga eky’okusendasenda. Okuyigiriza kwa Katonda kwe magezi; okubeerawo kwe kwe maanyi. Falaawo yalina ensonga ennene ey’okutya Musa eyalina olulimi oluzito okusinga okutya oyo eyasinga okwogera obulungi mu Misiri; kubanga bye yayogera byalimu amaanyi; yayogera ebibonoobono n’okufa. Mukama bw’abeera naffe mu bunafu bwaffe obw’obuzaaliranwa, tulyambazibwa amaanyi agasukkiridde ag’omu ggulu. Kale, twogerere Yesu n’obuvumu, nga bwe tusaanidde okwogera.

Agusito 3

EDDEMBE ERI KU BINTU EBITUKUVU

"Naye kabona bw’aneeguliranga omuddu n’ensimbi, oba omuddu bw’anaazaalirwanga mu nnyumba ya kabona, omuddu oyo anaalyanga ku mmere eyo." Ebyabaleevi 22:11

Bannaggwanga, abagenyi, n’abaweereza abapakasa baali tebakkirizibwa kulya ku bintu ebitukuvu. Bwe kityo bwe kiri ne mu by’omwoyo n’okutuusa kaakano. Naye ebibinja bibiri byali bikkirizibwa ku mmeeza entukuvu: abo abaagulibwa n’ensimbi za kabona, n’abo abaazaalirwa mu nnyumba ya kabona. Okugulibwa n’okuzaalibwa, buno bwe bujulizi obubiri obutarumbulwa obw’eddembe eri ku bintu ebitukuvu.

Eyagulibwa. Kabona waffe Omukulu Ennyo yagula n’omuwendo abo bonna abamwesiga. Bantu be ddala -- ba Mukama ddala. Si lwa kye bali mu bo bennyini, wabula ku bwa nannyini bwe, bakkirizibwa okuyingira mu birungi bye byennyini by’asanyukira, era "banaalyanga ku mmere ye." Alina emmere gy’alya ab’ensi gye batamanyi. "Kubanga muli bantu ba Kristo," kyemuliva mugabana ne Mukama wammwe.

Eyazaalibwa. Eno nayo ngeri ya kakafu ey’okutuuka ku birungi; bwe tuzaalibwa mu nnyumba ya Kabona, tufuna ekifo kyaffe wamu n’ab’omu maka abalala. Okuzaalibwa okuggya kutufuula abasika bannaffe, era ab’omubiri gumu; kyeyava, emirembe, essanyu, n’ekitiibwa, Kitaffe by’awadde Kristo, Kristo abituwadde. Okununulibwa n’okuzaalibwa okuggya bituwadde eddembe ery’emirundi ebiri ku lukusa lwa Katonda olw’ekisuubizo kino.

Agusito 4

AWA OMUKISA ERA AKUUMA

"Mukama Katonda akuwe omukisa, akukuume" Okubala 6:24

Ekigambo kino ekisooka eky’omukisa gwa Kabona Omukulu mu butuufu kisuubizo. Omukisa ogwo Kabona waffe Omukulu Ennyo gw’atwogerako gwa kujja ddala, kubanga ayogera ekiri mu mutima gwa Katonda.

Nga kya ssanyu okubeera wansi w’omukisa gwa Katonda! Kino kissa akaloosa ak’ekisa mu bintu byonna. Bwe tuweebwa omukisa, olwo ebintu byaffe byonna n’ebituusanyusa nabyo biweebwa omukisa; weewaawo, okufiirwa kwaffe n’ebizibu byaffe, ne wadde okumenyeka kw’essuubi kwaffe, biweebwa omukisa. Omukisa gwa Katonda muzito, gwa maanyi, era gukola. Omukisa gw’omuntu guyinza okutandika ne guggwaawo mu bigambo byokka; naye omukisa gwa Mukama gugaggawaza era gutukuza. Ekyo kye tuyinza okwagaliza mukwano gwaffe omwagalwa ennyo si "Okukulaakulana kukuwerekere," wabula "Mukama Katonda akuwe omukisa."

Era nate kya ssanyu okukuumibwa Katonda; okukuumibwa ye, okukuumibwa okumpi naye, okukuumibwa mu ye. Abo Katonda b’akuuma bakuumibwa ddala; bawonyezebwa obubi, era baterekerwa essanyu eritaliiko kkomo. Okukuuma kwa Katonda kugenda wamu n’omukisa gwe, okugunyweza n’okuguleetera okubeerawo emirembe gyonna.

Omuwandiisi w’akatabo kano ayagala nti omukisa omungi n’okukuuma okwa kakafu okwatiddwa wano kutuuke ku buli musomi ayinza mu kaseera kano okuba ng’atunuulira ennyiriri zino. Bambi, wummulira ekigambo kino eri Katonda ng’okusaba ku lw’abaweereza be.

Agusito 5

AMATEEKA MU MUTIMA

"Amateeka ga Katonda we gali mu mutima gwe, era ebigere bye tebiseerera." Zabbuli 37:31

Teeka amateeka mu mutima, omuntu yenna abeere mulongoofu. Wano we gasaanidde okubeera amateeka; kubanga olwo gabeera, ng’ebipande eby’amayinja bwe biri mu Ssanduuko, mu kifo kye gaateekerwa. Mu mutwe gasoberwa, ku mugongo gazitoowerera, naye mu mutima gawanirira.

Nga kigambo kironde ekikozeseddwa wano, "Amateeka ga Katonda we!" Bwe tumanya Mukama nga Katonda waffe ffe, amateeka ge gafuuka ddembe gye tuli. Katonda ng’ali naffe mu ndagaano atuleetera okwegomba okugondera by’ayagala n’okutambulira mu biragiro bye. Ekiragiro kino kya Kitange? Kale nkisanyukira.

Wano tukakasibwa nti omuntu alina omutima ogugondera aliwanirirwa mu buli kigere ky’akuba. Alikola ekituufu, era noolwekyo alikola ekya magezi. Ekikolwa ekitukuvu bulijjo kye kisinga obukalabakalaba, wadde nga mu kiseera ekyo kiyinza obutalabika bwe kityo. Tutambulira mu luguudo olunene olw’okulabirira kwa Katonda n’ekisa kye bwe tunywerera mu kkubo ery’amateeka ge. Ekigambo kya Katonda tekinnabuza muntu n’omu; ebiragiro byakyo ebyeyolefu eby’okutambula n’obwetoowaze, n’obwenkanya, n’okwagala, era n’okutya Mukama, bigambo bya magezi ebifuula ekkubo lyaffe okukulaakulana nga bwe biri amateeka ag’obutukuvu agakuuma ebyambalo byaffe nga tebiriiko bbala. Atambula mu bukakafu oyo atambula mu butuukirivu.

Agusito 6

GENDA; TWALA OBUTAKA BWO

"Laba, Mukama Katonda wo akuwadde ensi. Kale, yambuka ogyetwalire nga Mukama Katonda wa bajjajjaabo bwe yakugamba. Totya, so toggwaamu maanyi." Ekyamateeka Olwokubiri 1:21

Waliwo obusika obw’ekisa bwe tusaanidde okuba abavumu okuwangula okubufuna okuba obwaffe. Byonna omukkiriza omu by’afunye biweebwa awo eri omulala. Tuyinza okuba ab’amaanyi mu kukkiriza, ab’okwagala okwaka, n’abakozi ba nnyo; tewali kiziyiza; katwambuke tutwale obusika. Okukkiriza okusinga okuwoomerera n’ekisa ekisinga okwaka bya ffe nga bwe biri bya buli muganda waffe, Yakuwa abitutadde mu maaso; tewali n’omu ayinza kutuggyako ddembe lyaffe; katwambuke tubitwale mu linnya lye.

Ensi nayo eri mu maaso gaffe okuwangulwa ku lwa Mukama Yesu. Tetusaanidde kuleka nsi yonna oba kifo kyayo kyonna nga tekinnawangulwa. Ekifo ekyo eky’obwavu ekiriraanye ennyumba yaffe kiri mu maaso gaffe, si kya kulemesa kufuba kwaffe, wabula kya kukikkiririza. Kye tuteekwa kwokka kwe kufuna obuvumu obumala okwolekera mu maaso, olwo tunaawangula amaka ag’ekizikiza n’emitima emikakanyavu ku lwa Yesu. Tuleme kuleka bantu abali mu kkubo oba mu kakubo okufa olw’obutaba na kukkiriza kumala mu Yesu ne mu Njiri ye okwambuka okutwala ensi. Tewali kifo kya kizikiza kiyitiridde, tewali muntu mwonoonyi nnyo eyeeyongera okusukka amaanyi g’ekisa. Obutiitiizi, vaawo! Okukkiriza kutambulira mu maaso okuwangula.

Agusito 7

EBIRAGIRO EBY’OKUKULAAKULANA

"Ddamu amaanyi era beera muzira, byonna by’okola obyesigamye ku mateeka omuweereza wange Musa ge yakulagira; togaviirangako ddala, oleme okukyama ku mukono ogwa ddyo oba ogwa kkono olyoke obenga omuwanguzi buli gy’onoogendanga." Yoswa 1:7

Weewaawo, Mukama anaabeera naffe mu lutalo lwaffe olutukuvu, naye atwetaagisa okugoberera amateeka ge n’obwegendereza. Obuwanguzi bwaffe bunaasinziira nnyo ku kumugondera n’omutima gwaffe gwonna, nga tussa amaanyi n’obuvumu mu bikolwa by’okukkiriza kwaffe. Bwe tuba n’omutima ogw’ekitundu, tetuyinza kusuubira kusukka mukisa gwa kitundu.

Tuteekwa okugondera Mukama n’obwegendereza n’okulowooza. "By’okola obyesigamye" kye kigambo ekikozeseddwa, era kijjudde amakulu. Kino kikwata ku buli kitundu ky’ekyo Katonda ky’ayagala; tuteekwa okugondera nga twetegese mu buli ngeri. Etteeka lyaffe ery’empisa "kwe kukola byonna ng’amateeka bwe gali." Tetusobola kulonda kironda, wabula tuteekwa okukkiriza ebiragiro bya Mukama nga bwe bijja, byonna awamu. Mu bino byonna tuteekwa okweyongera n’obutuufu n’obunywevu. Olugendo lwaffe lube olugolokofu, olutakyamira ku mukono ogwa ddyo wadde ogwa kkono. Tetusaanidde kukyama nga tuba abakalubo okusinga amateeka, wadde okuva ku mateeka olw’obwangu ne tudda mu kkubo eryangu ery’okwefaako. Olw’obuwulize obwo mulijja okukulaakulana mu by’omwoyo. Ayi Mukama, tuyambe tulabe oba si bwe kiri! Tetuligezesa kisuubizo kyo busa.

Agusito 8

OBWESIGE OBUTASWAZIBWA

"Mukama Ayinzabyonna anyamba" Isaaya 50:7

Bino, mu bunnabbi, bye bigambo bya Masiya ku lunaku olw’okugondera kwe okutuusa okufa, bwe yawaayo omugongo gwe eri abaamukuba, n’amatama ge eri abaamukunyoola ebirevu. Yali n’obwesige mu buyambi bwa Katonda, era yeesiga Yakuwa.

Ayi ggwe emmeeme yange, ennaku zo ziri ng’enfuufu entono ey’oku minzaani bw’ogeraageranya n’eza Mukama wo! Toyinza kukkiriza nti Mukama Katonda anaakuyamba? Mukama wo yali mu mbeera ey’enjawulo; kubanga ng’eyakiikirira abantu aboonoonyi -- eyabadda mu kifo kyabwe era Ssaddaaka yaabwe -- kyali kyetaagisa Kitaawe okumuleka, n’amuleetera okuyita mu kwabulirwa okw’emmeeme. Tewali kyetaagisa ekifaanana bwe kityo ekikuteekeddwako ggwe: toteekeddwa kukaaba nti, "Lwaki onjabulidde?" Omulokozi wo ne mu mbeera ng’eyo yeesiga Katonda, ate ggwe toyinza? Yakufiirira, bw’atyo n’akifuula ekitasoboka ggwe okulekebwa wekka; kyeva, guma.

Mu mirimu gy’olunaku luno oba mu bigezo byalwo yogera nti, "Mukama Ayinzabyonna anyamba." Genda mu maaso n’obuvumu. Nyweza amaaso go ng’ejjinja, era malirira nti tewali kunafuwa wadde kuswala kunaakusemberera. Katonda bw’ayamba, ani ayinza okuziyiza? Bw’oba okakasa obuyambi bw’oyo Ayinzabyonna, kiki ekiyinza okukuzitoowerera? Tandika olunaku n’essanyu, era toganya kabonero konna ak’okubuusabuusa kuyingira wakati wo n’omusana ogutaggwaawo.

Agusito 9

OKUSALIRIRA OKULEETA EBIBALA

"Buli ttabi eriri ku Nze eritabala bibala aliggyako. Naye buli ttabi eribala ebibala, alirongoosa lyeyongerenga okubala." Yokaana 15:2

Kino kisuubizo kya muwendo eri oyo abeera olw’okubala ebibala. Okusooka kirabika ng’ekikakanyavu. Ettabi eribala ebibala lisaana okusalirirwa? Ekiso kisaana okusala ne litabi erisinga obulungi n’okugasa? Awatali kubuusabuusa bwe kityo bwe kiri, kubanga ekitundu kinene eky’omulimu gwa Mukama waffe ogw’okulongoosa gukolebwa nga kuyita mu kubonaabona okwa ngeri emu oba endala. Si babi, wabula balungi be balina ekisuubizo ky’okubonaabona mu bulamu buno. Naye, ekivaamu kisukka nnyo okuliyirira obuzibu bw’ekkubo eriyisibwamu. Bwe tunaabala ebibala ebisingawo ku lwa Mukama waffe, tetujja kufaayo ku kusalirirwa n’okufiirwa amalagala.

Naye era, okulongoosa oluusi kukolebwa Ekigambo awatali kugezesebwa, era kino kiggyawo ekyo kyonna ekyalabika nga kikalubo mu kawoowo k’ekisuubizo. Olw’Ekigambo tulifuuka ab’ekisa n’abagasa okusingawo. Mukama, eyatufuula, mu kigero, ab’okubala ebibala, anaatukolako okutuusa lwe tulituuka ku mutindo ogwa waggulu ennyo ogw’okubala. Kino si ssanyu kinene? Mazima ddala waliwo okusanyusa okusingawo mu kisuubizo eky’okubala ebibala okusinga singa twakakasibwa obugagga, oba obulamu, oba ekitiibwa.

Mukama Yesu, tuukiriza mangu ekigambo kyo eky’ekisa gye ndi, era ondeetere okuvaamu ebibala bingi ku lw’ettendo lyo!

Agusito 10

ATOOWAZA ALYOKE AGULUMIZE

"Mukama Katonda y’ayavuwaza era y’agaggawaza; atoowaza ate n’agulumiza." 1 Samwiri 2:7

Enkyukakyuka zange zonna ziva eri Oyo atakyukakyuka. Singa nnagaggawala, nandirabye omukono gwe mu ekyo, era nandimutenderezza; kale nange ndabe omukono gwe bwe nfuulibwa omwavu, era mmutendereze n’omutima gwonna nga bwe nandikoze. Bwe tukka wansi mu nsi eno, kiba kya Mukama, kale tuyinza okukikkiriza n’obugumiikiriza: bwe tulinnya waggulu mu nsi eno, kiba kya Mukama, era tuyinza okukikkiriza n’okwebaza. Mu buli ngeri, Mukama y’akikoze, era kirungi.

Kirabika engeri ya Yakuwa kwe kutoowaza abo b’ateekateeka okugulumiza, n’okwambula abo b’agenderera okwambaza. Bwe kiba nga y’engeri ye, y’engeri esinga amagezi era esinga obulungi. Bwe mba nga kaakano ngumiikiriza okutoowazibwa, nsaanidde okusanyuka, kubanga mu kwo ndabamu ennyanjula y’okugulumizibwa. Gye tukoma okutoowazibwa olw’ekisa, gye tulikoma okugulumizibwa mu kitiibwa. Obwavu obwo obulifuulibwa ekkubo ery’okutugaggawaza tusaanidde okubwaniriza.

Ayi Mukama, mu nnaku zino onzisizza wansi, n’ondeetera okuwulira obutono bwange n’ekibi kyange. Si kintu kisanyusa, naye nkwegayirira okifuule ekingasa. Kale, singa mu ngeri eyo onteekateeka okusobola okwetikka obuzito obusingawo obw’essanyu n’obw’okugasa; era bwe mba nga mmaze okwetegekera ekyo, olwo okimpe, ku lwa Kristo! Amiina.

Agusito 11

OKULINDIRIRA, SO SI KUDDUKA

"Emmeeme yange ewummulira mu Katonda yekka; oyo obulokozi bwange mwe buva." Zabbuli 62:1

Embeera ya mukisa! -- okuwummulira mu Mukama n’okumulindirira mu mazima era ye yekka. Eno ebeere embeera yaffe olunaku lwonna lwa leero, na buli lunaku. Okulindirira ekiseera kye, okulindirira nga tuli mu kuweereza kwe, okulindirira n’essuubi ery’essanyu, okulindirira mu kusaba, era nga tumativu. Emmeeme yennyini bw’elindirira bw’etyo, eba mu mbeera esinga obulungi era esinga amazima ekitonde kye kiyinza okubeeramu mu maaso g’Omutonzi waakyo, omuweereza mu maaso ga Mukama we, omwana mu maaso ga Kitaawe. Tetukkiriza kulagira Katonda, wadde okumwemulugunyiza; tetujja kukkiriza kunyiiganyiiga, wadde obutamwesiga. Mu kiseera kye kimu, tetudduka kukulembera kire, so tetunoonya buyambi eri balala: tewali na kimu ku ebyo ekyandibadde kulindirira Katonda. Katonda, era Katonda yekka, y’essuubi ly’emitima gyaffe.

Obukakafu obwa mukisa! -- obulokozi buva gy’ali; buli mu kkubo. Bulijja okuva gy’ali, so si eri mulala yenna. Ye y’alifuna ekitiibwa kyabwo kyonna, kubanga ye yekka y’asobola era y’alibukola. Era alibukola ddala mu kiseera kye ne mu ngeri ye. Alitulokola okuva mu kubuusabuusa, ne mu kubonaabona, ne mu kuwaayirizibwa, ne mu nnaku. Newaakubadde nga tetunnalaba kabonero kaakwo, tumativu okulindirira Mukama by’ayagala, kubanga tetulina kubuusabuusa kwonna ku kwagala kwe ne ku bwesigwa bwe. Alibukola ddala mu bujjuvu mu bbanga ttono, era tujja kumutendereza kaakano olw’okusaasira okujja.

Agusito 12

EKITANGAALA MU KIZIKIZA

"Oli ttaala yange, Ayi Mukama era Mukama wange yammulisiza mu nzikiza yange." 2 Samwiri 22:29

Ndi mu kitangaala? Kale ggwe, Ayi Mukama, oli ttaala yange. Singa ggwe oggyibwawo, essanyu lyange lyandigenze; naye ggwe bw’oba oli nange, nsobola okubeerawo awatali mimuli gya nsi eno n’ebimulisa eby’essanyu ebitonde. Nga okubeerawo kwa Katonda kwaka ekitangaala kya maanyi ku bintu byonna! Twawulira ku mmunaara ey’ettaala esobola okulabibwa okuva ku mayiro abiri, naye Yakuwa waffe si Katonda ali kumpi bukumpi, wabula alabibwa n’okuva wala, ne mu nsi y’omulabe yennyini. Ayi Mukama, mbeera musanyufu nga malayika okwagala kwo bwe kujjuza omutima gwange. Ggwe wekka gwe nneegomba.

Ndi mu kizikiza? Kale ggwe, Ayi Mukama, olimmulisiza mu nzikiza yange. Mu bbanga ttono ebintu bijja kukyuka. Ensonga ziyinza okweyongera okuzitowa, n’ekire ne kituumibwa ku kire; naye ne bwe kinaazikiza nnyo ne sisobola kulaba mukono gwange gwennyini, ndiraba omukono gwa Mukama. Bwe mba sisobola kuzuula kitangaala munda mu nze, wadde mu mikwano gyange, wadde mu nsi yonna, Mukama, eyagamba nti "Wabeerewo obutangaavu," ne waba obutangaavu, asobola okuddamu okwogera ekigambo kye kimu. Alinjogerera ne ntuuka mu musana. Sijja kufa, wabula nzija kuba mulamu. Obudde bumaze okutandika okukya. Ekyawandiikibwa kino ekiwoomerevu kyakaayakana ng’emmunyeenye ey’enkya. Ndikuba mu ngalo olw’essanyu nga n’essaawa nnyingi tezinnayitawo.

Agusito 13

NGA TEBANNAKOOWOOLA ERA NGA BAKYAKOOWOOLA

"Nga tebanakoowoola ndibaddamu, nga bakyayogera bati mbaddemu." Isaaya 65:24

Guno mulimu gwa mbiro! Mukama atuwulira nga tetunnakoowoola; era emirundi mingi atuddamu mu ngeri ye emu ey’embiro. Olw’okuba amanya ebyetaago byaffe n’okusaba kwaffe nga tebinnajja, ateekateeka ebintu mu ngeri nti ekyetaago nga tekinnatuuka aba amaze okukituukiriza, okugezesebwa nga tekunnatulumba aba amaze okutwambaza eby’okulwanyisa okukwolekera. Buno bwe bwangu bw’oyo amanyi byonna, era tukirabye emirundi mingi nga kikolebwa. Nga tetunnalowooza na kirooto ku kubonaabona okwali kujja, okubudaabudibwa okw’amaanyi okwali kugenda okutuwanirira mu kwo kwali kumaze okutuuka. Nga tulina Katonda addamu okusaba!

Ekitundu ky’ekigambo eky’okubiri kitujjukiza essimu. Newaakubadde nga Katonda ali mu Ggulu naffe nga tuli ku nsi, afuula ekigambo kyaffe, ng’ekigambo kye yennyini, okutambula n’embiro nnyingi. Bwe tusaba mu ngeri entuufu twogera mu kutu kwa Katonda. Omutabaganya waffe ow’ekisa atwalayo okwegayirira kwaffe amangu ago, ne Kitaffe omukulu akuwulira n’akumwenyera. Kuno kusaba kwa kitiibwa! Ani atandibadde mu kusaba ennyo ng’amanyi nti alina okutu kwa Kabaka wa bakabaka? Leero nzija kusaba mu kukkiriza, nga sikkiriza bukkiriza nti ndiwulirwa, wabula nti mpulirwa; si nti ndiddibwamu bwereere, wabula nti mmaze okufuna eky’okuddamu. Mwoyo Mutukuvu, nnyamba mu kino!

Agusito 14

OKUKANGAVVULA OMWANA SI KWA MIREMBE GYONNA

"Kyendiva nzikakkanya ezzadde lya Dawudi, naye si bbanga lyonna." 1 Bassekabaka 11:39

Mu maka ag’ekisa mulimu okukangavvula, era okukangavvula okwo kukambwe okumala okufuula okwonoona ekintu ekibi era ekikaawa. Sulemaani, eyawabibwa bakazi be ab’omu mawanga amalala, yali asimbye bakatonda abalala, n’asunguwaza nnyo Katonda wa kitaawe; kyeyava ekitundu eky’ekkumi mu ebiri eby’obwakabaka biyuzibwa ne bisimbibwa ng’obwakabaka obuvuganya. Kino kyali kubonaabona kunene eri ennyumba ya Dawudi, era kyajjira ku lulyo olwo nga kiva ku mukono gwa Katonda, ng’ekivudde mu nneeyisa etali ntukuvu. Mukama alikangavvula abaweereza be b’ayagala ennyo bwe baleka okugondera amateeka ge mu bujjuvu: oboolyawo mu kiseera kino kyennyini okukangavvula okufaanana ng’okwo kuli ku ffe. Katukaabe n’obuwombeefu nti "Ayi Mukama, ntegeeza ky’onvunaana."

Nga ekigambo eky’okulokola ekiwoomerevu kino -- "naye si bbanga lyonna!" Ekibonerezo ky’ekibi kya mirembe gyonna, naye okukangavvula okw’obwakitaawe okw’ekibi mu mwana wa Katonda kwa kiseera busa. Obulwadde, obwavu, okwennyamira kw’omwoyo, biriggwaawo nga bimaze okutuukiriza ekigendererwa kyabyo. Jjukira, tetuli wansi w’amateeka, wabula wansi w’ekisa. Oluga luyinza okutulumya, naye ekitala tekijja kututta. Ennaku yaffe eya kaakano egendererwa okutuleeta mu kwenenya, tuleme okuzikirizibwa awamu n’abakola ebibi.

Agusito 15

OMUSINGO OGW’ERINNYA

"Era buli kye munaasabanga mu linnya Lyange nnaakibakoleranga, Kitange alyoke agulumizibwe mu Mwana." Yokaana 14:13

Si buli mukkiriza eyayiga okusaba mu linnya lya Kristo. Okusaba si lwa ku bubwe bwokka, wabula mu linnya lye, nga tuweereddwa obuyinza okuva gy’ali, kwe kusaba okwa mutindo gwa waggulu. Tetwandiguma kusaba bintu bimu mu linnya eryo eddyereere, kubanga kyandibadde kulivvoola okw’ekivve; naye ekyo kye tusaba bwe kiba nga kituufu ddala ne tuguma okuteekako erinnya lya Yesu, olwo kiteekwa okuweebwa.

Okusaba kukakafu okusingawo okutuukirira kubanga kuli lwa kitiibwa kya Kitaffe nga kuyita mu Mwana. Kugulumiza amazima ge, obwesigwa bwe, amaanyi ge, n’ekisa kye. Okuweebwa kw’okusaba, nga kusabiddwa mu linnya lya Yesu, kiraga okwagala kwa Kitaffe eri Mwana, n’ekitiibwa ky’amuwadde. Ekitiibwa kya Yesu n’ekya Kitaffe bisibiddwa wamu nnyo, ne kiba nti ekisa ekigulumiza omu kigulumiza n’omulala. Omukutu gufuuka ogw’ettutumu olw’obujjuvu bw’ensulo, ne ensulo essibwamu ekitiibwa olw’omukutu mw’ekulukutira. Singa okuddibwamu kw’okusaba kwaffe kwandiswazza Mukama waffe, tetwandisabye; naye olw’okuba mu kino agulumizibwa, tujja kusaba awatali kukoowa mu linnya eryo ery’omwendo Katonda n’abantu be mwe balina obumu obw’essanyu.

Agusito 16

OKUBIKKULA N’OKWATULA EKIBI

"Oyo akweka ebibi bye, talifuna mukisa kukulaakulana, naye buli abyatula n’abireka, alisaasirwa." Engero 28:13

Lino lye kkubo ery’okusaasirwa eri omwonoonyi omuzzi w’omusango era eyeenenya. Ateekwa okulekayo empisa ey’okubikka ku kibi. Kino kigezebwako n’obulimba, obuwakanya ekibi; n’obunnanfuusi, obukikweka; n’okwewaana, okukiwolereza; n’okweyatula okwa waggulu, okugezaako okukiliyisa.

Omulimu gw’omwonoonyi kwe kwatula n’okuleka. Ebbiri zino ziteekwa okugenda wamu. Okwatula kuteekwa okukolebwa mu bwesimbu eri Mukama yennyini; era kuteekwa okulimu okukkiriza ensobi, okutegeera obubi bwayo, n’okugikyawa. Tetuteekwa kusuula musango ku balala, wadde okunenya embeera, wadde okwewolereza n’obunafu obwa buzaaliranwa. Tuteekwa okubyatula byonna awatali kukweka, ne twekkiriza omusango. Tewali kusaasirwa okutuusa nga kino kikoleddwa.

Ate era, tuteekwa okuleka ekibi: nga twekkirizza ensobi yaffe, tuteekwa okwegaana ekigendererwa kyonna eky’okati n’eky’omu maaso eky’okusigala mu kyo. Tetusobola kusigala mu bujeemu ate nga tubeera ne Kabaka ow’Ekitiibwa. Empisa embi eteekwa okulekebwa, awamu n’ebifo byonna, ne mikwano, n’ebigendererwa, n’ebitabo, ebiyinza okutuwabya. Si lwa kwatula, wadde okwekyusa, wabula nga bino biri wamu, tufuna okusonyiyibwa olw’okukkiriza mu musaayi gwa Yesu.

Agusito 17

ANI ALINA ABASINGA OBUNGI?

"Nnabbi n’addamu nti, Totya kubanga abali naffe bangi okusinga abali nabo." 2 Bassekabaka 6:16

Embalaasi n’amagaali, n’eggye eddene, byazingiza nnabbi mu Dosani. Omuweereza we omuvubuka yatya nnyo. Bandiwonye batya eggye ng’eryo ery’abasajja abalina ebyokulwanyisa? Naye nnabbi yalina amaaso omuweereza we ge yali talina, era yasobola okulaba eggye eddene erisingako, eririna ebyokulwanyisa ebisingako obulungi, nga limukuuma okuva mu buli kabi. Embalaasi ez’omuliro za maanyi okusinga embalaasi ez’ennyama, era amagaali ag’omuliro gasinga nnyo amagaali ag’ekyuma.

Bwe kityo bwe kiri ne mu kiseera kino. Abalabe b’amazima bangi, ba buyinza, bayivu, era ba magezi ga bukujjukujju; era amazima gabonaabonera mu mikono gyabwe; naye omuntu wa Katonda talina nsonga ya kutya. Amaanyi, agalabika n’agatalabika, ag’ekika ekisinga obw’amaanyi, gali ku ludda lw’obutuukirivu. Katonda alina amaggye ageekwese aganeeyoleka mu kiseera eky’obwetaavu. Amaanyi agali ku ludda lw’ekirungi n’amazima gasinga nnyo amaanyi g’ekibi. Kale, tukuume emyoyo gyaffe nga gizzeemu amaanyi, era tutambule ng’abantu abalina ekyama ekisanyusa, ekibasitudde waggulu w’okutya kwonna. Tuli ku ludda oluwangula. Olutalo luyinza okuba olw’amaanyi, naye tumanyi bwe lulikoma. Okukkiriza, nga kulina Katonda, kuli mu bungi obweyolefu: "abali naffe bangi okusinga abali nabo."

Agusito 18

ABANOONYA, ABAZUULA

"Bw’onoomunoonyanga, onoomulabanga." 1 Ebyomumirembe 28:9

Twetaaga Katonda waffe; afunika olw’okumunoonya; era tajja kwemma omuntu n’omu ku ffe singa buli omu amunoonya amaaso ge. Si nti bw’omusaanira, oba bw’ogula okuganza kwe, wabula "bw’omunoonya" kyokka. Abo abamanyi dda Mukama basaana okweyongera okunoonya amaaso ge nga bayita mu kusaba, mu kuweereza n’obunyiikivu, ne mu kwebaza okutukuvu: abo tajja kubamma kuganza kwe na bumu bwe. Abo, abatannaba kumumanya okutuusa emmeeme zaabwe we ziwummulira, basaana okutandika okunoonya amangwago, ne batakoowa okutuusa lwe bamulaba nga Omulokozi waabwe, Mukwano gwaabwe, Kitaabwe, era Katonda waabwe.

Nga ekisuubizo kino kiwa obukakafu obw’amaanyi eri anoonya! "Anoonya, azuula." Ggwe, weewaawo ggwe, bw’onoonya Katonda wo olimulaba. Bw’omulaba oba ofunye obulamu, okusonyiyibwa, okutukuzibwa, okukuumibwa, n’ekitiibwa. Toonoonye, n’okweyongera okunoonya, obanga tojja kunoonya bwereere? Munange omwagalwa, noonya Mukama kaakano. Wano we wali ekifo, era kaakano ke kiseera. Funya ejjovu eryo ekkakanyavu; weewaawo, funya ensingo eyo esingako obukakanyavu, okaabire Katonda, Katonda omulamu. Mu linnya lya Yesu noonya okulongoosebwa n’okuweebwa obutuukirivu. Tojja kugaanibwa. Wano waliwo obujulizi bwa Dawudi eri mutabani we Sulemaani, era bwe bujulizi bw’omuwandiisi w’ekitabo kino yennyini eri omusomi. Kikkirize era okikolereko, ku lwa Kristo.

Agusito 19

EMPEERA Y’ABATUUKIRIVU

"Awo abantu bonna balyogera nti, 'Ddala, abatuukirivu balwanirirwa. Ddala waliwo Katonda alamula mu bwenkanya ku nsi.'" Zabbuli 58:11

Emisango gya Katonda mu bulamu buno tegirabika bulungi bulijjo, kubanga emirundi mingi ekintu kimu kituuka ku bonna mu ngeri y’emu. Kino kye kiseera eky’okugezesebwa, si eky’okubonerezebwa oba okuweebwa empeera. Naye oluusi Katonda akola ebintu eby’entiisa mu butuukirivu, era n’abo abatafaayo bawalirizibwa okukkiriza omukono gwe.

Ne mu bulamu buno obutuukirivu bulina empeera eyo gye businga okwagala okusinga endala zonna, kwe kuseka kwa Katonda, okuleeta omuntima omuteefu. Oluusi empeera endala zigoberera, kubanga Katonda tayagala kubeera na bbanja lya muntu yenna. Naye mu kiseera kye kimu, empeera enkulu ey’abatuukirivu eri mu bulamu obugenda okujja.

Ate era, mu ngeri engazi, tulaba obuleeteredde bw’Omufuzi omukulu mu mawanga. Amenyaamenya entebe z’obwakabaka enjooza, era abonereza abantu abazza omusango. Tewali n’omu ayinza okwekenneenya ebyafaayo eby’okugulumira n’okugwa kw’obwakabaka nga tategedde nti waliwo amaanyi agaleetera obutuukirivu, era ku nkomerero, agaleeta obutali butuukirivu mu maaso g’embuga yaago, ne gagusalira omusango n’obwenkanya obutasonyiwa. Ekibi tekiirekebwe nga tekibonerezebbwa, n’obulungi tebulirekebwa nga tebuweereddwa mpeera. Omulamuzi w’ensi yonna ateekwa okukola eby’ensonga. Kale, tumutye, tuleke okutya amaanyi g’ababi.

Agusito 20

OKUWONYA TEKULINA KKOMO

"Alikuwonya mu buzibu bwa ngeri mukaaga. Weewaawo ne mu ngeri musanvu tootuukibwengako kulumizibwa." Yobu 5:19

Erifaazi mu kino yayogera amazima ga Katonda. Tuyinza okuba n’ebizibu bingi ng’ennaku ez’emirimu mu wiiki, naye Katonda eyakola ku nnaku ezo omukaaga anaatukolera okutuusa okuwonyezebwa kwaffe lwe kunaatuukiririra. Tunaawummulira wamu naye, era mu ye, ku Ssabbiiti yaffe. Okuddiriragana amangu kw’ebigezo kwe kumu ku bigezo ebisinga obuzibu eri okukkiriza. Nga tetunnaba kuwona ekifuba ekimu, kiddirirwa ekirala n’ekirala okutuusa lwe tusagaasagana. Naye era okuddiriragana amangu kw’okuwonyezebwa kusanyusa nnyo. Ennyimba empya ziweesebwa ku lweede n’ennyondo ey’okubonaabona, okutuusa lwe tulaba mu nsi ey’omwoyo ekifaananyi ekituufu eky’"the Harmonious Blacksmith." Obwesige bwaffe bwe buno nti, Mukama bw’afuula ebigezo byaffe mukaaga, ginaaba mukaaga, so tegiisukke.

Kiyinzika okuba nga tetulina lunaku lwa kuwummula, kubanga ebizibu musanvu bitujjira. Kale kiki ekiddako? "Ne mu ngeri musanvu tootuukibwengako kulumizibwa." Ekibi kiyinza okutuwulugumira, naye kinaakuumibwa wala okusinga obuwanvu bw’omukono, so tekiitutuukeeko n’akatono. Omukka gwakyo ogw’ebbugumu guyinza okututawaanya, naye olugalo lwakyo olutono terusobola kutussibwako.

Nga twesibye ebiwato byaffe, tunaasisinkana ebizibu omukaaga oba omusanvu, ne tulekera okutya abo abatalina Kitaawe, abatalina Mulokozi, era abatalina Mutukuza.

Agusito 21

EKIRO EKY’OKUKAABA; OLUNAKU OLW’ESSANYU

"Kubanga obusungu bwe bwa kiseera buseera, naye obulungi bwe bwa mirembe gyonna. Amaziga gayinza okubaawo ekiro kyokka essanyu ne lijja nga bukedde." Zabbuli 30:5

Akaseera wansi w’obusungu bwa Kitaffe kafaanana ng’akawanvu nnyo, naye mu butuufu kaseera buseera bwokka. Bwe tunakuwaza Omwoyo we tetuyinza kusuubira kuseka kwe; naye ye Katonda eyeeteeseteese okusonyiwa, era mangu ago aggyawo okujjukira kwonna okw’ensobi zaffe. Bwe tuzirika ne tuba kumpi n’okufa olw’amaaso ge amakambwe, obulungi bwe bututeekamu obulamu obuggya.

Olunyiriri luno lulina eddoboozi eddala erya kika kya kaseera katono. Ekiro kyaffe eky’okukaaba mangu kifuuka olunaku olw’essanyu. Obumpi bwe kabonero k’okusaasira mu kiseera eky’okukangavvula abakkiriza. Mukama tayagala kukozesa muggo ku balonde be; awa ekifuba kimu oba bibiri, ne biggwaawo; weewaawo, obulamu n’essanyu ebigoberera obusungu n’okukaaba bisukkuluma okuliwa ennaku ennungi.

Jjangu, ggwe mutima gwange, tandika Aleruuya zo! Tokaabira kiro kyonna, naye siimuula amaaso go ng’osuubira enkya. Amaziga gano matu agatuleetera ebirungi bingi nga bwe geenkana emisana gy’enkya. Amaziga gayonja amaaso okulaba Katonda mu kisa kye; era gafuula okulaba obulungi bwe okuba okw’omuwendo omungi. Ekiro eky’ennaku kiwa ebifaananyi ebyo eby’ekisiikirize ebireetera ebitangaavu okulabika obulungi. Byonna biri bulungi.

Agusito 22

OBUSUNGU BW’OMUNTU BUTENDEREZA KATONDA

"Bw’osunguwalira omuntu kikuleetera okutenderezebwa, n’abo b’otasunguwalidde ne beegendereza." Zabbuli 76:10

Abantu ababi banaabanga n’obusungu. Obusungu bwabwe tuteekwa okubugumiikiriza ng’akabonero k’okuyitibwa kwaffe, akabonero ak’okwawukana kwaffe okuva ku bo: singa twali ba nsi, ensi yandyagadde abab’ayo. Obusanyufu bwaffe bwe buno nti obusungu bw’omuntu bulifuulibwa okuzzaayo ekitiibwa eri Katonda. Ababi bwe baakomerera Omwana wa Katonda mu busungu bwabwe, baali batuukiriza ekigendererwa kya Katonda nga tebamanyi, era mu mbeera nkumi n’enkumi obukakanyavu bw’abatatya Katonda bukola bwe bumu. Beerowoozako nga ba ddembe, naye ng’abasibe abali mu njegere bakola ebiragiro bya Ayinzabyonna nga tebategedde.

Enkwe z’ababi zifuulibwa okubaleetera okuwangulwa. Bakola mu ngeri eyeetta, ne baremesa enteekateeka zaabwe bo. Tewali kiva mu busungu bwabwe ekiyinza okutukola akabi ka nsonga. Bwe baayokya abaafiira okukkiriza, omukka ogwava ku muti ogw’okwokerwako gwatamiiza abagoberezi b’Enzikiriza ya Papa okusinga ekintu kirala kyonna.

Ate era, Mukama alina ekisiba akamwa n’olujegere olw’eddubu. Aziyiza obusungu obusinga obukambwe obw’omulabe. Ali ng’omuntu asa obutta akuuma amazzi amangi mu mugga, era ago g’akkiriza okukulukuta agakozesa okukyusa nnamuziga we. Tuleme okusinda, wabula tuyimbe. Byonna biri bulungi, empewo ne bw’ekunta n’amaanyi atya.

Agusito 23

YAGALA ERA NOONYA AMAGEZI AMATUUFU

"Njagala abo abanjagala, n’abo abanyiikira okunnoonya bandaba." Engero 8:17

Amagezi gaagala abagaagala, era ganoonya abaganoonya. Alina amagezi dda oyo anoonya okuba n’amagezi, era anaatera okugafuna oyo agananyiikira n’obunyiikivu. Ekituufu ku magezi mu bujjuvu kyateekwa okuba ekituufu ennyo ku magezi agali mu Mukama waffe Yesu. Ye gwe tuteekwa okwagala n’okunoonya, ate mu kuddamu tunaasanyukira okwagala kwe, ne tumufuna ye yennyini.

Omulimu gwaffe kwe kunoonya Yesu nga tukyali bato. Balina omukisa abavubuka enkya yaabwe gye bamalira ne Yesu! Tewali kiseera kya mangu nnyo eri okunoonya Mukama Yesu. Abanoonya amangu bafuuka abazuula abeesigika. Tuteekwa okumunoonya amangu n’obunyiikivu. Abasuubuzi abakulaakulana bagolokoka mangu, n’abatukuvu abakulaakulana banoonya Yesu n’obunyiikivu. Abo abazuula Yesu ne bagaggawala bawaayo emitima gyabwe okumunoonya. Tuteekwa okumunoonya ye asooke, bw’atyo asookere ddala. Okusinga ebintu byonna, Yesu. Yesu asooke, so tewaba kirala newankubadde ng’eky’okubiri ekibi.

Omukisa gwe guno nti alizuulibwa. Yeeyoleka nga bw’akulaakulana obulungi eri okunoonya kwaffe. Yeewaayo yekka mu bujjuvu eri obussakkani bwaffe. Balina omukisa abasajja abanoonya Oyo, ng’amaze okuzuulibwa, asigala nabo emirembe gyonna, eky’obugagga ekyeeyongera okuba eky’omuwendo eri emitima gyabwe n’okutegeera kwabwe.

Mukama Yesu, nkuzudde; nzuulibwe gy’oli mu kigero eky’essanyu n’okumatira ekitayogerekeka.

Agusito 24

KATONDA ASINGA AMAGEZI G’ABANTU

"Kubanga kyawandiikibwa nti, 'Ndizikiriza amagezi g’abagezi, ne nzigyawo okumanya kw’abayivu.'" 1 Abakkolinso 1:19

Olunyiriri luno kutiisa eri abo abalina amagezi ag’ensi, naye eri omukkiriza omwangu kisuubizo. Abeeyita abayigirize bulijjo bagezaako okumalawo okukkiriza kw’omukkiriza omuwombeefu, naye bagwa mu kugezaako kwabwe. Ensonga zaabwe zivaanika, ebirowoozo byabwe bigwa olw’obuzito bwabyo bwennyini, enteekateeka zaabwe enziika zeeyolekera nga tezinnaakola bye zaayagala. Enjiri enkadde tennaggwaawo, so teriggwaawo Mukama ng’akyali mulamu. Singa yandisobose okumalibwawo, yandibuze ku nsi edda ennyo.

Tetuyinza kuzikiriza magezi g’abagezi, so tetwetaaga kugezaako, kubanga omulimu guli mu mikono egisinga obulungi. Mukama yennyini agamba nti, "Ndikola bwe ntyo," so tasalawo kya bwereere. Emirundi ebiri mu lunyiriri luno alangirira ekigendererwa kye, era tuyinza okuba abakakafu nti taakiveeko.

Mukama akola omulimu omuyonjo nnyo ku by’amagezi g’ensi ne ku "ndowooza ey’omulembe" bw’agissaako omukono gwe! Endabika ennungi agissa wansi awo; azikiririza ddala embaawo, essubi, n’ebisasiro. Kyawandiikibwa nti bwe kiribeera bwe kityo, era bwe kiribeera bwe kityo. Mukama, kikole mangu. Amiina, era Amiina.

Agusito 25

EMMERE N’OKUWUMMULA

"Nze kennyini ndirabirira endiga zange, ne nzigalamiza wansi mirembe, bw’ayogera Mukama Katonda." Ezeekyeri 34:15

Wansi w’obusumba obw’obwakatonda abatukuvu baliisibwa okukkuta. Ekyabwe si mmere ya mpewo, etakkusa, ey’"endowooza" y’abantu buntu; wabula Mukama abaliisa ku mazima amanywevu, ag’omugaso ag’okubikkulirwa kwa Katonda. Waliwo emmere entuufu ey’emmeeme mu Byawandiikibwa nga Omwoyo Omutukuvu bw’abireeta ku mutima. Yesu yennyini y’Emmere entuufu ewanirira obulamu bw’abakkiriza. Wano Omusumba waffe Omukulu asuubiza nti emmere eyo entukuvu yaffe yennyini y’anaagituwa. Bwe kiba nti, ku Lunaku lwa Mukama, omusumba waffe ow’oku nsi talina ky’alina, Mukama ye alina.

Ebirowoozo bwe bijjula amazima amatukuvu, biwummula. Abo Yakuwa b’aliisa bali mu mirembe. Tewali mbwa eribatawaanya, tewali musege alibalya, tewali kwegomba kutabukatabuka kulibateganya. Baligalamira ne bagaaya emmere gye baawoomeddwa. Enjigiriza ez’ekisa tezikoma ku kuwanirira kyokka, naye era zisanyusa: mu zo tulinamu eby’okuzimba n’okugalamira. Ababuulizi bwe batatuwa kuwummula, ka tutunuulire Mukama.

Ku lunaku luno Mukama atuleetere okulya mu ddundiro ery’Ekigambo, era atugalamize omwo. Waleme kubaawo busirusiru, so n’okweraliikirira, wabula Okufumiitiriza n’Emirembe kwe biraga olunaku luno.

Agusito 26

OYO OW’OMUNTIMA OGWEKENGERA

"Ndisala omusango mu bwenkanya wakati w’endiga n’endiga." Ezeekyeri 34:22

Abamu bagevvu era bakulaakulana, kyebava baba abatalina kisa eri abanafu. Kino kibi kinene, era kireeta ennaku nnyingi. Okusindika okwo n’embiriizi ne kibegabega, n’okutomera abalwadde n’ejjembe, kwe kwesittaza okunakuwaza mu nkuŋŋaana z’abeeyita abakkiriza. Mukama alaba ebikolwa bino eby’amalala era ebitalina kisa, era bimusunguwaza nnyo, kubanga ayagala abanafu.

Omusomi ali omu ku banyoomebwa? Muntu akaabira mu Sayuuni, era alagiddwako olw’omuntima gwe ogwekengera? Baganda be bamusalira omusango n’obukambwe? Aleme okunyiigira enneeyisa yaabwe; okusingira ddala aleme okuddamu okusindika n’okutomera. Ka aleke ensonga mu mikono gya Mukama. Ye ye Mulamuzi. Lwaki twagala okweyingiza mu mulimu gwe? Alisalawo mu butuukirivu okusinga ffe bwe tuyinza. Ekiseera kye eky’okusala omusango kye kisinga obulungi, so tetwetaaga kwanguyiriza kukireeta.

Omujoozi ow’omutima omukakanyavu ka akankane. Wadde ng’ayinza okulinnyirira abalala awatali kubonerezebwa mu kiseera kino, ebigambo bye byonna eby’amalala biwandiikiddwa, era buli kimu ku byo kiteekwa okubalirwako mu maaso g’embuga y’Omulamuzi Omukulu.

Gumiikiriza, ggwe mmeeme yange! Gumiikiriza! Mukama amanyi ennaku yo. Yesu wo akusaasira!

Agusito 27

ABANTU AB’OMUTINDO

"Nkugezesezza mu kirombe ky’okubonaabona." Isaaya 48:10

Kino ekiseera kiwanvu kibadde kigambo kyaffe eky’omukulu ekiteekeddwa mu maaso gaffe ku kisenge ky’ekisenge kyaffe eky’okwebaka, era mu ngeri nnyingi kiwandiikiddwa ne ku mutima gwaffe. Si kintu kya bwereere okulondebwa Katonda. Okulonda kwa Katonda kufuula abalonde okuba abantu ab’omutindo. Kirungi okuba omulonde wa Katonda okusinga okuba omulonde w’eggwanga lyonna. Enkizo eno nnene nnyo, olwo buli kikakasa kye kigattibwako tukikkiriza n’essanyu lingi, nga bwe Omuyudaaya bwe yalya enva ez’omululu olw’Omwana gw’Endiga ogw’Okuyitako. Tulonda ekikoomi, kubanga Katonda atulondera mu kyo.

Tulondebwa ng’abantu ababonaabona, so si ng’abantu abakulaakulana, tulondebwa si mu lubiri, wabula mu kikoomi. Mu kikoomi obulungi bwonoonebwa, endabika ezikirizibwa, amaanyi gasaanuusibwa, ekitiibwa kimalibwawo, naye wano okwagala okutaggwaawo kubikkula ebyama byakwo, ne kulangirira kwe kulonze. Bwe kityo bwe kibadde gye tuli. Mu biseera eby’ebigezo ebisinga obukambwe Katonda atwolekedde okuyitibwa kwaffe n’okulondebwa kwaffe mu bujjuvu, era tukikakasizza: olwo ne tulonda Mukama okuba Katonda waffe, era yalaze nti mazima ddala tuli balonde be. Kale, bwe kiba nti leero ekikoomi kyakibwa emirundi musanvu okusinga, tetuukitye, kubanga Omwana wa Katonda ow’ekitiibwa anaatambulira naffe wakati mu manda agaaka.

Agusito 28

OKUVA MU MBEERA YONNA

"Naye nze nkoowoola Mukama Katonda, n’andokola." Zabbuli 55:16

Yee, nteekwa era nnaasaba. Kiki ekirala kye nnyinza okukola? Kiki ekisinga obulungi kye nnyinza okukola? Nga nzigiddwako olukwe, ndekeddwa, nnakuwadde, ntabuddwatabuddwa, ai Mukama wange, nnaakukoowoola. Zikulagi wange afuuse vvu, era abantu boogera ku kunkasuukirira amayinja; naye ngguma omutima gwange mu Mukama, anaampitya mu kigezo kino nga bwe yampisa mu birala bingi. Yakuwa anandokola; nkakasa nti anaakikola, era nnangirira okukkiriza kwange.

Mukama, so si mulala yenna, y’anandokola. Saagala mubeezi mulala, so sandyesize mukono gwa mubiri newankubadde nga nnandisobodde. Nnaamukaabirira akawungeezi, ne ku makya, ne mu ttuntu, so sirikaabirira mulala yenna, kubanga amala byonna.

Engeri gy’anandokolamu siyinza kugigerageranya; naye anaakikola, mmanyi. Anaakikola mu ngeri esinga obulungi era esinga obwesigwa, era anaakikola mu ngeri esinga obunene, obutuufu, n’obujjuvu. Okuva mu kuzibu kuno ne mu buzibu bwonna obw’omu maaso, Oyo Omukulu, Ndi, anaandeeta nga bw’ali omulamu ddala; era okufa bwe kunajja, n’ebyama byonna eby’emirembe gyonna bwe binaakigoberera, kino kinaasigala nga kya mazima: "Mukama anandokola." Kino kinaaba luyimba lwange olunaku luno lwonna olw’ekiseera eky’amakungula. Si kifaanana ng’ekibala ekyengedde ekiva ku muti ogw’obulamu? Nnaalya ku lyo. Nga liwoomera akamwa kange!

Agusito 29

OKUWUMMUZIBWA OKUNGI

"Balibeera ng’ennimiro efukiririddwa obulungi." Yeremiya 31:12

Nga kirungi omuntu okuba n’emmeeme ye eri wansi w’okulimibwa okw’omu ggulu; nga tekyali ddungu, wabula nnimiro ya Mukama! Ng’eggaddwa okuva mu matongo, ng’ezingiziddwa bbugwe wa kisa, ng’esimbiddwa okuyigirizibwa, ng’ekyalibwa okwagala, ng’ekoleddwako omuddo okuva mu kukangavvula okw’omu ggulu, era ng’ekuumibwa amaanyi ga Katonda, emmeeme y’omuntu eyagalwa etegekeddwa okubala ebibala eri Mukama.

Naye ennimiro eyinza okukala olw’obutaba na mazzi, olwo n’ebimera byayo byonna ne biwotoka, ne biba kumpi n’okufa. Ai mmeeme yange, kino kyandituuse mangu atya singa Mukama akuvaako! Mu buvanjuba, ennimiro etaliimu mazzi mangu ago erekera awo okuba ennimiro n’akatono: tewali kisobola kutuukirira, kukula, wadde okuba obulamu. Okufukirira bwe kweyongera, ekivaamu kisanyusa. Nga kirungi emmeeme y’omuntu okufukirirwa Omwoyo Omutukuvu mu ngeri eyeenkanankana -- buli kitundu ky’ennimiro nga kirina omukutu gwakyo; mu bungi -- okuwummuzibwa okumala nga kutuuka ku buli muti na buli kimera, wadde nga kirina ennyonta etya olw’obuzaale bwakyo; obutakoma -- buli saawa nga ereeta si bbugumu lyokka, naye n’okuwummuzibwa; mu magezi -- buli kimera nga kifuna ekyo kyennyini kye kyetaaga. Mu nnimiro osobola okulaba olw’obulamu bw’ebimera awo amazzi we gakulukutira, era osobola mangu okutegeera Omwoyo wa Katonda bw’ajja.

Ai Mukama, mfukirira leero, era onnyambe okukuvaako empeera enjjuvu, ku lwa Yesu. Amiina.

Agusito 30

OKUBUDAABUDA, OBUKUUMI, OKUMATIRA

"Ennyumba yange tetuukiridde mu maaso ga Katonda? Teyalagaana nange endagaano ey’enkalakkalira, n’agiteekateeka era n’aginyweza mu buli nsonga? Ekimulobera okumpa omukisa, n’okuddamu buli kye mmusaba, kiki?" 2 Samwiri 23:5

Kino si kisuubizo kimu nga bwe kiri, wabula kuŋŋaanya ya bisuubizo -- essanduuko ejjudde obuulu. Endagaano y’essanduuko erimu ebintu byonna.

Bino bye bigambo bya Dawudi eby’enkomerero, naye biyinza okuba byange leero. Wano waliwo okussa ekikkowe: ebintu tebiri nga bwe nnandyagadde eri nze n’abange; waliwo ebigezo, okweraliikirira, n’ebibi. Bino bifuula omutto okuba omukakanyavu.

Wano waliwo eky’okubudaabuda -- "Yalagaana nange endagaano ey’enkalakkalira." Yakuwa yeewaddeyo gye ndi, era yakakasa endagaano n’omusaayi gwa Yesu. Nsibiddwa ku Katonda wange, ne Katonda wange ku nze.

Kino kireeta mu lwatu obukuumi, kubanga endagaano eno ya lubeerera, nga nnungi era nga ya kakafu. Tewali kya kutya olw’okuyita kw’ebiro, olw’okulemererwa kw’akatundu akeerabiddwa, oba olw’obutakakata bw’ebintu obw’obuzaale. Endagaano y’omusingi ogw’olwazi ogw’okuzimbako mu bulamu oba mu kufa.

Dawudi awulira okumatira: teyeetaaga kirala olw’obulokozi oba olw’essanyu. Alokolebbwa, era asanyuse. Endagaano y’ekyo kyonna omuntu ky’ayinza okwegomba.

Ai mmeeme yange, kyuka leero odde eri Mukama wo Yesu, Mukama omukulu gwe yawaayo okuba endagaano eri abantu. Mutwale abe byonna byonna gy’oli.

Agusito 31

EKYA KATONDA, EKIRAMU EMIREMBE GYONNA, EKITAKYUKA

"Naye ekigambo kya Mukama Katonda kibeerera emirembe gyonna. Era ekigambo ekyo y’Enjiri eyababuulirwa." 1 Peetero 1:25

Okuyigiriza kwonna okw’abantu, era mazima, n’abantu bonna, kulyita ng’omuddo ogw’omu ttale; naye wano tukakasibwa nti Ekigambo kya Mukama kya ngeri ya njawulo nnyo, kubanga kinaabeerera emirembe gyonna.

Wano tulina Enjiri eya Katonda; kubanga kigambo ki ekiyinza okubeerera emirembe gyonna okuggyako ekyo ekyogerwa Katonda ataggwaawo?

Wano tulina Enjiri eramu ennaku zonna, ejjudde obulamu nga bwe yali ng’ekyaakava ku mimwa gya Katonda; nga ya maanyi okukakasa n’okukyusa, okuzaalibwa obuggya n’okubudaabuda, okuwanirira n’okutukuza, nga bwe yabeeranga mu nnaku zaayo ezaasooka ez’okukola eby’amagero.

Tulina Enjiri etakyuka, etali muddo mubisi leero, ate nga essubi ekkalu enkya; wabula bulijjo ge mazima agabeerera ag’oyo Yakuwa atakyukakyuka. Endowooza zikyuka, naye amazima agakakasibwa Katonda tegayinza kukyuka kusinga Katonda oyo eyagayogera.

Kale, wano tulina Enjiri gye tusanyukira, ekigambo kya Mukama kye tuyinza okwesigamiza obuzito bwaffe bwonna. "Emirembe gyonna" mulimu obulamu, okufa, omusango, n’obutaggwaawo. Ekitiibwa kibe eri Katonda mu Kristo Yesu olw’okubudaabudibwa okutaggwaawo. Lya ku kigambo leero, ne mu nnaku zonna ez’obulamu bwo.