የተዘጋው በር — ከእግዚአብሔር ጋር ለብቻ

«አንተ ግን ስትጸልይ፥ ወደ እልፍኝህ ግባ መዝጊያህንም ዘግተህ በስውር ላለው አባትህ ጸልይ፤ በስውር የሚያይ አባትህም በግልጥ ይከፍልሃል።» ማቴዎስ 6:6።

ሰው የተፈጠረው ከእግዚአብሔር ጋር ለኅብረት ነው። ለዚህ የተገባ እንዲሆን፣ እግዚአብሔርን ማስተዋልና በእርሱ ደስ መሰኘት፣ ወደ ፈቃዱ መግባትና በክብሩ ሐሤት ማድረግ እንዲችል እግዚአብሔር በራሱ መልክና አምሳል ፈጠረው። እግዚአብሔር በሁሉ ስፍራ የሚገኝና ሁሉን የሚሞላ ስለ ሆነ፣ ሰው የትኛውንም ሥራ ቢሠራ በመካከሉ የማይቋረጥ ኅብረትን እየተደሰተ ሊኖር ይችል ነበር።

ኃጢአት ይህን ኅብረት ዘረፈን።

ከዚህ ኅብረት በቀር የሰውንም ሆነ የእግዚአብሔርን ልብ ሊያረካ የሚችል ምንም ነገር የለም። ክርስቶስ የመጣው ይህን ለመመለስ ነበር፤ የጠፋውን ፍጥረቱን ወደ እግዚአብሔር ለመመለስ፣ ሰውንም ወደ ተፈጠረለት ነገር ሁሉ ለመመለስ። ከእግዚአብሔር ጋር አንድ መሆን በሰማይ እንደ ሆነ በምድርም የብፅዕና ሁሉ ፍጻሜ ነው። ይህም የሚሆነው ብዙ ጊዜ የተሰጠው ተስፋ፦ «አልለቅህም ከቶም አልተውህም» የሚለው ሙሉ ተሞክሮ ሲሆንና እኛም፦ አብ ሁልጊዜ ከእኔ ጋር ነው ማለት ስንችል ነው። ይህ ከእግዚአብሔር ጋር ያለ አንድነት ሁኔታችን ወይም የከበቡን ነገሮች ምንም ቢሆኑ ቀኑን ሁሉ የእኛ እንዲሆን የታሰበ ነው። ነገር ግን የምንደሰትበት መሆኑ በውስጥ እልፍኝ ውስጥ ባለው አንድነት እውነተኛነት ላይ የተመሠረተ ነው። ቀኑን ሁሉ ከእግዚአብሔር ጋር የቅርብና የደስታ ኅብረትን ጠብቆ የማቆየት ኃይል፣ በስውር ጸሎት ሰዓት ያንን ለማረጋገጥ በምንፈልግበት ጽናት ላይ ሙሉ በሙሉ ይመሠረታል። በማለዳ ሰዓት ወይም በጸጥታ ሰዓት ውስጥ ያለው ብቸኛው አስፈላጊ ነገር — ከእግዚአብሔር ጋር ኅብረት ነው። ጌታችን የስውር ጸሎት ውስጣዊ ምስጢር እንደ ሆነ የሚያስተምረን ይህንኑ ነው፦ «መዝጊያህንም ዘግተህ በስውር ላለው አባትህ ጸልይ» ማቴዎስ 6:6።

የመጀመሪያውና ዋናው ነገር በዚያ በስውር የአብ መገኘትና ትኩረት እንዳለህ ማረጋገጥ ነው። እርሱ እንደሚያይህና እንደሚሰማህ እወቅ። ከልመናዎችህ ሁሉ — ምንም አስቸኳይ ቢሆኑ — ይልቅ፣ በትክክል ለመጸለይ ከምታደርገው ትጋትና ጥረት ሁሉ ይልቅ እጅግ የሚበልጠው ይህ አንድ ነገር ነው፦ አባትህ እንደሚያይህ፣ አሁን እንደ ተገናኘኸው፣ ዓይኑ በአንተ ላይ ዓይንህም በእርሱ ላይ ሆኖ አሁን ከእርሱ ጋር እውነተኛ አንድነትን እየተደሰትህ እንደ ሆነ የሚያውቅ የልጅነት ሕያው እርግጠኝነት።

ክርስቲያን ሆይ፣ በውስጥ እልፍኝህ ውስጥ የተጋለጥህለት አስፈሪ አደጋ አለ። ከእግዚአብሔር ጋር ባለው ሕያው ኅብረት ፋንታ — ፍቅርህን፣ ልብህንና ሕይወትህን ለእርሱ በመስጠት፣ ከእርሱም ፍቅሩን፣ ሕይወቱንና መንፈሱን በመቀበል በሚደረገው ሕያው ልውውጥ ፋንታ — ጸሎትንና የመጽሐፍ ቅዱስ ጥናትን የመተካት አደጋ ላይ ነህ።

ፍላጎቶችህና የምትገልጽባቸው ቃላት፣ በትሕትናና በትጋት በእምነትም ለመጸለይ ካለህ ምኞት ጋር፣ የፊቱ ብርሃንና የፍቅሩ ደስታ ወደ አንተ መግባት እስከማይችሉ ድረስ ሊያጠምዱህ ይችላሉ።

የመጽሐፍ ቅዱስ ጥናትህ እጅግ ሊስብህና ደስ የሚያሰኝ ሃይማኖታዊ ስሜትን ሊያነሣሣ ስለሚችል፣ አዎን፣ የእግዚአብሔር ቃል ራሱ በእግዚአብሔር ፋንታ ምትክ ሊሆን ይችላል፤ ነፍስን ወደ እግዚአብሔር ራሱ ከመምራት ይልቅ በሌላ ነገር እንድትጠመድ ስለሚያደርጋት ለኅብረት ትልቁ እንቅፋት ይሆናል። እኛም በማለዳ አምልኳችን በረከቱ ስላልተረጋገጠ፣ የሚኖር ኅብረት ኃይል ሳይኖረን ወደ ዕለቱ ሥራ እንወጣለን። በእልፍኝ ውስጥ ያለው ነገር ሁሉ ለዚህ አንድ ነገር ቢገዛ በብዙዎች ሕይወት ምንኛ ልዩነት ባመጣ ነበር፦ ቀኑን ሁሉ ከእግዚአብሔር ጋር መመላለስ እፈልጋለሁ፤ የማለዳ ሰዓቴ ይህ እንዲሆን አባቴ ከእኔ ጋር፣ እኔም ከእርሱ ጋር የተወሰነ ስምምነት የምናደርግበት ጊዜ ነው። እንዲህ ያለው ግንዛቤ ምንኛ ብርታት ባስገኘ ነበር፦ እግዚአብሔር ኃላፊነቴን ወስዷል፤ እርሱ ራሱ ከእኔ ጋር ይሄዳል፤ ቀኑን ሁሉ በእርሱ ብርታት ፈቃዱን አደርጋለሁ፤ ለሚመጣው ሁሉ ዝግጁ ነኝ! አዎን፣ የስውር ጸሎት አዲስ የመጽናናት፣ የብርሃን ወይም የብርታት ስሜትን መለመን ብቻ ሳይሆን፣ ሕይወትን ለአንድ ቀን ብቻ እንኳ በኃያሉና በታማኙ እግዚአብሔር እርግጠኛና አስተማማኝ ጥበቃ ሥር አሳልፎ መስጠት ቢሆን ኖሮ፣ ምንኛ ክብር ወደ ሕይወት በመጣ ነበር!

«በስውር ላለው አባትህ ጸልይ፤ በስውር የሚያይ አባትህም በግልጥ ይከፍልሃል።» ከአብ ጋር ያለው የስውር ኅብረት በመንፈስና በእውነት በሚጠበቅበት ስፍራ፣ በሰዎች ፊት ያለው ግልጽ ሕይወት ዋጋውን ይሸከማል።

በስውር የሚያይ አብ ኃላፊነቱን ይወስዳል፤ በግልጥም ይከፍላል። ከሰዎች ተለይቶ ከእግዚአብሔር ጋር ለብቻ መሆን፣ በእግዚአብሔር በረከት ኃይል ከሰዎች ጋር በአንድነት ለመኖር እርግጠኛውና ብቸኛው መንገድ ነው።