ራስን መውደድ ለልዑሉ በጎ ነገር ታላቁ እንቅፋት መሆኑ

ክርስቶስ፦

ልጄ ሆይ፥ ስለ ሁሉ ሁሉን ልትሰጥ፣ በምንም መንገድ የራስህ ልትሆን አይገባህም። ራስን መውደድ በዓለም ካለ ከማንኛውም ነገር ይልቅ እንደሚጐዳህ ልታውቅ ይገባሃል። ለአንድ ነገር ባለህ ፍቅርና ዝንባሌ መጠን ያ ነገር አብዝቶ ወይም አሳንሶ ይጣበቅብሃል። ፍቅርህ ንጹሕ፣ ቅንና በሥርዓት የተያዘ ከሆነ ለምንም ነገር ባሪያ አትሆንም። ልታገኘው የማይገባህን አትመኝ። ሊያሰናክልህ ወይም ነጻነትህን ሊዘርፍህ የሚችልን ማንኛውንም ነገር ገንዘብ አታድርግ።

ልትመኘው ወይም ገንዘብ ልታደርገው ከምትችለው ሁሉ ጋር ራስህን በፍጹም ልብህ ለእኔ አሳልፈህ አለመስጠትህ እንግዳ ነገር ነው። ስለ ምን በሞኝ ኀዘን ትበላለህ? ስለ ምንስ በማያስፈልግ ጭንቀት ትደክማለህ? ለፈቃዴ ራስህን ስጥ፤ ምንም ጕዳት አይደርስብህም።

ይህን ወይም ያን ብትፈልግ፣ በዚህ ወይም በዚያ ስፍራ መሆንን፣ የበለጠ ምቾትና ተድላ ማግኘትን ብትመኝ፣ ከቶ አታርፍም ከጭንቀትም ነጻ አትሆንም፤ በሁሉ ነገር አንዳች ጕድለት ይገኛልና፤ በየስፍራውም የሚያበሳጭህ ሰው አይጠፋምና። እንግዲህ ምድራዊ ሀብትን ማግኘትና ማብዛት አይረዳህም፤ እርሱን መናቅና ከልብህ መንቀል ግን ይጠቅምሃል። ይህም ስለ ገንዘብና ስለ ሀብት ብቻ ሳይሆን ስለ ክብር ምኞትና ስለ ከንቱ ውዳሴ ፍላጎትም እውነት እንደ ሆነ አስተውል፤ እነዚህ ሁሉ ከዚህ ዓለም ጋር ያልፋሉና።

የትጋት መንፈስ ከሌለ ስፍራው ብዙም አይጠቅምም፤ ሰላምም ከውጭ ቢፈለግ አይዘልቅም፤ ልብህ እውነተኛ መሠረት ከሌለው፣ ማለትም በእኔ ላይ ካልተመሠረትህ፣ ስፍራህን ልትለውጥ ትችላለህ እንጂ ራስህን አታሻሽልም። አጋጣሚ በተገኘና በተቀበልኸው ጊዜ የሸሸኸውን ነገር፣ እንዲያውም ከእርሱ የከፋውን ታገኛለህና።

ልብን ለማንጻትና ሰማያዊ ጥበብን ለማግኘት የሚቀርብ ጸሎት

አቤቱ፥ በቅዱስ መንፈስህ ጸጋ አበርታኝ። በውስጤ እንድበረታ፣ ልቤንም ከከንቱ ጭንቀትና ከሥጋት ሁሉ ባዶ እንዳደርግ ኃይልን ስጠኝ፤ ይኸውም ውድ ለሆኑም ሆነ ለተናቁ ነገሮች ባሉ ብዙ ምኞቶች እንዳልሳብ ነው። ሁሉን ነገር እንደሚያልፍ፣ ራሴንም ከእነርሱ ጋር ፈጥኜ እንደማልፍ አድርጌ እንድመለከት አድርገኝ፤ ሁሉ ከንቱና ነፋስን እንደ መከተል በሆነበት ከፀሐይ በታች የሚኖር ምንም ነገር የለምና። እንዲህ የሚያስብ ምንኛ ጠቢብ ነው!

ጌታ ሆይ፥ ከሁሉ በላይ አንተን መፈለግንና ማግኘትን፣ ከማንኛውም ነገር ይልቅ በአንተ ደስ መሰኘትንና አንተን መውደድን፣ ሌሎችንም ነገሮች ጥበብህ እንደ ሠራቻቸው እንደ ሆኑ አድርጎ መመልከትን እማር ዘንድ ሰማያዊ ጥበብን ስጠኝ። ሸንጋዩን እንድርቅ፣ የሚቃወመኝንም በትዕግሥት እንድሸከም ማስተዋልን ስጠኝ። በቃላት ድምፅ አለመናወጥ፣ ለክፉውና ለሚሸነግለው አሳሳች ድምፅም ጆሮን አለመስጠት ታላቅ ጥበብ ነውና። ያን ጊዜ በጀመርሁት መንገድ ተማምኜ እሄዳለሁ።