Omwezi gwa Okitobba

Okitobba 1

ENDAGAANO GY’AJJUKIRA

"Agabira abamutya emmere; era ajjukira endagaano ye buli kiseera." Zabbuli 111:5

Abo abatya Katonda tebalina kya kutya kya bwetaavu. Mu myaka gino gyonna emiwanvu, Mukama bulijjo abadde afunira abaana be emmere, oba nga bali mu ddungu, oba ku kagga Kerisi, oba mu buwaŋŋanguse, oba wakati mu njala. Okutuusa kaakano Mukama atuwadde emmere yaffe eya buli lunaku, era tetubuusabuusa nti ajja kweyongera okutuliisa okutuusa lwe tutaliba na kwetaaga kirala.

Ku by’emikisa emisukkulumu era eminene egy’endagaano ey’ekisa, taalekenga kubituwa nga embeera yaffe bw’eyagala. Ajjukira nti ye yakola endagaano eyo, era tayisaayisa nga eyagigejjererwa. Agijjukira ne bwe tumusunguwaza okututta. Ajjukira okutwagala, okutukuuma, n’okutubudaabuda, nga bwe yeeyama okukola. Ajjukira buli kimu ku ebyo bye yeeyama, wadde akatono ennyo, era takkiriza na kigambo kye na kimu kugwa wansi.

Ffe tetujjukira Katonda waffe nga bwe kigwanidde, naye ye atujjukira n’ekisa. Tayinza kwerabira Mwana we, Omuyima w’Endagaano, wadde Omwoyo we Omutukuvu, atuukiriza endagaano n’obunyiikivu, wadde ekitiibwa kye ye, ekisibiddwa ku ndagaano. Kyeva omusingi gwa Katonda gunywera, era tewali mukkiriza aliba afiirwa obusika bwe obw’obwakatonda, obubwe olw’endagaano ey’omunnyo.

Okitobba 2

OKUBUDAABUDA KU LUGENDO OLW’EKA

"Yusufu n’agamba baganda be nti, Nnaatera okufa, naye Katonda alibakyalira n’abalinnyisa okubaggya mu nsi eno; n’abatwala mu nsi gye yalayirira Ibulayimu, ne Isaaka ne Yakobo." Olubereberye 50:24

Yusufu yali eri baganda be ng’okulabirira kwa Katonda okwafuuka omuntu. Ba Yusufu baffe bonna baafa, era eby’okubudaabuda olukumi bifiira wamu nabo. Misiri teyaddayo kuba nga bw’eyali eri Isirayiri ng’oluvannyuma lwa Yusufu okufa, era n’ensi teyinza kuddamu kuba eri abamu ku ffe nga bwe yali ng’abaagalwa baffe bakyali balamu.

Naye laba obulumi bw’okufa okwo okunakuwavu bwe bwakendeezebwa! Baalina ekisuubizo nti Katonda omulamu alibakyalira. Okukyalirwa Yakuwa! Nga kya kisa nnyo! Nga kya kubudaabuda! Nga Ggulu ku nsi! Ayi Mukama, tukyalire olwa leero; wadde nga ddala tetusaanira ggwe okuyingira mu nju yaffe.

Naye waaliwo n’ebisingawo ebyasuubizibwa: Mukama yandibaggyeemu. Baalisanga mu Misiri okwanirizibwa okw’obunnyogovu Yusufu ng’amaze okufa; weewaawo, kyandibafuukidde ennyumba ey’obuddu. Naye tekyali kya kubeera bwe kityo emirembe gyonna; bandigivuddemu olw’obulokozi obw’obwakatonda, ne batambulira mu nsi ey’ekisuubizo. Tetulikaabira wano emirembe gyonna. Tuliyitibwa eka mu nsi ey’ekitiibwa okwegatta n’abaagalwa baffe. Kyeva, "buli omu agumyenga munne n’ebigambo ebyo."

Okitobba 3

ABALAGA OBULUNGI BWA MUKAMA

"Nze ndikulaba n’amaaso mu butuukirivu era ndimatira, bwe ndiraba obwenyi bwo nga nzuukuse." Zabbuli 17:15

Omugabo gw’abantu abalala gujjuza emibiri gyabwe, ne gugaggawaza abaana baabwe, naye omugabo gw’omukkiriza gwa ngeri ndala. Abantu ab’ensi eno balina obugagga bwabwe mu nsi eno, naye abantu ab’ensi ejja batunula waggulu era ewala.

Ebyaffe bya ngeri bbiri. Tulina okubeerawo kwa Katonda wano n’ekifaananyi kye oluvannyuma. Wano tulaba obwenyi bwa Mukama mu butuukirivu, kubanga tuweereddwa obutuukirivu mu Kristo Yesu. Nga kya ssanyu okulaba obwenyi bwa Katonda eyatabaganyizibwa naffe! Ekitiibwa kya Katonda mu bwenyi bwa Yesu Kristo kituwa Eggulu ku nsi, era kirituwa Eggulu ery’Eggulu waggulu.

Naye okulaba si kwe kukoma: tuli ba kufuulibwa ekyo kye tutunuulira. Tunaasula akaseera, ne tulyoka tuzuukuka ne tweesanga nga endabirwamu eziraga obulungi bwa Mukama waffe. Okukkiriza kulaba Katonda n’okutunula okukyusa. Omutima gutwala ekifaananyi kya Yesu mu buziba bwagwo, okutuusa engeri ya Yesu lw’eteekebwa ku mwoyo. Kuno kwe kumatira. Okulaba Katonda n’okumufaanana -- kiki ekirala kye nnyinza okwegomba? Obwesige bwa Dawudi obw’amazima wano, ku bw’Omwoyo Omutukuvu, bufuulibwa ekisuubizo kya Mukama. Nkikkiriza. Nkisuubira. Mukama, kituukirize. Amiina.

Okitobba 4

EKISIKA EKY’AMAANYI

"Bwe ndiwanikibwa okuva mu nsi, ndiwalulira bonna gye ndi." Yokaana 12:32

Mujje, mmwe abakozi, mugume omwoyo. Mutya nti temuyinza kusika kibiina. Mugezeeko okubuulira Omulokozi eyakomererwa, eyazuukira, era eyalinnya mu ggulu; kubanga guno gwe "musika" omukulu ennyo ogwali gulaze mu bantu. Kiki ekyakusika okudda eri Kristo okuggyako Kristo? Kiki ekikusika okudda gy’ali kaakano okuggyako ye yennyini omulungi? Bw’oba wasikibwa okudda mu ddiini olw’ekintu ekirala kyonna, mangu ddala oliwalulwa okuvaamu; naye Yesu akukutte, era anaakukuuma okutuusa ku nkomerero. Kale, lwaki obuusabuusa amaanyi ge ag’okusika abalala? Genda n’erinnya lya Yesu eri abo abaabadde bakakanyavu, olabe oba teribasika.

Tewali muntu wa ngeri yonna atasobola kusikibwa maanyi gano. Abakadde n’abato, abagagga n’abaavu, abatamanyi n’abayigirivu, aboonoonefu oba ab’engeri ennungi -- abantu bonna balivaayo bawulire amaanyi agasika. Yesu ye kisika kyokka. Tuleme okulowooza ku kirala kyonna. Ennyimba tezirisika muntu eri Yesu, so si buweereza bwa bigambo, so si kuwakana, so si mikolo gya ddiini, so si luyoogaano. Yesu yennyini y’ateekwa okusika abantu okudda gy’ali; era Yesu amala ku mulimu ogwo mu mbeera zonna. Toluubirizibwa nkola z’obukumpanya ez’ekiseera kino; naye ng’abakozi ba Mukama mukolere mu ngeri ye, era musike n’emiguwa gya Mukama gennyini. Sika okudda eri Kristo, era sika ku bwa Kristo, kubanga olwo Kristo alisika ku bubwe mu ggwe.

Okitobba 5

KU KIRAGIRO KYA KATONDA

"Abantu ba Isirayiri abalisigalawo balibeera wakati mu mawanga agabeetoolodde, babe ng’omusulo oguva eri Mukama, ng’obukubakuba obutonnyeredde ku muddo obutalindirira muntu oba abaana b’abantu." Mikka 5:7

Bwe kiba nga kino kya mazima ku Isirayiri ow’omu mubiri, kirisingawo okuba amazima ku Isirayiri ow’omwoyo, abantu ba Katonda abakkiriza. Abatukuvu bwe baba nga bwe kibagwanira, baba mukisa ogutabalika eri abo be basaasaanyizibbwamu.

Bali ng’omusulo; kubanga mu ngeri ya kasirise, etatawaanya, bawummuza abo abaabeetoolodde. Mu kasirise naye n’obuyinza, baweereza obulamu, okukula, n’essanyu by’abo ababeera nabo. Nga bava butiribiri mu Ggulu, nga bamasamasa ng’amayinja ag’omuwendo mu njuba, abasajja n’abakazi ab’ekisa balabirira abanafu n’abatalina kya kubalirwa okutuusa buli kasubi lwe kafuna ettondo lyako ery’omusulo. Newaakubadde nga bato ng’obuntu obw’omuntu kinnoomu, bwe begatta, bamala ku bigendererwa by’okwagala Mukama by’atuukiriza okuyita mu bo. Amatondo g’omusulo gatuukiriza okuwummuza ennimiro engazi. Mukama, tufuule ng’omusulo!

Abantu abatya Katonda bali ng’enkuba etonnya ku kiragiro kya Katonda awatali kukkirizibwa na luukusa lwa muntu. Bakolera Katonda ka abantu bakyagale oba nedda; tebasaba lukusa lwa muntu okusinga enkuba bw’etakola. Mukama, tufuule bwe tutyo, ab’obuvumu era abanguyi mu buweereza bwo buli we tunaasindikibwa.

Okitobba 6

OBUKULEMBEZE BW’OMULUŊŊAMYA WAFFE

"Naye Omwoyo ow’amazima, bw’alijja alibaluŋŋamya mu mazima gonna." Yokaana 16:13

Amazima gali ng’empuku ennene gye twagala okuyingira, naye tetusobola kugiyita ffekka. Ku mulyango gwayo gaaka era gamasamasa; naye bwe twandyagadde okugenda mu maaso ne tunoonyereza mu bifo byayo eby’omunda ennyo, twetaaga omuluŋŋamya, oba tulyebuza. Omwoyo Omutukuvu, amanyi amazima gonna mu bujjuvu, ye muluŋŋamya alondeddwa ow’abakkiriza bonna ab’amazima, era abakulembera nga bwe basobola okugumira, okuva mu kisenge ekimu eky’omunda okudda mu kirala, balyoke balabe ebintu bya Katonda eby’omunda ennyo, n’ekyama kye ne kibategeererwa.

Nga kino kisuubizo kya ngeri ki eri omuntu eyeebuuza mu buwombeefu! Twagala okumanya amazima, n’okuyingira mu go. Tumanyi nti ffe twanguyirwa okukyama, era tuwulira obwetaavu obunene obw’omuluŋŋamya. Tusanyuka nti Omwoyo Omutukuvu azze era abeera mu ffe. Yeetoowaza n’atubeerera omuluŋŋamya, era tukkiriza obukulembeze bwe n’essanyu. Twagala okuyiga "amazima gonna," tuleme okuba ab’oluuyi lumu era abatali benkanya. Tetwagala kubeera batamanyi kitundu kyonna eky’okubikkulirwa lwa kubanga kyandituviirako okubulwa omukisa, oba okwonoona. Omwoyo gwa Katonda gujja gutuluŋŋamye mu mazima gonna: ka tuwulirize ebigambo bye n’emitima egiwulira, tugoberere obukulembeze bwe.

Okitobba 7

BULIJJO YE ASOOKA MU NKOLAGANA

"Yesu abakulembeddemu okugenda e Ggaliraaya. Eyo gye mulimulabira nga bwe yabagamba." Makko 16:7

Gye yalonda okusisinkana abayigirizwa be, eyo gye yandibaddewo mu kiseera ekituufu. Yesu akuuma endagaano ye ey’okusisinkana. Bw’asuubiza okutusisinkana ku ntebe ey’okusaasira, oba mu kusinza okw’olwatu, oba mu mpisa entukuvu, tuyinza okwesiga nti aliba eyo. Tuyinza mu bubi okwewala ekifo ekyalondebwa okukuŋŋaanirako, naye ye takikola. Agamba nti, "Abantu ababiri oba abasatu bwe banaakuŋŋaananga mu linnya lyange, nange nnaabeeranga awo wakati waabwe"; tayogera nti "Eyo gye ndibeera," wabula agamba nti, "Ndiwo dda."

Yesu bulijjo ye asooka mu nkolagana: "Abakulembera." Omutima gwe guli n’abantu be, essanyu lye liri mu bo, era talwako kubasisinkana. Mu nkolagana yonna, atukulembera.

Naye yeeraga eri abo abamugoberera: "Eyo gye mulimulabira." Okulaba okw’essanyu! Tetufaayo kulaba muntu buntu asinga bonna, naye okulaba YE kwe kujjuzibwa essanyu n’emirembe. Era tulimulaba, kubanga asuubiza okujja eri abo abamukkiriza, n’okweraga gye bali. Weesige nti bwe kiriba bwe kityo, kubanga buli kimu akikola ng’ekigambo kye eky’ekisuubizo bwe kiri: "nga bwe yabagamba." Nyweeza ku bigambo ebyo eby’enkomerero, era okakase nti okutuusa ku nkomerero alikukolera "nga bwe yabagamba."

Okitobba 8

TOLIBEERA WEKKA

"Ataliddayo kuyitibwa nti, Eyalekebwa" Isaaya 62:4

"Eyalekebwa" kigambo kya nnaku. Kivuga ng’ekide ky’okuziika. Kye kijjukizo ky’ennaku ezisingayo obungi, era obunnabbi bw’ebibi ebisingayo obubi. Obuziba obw’ennaku busamaala mu kigambo ekyo "Eyalekebwa." Okulekebwa oyo eyeeyama ekitiibwa kye! Okulekebwa mukwano gwo gw’omaze ebbanga ddene ng’omugezesezza era ng’omwesiga! Okulekebwa ow’oluganda omwagalwa! Okulekebwa kitaawo ne nnyoko! Okulekebwa bonna! Kino ddala kya kabi, naye kiyinza okugumiikirizibwa singa Mukama anaatulonda.

Naye kiba kitya okuwulira ng’olekeddwa Katonda? Lowooza ku kkaaba erisinga obukaawa, "Katonda wange, Katonda wange, lwaki onjabulidde?" Waliwo lwe twali tulozezzaako mu ngeri yonna omususa n’ekikaawa eky’"Eyalekebwa," mu makulu ago? Bwe kiba bwe kityo, ka twegayirire Mukama waffe atununule mu kuddiŋŋana kwonna okw’ennaku etayogerekeka bwe etyo. Woowe, ekizikiza ekifaanana ng’ekyo kireme kuddayo emirembe gyonna! Abantu mu bukyayi baayogera ku mutukuvu nti, "Katonda amulese, ka tumugobe tumukwate." Naye bwe kyali bulijjo bwa bulimba. Ekisa kya Mukama eky’okwagala kirikaka abalabe baffe abakambwe okulya ebigambo byabwe, oba, wakiri, okusirika.

Ekikontanya n’ebyo byonna kye kigambo ekyo ekisukkuluma, Hephzibah -- "Mukama akusanyukira." Kino kifuula okukaaba okuzina. Abo abaali baloota nti balekeddwa bawulire Mukama ng’agamba nti, "Sirikuleka era sirikwabulira n’akatono.''

Okitobba 9

KIKI EKITUKUZA EBIWEEBWAYO BYAFFE?

"Awo kabona anaddiranga ku musaayi, n’agusiiga ku mayembe ag’oku kyoto okwoterezebwa obubaane obw’akawoowo, ekiri mu Weema ey’Okukuŋŋaanirangamu mu maaso ga Mukama." Ebyabaleevi 4:7

Ekyoto eky’obubaane kye kifo abatukuvu we bawaayo okusaba kwabwe n’ettendo lyabwe; era kya ssanyu okukirowoozaako nga kimansiddwako omusaayi ogwa Ssaddaaka enkulu. Kino kye kifuula okusinza kwaffe kwonna okukkirizibwa eri Yakuwa: alaba omusaayi gwa Mwana we, era kyava akkiriza ekitiibwa kye tumuwa.

Kirungi gye tuli okussa amaaso gaffe ku musaayi ogw’ekiweebwayo ekimu olw’ekibi. Ekibi kyetabika ne mu bintu byaffe ebitukuvu, era okwenenya kwaffe okusinga obulungi, okukkiriza, okusaba, n’okwebaza tebyandikkiriziddwa Katonda singa si lwa muwendo gwa ssaddaaka ey’okutangirira. Bangi banyooma "omusaayi"; naye gye tuli gwe musingi gw’okubudaabudibwa n’essuubi. Ekiri ku mayembe ag’ekyoto kigendererwa okuba mu maaso gaffe mu lwatu bwe tusemberera Katonda. Omusaayi guwa amaanyi okusaba, era kyeguva guba ku mayembe ag’ekyoto. Guli "mu maaso ga Mukama," era kyeguva kigwana okuba mu maaso gaffe. Guli ku kyoto nga tetunnaleeta bubaane; guliwo okutukuza ebiweebwayo byaffe n’ebirabo.

Mujje, ka tusabe n’obwesige, kubanga Ssaddaaka eweereddwayo, omuwendo guwoleddwayo, omusaayi guli munda w’eggigi, era okusaba kw’abakkiriza kuteekwa okuba okuwoomerera eri Mukama.

Okitobba 10

OLUGGI OLUGGULE OLW’EMPULIRAGANYA NE KATONDA

"Laba nkugguliddewo oluggi, omuntu yenna lw’atayinza kuggala" Okubikkulirwa 3:8

Abatukuvu ababeera abeesigwa eri amazima ga Katonda balina oluggi oluggule mu maaso gaabwe. Ggwe emmeeme yange, osazeewo okubeera omulamu n’okufa ng’onywerera ku ekyo Mukama ky’abikkulidde mu Kigambo kye, kale mu maaso go we luyimiridde oluggi luno oluggule.

Nnaayingira nga mpita mu luggi oluggule olw’empuliraganya ne Katonda. Ani anaŋŋaana? Yesu aggyeewo ekibi kyange, n’ampa obutuukirivu bwe, kale nsobola okuyingira awatali kuziyizibwa. Mukama, nkola bwe ntyo olw’ekisa kyo.

Nnina era mu maaso gange oluggi oluggule oluyingira mu byama by’Ekigambo. Nsobola okuyingira mu bintu ebiwanvu ebya Katonda. Okulondebwa, Okwegatta ne Kristo, Okukomawo omulundi ogw’okubiri -- bino byonna biri mu maaso gange, era nsobola okubinyumirwa. Tewali kisuubizo wadde enjigiriza ebiggaliddwa gye ndi kaakano.

Oluggi oluggule olw’okusemberera Katonda luli mu maaso gange mu kyama, n’oluggi oluggule olw’okuba ow’omugaso mu lwatu. Katonda anampulira; Katonda anankozesa. Oluggi lugguliddwawo olw’olugendo lwange olw’okugenda mu maaso eri ekkanisa eri waggulu, n’olw’empuliraganya yange eya buli lunaku n’abatukuvu ab’oku nsi kuno. Abamu bayinza okugezaako okunsibira munda oba okunzigala ebweru, naye byonna bya bwereere.

Amangwago ndiraba oluggi oluggule oluyingira mu Ggulu: omulyango ogw’olulu gwe gunaaba ekkubo lyange ery’okuyingira, ne ndyoka ngenda eri Mukama wange era Kabaka wange, ne mbeera ne Katonda nga nsibiddwa munda emirembe gyonna.

Okitobba 11

OKUBEERA N’EDDEMBE OKUTAMBULA

"Ndibafuula ba maanyi mu Mukama era nabo balitambulira mu linnya lyange, bw’ayogera Mukama." Zekkaliya 10:12

Eky’okusanyusa abatukuvu abalwadde. Baweddemu amaanyi, era batya nti tebalivaayo ku kitanda eky’okubuusabuusa n’okutya; naye Omusawo Omukulu asobola okuggyawo obulwadde, era n’okuggyawo obunafu obuvudde mu bwo. Alizzaamu amaanyi abanafu. Kino alikikola mu ngeri esinga obulungi, kubanga kiriba "mu Yakuwa." Amaanyi gaffe gasinga obulungi nga gali mu Katonda okusinga nga gali mu ffe ffennyini. Mu Mukama galeeta empuliraganya, mu ffe ffennyini gandireese amalala. Mu ffe ffennyini gandibadde matono ennaku, naye mu Katonda tegalina kkomo.

Amaanyi bwe gaweebwa, omukkiriza agakozesa. Atambulira mu linnya lya Mukama. Nga kya ssanyu okutambula ebweru oluvannyuma lw’obulwadde, era nga kya ssanyu okuba ow’amaanyi mu Mukama oluvannyuma lw’ekiseera eky’okulemala! Mukama awa abantu be eddembe okutambula, n’obwerere obw’omunda okukozesa eddembe eryo. Atufuula abaami: tetuli baddu abatamanyi kuwummula, era abatalaba bintu, naye tuli ba ddembe okutambula mpola mu nsi ya Emmanweri yonna.

Jjangu, ggwe omutima gwange, toddayo kuba mulwadde na munakuwavu, Yesu akulagira obeere ow’amaanyi, era otambule ne Katonda mu kufumiitiriza okutukuvu. Gondera ekigambo kye eky’okwagala.

Okitobba 12

AKABONERO AK’EKISA EKY’ENDAGAANO

"Mukama Katonda wo alikomola omutima gwo, n’omutima gwa bazzukulu bo, bw’otyo oyagalanga Mukama Katonda wo n’omutima gwo gwonna, n’emmeeme yo yonna, olyoke obeerenga omulamu." Ekyamateeka Olwokubiri 30:6

Wano tusoma ku kukomola okw’amazima.

Weetegereze eyakukola: "Mukama Katonda wo." Ye yekka y’asobola okukola ku mutima gwaffe mu ngeri esobola, n’aggyawo obw’omubiri n’obucaafu bwagwo. Okutufuula okwagala Katonda n’omutima gwaffe gwonna n’emmeeme yaffe yonna kya kyamagero eky’ekisa Omwoyo Omutukuvu yekka ky’asobola okukola. Tuteekwa okutunuulira Mukama yekka olw’ekino era tuleme okumatizibwa n’ekitatuuka ku ekyo.

Weetegereze ekifo okukomola kuno gye kukolerwa. Si kwa mubiri, wabula kwa mwoyo. Ke kabonero akateekwa ddala ak’endagaano ey’ekisa. Okwagala Katonda kye kabonero ekitasangulika eky’ezzadde eryalondebwa; olw’envumbo eno ey’ekyama okulondebwa okw’ekisa kukakasibwa eri omukkiriza. Tuteekwa okwegendereza tuleme okwesiga mpisa za kungulu, wabula okuteekebwako envumbo mu mutima olw’omulimu gw’Omwoyo Omutukuvu.

Weetegereze ky’evaamu -- "olyoke obeerenga omulamu." Okulowooza eby’omubiri kwe kufa. Mu kuwangula omubiri mwe tusanga obulamu n’emirembe. Bwe tussa omwoyo gwaffe ku bintu eby’Omwoyo, tunaabeera balamu. Ayi, Yakuwa, Katonda waffe, atuukirize omulimu gwe ogw’ekisa ku butonde bwaffe obw’omunda, tulyoke tube abalamu eri Mukama mu ngeri esinga okujjula n’esinga obukulu.

Okitobba 13

SINGA, N’EKISUUBIZO EKISATU

"Abantu bange abatuumiddwa erinnya lyange bwe baneetowazanga, ne basaba, ne banoonya amaaso gange, ne bakyuka okuleka amakubo gaabwe amakyamu, kale nnaawuliranga nga nsinziira mu ggulu ne nsonyiwa ekibi kyabwe era ne mponya ensi yaabwe." 2 Ebyomumirembe 7:14

Newankubadde nga tuyitibwa erinnya lya Mukama, kyokka tuli basajja na bakazi aboonoona. Nga kya kisa nnyo nti Katonda waffe mwetegefu okusonyiwa! Buli lwe twonoona, tuyanguwe okugenda ku ntebe ey’okusaasira eya Katonda waffe, nga tunoonya okusonyiyibwa.

Tuteekwa okwetoowaza. Tetusaanidde kwetoowaza olw’ekituufu nti oluvannyuma lw’okufuna okwagala okungi bwe kityo naye tukyayonoona? Ayi Mukama, tuvuunama mu maaso go mu nfuufu, era tukkiriza obutasiima bwaffe obw’amaanyi. Ayi, obuswavu bw’ekibi! Ayi, obuswavu bwakyo emirundi musanvu mu bantu abaayagalibwa nnyo nga ffe bwe tubadde!

Ekiddako, tuteekwa okusaba okusaasirwa, okulongoosebwa, n’okununulibwa okuva mu maanyi g’ekibi. Ayi Mukama, tuwulire ne kaakano, so toziyiza kukaaba kwaffe.

Mu kusaba kuno tuteekwa okunoonya amaaso ga Mukama. Atulese olw’ebisobyo byaffe, era tuteekwa okumwegayirira akomewo. Ayi Mukama, tutunuulire ng’oyita mu Mwana wo Yesu, era abaddu bo obamwenyukire.

Awamu n’ekyo tuteekwa okukyuka ffennyini okuva mu bubi, Katonda tayinza kutukyukira wabula nga ffe tukyuse okuva mu kibi.

Awo we lijjira ekisuubizo ekisatu eky’okuwulira, okusonyiwa, n’okuwonya. Kitaffe, otuwe ebyo mangu ago olwa Mukama waffe Yesu Kristo.

Okitobba 14

OBUTAKWATIBWA NSONYI EMIREMBE GYONNA

"Buli muntu alinjatulira mu maaso g’abantu, nange ndimwatulira mu maaso ga Kitange ali mu ggulu." Matayo 10:32

Ekisuubizo eky’ekisa! Kya ssanyu kinene gye ndi okwatula Mukama wange. Ne bwe biba ebisobyo byange bye biryawo bitya, sikwatibwa nsonyi za Yesu, so sitya kulangirira njigiriza z’omusaalaba gwe. Ayi Mukama, obutuukirivu bwo sibukwese munda mu mutima gwange.

Nga kirungi essuubi ekyawandiikibwa kye kinteekera mu maaso! Mikwano bandeka ne balabe basanyuka, naye Mukama taleka muddu we. Awatali kubuusabuusa Mukama wange anankkiriza n’okuno, era anampa obubonero obuggya nti ansiima. Naye wajja olunaku lwe nnaayimirira mu maaso ga Kitaffe omukulu. Nga kya ssanyu okulowooza nti Yesu alinjatulira olwo! Aligamba nti, "Omuntu ono yanneesiga ddala, era yali mwetegefu okuvumibwa ku lw’erinnya lyange; kyenva mmwatula nti wange." Olunaku olulala omusajja omukulu yafuulibwa knight, Kabaka omukazi n’amuwa olukoba olw’amayinja ag’omuwendo; naye ekyo kigasa ki? Kiriba kitiibwa okusinga ebitiibwa byonna, Mukama Yesu okutwatulira mu maaso g’Oyo Ow’ekitiibwa ow’obwakatonda ali mu Ggulu. Nneme okukwatibwa ensonyi okwatula Mukama wange. Nneme okukkiriza okusirika okwa buti, wadde okukkiriza okukwaŋŋana okw’omutima omunafu. Nnaaswala okwatula Oyo asuubiza okunjatula?

Okitobba 15

OKUWANIRIRWA OLW’OKULYA

"Nga Kitange eyantuma bw’ali omulamu, nange bwe ndi omulamu ku bwa Kitange, noolwekyo oyo alya ku nze naye aliba mulamu ku bwange." Yokaana 6:57

Tubeera balamu olw’okwegatta kwaffe n’Omwana wa Katonda. Nga Omutabaganya Katonda-omuntu, Mukama Yesu abeera omulamu ku bwa Kitaawe eyeetuula yekka eyamutuma, era mu ngeri y’emu tubeera balamu olw’Omulokozi eyatuzza obulamu. Oyo ali nsibuko y’obulamu bwaffe ye era y’abuwanirira. Obulamu buwanirirwa okuyita mu kulya. Tuteekwa okuwanirira obulamu obw’omwoyo n’emmere ey’omwoyo, era emmere eyo ey’omwoyo ye Mukama Yesu. Si bulamu bwe, oba okufa kwe, oba obuvunaanyizibwa bwe, oba omulimu gwe, oba ekigambo kye kyokka, wabula Ye yennyini, ng’azingiramu bino byonna. Ku Yesu, Ye yennyini, kwe tulya.

Kino kitulaga mu Kijjulo kya Mukama, naye kituganyulwa ddala nga tufumiitiriza ku Mukama waffe, ne tumukkiririza mu kukkiriza okumwetwalira, ne tumutwala munda mu ffe olw’okwagala, ne tumufuula omu naffe olw’amaanyi g’obulamu obw’omunda. Tumanyi kye kitegeeza okulya ku Yesu, naye tetusobola kukyogera wadde okukiwandiika. Ekisinga amagezi kwe kukikola, era okukikola nga tweyongera. Tukubirizibwa okulya bingi, era kinaatugasa nnyo awatali kkomo okukola bwe tutyo nga Yesu ye mmere yaffe era ye kyokunywa kyaffe.

Mukama, nkwebaza kubanga kino, ekyetaagisa mu bulamu bwange obuggya, era kye kya ssanyu kyakyo ekisinga. Kale, mu ssaawa eno ndya ku ggwe.

Okitobba 16

OKUBA OMU NE KRISTO YESU

"Kubanga Nze ndi mulamu, era nammwe muliba balamu." Yokaana 14:19

Yesu afudde obulamu bw’abamukkiririza obw’amazima nga bulamu bwe bwennyini. Nga bwe kiri eky’amazima nti Omutwe mulamu, n’ebitundu nabyo biba biramu. Singa Yesu tazuukira mu bafu, olwo tuli bafu mu bibi byaffe; naye olwokuba nti azuukidde, abakkiriza bonna bazuukidde mu ye. Okufa kwe kwaggyawo ebibi byaffe, ne kusumulula ebisiba ebyatunywezanga wansi w’omusango gw’okufa. Okuzuukira kwe kukakasa okuweebwa obutuukirivu kwaffe: tusonyiyiddwa, era okusaasira kwogera nti, "Mukama aggyeewo ekyonoono kyo era toofe."

Yesu afudde obulamu bw’abantu be obw’emirembe gyonna nga bulamu bwe bwennyini. Bayinza batya okufa ng’akyali mulamu, nga bali omu naye? Olwokuba nti tafa nate, era okufa tekukyamufuga, bwe batyo tebalidda nate mu ntaana z’ebibi byabwe eby’edda, wabula baliba balamu eri Mukama mu bulamu obuggya. Ayi ggwe omukkiriza, bw’oba, wansi w’okukemebwa okunene, otya nti olunaku olumu oligwa mu mukono gw’omulabe, kino kikuzzeemu amaanyi. Toolifiirwa bulamu bwo obw’omwoyo, kubanga bukwekeddwa ne Kristo mu Katonda. Tobuusabuusa butafa bwa Mukama wo; kyeva tolowooza nti alikuleka ofe, kubanga oli omu naye. Ensonga eraga obulamu bwo bwe bulamu bwe, era ku ekyo toyinza kubaako kutya; kyeva wummulira mu Mukama wo omulamu.

Okitobba 17

OKUTYA OKUTUKUVU

"Oyo awuliriza ebimulagirwa aliweebwa empeera." Engero 13:13

Okussa ekitiibwa okutukuvu mu Kigambo kya Katonda kukendedde nnyo. Abantu beerowooza okuba n’amagezi okusinga Ekigambo kya Mukama, ne bakisalira omusango. "Naye nze si bwe nakolanga, olw’okutya Katonda." Tukkiriza Ekitabo ekyaluŋŋamizibwa Omwoyo nga tekiriimu nsobi, era twoleka ekitiibwa kye tukiwa olw’obuwulize bwaffe. Tetutya kutiisibwa Kigambo, naye tulina okukitya ng’omwana bw’atya kitaawe. Tetutya bibonerezo byakyo, kubanga tulina okutya ebiragiro byakyo.

Okutya kuno okutukuvu okw’ekiragiro kuleeta okuwummula okw’obuwombeefu, okusinga wala obuwoomu obw’obutafaayo obw’amalala. Kufuuka omuluŋŋamya gye tuli mu ntambula yaffe; ekiziyiza bwe tuba tuserengeta, n’ekikubiriza bwe tuba twambuka. Nga tukuumiddwa okuva mu bubi era nga tuluŋŋamizibwa mu butuukirivu olw’ekitiibwa kye tuwa ekiragiro, tufuna emmeeme enteefu, nga luzzi lwa nvinnyo; okuwulira nti tetuvunaanyizibwa, nga bwe kuba obulamu obuva mu bafu; n’obwesige nti tusanyusa Katonda, nga ye ggulu ku nsi kuno. Abatatya Katonda bayinza okuduulira ekitiibwa kyaffe ekinene eri Ekigambo kya Mukama; naye ekyo kigasa ki? Empeera ey’okuyitibwa kwaffe okw’ekitiibwa etumatiza kimala. Empeera z’obuwulize zituleetera okunyoomereza okuduula kw’omunyoomi.

Okitobba 18

AMAZIGA, N’OLUVANNYUMA AMAKUNGULA AG’ESSANYU

"Abo abasiga nga bakaaba amaziga, baliyimba ennyimba ez’essanyu nga bakungula." Zabbuli 126:5

Ebiseera eby’okukaaba bituufu okusigira: tetwagala ttaka kuba likalu nnyo. Ensigo ennyike mu maziga ag’okweraliikirira okw’amaanyi erimera mangu. Omunnyo ogw’amaziga ag’okusaba gunaawa ensigo ennungi akawoowo akanaagikuuma eri envunyu: amazima agayogerwa n’obunyiikivu obungi galina obulamu obw’emirundi ebiri. Mu kifo ky’okulekera awo okusiga olw’okukaaba kwaffe, ka twongere okufuba kubanga ekiseera kirungi nnyo.

Ensigo yaffe ey’omu ggulu teyandisigiddwa bulungi nga tuseka. Ennaku enkulu n’okufaayo ku myoyo gy’abalala kwe kugenderako okusaanira okuyigiriza okutya Katonda okusinga buli kintu ekiringa okusaaga. Tuwulidde ku basajja abaagenda ku lutalo n’omutima omwangu, naye baawangulwa; era bwe kityo bwe kiri emirundi mingi eri abo abasiga mu ngeri y’emu.

Kale jjangu, ggwe omutima gwange, weyongere okusiga mu kukaaba kwo, kubanga olina ekisuubizo eky’amakungula ag’essanyu. Olikungula. Ggwe kennyini oliraba ebivudde mu mulimu gwo. Kino kirikutuukako mu kigero ekinene ennyo ne kikuleetera essanyu, ekyo amakungula amatono, amakalu, era amabi bye gatandiyinzizza kukola. Amaaso go bwe ganaaba nga gazibye olw’amaziga aga ffeeza, olowooze ku ŋŋaano eza zaabu. Gumira n’essanyu okutegana n’okunyolwa okwa kaakano; kubanga olunaku olw’amakungula lulikusasula mu bujjuvu.

Okitobba 19

OKUKANGAVVULA OKUGEREDDWA

"Ndibakangavvula n’obwenkanya" Yeremiya 30:11

Okulekebwa nga tokangavvulwa kyandibadde kabonero ka kabi: kyandikakasizza nti Mukama agambye nti, "Yeegasse n’abasinza ebifaananyi, mumuleke abeere yekka." Katonda aleme kukkiriza kino kubeera mugabo gwaffe! Okukulaakulana okutaliiko kizibu kintu ekireeta okutya n’okukankana. Bonna Katonda b’ayagala n’okwagala okungi, y’abanenya n’okubakangavvula: naye abo b’atassaamu kitiibwa, abaleka ne beegejjesa awatali kutya, ng’ente ez’okuttibwa. Mu kwagala Kitaffe ow’omu ggulu mw’akozesa oluga ku baana be.

Naye laba, okukangavvula kuli "n’obwenkanya": atuwa okwagala okutaliiko kkomo, naye okukangavvula "n’obwenkanya." Nga bwe kyali mu mateeka ag’edda, tewaali Muyisirayiri eyandifunye okusinga "emisago amakumi ana ng’oggyeko gumu, ekyakakasa okubala n’obwegendereza n’okukendeeza ku kubonaabona, bwe kityo bwe kiri eri buli muntu abonyaabonyezebwa mu nnyumba ey’okukkiriza--buli lubetenta lubalibwa. Bwe bwenkanya bw’amagezi, obwenkanya bw’okusaasira, obwenkanya bw’okwagala, kwe kukangavvula kwaffe bwe kugereddwa. Kikafuuwe ffe okujeemera ebiragiro ebya Katonda bwe bityo. Mukama, bw’oyimirira okugera amatondo ag’obukaawa mu kikompe kyange, kiŋŋwanidde okukikkiriza n’essanyu okuva mu mukono gwo, ne nkinywa nga bwe ondagira, nga njogera nti, "By’oyagala bikolebwe."

Okitobba 20

OKUVA MU BULI KIBI

"Alirokola abantu bonna mu bibi byabwe" Matayo 1:21

Mukama, ndokola mu bibi byange. Olw’erinnya lyo Yesu, nzikirizibwa okusaba bwe ntyo. Ndokola mu bibi byange eby’edda, omuze gwabyo guleme kunsiba busibe. Ndokola mu bibi ebinzaalirwa, nleme kufuuka muddu wa bunafu bwange. Ndokola mu bibi ebiri bulijjo mu maaso gange, nleme kufiirwa okubikyawa. Ndokola mu bibi eby’ekyama; ebibi bye sitegeera olw’obutaba na kitangaala. Ndokola mu bibi ebiddiŋŋana mangu era ebyewuunyisa: nneme okusuulibwa wansi olw’okugwibwa amaanyi okw’okukemebwa. Ndokola, Mukama, mu buli kibi. Tokkiriza kibi kyonna kunfuga."

Ggwe wekka gw’oyinza okukola kino. Sisobola kukutula njegere zange oba okutta abalabe bange. Omanyi okukemebwa, kubanga wakemebwa. Omanyi ekibi, kubanga wetikka obuzito bwakyo. Omanyi engeri y’okundabirira mu kiseera kyange eky’olutalo; oyinza okundokola nneme okukola kibi, era okundokola bwe mba nga nkoze ekibi. Kisuubizibwa mu linnya lyo lyennyini nti olikola kino, era nkwegayirira leero nkakase obunnabbi buno. Nneme okuwaayo eri obusungu, oba amalala, oba okuggwaamu essuubi, oba engeri yonna ey’obubi; naye ondokole mu butukuvu bw’obulamu, erinnya lyo Yesu liryoke ligulumizibwe mu nze ennyo.

Okitobba 21

OKUKUBISAAMU KWA KATONDA

"Asembayo okuba owa wansi alyala n’aba lukumi, n’asembayo obutono afuuke eggwanga ery’amaanyi. Nze Mukama, ndikyanguya mu biseera byakyo." Isaaya 60:22

Emirimu gya Mukama emiretwa gitandika ku katono, era tegiba na kabi olw’ekyo. Obunafu buyigiriza okukkiriza, busintuza Katonda, era buleetera erinnya lye ekitiibwa. Muwe omuwendo ebisuubizo eby’okweyongera! Empeke ya kaamulali ye nsinga obutono mu mpeke zonna, kyokka efuuka ekimera ekiri ng’omuti, nga kirina amatabi ebinyonyi eby’omu ggulu mwe bizimba ebisu. Tuyinza okutandika n’omu, era oyo "owa wansi," kyokka "alyala n’aba lukumi." Mukama mukugu nnyo mu kukubisaamu. Emirundi emeka gye yagamba omuddu we ali obwomu nti, "Nnaakwaza!" Mwesige Mukama, mmwe ab’omu n’ababiri; kubanga anaabeera wakati mu mmwe bwe munaakuŋŋaanira mu linnya lye.

"Asembayo obutono." Kiki ekiyinza okunyoomebwa okusinga mu maaso g’abo ababala emitwe ne bapima amaanyi! Kyokka guno gwe musingi gw’eggwanga ekkulu. Emmunyeenye emu yokka y’esooka okwaka akawungeezi, naye mangu ago eggulu lijjula ettabaaza ezitabalika.

So tetusaanidde kulowooza nti okweyongera kuli wala, kubanga ekisuubizo kigamba nti, "Nze Mukama, ndikyanguya mu biseera byakyo." Tewaabeewo kwanguyiriza kw’amangu ago, ng’okwo kwe tulaba mu nkuŋŋaana ezijjudde okusasamala; byonna biribeera mu biseera byabyo ebituufu; kyokka tewaabeewo kulwawo. Mukama bw’ayanguya, embiro ze za kitiibwa.

Okitobba 22

SINZIIRA KU KISUUBIZO KYE

"Kale nno okkirize okuwa ennyumba ey’omuddu wo omukisa enywerere mu maaso go ennaku zonna, kubanga ggwe Ayi Mukama Katonda oyogedde, era ennyumba ey’omuddu wo eneebanga n’omukisa ennaku zonna." 2 Samwiri 7:29

Kino kisuubizo ekyegayiriddwa, era bwe kityo kituyigiriza emirundi ebiri. Buli kigambo Mukama Katonda ky’ayogedde tusaanidde okukikkiriza nga kya mazima ddala, ne tulyoka tukyegayiririra ku ntebe ey’obwakabaka.

Nga kiwoomerera okujuliza ebyo Katonda waffe ky’ayogedde! Nga kya muwendo okukozesa "noolwekyo" ekisuubizo kye kitegeeza, nga Dawudi bw’akola mu lunyiriri luno!

Tetusaba lwa kubuusabuusa, wabula lwa kukkiriza. Okusaba awatali kukkiriza tekisaanira baana ba Mukama. Nedda, Mukama, tetuyinza kukubuusabuusa: tukakasibwa nti buli kigambo kyo gwe musingi ogwesigika ogw’okusuubira okusingayo. Tujja gy’oli ne tugamba nti, "Okole nga bwe wasuubiza." Wa omukisa ennyumba y’omuddu wo. Wonya abalwadde baffe; lokola abo abalengalenga; komyawo abo ababula; nyweza abo ababeera mu kukutya. Mukama, tuwe emmere n’ebyokwambala ng’ekigambo kyo bwe kiri. Yamba emirimu gyaffe; naddala wangaaza okufuba kwaffe okumanyisa Enjiri yo mu kitundu kyaffe. Fuula abaddu baffe abaddu bo, n’abaana baffe abaana bo. Leka omukisa gukulukute eri emirembe egigenda okujja, era ng’ekika kyaffe kyonna bwe kikyaliwo ku nsi kibeere nga kikwesigwa. Ayi Mukama Katonda, "ennyumba ey’omuddu wo eweebwe omukisa."

Okitobba 23

AMAKUNGULA G’EKITANGAALA, N’ESSANYU

"Omusana gwe gwakira abatuukirivu, n’abalina omutima ogw’amazima bajjula essanyu." Zabbuli 97:11

Obutuukirivu bulikuwaza omuwendo omungi eri omuntu abunywereramu mu buli kabi, naye ku nkomerero bulyesasulira era buliddizaawo amagoba agatakoma. Obulamu obutukuvu buli ng’okusiga ensigo: bingi bifuluma, era bulabika ng’abiziikidde mu ttaka, nga tebiddayo kukuŋŋaanyizibwa. Tukyama bwe tunoonya amakungula amangu ago; naye ensobi eno ya bwabuntu, kubanga kirabika nga tekisoboka kuziika kitangaala. Kyokka ekitangaala "kisigibwa," bw’ekigamba ekyawandiikibwa. Kigalamidde nga tekirabika: tewali akiraba, kisigiddwa. Tumanyidde ddala nti lulituuka ne kyeraga.

Tukakasa ddala nti Mukama ateeseteese amakungula eri abo abasiga ekitangaala, era baligakungula, buli muntu ku bubwe. Olwo essanyu lyabwe lirijja. Ebinywa by’essanyu olw’ensigo ez’ekitangaala. Omutima gwabwe gwali mugolokofu mu maaso ga Mukama, wadde ng’abantu tebaabawa kitiibwa olw’ekyo, naye ne babavuma: baali batuukirivu, wadde ng’abo ababeetoolodde babalanga ng’abaawukanya. Baalina okulindirira, ng’abalimi bwe balindirira ebibala eby’omuwendo eby’ensi: naye ekitangaala kyabasigirwa, era essanyu lyali litegekebwa ku lwabwe Mukama ow’amakungula.

Mugume amaanyi, baganda bange! Tetwetaaga kwanguyiriza. Ka tunyweze emmeeme zaffe n’obugumiikiriza, kubanga mangu ago emmeeme zaffe zirifuna ekitangaala n’essanyu.

Okitobba 24

OBUNYWEVU MU KUTYA KATONDA

"Ndikufuula ekisenge eri abantu bano, ekisenge ekinywezebbwa eky’ekikomo. Balikulwanyisa naye tebalikuwangula, kubanga ndi naawe, okukununula, n’okukulokola, bw’ayogera Mukama' Yeremiya 15:20

Obunywevu mu kutya n’okukkiriza Katonda bufuula omuntu ng’ekisenge eky’ekikomo, tewali ayinza kukimenya oba kukyasa. Mukama yekka y’ayinza okukola abo; naye twetaaga abantu ng’abo mu kkanisa, ne mu nsi, naye naddala ku kituuti.

Emirembe gino egy’obukuusa ginaalwanyisa n’amaanyi gonna abantu ab’amazima abatakyukakyuka. Tewali kirabika kunyiiza Setaani n’ezzadde lye ng’okusalawo n’obukakafu. Balumba obunywevu obutukuvu nga Abasuuli bwe baazingiza ebibuga ebiriko bbugwe. Essanyu liri nti tebayinza kuwangula abo Katonda b’afudde ab’amaanyi mu buyinza bwe. Nga batwalibwa buli mpewo ey’enjigiriza, abalala kye kyokka kwe kufuuyibwako, ne bagenda; naye abo abaagala enjigiriza ez’ekisa, kubanga balina ekisa eky’enjigiriza, bayimirira ng’enjazi wakati mu nnyanja ezisiikuuse.

Obunywevu buno buva wa? "Ndi naawe, bw’ayogera Mukama": eyo ye ddiba entuufu. Yakuwa alirokola n’awonya emmeeme ennywevu okuva mu kulumbibwa kwonna okw’omulabe. Eggye lituulumbye, naye Mukama ow’Eggye ali naffe. Tetwaŋŋanga kuva ku kifo kyaffe wadde akatono; kubanga Mukama yennyini y’atunyweza mu kifo kyaffe, era eyo gye tulibeerera emirembe gyonna.

Okitobba 25

KATONDA ASOOKE, EBIRALA BIGATTIBWEKO

"Naye musooke munoonye obwakabaka bwa Katonda n’obutuukirivu bwe, ebyo byonna mulibyongerwako." Matayo 6:33

Laba Bayibuli nga bw’etandika: "Ku lubereberye Katonda." Obulamu bwo butandike mu ngeri y’emu. Noonya n’emmeeme yo yonna, okusooka era okusinga byonna, obwakabaka bwa Katonda, ng’ekifo eky’obwenkanya bwo, n’obutuukirivu bwe ng’empisa ez’obulamu bwo. Ebisigadde biriva eri Mukama yennyini nga tobyeraliikirira. Byonna ebyetaagibwa mu bulamu buno ne mu kutya Katonda "mulibyongerwako."

Nga kino kisuubizo kya ngeri ki! Emmere, ebyokwambala, amaka, n’ebirala, Katonda yeeyama okubikugattako ng’omunoonya. Ffaayo ku mirimu gye, naye y’anaafaayo ku gyo. Bw’oba weetaaga empapula n’akaguwa, obiweebwa awamu bw’ogula ebintu ebikulu ennyo; bwe kityo bwe kityo byonna bye twetaaga eby’omu nsi tulibigattibwako awamu n’obwakabaka. Oyo omusika w’obulokozi taafe njala; n’oyo ayambaza emmeeme ye obutuukirivu bwa Katonda, Mukama tayinza kumuleka na mubiri gwereere. Vaawo ggwe okweraliikirira okumira. Ssaayo omwoyo gwo gwonna ku kunoonya Mukama. Okuyaayaana bwavu, n’okweraliikirira nnaku: okwesiga Katonda kye kyobugagga, n’okufaanana Katonda gwe musika ogw’omu ggulu. Mukama, nkunoonya, ndabike gy’oli.

Okitobba 26

OLW’AFFE

"Olw’abalonde be ennaku ezo zirikendezebwako" Matayo 24:22

Olw’abalonde be, Mukama akuuma emisango mingi, n’akendeeza egirala. Mu kubonaabona okunene, omuliro gwandyiye byonna singa si lwa kussa ekitiibwa ku balonde be, Mukama n’azikiza olulimi lw’omuliro. Bwe kityo, ng’alokola abalonde be olwa Yesu, era akuuma n’olulyo olw’abantu olw’abalonde be.

Nga kitiibwa kya ngeri ki ekiweebwa abatukuvu! Nga basaanidde okukozesa n’obunyiikivu obuyinza bwabwe eri Mukama waabwe! Aliwulira okusaba kwabwe olw’aboonoonyi, n’awa omukisa okufuba kwabwe olw’obulokozi bwabwe. Awa abakkiriza omukisa balyoke babeere mukisa eri abo abali mu butakkiriza. Aboonoonyi bangi balamu olw’okusaba kwa maama, oba mukyala, oba muwala, Mukama gw’assaamu ekitiibwa.

Tukozesezza bulungi obuyinza obw’enjawulo Mukama bw’atwesigisa? Tusabira ensi yaffe, n’amawanga amalala, n’omulembe guno? Mu biseera eby’entalo, enjala, ne kawumpuli, tuyimirira ng’abawolereza, nga twegayirira nti ennaku zikendezebweko? Tukungubagira mu maaso ga Katonda okubunyuuka kw’obutakkiriza, n’obukyamu, n’obwenzi? Twegayirira Mukama waffe Yesu okukendeeza obufuzi bw’ekibi ng’ayanguyiza okulabika kwe okw’ekitiibwa? Ka tufukamire, era tuleme okuwummula okutuusa Kristo lw’alirabika.

Okitobba 27

OKUWEEREZA KWE, AMAASO GE, ERINNYA LYE

"Abaddu be balimuweereza, era banaalabanga amaaso ge, n’erinnya lye liriwandiikibwa mu byenyi byabwe." Okubikkulirwa 22:3, 4

Emikisa esatu emironde giribeera gyaffe mu nsi ey’ekitiibwa.

"Abaddu be balimuweereza." Tewaabeewo bakama balala abatujooga, tewaabeewo buweereza bulala butunakuwaza. Tuliweereza Yesu bulijjo, mu bujjuvu, awatali kukoowa, era awatali kusobya. Guno gwe ggulu eri omutukuvu: mu bintu byonna okuweereza Mukama Kristo, n’okuba nga atulaba ng’abaddu be, kwe kwegomba kwa mmeeme yaffe okw’emirembe gyonna.

"Era banaalabanga amaaso ge." Kino kifuula okuweereza okusanyusa: mazima, gwe mpeera ey’okuweereza eya kaakano. Tulimanya Mukama waffe, kubanga tulimulaba nga bw’ali. Okulaba amaaso ga Yesu kye kisa ekisinga omuddu wa Mukama omwesigwa ennyo ky’ayinza okusaba. Kiki Musa kye yandisabye okusinga -- "Ka ndabe amaaso go"?

"N’erinnya lye liriwandiikibwa mu byenyi byabwe." Batunuulira Mukama waabwe okutuusa erinnya lye lwe likubibwa ku byenyi byabwe ng’ekifaananyi. Bategeerwa Ye, era nabo bamutegeera. Akabonero ak’ekyama ak’ekisa eky’omunda kakula ne kafuuka akabonero akalabika mu lwatu ak’enkolagana eyeeyanjudde.

Ayi Mukama, tuwe ebintu bino ebisatu mu ntandikwa yaabyo wano, tulyoke tubifune mu bujjuvu bwabyo mu kifo kyo eky’essanyu!

Okitobba 28

EBIBI EBY’OBUTAMANYA

"Bwe batyo banaasonyiyibwanga; kubanga baasobya mu butagenderera" Okubala 15:25

Olw’obutamanya bwaffe, tetutegeera bulungi bibi byaffe eby’obutamanya. Kyokka tuyinza okukakasa nti bingi, mu ngeri z’okukola ebitasaana n’okulekera awo ebisaana. Tuyinza okuba nga tukola n’omutima omulongoofu, ng’okuweereza Katonda, ekyo Ye ky’atalagira, era ky’atayinza kukkiriza.

Mukama amanyi buli kimu ku bibi bino eby’obutamanya. Kino kiyinza okututya, kubanga mu bwenkanya alituvunaana ebyonoono bino; naye ku luuyi olulala, okukkiriza kulaba essanyu mu nsonga eno, kubanga Mukama alifuba okulaba nti ebbala lye tutalaba lyoza. Alaba ekibi alyoke akyongereko okukiraba ng’akisuula emabega we.

Okubudaabudibwa kwaffe okukulu kwe kuti Yesu, kabona ow’amazima, atangiridde ekibiina kyonna eky’abaana ba Isirayiri. Okutangirira okwo kukakasa okusonyiyibwa kw’ebibi ebitamanyiddwa. Omusaayi gwe ogw’omuwendo gutunaazaako ekibi kyonna. Ka kibe nga amaaso gaffe gakiraba ne tukikaabira oba nedda, Katonda akirabye, Kristo akitangiridde, Omwoyo akakasa okusonyiyibwa kwakyo, bwe kityo tulina emirembe egy’engeri esatu.

Ayi Kitange, ntendereza okumanya kwo okw’obwakatonda, okutalaba byonoono byange byokka, naye era okumteekerateekera ekitangiriro ekimponya omusango gwabyo, ne nga sinnaba na kumanya nti ndina omusango.

Okitobba 29

KUUMA ENJAWULO

"Nzija kussaawo enjawulo wakati w’abantu bange n’abantu bo. Ekyamagero kino kijja kubaawo enkeera." Okuva 8:23

Falaawo alina abantu be, ne Mukama alina abantu be. Bano bayinza okubeera wamu, ne balabika ng’abenkanankana, naye waliwo enjawulo wakati waabwe, era Mukama aligyeyoleka. Si lwa mirembe gyonna ekintu kimu kirituuka bonna mu ngeri y’emu, naye waabeewo enjawulo nnene wakati w’abantu b’ensi n’abantu Yakuwa be yeeroboza.

Kino kiyinza okubaawo mu kiseera eky’emisango, Mukama bw’afuuka ekifo ekitukuvu eky’abatukuvu be. Kirabika nnyo mu kukyusibwa kw’abakkiriza ng’ekibi kyabwe kiggyibbwawo, ate ng’abatakkiriza basigala mu kusalirwa omusango. Okuva mu kaseera ako, bafuuka olulyo olw’enjawulo, bajja wansi w’okukangavvula okuggya, ne beeyagalira emikisa emiggya. Amaka gaabwe, okuva mu kiseera ekyo, teganyigirizibwa bibinja by’ebibi ebisaasaanya ebyonoona ne bibonyaabonya Abamisiri. Bakuumibwa okuva mu bucaafu bw’okwegomba, okuluma kw’okweraliikirira, obwonoonefu bw’obulimba, n’okubonyaabonya okw’ettima ekukambwe, ebisaanyaawo amaka mangi.

Weesige, ggwe omukkiriza agezesebbwa, nti wadde ng’olina ebizibu byo, olokolebwa mu bibinja by’ebibi ebisingako obubi, ebijjula amaka n’emitima gy’abaddu b’Omulangira w’ensi. Mukama assizaawo enjawulo; laba ng’okuuma enjawulo eyo mu mwoyo, mu kigendererwa, mu mpisa ne mu banno.

Okitobba 30

OKUNAAZIBWA OKUJJUVU

"Ndibamaansirako amazzi amayonjo, era ndibaggyako obutali bulongoofu bwammwe bwonna n’okuva ku bakatonda abalala bonna, ne mbafuula abalongoofu." Ezeekyeri 36:25

Nga essanyu lino lya maanyi! Oyo eyatunaaza n’omusaayi gwa Yesu era alitunaaza n’amazzi ag’Omwoyo Omutukuvu. Katonda akyogedde, era bwe kityo bwe kiteekwa okuba, "Mulibeera abalongoofu." Mukama, tuwulira era tukungubagira obutali bulongoofu bwaffe, era kizzaamu amaanyi okukakasibwa n’akamwa ko wennyini nti tulibeera abalongoofu. Ayi, singa okikola mangu!

Alitulokola mu bibi byaffe ebisingayo obubi. Okugolokoka kw’obutakkiriza, n’okwegomba okulimba okulwanyisa emmeeme, ebirowoozo ebibi eby’amalala, n’okusendasenda kwa Setaani okuvvoola erinnya ettukuvu -- bino byonna birifulumizibwa ne bitaddayo emirembe gyonna.

Era alitunaaza okuva mu bakatonda baffe bonna, oba aba zaabu oba ab’ebbumba: okwagala kwaffe okutali kulongoofu, n’okwagala kwaffe okuyitiridde ku ekyo ekiri ekirongoofu mu kyennyini. Ekyo kye twafuula katonda kirimenyebwa ne kituvaako, oba ffe tulimenyebwa ne tukivaako.

Katonda ye ayogera ku ekyo Ye kennyini ky’alikola. Noolwekyo ekigambo kino kinywevu era kya kakafu, era tuyinza n’obuvumu okusuubira ekyo kye kitukakasa. Okunaazibwa mukisa gwa ndagaano, era endagaano etegekeddwa mu bintu byonna era ya kakafu.

Okitobba 31

OMULAMU OKUTUUSA OMULIMU LWE GULIGGWA

"Sijja kufa, wabula nzija kuba mulamu, ndyoke ntegeeze ebyo byonna Mukama by’akoze." Zabbuli 118:17

Buno bukakafu bulungi! Awatali kubuusabuusa bwasinziira ku kisuubizo, ekyawuubaawuubibwa munda mu mutima gw’Omuwandiisi wa Zabbuli, kye yakwata ne yeeyagala. Embeera yange eri ng’eya Dawudi? Nnennyamidde kubanga omulabe anvuma? Waliwo ekibiina ekinnwanyisa, ne batono ku luuyi lwange? Obutakkiriza bunnagira ngalamire ne nfa mu kuggwaamu essuubi -- omuntu awanguddwa, aswazibbwa? Abalabe bange batandika okunsimira entaana?

Kale kiki? Nnyinze okuwuliriza okwama kw’okutya, ne nva mu lutalo, ne ndeka n’essuubi lyonna? Kikafuuwe. Wakyaliwo obulamu mu nze: "Sijja kufa." Amaanyi galidda ne gaggyawo obunafu bwange: "Nzija kuba mulamu." Mukama mulamu, era nange ndiba mulamu. Akamwa kange kalyasamizibwa nate: "Nnaategeeza ebyo byonna Mukama by’akoze." Yee, era ndyogera ku kuzibu okwa kaakano ng’ekyokulabirako ekirala eky’obwesigwa n’okwagala okukola eby’amagero okwa Mukama Katonda wange. Abo abandyagala okumpima olw’essanduuko yange balinde katono; kubanga "Mukama ambonerezza nnyo, naye tandese kufa." Ekitiibwa kibeere eri erinnya lye emirembe gyonna! Ndi omulamu okutuusa omulimu gwange lwe guliggwa. Okutuusa Mukama lw’anaakyagala, tewali ntaana eyinza kunziba.