Omwezi gwa Marisi

Marisi 1

ESSANYU ERI ABAAGOBEBWA

"Muwulirize ekigambo kya Mukama Katonda mmwe abakankanira ekigambo kye. Baganda bammwe abatabaagala era ababayigganya olw’erinnya lyange babasekerera nti, ‘Leka Mukama alage obukulu bwe abalokole tulabe bwe musanyuka!’ Naye bo be banaakwasibwa ensonyi." Isaaya 66:5

Oboolyawo ekyawandiikibwa kino kiyinza obutakwata ku muntu n’omu mu lukumi ku basomi b’akatabo kano ak’ebisuubizo; naye oyo omu Mukama amugumya n’ebigambo ng’ebyo. Tusabire bonna abagobebwa mu bukyamu okuva mu kibiina kye baagala. Mukama abalabikire basanyuke!

Ekyawandiikibwa kino kikwata ku bantu ab’ekisa ddala abakankanira ekigambo kya Mukama. Abo baakyayibwa baganda baabwe, era oluvannyuma ne bagobebwa olw’obwesigwa bwabwe n’obutukuvu bwabwe. Kino kiteekwa okuba nga kyabakaayirira nnyo; era ne kisingawo kubanga okugobebwa kwabwe kwakolebwa mu linnya ly’eddiini, nga kirabika ng’ekigendererwa kwe kugulumiza Katonda. Nga bingi ebikolerwa Setaani mu linnya lya Katonda! Okukozesa erinnya lya Yakuwa okwongera obusagwa mu kuluma kw’omusota ogw’edda kya kyokulabirako ky’obukujjukujju bwe.

Okulabika kwa Mukama ku lwabwe ly’essuubi ly’abantu be abayigganyizibwa. Alabika ng’omuwolereza era omutaasa w’abalonde be; era bw’akola bw’atyo, kitegeeza okununulibwa okw’enkukunala eri abatya Katonda, n’ensonyi eri ababajooga. Ayi Mukama, tuukiriza ekigambo kino eri abo abantu be basekerera!

Marisi 2

OKUGABA MU KASIRISE

"Naye ggwe bw’obanga ogabira omuntu yenna ekintu omukono gwo ogwa kkono guleme kumanya ogwa ddyo kye gukola. Kale Kitaawo amanyi ebyama byonna alikuwa empeera." Matayo 6:3,4

Tewali kisuubizo kiweebwa abo abagabira abaavu abantu babalabe. Abo empeera yaabwe bagifuna amangu ago, era tebayinza kusuubira kusasulwa mirundi ebiri.

Tukweke okugaba kwaffe; -- weewaawo, tukukweke ne ffe ffennyini. Gaba emirundi mingi era ebingi ng’ekintu ekya bulijjo, olwo obutaddamu kussaayo mwoyo nti oyambye omwavu, nga bw’otossaayo mwoyo nti olidde emmere yo eya bulijjo. Gaba nga toyogera ne mu kaama n’eri ggwe kennyini nti, "Nga ndi mugabi!" Togezaako bw’otyo okwesasula wekka. Ekyo kirekere Katonda, atalemwa kulaba, kuwandiika na kusasula. Alina omukisa omuntu akolera ekisa kye mu kyama: afuna essanyu ery’enjawulo mu bikolwa bye eby’obulungi ebitamanyiddwa. Guno gwe mugaati, oguliibwa mu kyama, oguwooma okusinga embaga za bakabaka. Nnyinza ntya leero okwesanyusa n’eby’omuwendo bino ebiwoomerera? Ka nfune embaga ddala ey’ekisa n’okukulukuta kw’omwoyo.

Wano ne mu biseera ebijja, Mukama, Ye yennyini, y’alirabirira okusasula oyo agaba mu kyama. Kino kiriba mu ngeri ye ne mu kiseera kye; era alironda ekisinga obulungi. Ekisuubizo kino kye kitegeeza kwetaaga emirembe n’emirembe okukibikkula.

Marisi 3

TETULEKEBWA KUZIKIRIRA

"Kubanga omwoyo gwange toliguleka magombe, wadde okukkiriza Omutukuvu wo okuvunda." Zabbuli 16:10

Ekigambo kino kituukirizibwa mu butuufu mu Mukama Yesu; naye era kikwata, mu ngeri eyawukanako, ku bonna abali mu Ye. Omwoyo gwaffe teguulekebwe mu mbeera ey’okwawukana n’omubiri, n’omubiri gwaffe, ne bwe gulivunda, gulizuukira nate. Amakulu ag’awamu, so si ag’enjawulo ag’okukikozesa, ge twagala abasomi baffe okulowoozaako mu kiseera kino.

Tuyinza okukka wansi nnyo mu mwoyo okutuusa lwe tulabika ng’abasuuliddwa mu bunnya bwa magombe; naye tetuulekebwe eyo. Tuyinza okulabika ng’abali ku mulyango gw’okufa mu mutima, ne mu mwoyo, ne mu kutegeera; naye tetuyinza kusigala eyo. Okufa kwaffe okw’omunda ku bikwata ku ssanyu n’essuubi kuyinza okugenda wala nnyo; naye tekuyinza kutuuka ku bituuka byakwo ebijjuvu, ne kutuuka ku kuvunda okw’enkomeredde okw’okuggwaamu essuubi okw’ekizikiza. Tuyinza okukka wansi nnyo, naye si wansi okusinga Mukama w’akkiriza; tuyinza okumala akaseera mu kkomera erya wansi ennyo ery’okubuusabuusa, naye tetuuzikirire eyo. Emmunyeenye ey’essuubi ekyali ku ggulu ekiro bwe kiba kizikidde ennyo. Mukama taatwerabire n’atuwaayo eri omulabe. Tuwummulire mu ssuubi. Tulina okukolagana n’Oyo okwagala kwe kubeerera emirembe gyonna. Mazima, okuva mu kufa, ne mu kizikiza, ne mu kuggwaamu essuubi tulizuukira ne tudda mu bulamu, ne mu kitangaala, ne mu ddembe.

Marisi 4

SSAAMU KATONDA EKITIIBWA

"Abanzisaamu ekitiibwa bennassangamu ekitiibwa" 1 Samwiri 2:30

Ekitiibwa kya Katonda nkifuula ekigendererwa ekikulu eky’obulamu bwange n’etteeka ly’empisa zange? Bwe kiba bwe kityo, alinzisaamu ekitiibwa. Nnyinza okumala akaseera nga sifuna kitiibwa kuva mu bantu, naye Katonda Ye yennyini alinteekako ekitiibwa mu ngeri esinga okuba ey’amaanyi. Ku nkomerero kirizuulibwa nti ekkubo erisinga okuba ery’obwesige erituusa ku kitiibwa kwe kukkiriza okuswazibwa olw’omuntu ow’omunda.

Eri teyassaamu Mukama kitiibwa nga afuga obulungi ennyumba ye, ne batabani be tebaassaamu Mukama kitiibwa nga beeyisa mu ngeri esaanira omulimu gwabwe omutukuvu, n’olwekyo Mukama teyabassaamu kitiibwa, wabula yaggya obukabona obukulu mu nnyumba yaabwe, n’afuula Samwiri omuto okuba omufuzi mu nsi mu kifo ky’omuntu yenna ow’omu lulyo lwabwe. Bwe mba njagala ennyumba yange okugulumizibwa, nteekwa okussaamu Mukama ekitiibwa mu byonna. Katonda ayinza okukkiriza ababi okufuna ebitiibwa eby’ensi; naye ekitiibwa Ye yennyini ky’awa, kwe kugamba ekitiibwa, ettendo n’obulamu obw’emirembe n’emirembe, akiterekera abo abassaamu ekitiibwa nga bamuwulira mu butukuvu.

Kiki kye nnyinza okukola leero okussaamu Mukama ekitiibwa? Ndyongera ekitiibwa kye olw’obujulirwa bwange bwe njogera, n’olw’obuwulize bwange mu bikolwa. Era ndimussaamu ekitiibwa n’ebintu byange, n’okumuweereza mu ngeri ey’enjawulo. Ka ntuule ndowooze bwe nnyinza okumussaamu ekitiibwa, kubanga Ye anansaamu ekitiibwa.

Marisi 5

EMIKISA GY’AMAKA

"Awa omukisa ennyumba y’abatuukirivu" Engero 3:33

Atya Mukama, n’olwekyo abeera wansi w’obukuumi bwa Katonda ne ku bikwata ku kasolya akabikka ye n’ab’omu nnyumba ye. Amaka ge kifo kya kwagala, ssomero ly’okutendekebwa okutukuvu, era kifo kya kitangaala ky’omu ggulu. Mu go mulimu ekyoto ky’amaka erinnya lya Mukama we lissibwamu ekitiibwa buli lunaku. Mukama kyava awa omukisa ennyumba ye. Eyinza okuba akasu akatono oba ekizimbe eky’ekitiibwa; naye omukisa gwa Mukama gujja olw’empisa z’oyo agibeeramu, so si lwa bunene bw’ennyumba.

Ennyumba esinga okuweebwa omukisa ye eyo ssemaka ne nnyinimu mwe baba abatya Katonda; naye omwana ow’obulenzi oba ow’obuwala oba n’omuweereza ayinza okuleetera ennyumba yonna omukisa. Emirundi mingi Mukama akuuma, agaggawaza, era aliisa ennyumba ku lw’omuntu omu oba babiri abagirimu, abatuukirivu mu maaso ge, kubanga ekisa kye kye kibafudde bwe batyo. Abaagalwa, tubeere ne Yesu ng’omugenyi waffe ow’olubeerera ng’abawala ab’oluganda ab’e Besaniya bwe baali, olwo nno tuliweebwa omukisa ddala.

Tweegendereze tubeere abatuukirivu mu byonna -- mu bya busuubuzi byaffe, mu kusalira abalala omusango, mu ngeri gye tuyisaamu baliraanwa baffe, ne mu mpisa zaffe ffe ffennyini. Katonda omutuukirivu tayinza kuwa mukisa nkolagana etali ya butuukirivu.

Marisi 6

OMUKUUMI WA BAMULEKWA

"Mu ggwe, bamulekwa mwe bajja okusaasirwa." Koseya 14:3

Eno nsonga nnungi nnyo ey’okusuula obwesige obulala bwonna ne twesigama ku Mukama yekka. Omwana bw’asigala nga talina amukuuma ow’obuzaaliranwa, Katonda waffe ayingirawo n’afuuka omukuumi we: bwe kityo n’omuntu bw’aba afiiriddwa buli kintu kye yali yeesigamako, ayinza okwesuula ku Katonda omulamu n’amufunamu byonna bye yeetaaga. Bamulekwa basuulibwa ku bukitaawe bwa Katonda, era Ye abaliisa. Omuwandiisi w’empapula zino amanyi kye kitegeeza okwesigama ku mukono gwa Katonda gwokka, era awa obujulirwa bwe n’omwoyo omulungi nti tewali bwesige obukakasibwa obulungi bwe butyo ebibaddewo, oba obukakafu okusasulwa n’ebivaamu, ng’obwesige mu Katonda atalabika naye omulamu ennaku zonna.

Abaana abamu abalina bakitaabwe tebaganyulwa nnyo mu bo, naye bamulekwa abalina Katonda bagagga. Kirungi okuba ne Katonda nga tolina mukwano mulala okusinga okuba n’abakuyamba bonna ab’oku nsi nga tolina Katonda. Okufiirwa ekitonde kirumya, naye Mukama bw’aba akyali ensulo y’okusaasira gye tuli, tetuba bamulekwa ddala. Abaana bamulekwa beegayirire ekigambo kino eky’ekisa eky’enkya eno, n’abo bonna abafiiriddwa obuyambi obulabika bakole bwe batyo. Mukama, ka nsaasirwe mu ggwe! Gye nkoma okuba omwetaavu era atalina amuyamba, gye nkoma okukukaabirira n’obwesige mu mutima gwo ogw’okwagala.

Marisi 7

OKUSUMULULWA MU NJEGERE

"Mukama asumulula abasibe." Zabbuli 146:7

Akikoze. Jjukira Yusufu, Isirayiri mu Misiri, Manase, Yeremiya, Peetero, n’abalala bangi. Akyasobola okukikola. Amenya emitayimbwa egy’ebikomo n’ekigambo, n’akutula enjegere ez’ekyuma ng’atunula butunuzi. Akikola kaakano. Mu bifo lukumi abali mu nnaku bafuluma ne bajja mu kitangaala ne mu ddembe. Yesu akyalangirira nti abasibe bateebwe bave mu makomera. Mu kaseera kano kennyini enzigi zeggulawo n’enjegere zigwa wansi.

Alisanyukira okukuteera ddembe, mukwano gwange, bw’oba mu kiseera kino okungubaga olw’ennaku, n’okubuusabuusa, n’okutya. Kiriba ssanyu eri Yesu okukuwa eddembe. Kirimusanyusa okukusumulula nga bwe kirikusanyusa okusumululwa. Nedda, si ggwe olina okukutula ekisiba eky’ekyuma: Mukama Ye yennyini y’alikikola. Mwesige bumwesizi, era Ye aliba Omusumuluzi wo. Mukkirize newankubadde ebisenge eby’amayinja, oba empingu ez’ekyuma. Setaani tayinza kukukwata, ekibi tekiyinza kukusiba njegere, n’okuggwaamu essuubi tekuyinza kukusiba, bw’onookkiriza kaakano Mukama Yesu, n’ekisa kye eky’obwereere, n’obujjuvu bw’amaanyi ge okulokola.

Soomooza omulabe, era ekigambo ekiri mu maaso go kaakano kibeere oluyimba lwo olw’okununulibwa: "Yakuwa asumulula abasibe."

Marisi 8

EBINTU BYAFFE BIWEEBWA OMUKISA

"Ekibbo kyo mw’onookuŋŋaanyizanga, n’olutiba lwo mw’onoogoyeranga nabyo binaabanga n’omukisa." Ekyamateeka Olwokubiri 28:5

Obuwulize buleeta omukisa ku bintu byonna okukola kwaffe bye kutufunira. Ekiyingira ne kifuluma amangu ago, ng’ebibala ebiri mu kibbo ebigenda okuliibwa amangu, kiriweebwa omukisa; n’ekiterekebwa gye tuli okumala ekiseera ekiwanvu nakyo kiriweebwa omukisa mu ngeri y’emu. Oboolyawo ffe omugabo gwaffe gwa kibbo kya mu ngalo. Tulina akatono ak’eky’enkya, n’akamere akatono ak’eky’emisana mu kibbo bwe tufuluma okukola emirimu gyaffe enkya. Kino kirungi, kubanga omukisa gwa Katonda gusuubiziddwa ekibbo. Bwe tuba tulya kye tufuna buli lunaku, nga tufuna eby’olunaku mu lunaku olwo, tuli bulungi nga Isirayiri; kubanga Mukama bwe yaliisa abantu be be yaganza yabawanga maanu ya lunaku lumu lwokka buli mulundi. Kiki ekirala kye baali beetaaga? Kiki ekirala kye twetaaga?

Naye bwe tuba n’etterekero, nga twetaaga nnyo Mukama okuliwa omukisa! Kubanga waliwo okweraliikirira okw’okufuna, okweraliikirira okw’okutereka, okweraliikirira okw’okuddukanya, n’okweraliikirira okw’okukozesa; era, Mukama bw’ataliwa mukisa, okweraliikirira kuno kulirya emitima gyaffe, okutuusa ebintu byaffe lwe birifuuka bakatonda baffe, n’okweraliikirira kwaffe ne kufuuka amabwa agatulya.

Ayi Mukama, wa ebintu byaffe omukisa. Tusobozese okubikozesa olw’ekitiibwa kyo. Tuyambe okukuuma eby’ensi mu bifo byabyo ebibituukira, era ebyo bye tutereka bireme kutuusa bulabe ku bulokozi bw’emyoyo gyaffe.

Marisi 9

OKUSABIRA EMIREMBE

"Era munoonye emirembe n’okukulaakulana kw’ekibuga gye mbatutte mu buwaŋŋanguse. Musabenga Mukama, ekibuga mukisabire kubanga bwe kikulaakulana nammwe mujja kukulaakulana." Yeremiya 29:7

Omusingi oguli mu kyawandiikibwa kino gutulaga ffenna, abagenyi n’abatambuze ba Mukama, nti tusaanidde okwegomba okuleeta emirembe n’okukulaakulana kw’abantu be tubeeramu. Naddala eggwanga lyaffe n’ekibuga kyaffe bisaanidde okuweebwa omukisa olw’okwegayiririra kwaffe okutasalako. Okusaba okunyiikivu ku lw’ensi yo n’ensi endala kusaanira nnyo mu kamwa ka buli mukkiriza.

Tusabe n’obunyiikivu ekirabo ekikulu eky’emirembe, mu ggwanga lyaffe ne mu mawanga amalala. Enjawukana bwe zandireeseewo okuyiwa omusaayi mu nguudo zaffe, oba olutalo olw’ebweru bwe lwanditta abaserikale baffe abazira, ffenna twandikungubagidde ekikangabwa ekyo; kale tusabe emirembe, era tunyiikire okukulaakulanya emisingi egiyinza okugatta awamu ebibinja by’abantu mu ggwanga lyaffe n’amawanga ag’ebweru mu bukwate obw’omukwano.

Naffe ffennyini tusuubiziddwa okubeera mu mirembe awamu n’emirembe gy’eggwanga, era kino kyegombebwa nnyo; kubanga bwe tutyo tusobola okukuza ab’omu maka gaffe mu kutya Mukama, era n’okubuulira enjiri awatali kuziyizibwa. Leero tunyiikire okusabira ensi yaffe, nga twatula ebibi by’eggwanga, era nga tusaba eggwanga lisonyiyibwe era liweebwe omukisa, ku lwa Yesu.

Marisi 10

TAMBULIRA MU MUSANA

"Nze omusana nzize mu nsi buli anzikiriza aleme okusigala mu kizikiza" Yokaana 12:46

Ensi eno ezikizza ng’ekiro ekituumbi; Yesu yajja tulyoke tufune omusana olw’okukkiriza, tuleme kweyongera kutuula mu kizikiza ekibikkidde abantu abalala bonna.

Buli muntu kigambo kigazi nnyo: kitegeeza ggwe nange. Bwe twesiga Yesu tetuliddayo kutuula mu kisiikirize eky’olumbe ekizikizza, wabula tuliyingira mu musana ogubuguma ogw’olunaku olutaliggwaawo. Lwaki tetufuluma mu musana kaakano?

Ekire kiyinza oluusi okutubikkako, naye tetulisigala mu kizikiza bwe tukkiriza Yesu. Yajja kutuwa musana gwa ttuntu. Ajjidde bwereere? Bwe tuba n’okukkiriza, tulina enkizo ey’omusana: tugwesanyusemu. Yesu yajja okutuggya mu kiro eky’obwonoonefu bwaffe obw’obuzaaliranwa, eky’obutamanya, eky’okubuusabuusa, eky’okuggwaamu essuubi, eky’ekibi, n’eky’entiisa; era abakkiriza bonna balitegeera nti tasobola kujja bwereere, nga n’enjuba bw’etasobola kuvaayo n’eremererwa kubunyisa bbugumu lyayo n’omusana gwayo.

Kunkumula ennaku yo, ow’oluganda omwagalwa. Tosigala mu kizikiza, wabula beera mu musana. Mu Yesu mwe muli essuubi lyo, essanyu lyo, n’eggulu lyo. Mutunuulire, Ye yekka, olisanyuka ng’ennyonyi bwe zisanyuka enjuba bw’evaayo, era nga bamalayika bwe basanyukira mu maaso g’entebe ey’obwakabaka.

Marisi 11

OLUTALO LW’ANI?

"Abo bonna abakuŋŋaanye wano banaategeera nga Mukama talokola na kitala wadde effumu, kubanga olutalo, lwa Mukama era mwenna agenda kubawaayo mu mukono gwaffe" 1 Samwiri 17:47

Ensonga eno ekakasibwe, nti olutalo lwa Mukama, olwo tulyoke tubeere bakakafu ku buwanguzi, era obuwanguzi mu ngeri esinga okulaga amaanyi ga Katonda. Mukama yeerabirwa nnyo abantu bonna, weewaawo, n’ebibiina bya Isirayiri byennyini; era bwe wabaawo omukisa ogw’okulaga abantu nti Oyo Ensibuko Enkulu eya Byonna asobola okutuukiriza ebigendererwa bye awatali maanyi ga muntu, guba mukisa gwa muwendo mungi ogusaanidde okukozesebwa obulungi. Ne Isirayiri yennyini yeesiga nnyo ekitala n’effumu. Kintu kya kitalo Dawudi obutaba na kitala mu mukono gwe, ate nga Dawudi amanyi nti Katonda we alimegga eggye lyonna ery’abagwira.

Bwe tuba ddala tulwanirira amazima n’obutuukirivu, tulemenga okulinda okutuusa lwe tunaafuna ebitone, oba obugagga, oba engeri endala yonna ey’amaanyi agalabika; wabula n’amayinja ge tusanga mu kagga, n’envuumuulo yaffe gye tumanyidde, tudduke tusisinkane omulabe. Singa lwabadde lutalo lwaffe ffekka, tetwandibadde bakakafu; naye bwe tuba tuyimiridde ku lwa Yesu, nga tulwana mu maanyi ge gokka, ani ayinza okutuziyiza? Awatali kutankatanka n’akatono tusisinkane Abafirisuuti; kubanga Mukama ow’eggye ali naffe, era ani asobola okutulwanyisa?

Marisi 12

OKUFULUMA N’ESSANYU

"Yayogera bw’ati ku Zebbulooni: Jaguzanga, ggwe Zebbulooni, bw’onoofulumanga" Ekyamateeka Olwokubiri 33:18

Emikisa gy’ebika gyaffe; kubanga ffe Isirayiri ey’amazima, abasinza Katonda ng’Omwoyo bw’atuluŋŋamya, so tetwesiga mubiri. Zebbulooni alina okujaguza kubanga Yakuwa alimuwa omukisa "bw’anaafulumanga"; naffe tulaba ekisuubizo kyaffe nga kikwekeddwa mu mukisa guno. Bwe tunaafulumanga tunaanoonyanga ebituleetera essanyu.

Tufuluma okutambula, n’okulabirira kwa Katonda kwe kutuwerekera. Tufuluma okusenguka, ne Mukama abeera naffe ku lukalu ne ku nnyanja. Tufuluma ng’ababuulizi b’enjiri, ne Yesu agamba nti, "Ndi nammwe bulijjo n’okutuukira ddala ensi lw’eriggwaawo." Tufuluma buli lunaku okugenda ku mirimu gyaffe, era tuyinza okukikola n’essanyu, kubanga Katonda anaabeeranga naffe okuva ku makya okutuusa akawungeezi.

Oluusi okutya kutwewalampako nga tutandika olugendo, kubanga tetumanyi bye tulisanga; naye omukisa guno gusobola okutuweereza bulungi ng’ekigambo ekizzaamu amaanyi. Nga tusiba ebintu byaffe okusenguka, tuteeke olunyiriri luno mu ssanduuko yaffe ey’olugendo; tulusuule mu mitima gyaffe, tulukuume eyo; weewaawo, tuluteeke ku lulimi lwaffe lutuyimbise. Tusitule enanga y’eryato nga tuyimba, oba tubuuke mu ggaali nga tuyimba zabbuli. Tubeere ab’omu kika ekijaguza, era mu buli mutambula gwaffe tutenderezenga Mukama n’emitima egijjudde essanyu.

Marisi 13

TONYOOMANGA BUVUBUKA BWO

"Ne ndyoka ŋŋamba nti, Laba nno, Mukama Katonda! Simanyi kwogera mu bantu, ndi mwana muto. Naye Mukama Katonda n’aŋŋamba nti, Toyogera nti, ‘Ndi mwana bwana;’ kubanga yonna gye nnaakutumanga gy’onoogendanga, era byonna bye nnaakulagiranga by’onooyogeranga" Yeremiya 1:6, 7

Yeremiya yali muto era yawulira okutya okw’obuzaaliranwa bwe yatumibwa Mukama ku mulimu omunene; naye Oyo eyamutuma teyayagala ayogere nti, "Ndi mwana muto." Kye yali ye yennyini tekyandyogeddwako, wabula kyandibuliddwa mu kulowooza nti yalondebwa okwogerera Katonda. Teyalina kwefumiitiriza na kwetondera bubaka, wadde okwerondera abawuliriza: yalina kwogera Katonda kye yamulagira, n’okwogerera Katonda gye yamutuma, era ekyo yandikisobozeseddwa mu maanyi agatali gage.

Si bwe kiri n’omubuulizi omuto, oba omusomesa omuto ayinza okusoma ennyiriri zino? Katonda amanyi bw’oli omuto, n’okumanya kwo n’obumanyirivu bwo bwe biri ebitono; naye bw’asalawo okukutuma, si kikyo okudduka okuyitibwa okw’omu ggulu. Katonda alyegulumiza mu bunafu bwo. Singa wali mukulu nga Mesuseera, emyaka gyo gyandikuyambye gitya? Singa wali mugezi nga Sulemaani, wandibadde mukakanyavu nga ye. Nywerera ku bubaka bwo era bwe bunaaba amagezi go; goberera ebiragiro by’oweereddwa era bye binaaba obwegendereza bwo.

Marisi 14

OKUBUDAABUDA OKW’EKISA

"Ng’omwana bw’asanyusibwa nnyina, bwe ntyo bwe ndikuzzaamu amaanyi" Isaaya 66:13

Okubudaabuda kwa maama! Aa, kuno kwe kugonda kwennyini. Nga bw’ayingira mu nnaku y’omwana we! Nga bw’amunyweza ku kifuba kye, n’agezaako okutwala ennaku ye yonna mu mutima gwe! Omwana asobola okumubuulira byonna, era anaamulumirwa ng’omulala yenna bw’atasobola. Mu ababudaabuda bonna omwana asinga kwagala maama we, era n’abasajja abakulu bakizudde nga bwe kiri.

Yakuwa yeetoowaza okukola omulimu gwa maama? Buno bulungi ddala. Tutegeera mangu bw’ali kitaffe; naye anaabeera nga maama naye? Kino tekitutuuza mu kumanyigana okutukuvu, mu kwesiga okutaliimu kwekwata, ne mu kuwummula okutukuvu? Katonda yennyini bw’afuuka "Omubudaabudi" tewali nnaku esobola kusigalawo bbanga ddene. Tumubuulire ebizibu byaffe, ne bwe kiba nti okukaaba n’okussa ebikkowe bye bifuuka ebigambo byaffe ebisinga okwanguyirwa. Tagenda kutunyooma lwa maziga gaffe; maama waffe teyatunyooma. Alifaayo ku bunafu bwaffe nga ye bwe yakola, era aliggyawo ensobi zaffe, kyokka mu ngeri ekakafu era etaliimu kabi okusinga maama waffe bwe yali asobola. Tetugenda kugezaako kwetikka nnaku yaffe ffekka: ekyo kyandibadde butafaayo eri omugonvu era ow’ekisa bw’atyo. Tutandike olunaku ne Katonda waffe omwagazi, era lwaki tetulumaliriza nga tukyali naye, kubanga bamaama tebakoowa baana baabwe?

Marisi 15

KATONDA KIFO KITUKUVU

"Kyonoova oyogera nti, ‘Bw’ati bw’ayogera Mukama Katonda nti, Newaakubadde nga nabasindika mu mawanga ne mbasaasaanya mu nsi nnyingi, naye mbalabiriridde mu nsi gye baagenda.’" Ezeekyeri 11:16

Ne bwe tuba tugobeddwa okuva ku makubo ag’ekisa ag’olukale, tetuggyibwa ku kisa ky’amakubo ago. Mukama ateeka abantu be we bawulira ng’abawaŋŋanguse, Ye yennyini anaabeeranga nabo, era anaabeeranga gye bali byonna bye bandifunye eka, mu kifo ky’enkuŋŋaana zaabwe entukuvu. Mmwe abayitiddwa okutambulatambula, kino mukitwale nga kyammwe!

Katonda eri abantu be kye kiddukiro. Mu Ye basanga obubudamo okuva eri buli mulabe. Ye kifo kyabwe eky’okusinzizaamu nakyo. Ali nabo nga bwe yali ne Yakobo bwe yeebaka mu ttale, n’agolokoka n’agamba nti, "Mazima ddala Mukama ali mu kifo kino." Nabo anaabeeranga ekifo ekitukuvu eky’okutereera, ng’Awatukuvu w’Awatukuvu, ekyali ekifo ekisiriikiridde eky’Oyo Ataggwaawo. Banaabeeranga mirembe nga bagumye nga tebalina kutya kwonna.

Katonda yennyini, mu Kristo Yesu, kye kifo ekitukuvu eky’okusaasira. Essanduuko ey’Endagaano ye Mukama Yesu, era omuggo gwa Alooni, ekibya ekyalimu emmaanu, ebipande eby’Amateeka, byonna biri mu Kristo ekifo kyaffe ekitukuvu. Mu Katonda mwe tusanga awatukuvu aw’obutukuvu n’aw’okussa ekimu. Kiki ekirala kye twetaaga? Ayi Mukama, tuukiriza ekisuubizo kino, obeerenga gye tuli ekifo ekitukuvu ekitono ennaku zonna!

Marisi 16

ERI ABALALA "EKYOKULABIRAKO"

"Ebyo bye mwayiga, n’ebyo bye mwafuna ne muwulira, ebyo mubirowoozengako, ne bye mwalaba mu nze, mubikolenga; ne Katonda ow’emirembe anaabeeranga nammwe" Abafiripi 4:9

Kirungi omuntu bw’asobola okukoppebwa mu buli kantu n’omugaso, nga Pawulo bwe yandikoppeddwa. Aa, singa tufuna ekisa okumukoppa leero na buli lunaku!

Singa, olw’ekisa kya Katonda, tussa mu nkola enjigiriza ya Pawulo, tusobola okwetwalira ekisuubizo ekituli mu maaso kaakano; era nga kisuubizo kya kitalo! Katonda, ayagala emirembe, aleeta emirembe, era assa emirembe, anaabeeranga naffe. "Emirembe gibeere nammwe" mukisa muwoomu; naye Katonda ow’emirembe okubeera naffe kisingawo nnyo. Bwe tutyo tuba n’ensulo awamu n’emigga, enjuba awamu n’ebimyanso byayo. Katonda ow’emirembe bw’aba naffe, tulisanyukira emirembe gya Katonda, egisukkiridde okutegeera, ne bwe wabaawo embeera ez’ebweru ezitiisatiisa okututabula. Abantu bwe bayomba, ffe tunaabeeranga abatabaganya, Omuleezi w’emirembe bw’aba naffe.

Mu kkubo ery’amazima mwe musangibwa emirembe egy’amazima. Bwe tuva mu kukkiriza oba ne tuleka ekkubo ery’obutuukirivu nga tulowooza nti tukulaakulanya emirembe, tuba twekyamu nnyo. Okusooka byonna malongoofu, era ga mirembe, eyo y’entegeka ey’amagezi era ey’amazima. Tunywerere ku kkubo lya Pawulo, ne Katonda ow’emirembe anaabeeranga naffe nga bwe yali n’omutume.

Marisi 17

TYA OKUTYA

"Tobatyanga, kubanga nze ndi naawe okukuwonya, bw’ayogera Mukama Katonda" Yeremiya 1:8

Buli okutya lwe kuyingira ne kututankatanya, tuba mu kabi ak’okugwa mu kibi. Okwegulumiza kulina okutiibwa, naye n’obuti bwe butyo. "Guma obeere nga Danyeri." Omuduumizi waffe omukulu asaanidde okuweerezebwa abaserikale abazira.

Nga wano waliwo ensonga ey’obuzira! Katonda ali n’abo abali naye. Katonda talibulawo ssaawa ey’okulwana bw’etuuka. Bakutiisatiisa? Ggwe ani okutya omuntu alifa? Ofiirwa omulimu gwo? Katonda wo gw’oweereza alifunira abaweereza be omugaati n’amazzi. Tosobola kumwesiga? Bakusekerera? Ekyo kirimenya amagumba go oba omutima gwo? Kigumiikirize ku lwa Kristo, era n’okusanyuka osanyuke olw’ekyo.

Katonda ali n’ab’amazima, abatuukirivu, n’abatukuvu, okubawonya; era alikuwonya. Jjukira Danyeri bwe yava mu mpuku y’empologoma, n’abavubuka abasatu abatukuvu bwe baava mu kikoomi. Embeera yo si nzibu nga yaabwe; naye singa ebadde bw’etyo, Mukama yandikuyisizzaamu, n’akufuula awangula n’okukirawo. Tya okutya. Beera n’okutya okutya. Omulabe wo asingayo ali mu kifuba kyo. Fukamira osabe obuyambi, olyoke ogolokoke ng’ogamba nti, "Nzija kumwesiga era siritya."

Marisi 18

SIGALA MULONGOOFU

"Okusaba kw’abalongoofu lye ssanyu lye" Engero 15:8

Kino kyenkana ekisuubizo, kubanga kirangirira ekiriwo kaakano, era ekinaabeeranga bwe kityo emirembe gyonna. Katonda asanyukira nnyo okusaba kw’abantu abalongoofu; n’okukuyita akuyita essanyu lye. Ekisooka kye tulina okufaako kwe kuba abalongoofu. Nga tokyamira ku ludda luno wadde ku luli, sigala ng’oli mugolokofu: nga tokyamye lwa bukujjukujju, so nga tovuunamye lwa kukkiriza bubi, beera mulongoofu mu bwesimbu obutaliimu kabuusabuusa ne mu butereevu. Bwe tutandika okwekyusakyusa n’okwekulukuunya, tulirekebwa twerabirire. Bwe tugezaako amakubo amakyamu, tulizuula nga tetusobola kusaba, era bwe tunaafuusa nga tusaba, tulisanga okusaba kwaffe nga kuggaliddwa ebweru w’eggulu.

Tukola mu kkubo eggolokofu, bwe tutyo nga tugoberera okwagala kwa Mukama kwe yabikkula? Kale tusabenga nnyo era tusabenga mu kukkiriza. Okusaba kwaffe bwe kuba ssanyu lya Katonda, tulemenga kumukendeeza ku ekyo ekimusanyusa. Ye talowooza ku ggulama yaakwo, wadde ku bufiirosoofo bwakwo, wadde ku bukugu bwakwo mu njogera; mu ebyo byonna abantu bayinza okukunyooma. Ye, nga Kitaffe, asanyukira okulibaata kw’abaana be abawere, okunaanaagira kw’abaana be ab’obulenzi n’ab’obuwala abaakazaalibwa. Tetusaanidde kusanyukira kusaba, nga Mukama akusanyukira? Twekolere ensonga ez’okugenda ku ntebe ey’obwakabaka. Mukama atuzuulira ensonga ezimala ez’okusaba, era tusaanidde okumwebaza nti bwe kiri.

Marisi 19

OKUFUULIBWA ABASAANIRA EKITIIBWA

"Mukama atuwa emikisa gye awamu n’ekitiibwa" Zabbuli 84:11

Ekisa kye tuli mu kwetaaga kaakano, era kiweebwa bwereere. Kiki ekiyinza okusinga ekirabo okuba eky’obwereere? Leero tujja kufuna ekisa ekituwanirira, ekitugumya, ekitutukuza, era ekitumatiza. Atuwadde ekisa buli lunaku okutuusa kaakano, era ne mu biseera ebijja, ekisa ekyo kikyamala. Bwe tuba n’ekisa ekitono, ensobi eteekwa okuba mu ffe ffennyini; kubanga Mukama tafunda, so talwawo kukigaba mu bungi. Tuyinza okusaba nga bwe twagala, ne tutatya kugaanibwa. Agabira bonna atakayuka.

Mukama ayinza obutatuwa zaabu, naye alituwa ekisa: ayinza obutatuwa magoba, naye alituwa ekisa. Ddala alituweereza okugezesebwa, naye alituwa ekisa ekigenkana. Tuyinza okuyitibwa okukola, n’okubonaabona, naye awamu n’okuyitibwa okwo wajja kujja ekisa kyonna ekyetaagisa.

Nga ekigambo NA ekiri mu lunyiriri luno kya maanyi -- "n’ekitiibwa!" Ekitiibwa tetunnakyetaaga kaakano, era tetunnakisaanira; naye tulikifuna mu ntuuko yaakyo. Bwe tumala okulya omugaati ogw’ekisa, tulinywa omwenge ogw’ekitiibwa. Tuteekwa okuyita mu Kifo Ekitukuvu --kye kisa, okutuuka mu Watukuvu w’Awatukuvu -- kye kitiibwa. Ebigambo bino "n’ekitiibwa" bimala okuzinisa omuntu olw’essanyu. Akaseera katono -- akaseera katono, n’oluvannyuma ekitiibwa emirembe gyonna!

Marisi 20

OKUGABIRIRA KWA KATONDA

"Naye obanga Katonda ayambaza obulungi bw’atyo omuddo ogw’omu nsiko ogw’ekiseera obuseera, ogubaawo leero ate enkeera ne gwokebwa mu kyoto, talisingawo nnyo okubambaza? Nga mulina okukkiriza okutono!" Matayo 6:30

Engoye za bbeeyi, era abakkiriza abaavu bayinza okweraliikirira nga beebuuza engoye zaabwe ezijja gye ziriva. Enkaato z’engatto zikooye; engatto empya tuliziggya wa? Laba Mukama waffe atulowoozaako bw’atuteekeddeteekedde eri okweraliikirira kuno. Kitaffe ali mu ggulu ayambaza omuddo ogw’omu nsiko obulungi Sulemaani bwe yali tasobola kwenkanya: ye talyambaza baana be bennyini? Tukakasa nti alibambaza. Wayinza okubaawo ebiraka bingi n’okutunga okungi, naye eby’okwambala tulibifuna.

Omuweereza wa Katonda omwavu yalaba ng’engoye ze zisanyaladde nnyo, era nga zikaddiye okutuusa nga zibula katono okukutuka; naye ng’omuddu wa Mukama, yasuubira Mukama we okumufunira ebyambalo eby’obuweereza bwe. Kyali kituukiridde nti omuwandiisi w’ekitabo kino, ng’ali ku lukyala ewa mukwano gwe, yawoleddwa ekituuti ky’omusajja omulungi oyo, ne kimujjira mu mutima okumukungaanyiza ensimbi, era ne ziba ezimugulira engoye ze. Embeera endala nnyingi tuzirabye, abo abaweereza Mukama gye baamusanze ng’afaayo ku by’okwambala byabwe. Oyo eyatonda omuntu, omuntu bwe yayonoona n’aba nga yeetaaga ebyambalo, era mu kusaasira kwe n’abimuwa; era ebyo Mukama bye yawa bazadde baffe abasooka byali birungi nnyo okusinga bye beekolera bo bennyini.

Marisi 21

WEEWALE OKUSEERERA OKWO

"Bw’otyo bw’onootambulanga nga onyweredde mu kkubo lyo, era ekigere kyo tekijjanga kwesittala" Engero 3:23

Kwe kugamba nti, bwe tugoberera amakubo ag’amagezi n’ag’obutukuvu, tulikuumibwa mu go. Atambulira mu luguudo olunene emisana aba akuumibwa mu ngeri emu. Buli muntu alina ekkubo lye, kwe kugamba, omulimu gwe ogumutuukira mu bulamu, era bwe tutambulira mu lyo n’obwesimbu nga tutya Katonda, Ye alikuuma FFE eri ekibi. Tuyinza obutatambula mu bugagga, naye tulitambula mirembe. Tuyinza obutasobola kudduka ng’abavubuka, naye tulisobola okutambula ng’abantu abalungi.

Akabi kaffe akasinga kali mu ffe ffennyini: ekigere kyaffe ekinafu kyangu nnyo okwesittala, nga kya nnaku. Tusabe amaanyi amalala ag’omwoyo, obunafu bwaffe obw’okuseerera bulyoke buwangulwe. Abamu beesittala kubanga tebalaba jjinja mu kkubo: ekisa kya Katonda kitusobozesa okulaba ekibi, ne tukyewala. Twegayirire ku kisuubizo kino, era twesige Oyo awanirira abalonde be.

Woowe! akabi kaffe akasingira ddala bwe butafaayo bwaffe ffennyini, naye ku kino Mukama Yesu yatulabula, ng’agamba nti, "Mutunule nga bwe musaba."

Singa tufuna ekisa okutambula leero nga tetwesittadde na kamu! Tekimala nti tetugwa ddala; okukaaba kwaffe kubeere nti tuleme kuseerera na katono n’ebigere byaffe, naye ku nkomerero tusinze Oyo "asobola okutuwanirira tuleme okuva mu kkubo lye."

Marisi 22

EKISA ERI ABAWOMBEEFU

"Abawombeefu abawa ekisa" Yakobo 4:6

Emitima emiwombeefu ginoonya ekisa, era kyegiva gikifuna. Emitima emiwombeefu gikkiriza okufugibwa ekisa mu bulungi bwakyo, era kyekiva kigiweebwa mu bungi obweyongera. Emitima emiwombeefu gibeera mu biwonvu emigga gy’ekisa gye gikulukutira, era kyegiva ginywa ku gyo. Emitima emiwombeefu gyebaza olw’ekisa, ne giwa Mukama ekitiibwa kyakyo, era kyekiva kituukana n’ekitiibwa kye okugiwa ekisa.

Jjangu, omusomi omwagalwa, tuula mu kifo ekya wansi. Weetwale ng’omutono mu maaso go ggwe, Mukama alyoke akugulumize. Oboolyawo okusinda kuyinza okufuluma nti, "Ntya nti siri muwombeefu." Kiyinza okuba nti olwo lwe lulimi lw’obuwombeefu obwa nnamaddala. Abamu beenyumiririza mu buwombeefu bwabwe, era ago ge gamu ku malala agasingira ddala obubi. Tuli bitonde ebyetaaga, ebitalina buyambi, ebitasaanira, ebisaanira omuliro ogutazikira, era bwe tuba nga tetuli bawombeefu, twandibadde. Twetoowaze olw’ebibi byaffe eri obuwombeefu, olwo Mukama alituwa okulega ku kisa kye. Ekisa kye kitufuula abawombeefu, era ekisa kye kisanga mu buwombeefu buno akakisa ak’okufukamu ekisa ekisingawo. Tukke wansi tulyoke tulinnye. Tubeere abaavu mu mwoyo Katonda alyoke atugaggawaze. Tubeere abawombeefu tuleme kwetaaga kutoowazibwa, wabula tugulumizibwe ekisa kya Katonda.

Marisi 23

OMULUŊŊAMYA OMWESIGWA

"Ndikulembera abantu bange abazibe ba maaso mu kkubo lye batamanyi" Isaaya 42:16

Lowooza ku Yakuwa ow’ekitiibwa ekitaliiko kkomo ng’afuuka Omuluŋŋamya w’abazibe b’amaaso! Nga kino kiraga okwetoowaza okutaliiko kkomo! Omuzibe w’amaaso tasobola kuzuula kkubo ly’atamanyi. Ne bw’aba ng’amanyi ekkubo, kimuzibuwalira okulitambulamu; naye ekkubo ly’atamanyanga terisoboka n’akatono eri ebigere bye ebitaluŋŋamizibwa. Kale, mu butonde bwaffe tuli bazibe ba maaso eri ekkubo ly’obulokozi, naye Mukama atuluŋŋamya mu lyo, n’atuleeta gy’ali, n’oluvannyuma n’azibula amaaso gaffe. Ku by’ebiseera ebijja, ffenna tuli bazibe ba maaso, era tetusobola kulaba ssaawa n’emu mu maaso gaffe; naye Mukama Yesu alituluŋŋamya okutuusa ku nkomerero y’olugendo lwaffe. Erinnya lye litenderezebwe!

Tetusobola kuteebereza ngeri okununulibwa mwe kuyinza kutujjira, naye Mukama amanyi, era alituluŋŋamya okutuusa lwe tuliba nga tuwonye buli kabi. Balina omukisa abo abateeka omukono gwabwe mu gw’Omuluŋŋamya omukulu, ne bamukwasa ekkubo lyabwe ne bo bennyini ddala. Alibatuusa olugendo lwonna; era bw’alimala okubatuusa eka mu kitiibwa, n’azibula amaaso gaabwe okulaba ekkubo mwe yabaluŋŋamiriza, nga baliyimbira Omugabi waabwe omukulu oluyimba lw’okwebaza! Mukama, luŋŋamya omwana wo omwavu omuzibe w’amaaso leero, kubanga simanyi kkubo lyange!

Marisi 24

OKUNYWEZEBWA N’OKUKUUMIBWA

"Naye Mukama waffe mwesigwa, alibanyweza mmwe era anaabawonyanga Setaani" 2 Basessaloniika 3:3

Abantu emirundi mingi babulwa ensonga nga bwe babulwa okukkiriza. Wakyaliwo mu ffe abantu abatalina nsonga era "abakozi b’ebibi." Tewali mugaso kuwakana nabo oba okugezaako okutabagana nabo: balimba mu mutima, era bakuusa mu kwogera. Kale, kino kitukwatako kitya? Twereetere okweraliikirira olw’abo? Nedda; tukyukire Mukama, kubanga ye mwesigwa. Tewali kisuubizo kya mu Kigambo kye ekirimenyebwa. Ye si mutalina nsonga mu by’atwetaagako, so si mutali mwesigwa eri bye tumusaba ng’ebisuubizo bye bwe biri. Tulina Katonda omwesigwa. Kino kibeere essanyu lyaffe.

Alitunyweza abakozi b’ebibi baleme kutugwisa, era alitukuuma waleme kubaawo na kimu ku bibi ebitulumba kaakano ekirituukako ddala. Nga mukisa gye tuli nti tetwetaaga kulwanagana na bantu, wabula tukkirizibwa okwekweka mu Mukama Yesu, atulumirirwa mu mazima agasingira ddala. Waliwo omutima gumu ogw’amazima, endowooza emu enneesigwa, Okwagala kumu okutakyuka; eyo gye tuwummulire. Mukama alituukiriza ekigendererwa ky’ekisa kye gye tuli, ffe abaweereza be, era tetwetaaga kukkiriza kisiikirize kya kutya n’akamu kugwa ku myoyo gyaffe. Byonna abantu oba baddayimooni bye bayinza okukola tebisobola kutulemesa kufuna bukuumi na kugabirirwa bya Katonda. Leero tusabe Mukama atunyweze era atukuume.

Marisi 25

OTULO OTUWUMMUZA

"Bw’onoogalamiranga toobenga na kutya, weewaawo bw’oneebakanga otulo tunaakuwoomeranga" Engero 3:24

Omusomi ayinza okuba ng’anaatera okusibibwa ku kitanda okumala akaseera olw’obulwadde? Alinnye agende mu kisenge kye nga tanakuwadde, ng’ekisuubizo kino kiri ku mutima gwe -- "Bw’onoogalamiranga toobenga na kutya."

Bwe tugenda okwebaka ekiro, ekigambo kino kigonze omutto gwaffe. Tetusobola kwekuuma nga twebase, naye Mukama alitukuuma ekiro kyonna. Abo abagalamira wansi w’obukuumi bwa Mukama baba mirembe nga bakabaka ne bannabagereka mu mbiri zaabwe, era n’okusingawo nnyo. Bwe tuba nga bwe tugalamira tuteeka wansi n’okweraliikirira kwonna n’obwegombi bwonna, tuliggya mu bitanda byaffe okuwummula abeeraliikirira n’abalulunkanira ebyabalala kwe batasobola kufuna mu byabwe. Ebirooto ebibi biligobebwa, oba ne bwe biba bizze, tulisangula okukwatibwa kwabyo, nga tumanyi nti birooto bwe birooto.

Bwe tunaayebaka bwe tutyo tunaaba tukoze bulungi. Nga Peetero yeebaka bulungi, ne kitangaala kya malayika lwe kyatamuzuukusa, ne kyetaagisa okukubibwa mu mbiriizi n’amaanyi okumuzuukusa. Ate nga yali asaliddwa okuttibwa enkeera. Bwe batyo abajulirwa bwe beebakanga nga tebannayokebwa. "Mukama abaagalwa be abawa otulo."

Okufuna otulo otuwooma tuteekwa okuba n’obulamu obuwooma, empisa eziwooma, ebirowoozo ebiwooma, n’okwagala okuwooma.

Marisi 26

OKUFAAYO KU BAAVU

"Mukama anaamujjanjabanga nga mulwadde" Zabbuli 41:3

Jjukira nti kino kisuubizo eri omuntu asaasira omunaku. Oli omu ku abo? Kale twala olunyiriri luno eka.

Laba mu ssaawa ey’obulwadde Katonda w’abaavu bw’aliwa omukisa omuntu afaayo ku baavu! Emikono egy’emirembe gyonna girimuwanirira emmeeme ye ng’emikono gya mikwano n’emitto emigonvu bwe giwanirira omubiri gw’omulwadde. Ekifaananyi kino nga kya kisa era nga kiraga okulumirwa; nga kireeta Katonda waffe okumpi n’obunafu bwaffe n’endwadde zaffe! Ani eyali awulidde kino ku Jove ow’abakaafiiri ab’edda, oba ku bakatonda ba Buyindi, oba ba China? Luno lulimi lwa Katonda wa Isiraeri yekka; Ye y’akkiriza okwetoowaza n’afuuka omujjanjabi era omulabirizi w’abantu abalungi. Bw’akuba n’omukono ogumu, awanirira n’omulala. Woowe, kuzirika kwa mukisa omuntu bw’agwa mu kifuba kya Mukama yennyini, n’asitulirwa okwo! Ekisa kye ddagala erisinga okuzzaamu amaanyi; okwagala kwa Katonda kye kizzaamu amaanyi ekisinga obutali bwa kabi eri omulwadde ayongobera; kufuula emmeeme ey’amaanyi ng’ekinene, n’amagumba bwe gaba nga gayitamu olususu. Tewali musawo nga Mukama, tewali ddagala nga ekisuubizo kye, tewali mwenge nga okwagala kwe.

Omusomi bw’aba ng’alemeddwa okutuukiriza obuvunaanyizibwa bwe eri abaavu, alabe ky’afiirwa, era amangwago afuuke mukwano gwabwe era omuyambi waabwe.

Marisi 27

OKUSEMBERERA KATONDA

"Musemberere Katonda, ne Katonda anaabasembereranga" Yakobo 4:8

Gye tukoma okusemberera Katonda, gy’akoma okweyoleka gye tuli mu kisa ekisingawo. Omwana omujaajaamya bw’adda eri kitaawe, kitaawe adduka n’amusisinkana. Ejjuba eribuze bwe likomawo mu lyato, Nuuwa agolola omukono gwe n’aliyingiza gy’ali. Omukazi omwagazi bw’anoonya okubeera ne bba, bba amujjira ku biwaawaatiro by’okwagala. Kale jjangu, mukwano gwange omwagalwa, tusemberere Katonda atulindirira n’ekisa ekingi bwe kityo, weewaawo, ajja n’atusisinkana.

Wali weetegerezezza olunyiriri olwo mu Isaaya 58:9? Eyo Mukama alabika ng’eyeewaayo eri abantu be, ng’abagamba nti, "Ndi wano." Kiringa agamba nti -- "Olina ki ky’oyagala okuŋŋamba? Nkukolere ki? Ndindirira okukuwa omukisa. Tuyinza tutya okulwawo okusembera? Katonda ali kumpi okusonyiwa, okuwa omukisa, okubudaabuda, okuyamba, okuzzaamu amaanyi, okununula. Ekisinga obukulu gye tuli kibeere okusembera okumpi ne Katonda. Ekyo bwe kikolebwa, byonna bikoleddwa. Bwe tusemberera abalala, bayinza okutukoowa mangu ne batuleka; naye bwe tunoonya Mukama yekka, tewali kukyuka kulijja mu ndowooza ye, wabula alyeyongera okutusemberera n’okusingawo ng’ayita mu kussekimu okujjuvu era okw’essanyu erisingawo.

Marisi 28

KULEMBERA

"Mukama anaakufuulanga mutwe so si mukira" Ekyamateeka Olwokubiri 28:13

Bwe tugondera Mukama, aliwaliriza abalabe baffe okulaba nti omukisa gwe guli ku ffe. Newaakubadde kino kisuubizo ky’amateeka, kikyanywedde eri abantu ba Katonda; kubanga Yesu yaggyawo ekikolimo, naye omukisa yagunyweza.

Kya batukuvu okukulembera mu bantu ng’obulamu bwabwe obutukuvu bwe bukwata ku balala: tebalina kuba mukira, ogusikibwa eno n’eri abalala. Tetuteekwa kugondera mwoyo gwa mulembe guno, wabula tuwalirize omulembe okuvuunamira Kristo. Mukama bw’aba naffe, tetulyegayirira kugumiikirizibwa kw’eddiini, wabula tulinoonya okugituuza ku ntebe ey’obwakabaka ey’obuntu bwonna. Mukama Yesu teyafuula bantu be bakabona? Ddala balina okuyigiriza, so tebalina kuba bayizi ba magezi g’abatakkiriza. Mu Kristo tetwafuulibwa bakabaka okufuga ensi? Kale, tuyinza tutya okuba abaddu b’empisa ez’ensi, abasibe b’endowooza z’abantu?

Ggwe, mukwano gwange omwagalwa, otwala ekifo kyo ekituufu ku lwa Yesu? Bangi nnyo basirika olw’okubulwa obuvumu, oba n’olw’obuti. Tukkirize erinnya lya Mukama Yesu okusigala emabega? Eddiini yaffe eyisibwe ng’omukira? Tekyandisaanidde okukulembera, n’okuba amaanyi agafuga ffe n’abalala?

Marisi 29

OKUKKIRIZA OKUTATYA

"Ndi wamu naawe, tewali ayinza kukulumba n’akukola kabi" Ebikolwa by’Abatume 18:10

Mukama nga bwe yali akyalina omulimu Pawulo gw’alina okukola mu Kkolinso, obusungu bw’ekibiina bwaziyizibwa. Abayudaaya baawakanya ne bavvoola; naye tebaasobola kuziyiza kubuulira Njiri, wadde okukyuka kw’abawulira. Katonda alina obuyinza ku birowoozo ebisingira ddala obukambwe. Obusungu bw’omuntu bwe bubuubuuka abufuula okumutendereza, naye asingira ddala okulaga obulungi bwe bw’abuziyiza; era asobola okubuziyiza. "Olw’omukono gwo ogw’amaanyi tebalinyega, balisirika ng’ejjinja okutuusa abantu bo lwe baliyitawo, Ayi Mukama."

Noolwekyo, totya muntu n’akatono ng’omanyi nti okola omulimu gwo. Genda mu maaso butereevu, nga Yesu bwe yandikoze, era abo abawakanya baliba ng’olumuli olubetentefu era ng’olutambi olunyooka. Emirundi mingi abantu baafuna ensonga ez’okutya kubanga bo bennyini baali batya; naye okukkiriza Katonda okutatya kusuula okutya ku bbali ng’ekinene bwe kisuula ebiwujjo by’ennabbubi mu kkubo lyakyo. Tewali muntu ayinza kutukola kabi okuggyako Mukama ng’akkirizza. Oyo afuula Setaani yennyini okudduka olw’ekigambo kimu, ddala asobola okufuga ababaka ba Setaani. Oboolyawo bo bakutya nnyo okusinga ggwe bw’obatya. Noolwekyo, genda mu maaso, era gye wasuubira okusanga abalabe olisangayo mikwano.

Marisi 30

OKUSABA, OKWEBAZA, OKUTENDEREZA

"Temweraliikiriranga kintu na kimu, wabula mu buli kintu mu kusabanga ne mu kwegayiriranga awamu n’okwebazanga, mutegeezenga Katonda bye mwetaaga. N’emirembe gya Katonda, egisukkiridde okutegeera kwammwe ginaabakuumanga amagezi gammwe n’emitima gyammwe mu Kristo Yesu" Abafiripi 4:6,7

Tewabanga kweraliikirira, wabula okusaba mu byonna. Tewabanga kutya, wabula okussa ekimu ne Katonda okungi okw’essanyu. Twala okwegomba kwo eri Mukama w’obulamu bwo, omukuumi w’emmeeme yo. Genda gy’ali n’emigabo ebiri egy’okusaba, n’omugabo gumu ogw’okutendereza okuwunya akaloosa. Tosabanga ng’obuusabuusa, wabula ng’oyebaza. Lowooza nti by’osabye obifunye, era kyova weebaza Katonda olw’ekisa kye. Akuwa ekisa, mwebaze. Tokwekanga kintu. Tokkirizanga kwetaaga kwonna kusigala nga kukuluma mu kifuba kyo; "mutegeezenga Katonda bye mwetaaga." Toddukiranga muntu. Genda eri Katonda wo yekka, Kitaawe wa Yesu, akwagalira mu Ye.

Kino kirikuleetera emirembe gya Katonda yennyini. Toliyinza kutegeera mirembe gy’olinyumirwa. Girikuzingako mu kugwa mu kifuba kwagyo okutaliiko kkomo. Omutima n’amagezi mu Kristo Yesu birinnyikira mu nnyanja ey’okuwummula. Ne bwe wajja obulamu oba okufa, obwavu, obulumi, okuwaayiriza, olibeera mu Yesu waggulu wa buli mpewo esiikuula na buli kire ekizikiza. Tojja kugondera kiragiro kino eky’omuwendo?

Weewaawo, Mukama, nkukkiriza; naye nkwegayiridde, nnyamba okukkiriza kwange kweyogereko.

Marisi 31

OBUTEBENKEVU BW’EBIROWOOZO

"Totyanga kabenje kootomanyiridde, wadde okuzikirira okujjira abakozi b’ebibi, Kubanga Mukama y’anaabeeranga obwesigwa bwo, era anaalabiriranga ekigere kyo ne kitakwatibwa mu mutego" Engero 3:25,26

Katonda bw’aba ng’atambula mu nsi ng’asala emisango, tayagala bantu be kutya. Tajjidde kukola kabi, wabula kulwanirira batuukirivu.

Ayagala balage obuvumu. Ffe abanyumirwa okubeerawo kwa Katonda tusaanidde okulaga obutebenkevu bw’ebirowoozo. Nga Mukama yennyini bw’ayinza okujja embagirawo, tetusaanidde kwewuunya kintu kyonna ekijja embagirawo. Okutebenkera wansi w’okulumba n’okuwuuma kw’ebibi ebitasuubirwa kirabo kya muwendo eky’okwagala kwa Katonda.

Mukama ayagala abalonde be balage okwawula, balyoke balabe nti okuzikirira kw’abakozi b’ebibi si kabenje ka nnamaddala eri obutonde bwonna. Ekibi kyokka kye kibi; ekibonerezo ekikigoberera kiringa omunnyo ogukuuma abantu baleme okuvunda. Twandyennyamidde nnyo olw’ekibi ekisaanira omuliro ogutazikira, okusinga olw’omuliro ogutazikira oguva mu kibi.

Bwe kityo, abantu ba Mukama basaanidde okulaga okutebenkera okungi mu mwoyo. Setaani n’ezzadde lye ery’omusota bajjudde obukuusa bwonna; naye abo abatambula ne Katonda tebalikwatibwa mu mitego gyabwe egy’obulimba. Genda mu maaso, ggwe akkiriza Yesu, era Mukama abeere obwesigwa bwo.