ምዕራፍ 32 · 4 ደቂቃ ንባብ · 5 ደቂቃ ማዳመጥ
ሁለቱ በሰላም ደረሱ
«እግዚአብሔር የነፍሳትን ራብና ጥማት ሰጥቶኛል፤ ሳይጠግብ ይተወኛልን? በእውነት አይተወኝም።»
ጄምስ ጊልሞር፣ ሞንጎሊያ።
«እንዲህ ባሉ ጠላት ተጽዕኖዎች መካከል አንዲት ነፍስ ወደ ክርስቶስ መምጣቷ ሙሉ በሙሉና በሚያስደንቅ ሁኔታ የመንፈስ ቅዱስ ሥራ በመሆኑ፣ የአንዲቱን ነጻነት በማስገኘት በምንም መጠን መሣሪያ በመሆኔ አንዳንድ ጊዜ ከልክ በላይ ደስ ይለኛል።»
ሮበርት ኖብል፣ ሕንድ።
ከወንዶች ልጆቻችን ሁለቱ በሰላም ደርሰዋል። በድንገት ተለዩን። እንደ ሄዱ ማመን ይቸግረናል። ታናሹ ልዩ ልጃችን ነበር፤ ከወንዶቹ ልጆች መጀመሪያ የመጣው፣ እጅግ ውድ ልጅ። ሁላችንም በአንድነት ባሳለፍነው በመጨረሻው ማታ እንዳየሁት አስበዋለሁ፤ በማዕበል በሚታጠብ ዓለት ላይ ቆሞ፣ ነፋሱ በጠጉሩ፣ ፊቱም በባሕር ፍንጣቂ ርሶ፣ በሁሉም ደስ እያለው። ሌላ ማንም ልጅ ሄዶ በዚያ በሚንተከተክ አረፋ መካከል ለመቆም አልደፈረም፤ እርሱን ግን የአደጋው ቅመም ሳበው። እንዴት ያለ እውነተኛ ልጅ ነበር!
ለክርስቶስ ብሎ ቤቱን እንዲተው የመጣለት ጥሪ ከሁለት ዓመት በፊት በመንደሩ በተደረገ የአደባባይ ስብሰባ ላይ ነበር። ከዚያም ሊታገሠው የሚገባ እጅግ መራራ ኀፍረት ነበር። አባቱና እናቱ ደንግጠውና ተጨንቀው ክርስቶስን በግልጽ በመመስከሩ የመጣውን ውርደት ለመከላከል የሚችሉትን ሁሉ አደረጉ። አንድ ልጅ ብቻ፣ የብዙ ንብረት ወራሽ ነበረ፤ ስለዚህ ነገሩ እጅግ ከባድ ነበር። አባቱ እጅግ ይወደው ነበር፤ ነገር ግን ልጁን ለመግረፍ ልቡን አጠነከረ፤ ሁለት ጊዜም ታስሮ ተገረፈ። ፈጽሞ እንዳልተናወጠ ግን ይናገራሉ፤ ለመቋቋም እጅግ የከበደው የእናቱ እንባ ብቻ ነበር።
በጽኑ የመመስከር ሳምንታት አለፉ፤ ከዚያም በክርስቶስና በቤቱ መካከል ወደ መምረጥ ደረሰ። ክርስቶስን መረጠ፤ አንድ ቀን በማለዳም እርሱን ለመከተል ሁሉን ተወ። ቀላል ነበር ብላችሁ ታስባላችሁን? አፍቃሪ ልጅ ነበረ። የእናቱን ልብ መውጋት ቀላል ሊሆን ይችል ነበርን?
በዚያ ጠዋት ቤተሰቡ ሲነቃ እርሱ ወደ እኛ በመንገድ ላይ ነበር። አባቱ ዘመዶቹን ሰበሰበ፤ በብዙ ሰውም ሆነው ወደ ቤታችን መጡ።
ልጁን በመካከላቸው አድርገው በክብ መሬት ላይ ተቀመጡ፤ ለመኑትም። የዚያችን ቅጽበት ትርታ አሁንም አስታውሳለሁ። ውጥረቱ እጅግ ብርቱ ስለ ነበረ በክፍሉ ውስጥ አንድ የልብ ትርታ ብቻ የሚመታ ይመስል ነበር፤ እርሱ በድፍረት እስኪናገር ድረስ። «አልመለስም፤» አለ።
ሁሉን ነገር ቃል ገቡለት—ቤት፣ መሬቶች፣ ወዲያውኑ የሚሰጠው ርስቱ፣ «የበለጸገ የጌጣጌጥ ጥሎሽ ያላት» ሚስት—አንድ የታሚል ልጅ እጅግ የሚመኘውን ሁሉ አቀረቡለት። እግዚአብሔርንም የማምለክ ነጻነት እንደሚሰጡት ቃል ገቡለት፤ «ብቻ ተመለስና ካስትህን አድን፤ የእናትህንም ልብ አትስበር፤ ቤተሰብህንም አታዋርድ።»
ቀን በቀን መጡ፤ አንዳንድ ጊዜ አንድ በአንድ፣ አንዳንድ ጊዜ በቡድን፤ እናቱ ግን ፈጽሞ አልመጣችም። ልብ በሚነካ ቃል ገለጿት። አትበላም አትተኛምም አሉ፤ ጠጉሯን ፈትታ ተቀምጣ ስለ ልጇ ታለቅሳለች፣ የሞት ሙሾም ታሞሻለች።
በመጨረሻ መምጣታቸውን ተዉ፤ ለረጅም ጊዜ የቀጠለው ጫና ከባድ ነበርና እፎይ አልን፤ እርሱ ፈጽሞ ባይናወጥም ልጁ እንደ ተሰማው አውቀን ነበር። ማንም በአጠገቡ እንደሌለ ባሰበ ጊዜ ልቡን እያፈሰሰ፣ አንዳንድ ጊዜም ስማቸውን እየጠራ እየተንሰቀሰቀ ስለ ወገኖቹ ሲጸልይ እንሰማው ነበር። በድምፁ ያለው ልመና ዓይኖቻችንን እንባ ያሞላ ነበር። ምነው በቤቱ ሆኖ በዚያ ክርስቲያን ሊሆን ቢችል! ነገር ግን በሌሎች ላይ የደረሰውን አውቀን ነበር፤ መልሰን ልንልከውም አልደፈርንም።
ከዚያም ከአንድ ዓመት ገደማ በኋላ ሁላችንም በአንድነት ወደ ውኃው ሄድን፤ እርሱና ሌሎች ሦስት ተጠመቁ። ወደ ውኃው መጀመሪያ የወረደው ታላቁ ልጅ፣ የድል ብርሃን ነበር። የሕይወት ብርሃን ሁለተኛ ነበር። የጥቂት ሳምንታት ብሩህ ሕይወት—እነዚያ በባሕሩ አጠገብ ያሳለፍናቸው የደስታ ቀናት—ከዚያም በዚያው ቅደም ተከተል፣ በዚያው መልእክተኛ ተጠርተው—ፈጣኑ የሕንድ መልእክተኛ፣ ኮሌራ—ሁለቱም ወደ ሌላው ውኃ ወርደው ወደ ማዶ ተሻገሩ።
የሕይወት ብርሃን በጠዋት ደኅና ነበረ፤ በማታ ሞተ። ሕመሙ መጀመሪያ በያዘው ጊዜ ደነገጠ። ከዚያም ተረድቶ በሰላም ተኛ። አሕዛብ ተጋፍተው ገቡ። ሊከለከሉ አልተቻለም። ተኝቶ ሳለ ተሳለቁበት። «ካስትህን በማፍረስህ ዋጋህ ይህ ነው!» አሉ። የኮሌራ ሥቃይ በላዩ ነበረ። ብዙ መናገር አልቻለም፤ ነገር ግን ወደ ላይ እያመለከተ «አታስቸግሩኝ፤ ወደ ኢየሱስ የምሄድበት መንገድ ይህ ነው፤» አለ፤ ከመዝሙሮቻችንም ከአንዱ አዝማች «ኃይሌና ቤዛዬ፣ መጠጊያዬ—ኢየሱስ!» የሚለውን ስንኝ ለመዘመር ሞከረ።
መታመሙ እንደ ታወቀ ወላጆቹ እንዲመጡ ተልኮባቸው ነበር። ፈጥነው መጡ፤ ተስፋ የቆረጠችው ምስኪን እናቱ ወደማይሰሙት አማልክት በታላቅ ድምፅ እየተማጸነች ትጮኽ ነበር። ዳግመኛ ወደ ላይ አመለከተ፤ ያን ጊዜ መናገር ተስኖት ነበር ማለት ይቻላል፤ ነገር ግን «ኢየሱስ» እና «ኑ» ለማለት ሞከረ።
ከዚያም አሕዛብ ቆመው ሲያፌዙ፣ እናቱ ደረቷን እየደቃች ስታለቅስ፣ አባቱም በሐዘኑ ዝም ብሎ ቆሞ ልጁን ሲመለከት፣ ልጁ በጸጥታ አለፈ። መሞቱን እንኳ ማመን አቃታቸው።
ኦ፣ እንዴት እንደምንናፍቀው! ልባችንም ስለ ወገኖቹ ያዝናል፤ ተስፋ እንደሌላቸው ያዝናሉና። እግዚአብሔር ግን ለምን እንደ ወሰደው ያውቃል፤ ሁሉም መልካም እንደ ሆነ እናውቃለን።
ስለ እርሱ ያለው መታሰቢያ ሁሉ መልካም ነው። የመጀመሪያው ብርቱ ጫና ካለፈ በኋላ እንዴት ያለ እውነተኛ ልጅ እንደ ነበረ አወቅን፤ በባሕሩ አጠገብ በነበረው በዚያ ሳምንትም በውስጡ የነበረው ሕይወትና ጨዋታ ሁሉ ወጣ፤ በመዋኘትና በጀልባ በመቅዘፍ እጅግ ተደሰተ፤ ልቡንም ሁሉ ለበዓሉ ሰጠ። ስለ እርሱ ብዙ ተስፋ ነበረን፤ በተስፋና በሕይወት ብርታት የተሞላ ነበርና።
አሁንም ለሁለቱም ሁሉ አልቋል። ያስከፈለውን ሕመም የሚገባው ነበርን? ለመመስከር እንዲህ ያለ አጭር ጊዜ፣ ዋጋ ነበረውን?
እጅግ አጭር እንደ ነበረ እውነት ነው። በመምጣታቸውና በመሄዳቸው መካከል ያለው ትንሽ ጊዜ አብዛኛው እዚህ ለሚሆን ለወደፊት አገልግሎት በመዘጋጀት የተሞላ ነበር። ሆኖም በዚያች ትንሽ ጊዜ ውስጥ ከሁለቱ እያንዳንዳቸው ዋጋው እጅግ ታላቅ ተደርጎ ቢቈጠር ምናልባት ፈጽሞ ሊገኝ የማይችለውን አንድ ሌላ ልጅ አገኙ። አሁን ልትጠይቋቸው ብትችሉ የኢየሱስ አቀባበል ነገሩን ከሚገባው እጅግ በላይ ዋጋ ያለው እንዳደረገው ይነግሯችሁ ነበር ብዬ አስባለሁ።