Omununuzi Wange Mulamu

"OMUNUNUZI WANGE MULAMU"

Bulijjo mbadde njogera n'oyo asoma ku Kristo eyakomererwa, era ye ssuubi ekkulu ery'abalina omusango; naye kya magezi gye tuli okujjukira nti Mukama waffe yazuukira mu bafu era mulamu emirembe gyonna.

Tosabibwa kwesiga Yesu afudde, wabula oyo, newankubadde yafiirira ebibi byaffe, yazuukira olw'okutuweebwa obutuukirivu. Oyinza okugenda eri Yesu kaakati ng'ogenda eri mukwano gwo omulamu era aliwo. Si kujjukira bujjukira, wabula Muntu abeerera ennaku zonna anaawuliriza okusaba kwo n'akuddamu. Aba mulamu ku nsonga y'okutuukiriza omulimu gwe yali yeewaddeyo obulamu bwe. Yeegayiririra aboonoonyi ku mukono ogwa ddyo ogwa Kitaawe, era olw'ensonga eno asobola okulokola ddala abo bonna abajja eri Katonda ng'ayita mu ye. Jjangu ogezese Omulokozi ono omulamu, oba nga tewali we wakikola edda.

Yesu ono omulamu era yagulumizibwa mu kitiibwa n'obuyinza obungi. Kaakati tanakwatibwa nnaku nga "omuntu omuwombeefu mu maaso g'abalabe be," so takola nga "omwana w'omubazzi"; wabula agulumizibbwa waggulu nnyo okusinga obufuzi n'obuyinza n'erinnya lyonna erituumibwa. Kitaawe yamuwa obuyinza bwonna mu ggulu ne ku nsi, era akozesa ekirabo kino ekikulu mu kutuukiriza omulimu gwe ogw'ekisa. Wuliriza Peetero n'abatume abalala kye baawa obujulizi ku ye mu maaso ga kabona asinga obukulu n'olukiiko:

Katonda wa bajjajjaffe yazuukiza Yesu, gwe mwatta nga mumuwanika ku muti. Oyo Katonda yamugulumiza n'omukono gwe ogwa ddyo okuba Omulangira n'Omulokozi, okuwa Isiraeri okwenenya n'okusonyiyibwa kw'ebibi (Ebikolwa 5:30, 31).

Ekitiibwa ekyetoolodde Mukama eyalinnya mu ggulu kisaanidde okuleeta essuubi mu mutima gwa buli mukkiriza. Yesu si muntu wa bwereere—ye "Omulokozi era omukulu." Ye Munununuzi w'abantu eyatikkirwa engule n'atuula ku ntebe ey'obwakabaka. Obuyinza obw'obulamu n'obufu buli mu ye; Kitaawe yateeka abantu bonna wansi w'obufuzi bw'Omwana ng'omutabaganya, alyoke awe obulamu oyo gw'ayagala. Aggulawo, ne watabaawo muntu aggalawo. Ku kigambo kye omwoyo ogusibiddwa emiguwa gy'ekibi n'okusalirwa omusango guyinza okusumululwa mu kaseera buseera. Agolola omuggo ogwa ffeeza, era buli akwata ku gwo aba mulamu.

Kya mugaso gye tuli nti nga ekibi bwe kiba ekiramu, n'omubiri nga mulamu, ne Setaani nga mulamu, bw'atyo ne Yesu mulamu; era kya mugaso nti buli maanyi ago ge biyinza okuba nago okutuzikiriza, Yesu akyalina obuyinza obusingako okutulokola.

Okugulumizibwa kwe kwonna n'obusobozi bwe biri ku lulwaffe. "Yagulumizibwa okuba," era yagulumizibwa "okuwa." Yagulumizibwa okuba Omulangira n'Omulokozi, alyoke awe byonna ebyetaagisa okutuukiriza obulokozi bwa bonna abajja wansi w'obufuzi bwe. Yesu talina kintu ky'atalikozesa mu bulokozi bw'omwonoonyi, so tewali kya ye ky'atalyoleka mu bungi bw'ekisa kye. Ayunga obwakabaka bwe n'obulokozi bwe, ng'ataagala kimu awatali kirala; era ayanjula okugulumizibwa kwe ng'okwateekebwawo okuleetera abantu emikisa, ng'olwo lwe lumuli n'engule y'ekitiibwa kye. Waliwo ekintu ekyandisinze okuyimusa essuubi ly'aboonoonyi abanoonya nga batunula eri Kristo?

Yesu yagumiikiriza okuswazibwa okunene, era bwe kityo ne wabaawo ekifo eky'okugulumizibwa. Olw'okuswazibwa okwo yatuukiriza n'agumiikiriza okwagala kwonna okwa Kitaawe, era bwe kityo n'asasulwa ng'agulumizibwa mu kitiibwa. Akozesa okugulumizibwa okwo ku lw'abantu be. Ka asoma wange ayimuse amaaso ge eri ensozi zino ez'ekitiibwa, obuyambi bwe gye buva. Ka alowooze ku bitiibwa ebikulu eby'Omulangira n'Omulokozi. Si ssuubi kkulu eri abantu nti Omuntu kaakati ali ku ntebe ey'obwakabaka ey'obutonde bwonna? Si kya kitiibwa nti Mukama wa byonna ye Mulokozi w'aboonoonyi? Tulina Mukwano ku lukiiko; weewaawo, Mukwano ali ku ntebe ey'obwakabaka. Ajja kukozesa obuyinza bwe bwonna ku lw'abo abateeka ebyabwe mu mikono gye. Omu ku bawandiisi baffe ab'ennyimba bw'ayimba bulungi nti:

Abeerera ennaku zonna okwegayiririra

Mu maaso ga Kitaawe;

Muwe, ggwe emmeeme yange, ensonga yo agiwoze,

Tobuusabuusa ku kisa kya Kitaawe.

Jjangu, munnange, oteeke ensonga yo n'omusango gwo mu mikono egyo egyafumitibwa, kaakati egigulumizibbwa n'empeta ez'obuyinza n'ekitiibwa eby'obwakabaka. Tewali musango gwali guggwaamu amaanyi ogwaleka mu mukono gw'Omuwolereza ono omukulu.